Nta̱m A̱yaata̱m 22

1Bulut si̱ nyia̱ ma̱ng a̱mba, “A̱yaatyia̱ ma̱ng á̱na̱nyiuk nung nang n chat a̱ni, nyi myiai a̱fufwuo nyi fa̱k si̱ nung ta̱fwat ji!”

2Nang A̱yahudawa ba nfa̱k nang Bulut ndyiat ma̱ng a̱mba da̱ a̱lyem mba ka#22:2 Wa̱i a̱lyiat: A̱lyem mba ka. Ku fa A̱lyem Ibriniyawa, ku A̱lyem A̱ra̱mik. a̱ni, ba̱ si̱ mbeang tyia̱ nywang hu.

3A̱jawa Bulut si̱ nyia̱, “Nung n gyet a̱tyu A̱yahudawa wa. Á̱ byin nung ma̱ a̱keang Tasut mi̱ fam a̱byin Kilikiya. A̱ja wa nang n shi. Ga̱maliyal wa si̱ tyiet nung a̱ji mi̱ Urusha̱lima. A̱ si̱ ta̱bam, a̱ si̱ tyiet nung shansham ma̱nang doká ma̱ng taada A̱yahudawa ji nshim á̱ nyia̱ a̱ni. N si̱ nkwan ba̱t n nwuak A̱gwaza shi mi̱ kuzang kyang nang n nyia̱ a̱ni, ma̱nang a̱mgba̱m nyin nnyia̱ a̱fwun a̱ni.

4“A̱wot n ku nya̱shuk susot á̱niet khwi Yesu jini nang á̱ ngyei ‘Vak hu’ a̱ni#22:4 Lyuut cha̱chaat: “Vak huni.”. N si̱ nhyaai á̱ghyang. N si̱ nya̱baat á̱tyok ma̱ng á̱nyiuk tyei mi̱ jaru. 5A̱gba̱ndang pris wu ma̱ng a̱mgba̱m a̱cha̱chet a̱yaakwak a̱son A̱yahudawa ba, na nwuak sheda tazwa nung da̱ a̱lyiat nani. Mat n ku nsaai wusiká da̱ a̱vwuo mba. N si̱ nat ndyo da̱ a̱vwuo á̱na̱nyiuk nzi̱t ba, ba̱ yet A̱yahudawa ma̱ a̱keang Da̱maskut ka a̱ni; ba̱ ku shim nung ndyo n ya̱baat á̱niet khwi Yesu ba a̱ja, n vwuoi mba ma̱ng a̱nyanyang, n bai ma̱ng a̱mba Urusha̱lima, á̱ ka nyiak baa.

Bulut Kwok Si̱sak nang gu Nnwuo Khwi Yesu a̱ni

6“Nang n shya̱ di̱n vak kpa̱mkpaan ma̱ng Da̱maskut, a̱tyia̱ka̱u a̱ta̱mam, a̱jawa a̱tsatsak a̱kyenkyai sai si̱ kin neet tswazwa, a̱ ba̱ tyia̱ ma̱ mya̱ra̱m a̱ tyong nung a̱ kaat! 7N si̱ nshot kwa a̱byin, huhwa n si̱ kin fa̱k a̱nwuat ka̱ nyia̱ ma̱ng a̱nung, ‘Sha̱wulu, Sha̱wulu, yihwa mbyia̱ nang a nya̱shuk nung a̱nia?’

8“N si̱ ndyip a̱nyuu, nyia̱, ‘A̱tyoli, nwan wa yet a̱nyan?!’

“A̱wot a̱nwuat ka si̱ nyia̱ ma̱ng a̱nung, ‘Nung gwa ngyet Yesu a̱tyu Na̱za̱ra̱t, nang a ya̱shuk a̱ni.’ 9Á̱niet ba ba̱ ku chong ndung ma̱ng nung a̱ni, ba̱ si̱ li sai a̱vwuo hu. A̱wot da̱ mba, ba̱ fi̱k a̱nwuat a̱tyu a̱ lyiat ma̱ng a̱nung a̱ni bah.

10“N si̱ bu ndyip gu, nyia̱, ‘A̱tyoli, mi̱ yihwa n na nyia̱?’ A̱jawa A̱tyoli Yesu si̱ nyia̱ ma̱ng a̱nung,

“Doot, a nwuo Da̱maskut, ‘A̱ja wa nang á̱ na nhyia̱ ma̱ng a̱nwan a̱mgba̱m kuzang ta̱m nang á̱ chat a nyia̱ a̱ni.’

11“N si̱ nkwa a̱fi̱fan mat chet a̱kyenkyai sai hu. A̱wot á̱kpa̱ndang a̱chyet nung bibya si̱ kwak nung di̱n shan á̱ nwuo ndyo ma̱ a̱keang Da̱maskut ka. 12A̱yin ku shya̱ a̱ja, á̱ si̱ ngyei nggu Ananiya. A̱ si̱ yet a̱tyu khwi A̱gwaza wa. A̱ si̱ khwi doká A̱yahudawa ji nang á̱ nwuak zi̱t a̱ni. A̱wot a̱mgba̱m A̱yahudawa ba ba̱ ku shya̱ Da̱maskut a̱ni, ba̱ si̱ nwuat gu shi. 13A̱ si̱ bai a̱ ba̱ yong kpa̱mkpaan ma̱ng a̱nung, a̱ si̱ nyia̱, ‘Sha̱wulu, a̱na̱nyiuk nung, bu shya̱ nwuan a̱vwuo!’ A̱wot mi̱ di̱ yong a̱hwa, á̱ghyi nung ba si̱ khwuk, n si̱ ndi ngguu!

14“A̱jawa Ananiya si̱ nyia̱ ma̱ng a̱nung, ‘A̱gwaza a̱yaatyia̱ khwop nzi̱t wu, nggu wa khai ang, da̱nian a ka lyen kyang nang gu chat a̱ni, a̱wot a li A̱tsotswat A̱yin a̱wa, a bu fa̱k a̱lyiat a̱bwonu nggu na. 15Mat a̱nia, a na yet á̱ghyi nggu, da̱ a̱vwuo a̱mgba̱m á̱niet ba, a bu tak konyan kyang hu nang a li, a si̱ bu fa̱k a̱ni.

16“ ‘A̱wot ma̱ninika, yihwa nang a fwuong? Doot, á̱ nyia̱ ang ba̱ptisman. A yei a̱lyoot A̱tyoli Yesu, gu kwi a̱ka̱tuk nyia̱ ang wu.’

Bulut Shei A̱sham Nkhang da̱ a̱vwuo Nnwap na̱ nwai yet A̱yahudawa a̱ni

17“Nang n bwuok nat Urusha̱lima a̱ni, n si̱ nshya̱ di̱ naai A̱gwaza A̱mali Nwuat Za̱nang A̱gwaza ka. N si̱ ndi a̱ma̱bwoi! 18Ma̱ a̱ma̱bwoi na, A̱tyoli Yesu si̱ nyia̱ ma̱ng a̱nung, ‘Ghan a̱nggang! A ghwon Urusha̱lima hu! Mat á̱niet ba̱ shya̱ a̱ji a̱ni, ba̱ na nwuak a̱chuchuk da̱ á̱lyiat nang a shei tazwa nung a̱ni bah.’

19“N si̱ nwuak A̱tyoli Yesu shim nyia̱, ‘A̱tyoli, mba A̱yahudawa ba ba̱ lyen za̱m nang n ku nwuai ma̱ á̱tutu a̱tung mba ba, n si̱ nya̱baat á̱niet khwi ang ba ntyei mi̱ jaru. A̱wot n si̱ ntsot á̱si̱ ba ba̱ nwuak fwuo da̱ nwan a̱ni. 20A̱wot jen nang á̱ ku nhyat Itifanut a̱tyu shei a̱lyiat ang wu a̱ni, nung ma̱ a̱pyia̱ nung n ku nshim mi̱ fwuo nyiung! Nung gwa si̱ nchok a̱yaatoot á̱niet ba ba̱ mang nggu mi̱ nfang na á̱ hyat a̱ni!’

21“A̱mgba̱m ma̱ng a̱nia, A̱gwaza si̱ nyia̱ ma̱ng a̱nung, ‘Nat, mat n na ta̱m ang ma̱ gbang da̱ a̱vwuo Nnwap na̱ nwai yet A̱yahudawa a̱ni!’ ”

22Á̱kpa á̱niet ka ba̱ myiai a̱fufwuo á̱ fwuong á̱lyiat Bulut na a̱ni. A̱wot nang ba̱ nfa̱k swáng a̱lyiat “Nnwap na̱ nwai yet A̱yahudawa a̱ni”, ba̱ si̱ kin nwuo khwot a̱gugwong mi̱ chet nyia̱, “Á̱ nkat ma̱ng a̱nggu! A̱ myim á̱ ghwon gu a̱chet bah!” 23Ba̱ si̱ ya a̱son mi̱ khwot a̱gugwong wu, á̱ tsa á̱ bu nsam a̱yaatoot mba ba. A̱wot ba̱ si̱ wop mbwuk tswazwa!

Bulut Tyai nang gu ngyet Nggwon A̱byin A̱romawa

24A̱gba̱ndang a̱kwak a̱son á̱niet nzwang A̱romawa wu si̱ nwuo ma̱ng Bulut mami. A̱ si̱ tyia̱ á̱niet nzwang ba si̱ tsot Bulut ma̱ng a̱ya̱u a̱ byia̱ pyipyia̱ ntswam a̱ni, mat Bulut a̱ ka tak ma̱ng a̱mba kyang hu ku mbyia̱ nang á̱kpa á̱niet ka nkhwot a̱gugwong wu, á̱ tsa á̱ ntsot gu a̱ni.

25Nang á̱niet nzwang ba nda̱p Bulut ba̱ ka tsot gu a̱ni, a̱jawa gu nyia̱ ma̱ng a̱kwak a̱son á̱niet nzwang a̱ghyang a̱ yong a̱ja a̱ni, “Doká A̱romawa ji shim nyin ndyo nyi tsot nggwon a̱byin A̱romawa; da̱ nyin, nyi ka̱n zop ka nyi si̱ shya̱ nka ma̱ng a̱bun a?”

26Nang a̱kwak a̱son á̱niet nzwang A̱romawa wu nfa̱k a̱nia a̱ni, a̱ si̱ nat da̱ a̱vwuo a̱gba̱ndang a̱kwak a̱son mba wu. A̱ si̱si̱ lyip gu nyia̱, “Yihwa nang a nyia̱ a̱tyu wuni ndyo? A̱ yet nggwon a̱byin A̱romawa kya!”

27A̱jawa a̱gba̱ndang a̱kwak a̱son á̱niet nzwang A̱romawa wu, si̱ nat da̱ a̱vwuo Bulut. A̱ si̱si̱ lyip gu, nyia̱, “Tak ma̱ng a̱nung a̱tsak a̱lyiat; a yet nggwon a̱byin A̱romawa kyaa?”

Bulut si̱ nwuak gu shim nyia̱, “Ii, a̱nia wa za̱m!”

28A̱gba̱ndang a̱kwak a̱son á̱niet nzwang A̱romawa wu si̱ nyia̱, “Nung meang, n gyet nggwon a̱byin A̱romawa kya, mat n ku san yet nggwon a̱byin hu ma̱ng kurum gba̱mgbam.”

A̱jawa Bulut si̱ nwuak gu shim nyia̱, “A̱wot nung, á̱ byin nung dyo wa!”

29Mat a̱nia, á̱niet nzwang ba ba̱ ku chat zop Bulut a̱ni, si̱ bwuok lilyim ma a̱nggang! A̱wot a̱gba̱ndang a̱kwak a̱son á̱niet nzwang A̱romawa wu si̱ fa̱k a̱wun, mat a̱ ka̱n tyia̱ á̱niet nzwang ba si̱ la̱p Bulut, ba̱ si̱ tsot gu.

Bulut a̱zaghyi A̱gba̱ndang A̱tung Sot A̱cha̱chet A̱yahudawa

30Da̱ a̱tsotson tat ka, a̱gba̱ndang a̱kwak a̱son á̱niet nzwang wu si̱ chat a̱ zop a̱ ka lyen chi̱k kyang hu ku mbyia̱ nang A̱yahudawa ba mbat Bulut a̱hyiak na a̱ni. Huhwa a̱ si̱ yorong a̱cha̱chet a̱yaapris, mbeang a̱mgba̱m á̱niet ba ba̱ shya̱ ma̱ sot a̱cha̱chet A̱yahudawa ji a̱ni, ba̱ si̱ nyia̱ a̱gba̱ndang a̱tung. A̱ si̱ tyia̱ á̱niet nzwang ba si̱ byii̱k Bulut a̱nyanyang wu. A̱wot á̱ bai ma̱ng Bulut a̱zaghyi mba.

Currently Selected:

Nta̱m A̱yaata̱m 22: TyapNT

Highlight

Copy