2 A̱ta̱solonikawa 2
2
Á̱ na Tyai A̱gwam Tyei Zat kpa̱sai
1Á̱niet khwi Yesu ba nang n chat a̱ni, da̱ a̱lyiat bwuok bai A̱tyoli Yesu Kristi nzi̱t na, ma̱ng si̱sak ji á̱ bye ntung nzi̱t da̱ a̱vwuo nggu ka a̱ni, zi̱ naai nyin; 2nyi yok shim a̱yin a̱ kyiai nfwuo nyin na nyi tyia̱ ma̱ tai ma a̱nggang, nyia̱ a̱tuk ka nang A̱tyoli Yesu na mbwuok a̱ bai a̱ni, nyia̱ ku wa ka̱n bai ku si̱ swak. Nyi yok nwuak a̱chuchuk da̱ a̱lyiat a̱nia bah, ku nang a̱nyuu nyia̱ a̱ shei a̱lyiat A̱gwaza á̱zanson nang A̱za̱za̱rak Ntswa A̱gwaza wa tyia̱ gu ndyo a̱ni; ku a̱nyuu a̱ nyia̱ á̱ tyai gu ta̱m ji kpa̱sai; ku a̱nyuu a̱ ma nyia̱ á̱ lyuut mi̱ wusika ja neet da̱ a̱vwuo nzi̱t. 3Nyi yok shim a̱yin a̱ laai nyin di̱ kuzang vak bah.
Mat mam a̱hwa na bai bah, si̱ nang jen a̱chi̱nchi̱ri̱ng á̱niet swanta ji bai, a̱gwam tyei zat a̱wa a̱ swan a̱ni, á̱ sii tyai gu kpa̱sai. A̱gwam wuni wa ni̱ chong ma̱ng a̱khwu ka. 4Nggu wa na yet a̱tyu lak li a̱mgba̱m kyang ku yet si̱ A̱gwaza a̱ni. A̱ si̱ bu nyia̱ na̱nvan ma̱ng kuzang kyang nang á̱ ni̱ kwok ntong hu a̱ni. A̱ na nwuat a̱pyia̱ nggu shi. A̱ na swan mami A̱li Nwuat Za̱nang A̱gwaza, a̱ tak nang nggu wa ngyet A̱gwaza wu.
5Nyi bwung wa kee? N ku nhyia̱ ma̱ng a̱nyin a̱lyiat nani nang zi̱ shya̱ dundung ma̱ng a̱nyin. 6A̱wot nyi lyen nang a̱yin nshya̱ a̱ vwuong a̱gwam tyei zat wu bai hu ma̱nini a̱ni, da̱nian á̱ ka tyai bai nggu hu kpa̱sai da̱ cha̱chaat njen nang A̱gwaza sak a̱ni. 7Tyok a̱chi̱nchi̱ri̱ng swanta a̱hwa ka̱n nwuo nyia̱ ta̱m da̱ bang. A̱wot nggu a̱tyu nvwuong a̱chi̱nchi̱ri̱ng swanta wu na ya a̱son ma̱ng nvwuong hu, si̱ nat jen nang A̱gwaza bye nti̱n nggu a̱ni.
8Jen a̱ja ja nang á̱ na ntyai a̱gwam tyei zat a̱wa kpa̱sai, a̱tyu nang A̱tyoli Yesu bye hyat gu ma̱ng swuan a̱bwonu nggu ji. A̱wot a̱ bu tyak ma̱ng a̱nggu ma̱ng a̱gba̱ndang a̱kyenkyai shi bwuok nggu wu di̱ ngaan njen wu a̱ni. 9Nang a̱tyu tyei zat a̱wa bye mbai a̱ni, a̱ bye bai ma̱ng chet a̱ neet ndyo da̱ a̱vwuo A̱ta̱nyeang#2:9 Lyuut cha̱chaat: Sha̱tan.. A̱ nyia̱ a̱ri̱bi̱di, nkyang a̱ga̱de, ma̱ng a̱lama ma̱ a̱di̱di̱t ku li á ngyei na̱ neet da̱ a̱vwuo A̱gwaza kya. A̱wot na̱ yet si̱ bwoi a̱ka̱laa nia. 10A̱ na laai á̱niet ba̱ shya̱ di̱n vak a̱khwu a̱ni, di̱ kuzang tangka̱i a̱ka̱tuk nvak, mat ba̱ lak chat san a̱tsatsak a̱lyiat wu, nang ba̱ na nshya̱ swuan sang sangba̱p a̱ni.
11Mat a̱nia, A̱gwaza si̱ tyia̱ á̱ si̱ laai mba ba̱t á̱ mbeang, da̱nian ba̱ ka nwuak a̱chuchuk di̱ a̱mgba̱m bwoi a̱ka̱laa a̱nia. 12A̱wot a̱ ka faat shi̱ri̱ya da̱ á̱niet ba̱ fwuong nyinyang nyia̱ a̱ka̱tuk, da̱ a̱kwonu ba̱ na nnwuak a̱chuchuk da̱ a̱tsak a̱lyiat wu a̱ni.
Yok Á̱niet Khwi ba̱ Yong mi̱ Chet di̱ Tyiet ba̱ Shya̱ a̱ni
13Á̱niet khwi Yesu ba nang n chat a̱ni, ku yet ta hwa zi̱ gwai A̱gwaza da̱nian nyin kuzang jen. Zi̱ gwai nang A̱gwaza nchat nyin, a̱wot a̱ ku khai nyin, nyin bya nyi tsa shya̱ swuan sang sangba̱p ji. Mat A̱za̱za̱rak Ntswa ja̱u nyin nyi ka yet á̱za̱za̱rak á̱niet, mat nwuak a̱chuchuk nyin hu da̱ a̱tsatsak a̱lyiat wu. 14A̱ si̱ bu yorong nyin nyi shya̱ swuan sang sangba̱p nang nyi ku nfa̱k A̱sham Nkhang ka nang zi̱ ku tak ma̱ng a̱nyin a̱ni, da̱nian nyi ka shya̱ nwuo ma̱ a̱kyenkyai shi Yesu Kristi A̱tyoli nzi̱t wu.
15Mat a̱nia, á̱na̱nyiuk nzi̱t ba mi̱ khwi Yesu nang zi̱ chat a̱ni, zi̱ chat nyi yong mi̱ chet. Nyi ya a̱son mi̱ khwi tyiet nang zi̱ ku tyiet nyin gi̱ngi̱ng a̱ni; si̱ zi̱ ku lyiat ma̱ng a̱nu, ma̱ng si̱ zi̱ bu lyuut nyin ndyo mi̱ wusika a̱ni.
16Ma̱ninika, yok A̱tyoli nzi̱t, Yesu Kristi ma̱ a̱pyia̱ nggu, ma̱ng A̱gwaza a̱ yet A̱tyia̱ nzi̱t wu a̱ni, a̱ chat zi̱t a̱wot mat shok nggu ji, a̱ si̱ tyei nzi̱t gba̱gbak ku nwai tyiai a̱ni, a̱wot a̱ si̱ tyia̱ nzi̱t zi̱ ntyia̱ fwuo da̱ nggu; 17yok gu tyia̱ nyin gba̱gbak, gu bu nang nyin chet nyi nyia̱ kuzang a̱tan nta̱m, nyi bu lyiat a̱tan a̱lyiat.
Currently Selected:
2 A̱ta̱solonikawa 2: TyapNT
Highlight
Share
Compare
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
