Nta̱m A̱yaata̱m 26

Bulut Tak Ta̱fwat gu a̱zaghyi A̱gwam A̱ga̱riba

1A̱jawa a̱gwam A̱ga̱riba si̱ nyia̱ ma̱ng Bulut, “Á̱ nwuak ang shim a hyia̱ ta̱fwat ang ji.”

A̱jawa Bulut si̱ neap bwak. A̱ si̱ ta̱bat shei mba ta̱fwat ji nang gu byia̱ a̱ni. A̱ si̱ nyia̱,

2“A̱gwam A̱ga̱riba, swuan ang ji la beang! Ku yet nung kyang a̱lyia̱ a̱sai hwa, nang n ngyong a̱zaghyi ang a̱fwun; n tak ma̱ng a̱nwan, a fa̱k ta̱fwat nung ji tazwa a̱hyiak nang a̱yaakwak a̱son A̱yahudawa ba bat nung a̱ni. 3Mat n dyen nang a ngyet a̱gwak lyen a̱mgba̱m taada A̱yahudawa ma̱ng nkyang na nang ba̱ ngya fwuang ji ma̱ng á̱ghyang mba a̱ni. Ma̱ninika, ma̱sa̱kut, nyap fwuo ang hu, a myiai a̱fufwuo a fa̱k á̱lyiat nung na!

4“Ma̱nang a̱cha̱chet A̱yahudawa ba ndyen a̱ni, n ku shya̱ tyiet tazwa swat A̱yahudawa hu neet nang n ni̱ ngyet nggwon mami á̱niet nung ba mi̱ Urusha̱lima. 5Ki̱ ba̱ na hyia̱ a̱tsak a̱lyiat, ba̱ lyen nang n gyet a̱tyo nyiung mami A̱fa̱risawa ba, sot á̱niet ji̱ ba̱ng khwi A̱gwaza nzi̱t hu mi̱ chet a̱ni.

6“A̱wot ma̱ninika, nyi zop nung, mat n tyia̱ fwuo di̱ a̱li̱ka̱uli wu nang A̱gwaza nyia̱ a̱yaatyia̱ khwop nzi̱t ba ndyo a̱ni, a̱ na bai da̱ a̱nu ka cha̱chaat. 7A̱tsak a̱lyiat, a̱li̱ka̱uli wuni wa mbyia̱ nang kwaí swak mi̱ sweang Isi̱rela ji ku mbyia̱ di̱dang ba̱t, ba̱ kwan ba̱ kwok A̱gwaza ntong a̱ta̱mam ma̱ng a̱tyetuk. A̱wot ba̱ si̱ byia̱ tangka̱i tyia̱ fwuo huni cha̱chaat ma̱ng a̱nung. A̱mgba̱m ma̱ng a̱nia, a̱gwam, swuan ang ji labeang, A̱yahudawa ba bat nung a̱hyiak mat tyia̱ fwuo huni! 8Yihwa mbyia̱ nang nyin A̱yahudawa ndak nwuak a̱chuchuk, nyia̱ A̱gwaza na ta̱ngam á̱niet ba̱ ka̱n kwi a̱ni ma̱ng swuan?

9“Gbangbang nung meang, n ku nwuak a̱chuchuk, n si̱ ndi ku myim n nyia̱ kuzang kyang ku na nyia̱ na̱nvan ma̱ng a̱lyoot Yesu a̱tyu Na̱za̱ra̱t a̱ni. 10A̱tsak a̱lyiat, kyang hu n ku nyia̱ ma̱ a̱keang Urusha̱lima ka a̱ni, huhwa a̱hwa: N ku nshya̱ shim da̱ a̱vwuo a̱cha̱chet a̱yaapris, n si̱ ntyia̱ á̱za̱za̱rak á̱niet khwi Yesu#26:10 Lyuut cha̱chaat: “Á̱za̱za̱rak á̱niet A̱gwaza.” ma̱ a̱di̱di̱t mi̱ jaru. A̱wot jen ji nang á̱ ku nhyaai á̱ghyang ma̱ mba a̱ni, n ku nshim. N si̱ ndi̱n a̱ma á̱ hyaai mbaa. 11Jen ma̱ a̱di̱di̱t, n ku nyia̱ mba a̱ka̱kpa̱t ma̱ á̱tutu a̱tung A̱yahudawa ba. A̱wot n si̱ nkwan n tyia̱ mba ba̱ nyia̱ Yesu lihyat, ba̱ fwuo lyen gu. N ku ndak li mba, n si̱ nyia̱ mba a̱ka̱kpa̱t ba̱t. N si̱ nwuai fi̱n mba ma̱ a̱ka̱keang bibyin nta.

Bulut bu Kwok Si̱sak nang gu Nnwuo Khwi Yesu a̱ni

12“A̱ghyang a̱tuk ta̱m huni hwa nang n ku naat nyia̱ hu ma̱ a̱keang Da̱maskut ka, nang n ku nshya̱ li̱n a̱ma ma̱ng shim da̱ a̱vwuo pris ba̱ yet a̱yaakwak a̱son ba a̱ni. 13A̱gwam, swuan ang ji labeang, nang n shya̱ di̱n vak naat Da̱maskut a̱ni, ma̱ a̱ka̱wa̱tyia̱ a̱ta̱mam, sai si̱ kin neet Ma A̱gwaza tswazwa! Ku si̱ sai ma̱ kyenkyai a̱nkyai a̱ swak a̱nu mam; ku si̱ sai da̱ nung ma̱ng á̱kpa̱ndang a̱chyet nung ba! 14A̱mgba̱m nzi̱t, zi̱ si̱ shyot kwa̱i a̱byin. A̱wot n si̱ nfa̱k a̱nwuat nang ka̱ nyia̱ ma̱ng a̱nung da̱ a̱lyem A̱yahudawa ka#26:14a Lyuut cha̱chaat: A̱lyem Ibriniyawa ka. Ku: A̱lyem A̱ra̱mik., nyia̱, ‘Sha̱wulu, Sha̱wulu, yihwa mbyia̱ nang a nya̱shuk nung a̱nia? Ku na yet ang a̱buk kyang wa, a nyia̱ na̱nvan ma̱ng a̱lyiat nung na!#26:14b Lyuut cha̱chaat: “Ku byia̱ ang a̱khwu ka a noot á̱jojwaat shán chok.”’

15“A̱wot n si̱ ndyip, nyia̱, ‘A̱tyoli, nwan wa yet a̱nyan?’

“A̱wot A̱tyoli si̱ nwuak nung shim nyia̱, ‘Nung gwa ngyet Yesu, a̱tyu nang a ya̱shuk a̱ni. 16Ma̱ninika, doot yong ka̱tsak! Mat n tyai a̱pyia̱ nung da̱ a̱vwuo ang, da̱nian n ka ntyia̱ ang a yet a̱khwo ma̱ng a̱tyu shei a̱lyiat nung. A na tak ma̱ng á̱niet swanta ba nkyang nang a ka̱n di, ma̱ng kyang nang n na ntak ang á̱zanson a̱ni.

17“ ‘A̱wot n na nsan ang mbwak á̱niet ang ba mbeang Nnwap na̱ nwai yet A̱yahudawa a̱ni. A̱tsak a̱lyiat, n na nta̱m ang da̱ a̱vwuo Nnwap na̱ nwai yet A̱yahudawa a̱ni. 18Nwan wa na tat ba á̱ghyi ba, da̱nian ba̱ ka ghwut mi̱ ndyin, ba̱ nat da̱ a̱vwuo sai; a̱wot a tyia̱ ba̱ ghwut mi̱ ntyok A̱ta̱nyeang#26:18 Lyuut cha̱chaat: Sha̱tan. ba̱ nwuo Tyok A̱gwaza hu. A̱jawa A̱gwaza na chi a̱ka̱tuk nyia̱ mba wu. A̱wot ba̱ na shya̱ a̱vwuo nswat dundung ma̱ng á̱niet ba̱ yet á̱si̱ A̱gwaza a̱ni; bibya á̱ khap á̱ sak da̱nian ba̱ ka nwuak fwuo da̱ nung.’

19“Mat a̱nia, A̱gwam A̱ga̱riba, swuan ang ji labeang, n ku nkhwi a̱ma̱bwoi a̱wa za̱m, a̱ ku neet Ma A̱gwaza tswazwa ka a̱ni. 20N si̱ ntsa shei á̱lyiat A̱gwaza na da̱ a̱vwuo á̱niet Da̱maskut, Urusha̱lima, a̱mgba̱m a̱byin Yahudiya ka, ma̱ng Nnwap na̱ nwai yet A̱yahudawa a̱ni meang. N si̱ ntak ma̱ng a̱mba nang ku ngyet ta hwa ba̱ ghwon a̱ka̱tuk nyia̱ mba wu, a̱wot ba̱ nwuo khwi A̱gwaza; ba̱ nyia̱ a̱tan nta̱m na̱ tak nang ba̱ nghwon a̱ka̱tuk nyia̱ mba wu mami a̱chuchuk a̱ni. 21Mat shei a̱lyiat huni hwa A̱yahudawa á̱ghyang ku nta̱bat nung A̱mali Nwuat Za̱nang A̱gwaza ka. A̱wot ba̱ si̱ kwan ba̱ hyat nung!

22“A̱mgba̱m ma̱ng a̱nia, A̱gwaza si̱ chok nung ba̱ng ba̱ tat a̱fwun, mat n ka nwuak sheda a̱zaghyi konyan, neet da̱ a̱chyuang wu si̱ nat a̱cha̱chet ba. N tyiet á̱lyiat A̱gwaza á̱ghyang nia ma̱ zan bah, si̱ mi̱ tyiet nang a̱yaata̱m a̱kwonu A̱gwaza, mbeang Musa, ku nyia̱ ku na bai da̱ a̱nu ka a̱ni. 23Ba̱ ku tak nyia̱; ku yet ta hwa Kristi a̱ swuo a̱bung a̱ khwu. A̱wot nggu wa a̱ tsa doot ma̱ng swuan ma̱ a̱niet ba̱ ka̱n kwi a̱ni. A̱wot di̱n vak huni hwa, gu na ntak sai A̱gwaza hu da̱ a̱vwuo A̱yahudawa mbeang Nnwap na̱ nwai yet A̱yahudawa a̱ni.”

Bulut Tak ma̱ng A̱gwam A̱ga̱riba gu Nwuak Fwuo di̱ Yesu

24Mi̱ di̱ yong a̱hwa, gwomna Festut si̱ kam Bulut nyia̱, “Bulut, a tyong jhyiip! A̱di̱di̱t fang ta̱ka̱da ang wu tyia̱ ang tyong jhyiip!”

25A̱wot Bulut si̱ nwuak gu shim nyia̱, “Gwomna Festut, swuan ang ji labeang! N tyong jhyiip ja bah. A̱lyiat na n dyiat a̱ni, a̱tsak a̱lyiat wa n dyiat ma̱ng fwuo nung nyiung. 26A̱wot A̱gwam A̱ga̱riba lyen á̱lyiat nani. A̱wot n dyiat ma̱ng a̱nggu ma̱ng gbang a̱lyia̱, mat n nwuak a̱chuchuk a̱ chyi nkyang nani bah, mat á̱ ku nyia̱ na mi̱n dyin hwa bah.

27“A̱gwam A̱ga̱riba, a nwuak a̱chuchuk da̱ a̱yaata̱m a̱kwonu A̱gwaza baa? N dyen, a nwuak a̱chuchuk da̱ mba za̱m.”

28A̱jawa nang A̱gwam A̱ga̱riba nyia̱ ma̱ng Bulut, “A fa a na mwang nung n tyia̱ a̱tyu khwi Yesu ma a̱nggang a?”

29Bulut si̱ nwuak gu shim nyia̱, “Ke ma a̱nggang wa oo, ke shonshyon wa oo, n naai A̱gwaza; nwan ma̱ng a̱mgba̱m á̱niet ba̱ shya̱ a̱ji a̱fwun a̱ni, n chat nyi yet á̱niet khwi Yesu nang nung a̱ni, kang ma̱ng la̱p nang á̱ la̱p nung ma̱ng a̱nyanyang wuni a̱ni!”

30A̱jawa A̱gwam A̱ga̱riba, mbeang gwomna Festut, Ba̱rniki, ma̱ng a̱mgba̱m á̱kum á̱niet ka si̱ doot, ba̱ si̱ nkat. 31Nang ba̱ nghwon tutu shi̱ri̱ya hu a̱ni, ba̱ si̱ lyiat ma̱ng á̱ghyang mba nyia̱, “A̱tyu wuni nyia̱ kyang ku maai a̱khwu, ku á̱ tyia̱ nggu mi̱ jaru a̱ni bah!”

32A̱wot a̱gwam A̱ga̱riba si̱ nyia̱ ma̱ng gwomna Festut, “Ka̱ Bulut wa ka̱n chat á̱ swak ma̱ng a̱lyiat nani á̱ nat ndyo da̱ a̱vwuo Kaisar a̱gwam shan bah; si̱ á̱ na kai nggu á̱ ghwon!”

Currently Selected:

Nta̱m A̱yaata̱m 26: TyapNT

Highlight

Copy