2 A̱korontiyawa 11

Bulut Lyiat tazwa A̱yaata̱m Bwoi A̱ka̱laa

1N ba̱ng fwuo nyi na nyap fwuo ma̱ng a̱lyiat nang á̱ kyiak na̱ yet ki̱ngkang a̱ni. Ma̱sa̱kut, nyi shyim nfwuo na! 2N kwi swam da̱ nyin ma̱nang A̱gwaza ma̱ a̱pyia̱ nggu nkwi swam da̱ nyin a̱ni. N nwuan nyin nang fi̱ng nggwon neam ka̱ ka̱n nwai lyen a̱tyok a̱ni, ku li nang n da̱p nyin a̱li̱ka̱uli ma̱ng a̱tyok a̱nyiung nang nyi na nyeang a̱ni; nggu wa yet Kristi ma̱nyin nggu. 3A̱mgba̱m ma̱ng a̱nia, n fwuong a̱wun, ki̱ di̱ A̱ta̱nyeang ka ka̱ du laai nyin, nyi teap di̱ yet a̱za̱za̱rak ma̱ng nwuak á̱pyia̱ nyin hu di̱ Kristi; ma̱nang zwak ji ku ndaai A̱wa mat mumwang nji hu a̱ni.

4Nyi ni̱ san kuzang tangka̱i tyiet nang ba̱ hyia̱ ma̱ng a̱nyin a̱ni mbwak feang. Nyi ni̱ nyia̱ a̱nia, ku nang ba̱ tyiet nyin tangka̱i Yesu a̱ghyang a̱ vwuon ma̱ zan ma̱ng a̱si̱ nang zi̱ ka̱n shei nyin a̱ni; ku nang ba̱ shei nyin tangka̱i A̱za̱za̱rak Ntswa a̱ghyang a̱ vwuon ma̱ng a̱si̱ nang nyi ka̱n san a̱ni; ku nang ba̱ shei nyin A̱sham Nkhang a̱ghyang ka̱ vwuon ma̱ng a̱si̱ nyi nwuak a̱chuchuk da̱ nka a̱ni!

5A̱wot n kyiak a̱pyia̱ nung cha̱chaat ma̱ng á̱niet nang nyi ngyei “Á̱tsatsak a̱yaata̱m Yesu” ba a̱ni. Bibya tyiet nyin a̱ka̱laa a̱nia. 6Ku nang nyi kyiak nung a̱tyu tak a̱lyiat tí̱tak ma̱ á̱kpa á̱niet a̱ni bah. A̱mgba̱m ma̱ng a̱nia, n byia̱ mumwang mameang. Zi̱ ku tyai nyin a̱lyiat nani kpa̱sai di̱ kuzang vak ku myim a̱ni.

7Nyi kyiak n ku mbwuo a̱bun wa nang n ku nkyiak a̱pyia̱ nung kyang a̱ni baa? Kee nyi kyiak n ku mbwuo a̱bun wa, nang n si̱ nwuak nyin shi di̱ shei nyin A̱sham Nkhang A̱gwaza ka di̱ mi̱n san zang da̱ a̱vwuo nyin a? 8Ka̱ a̱nia wa, ku li nang n ku ntsaai susot á̱niet khwi jhyáng ja, nang ba̱ ku nteang nung zang ta̱m, da̱nian n ka nyia̱ nyin ta̱m di̱ mi̱n tan a̱ni.

9A̱wot di̱n jen nang n ku nshya̱ dundung ma̱ng a̱nyin a̱ni, n si̱ mbyia̱ kurum ku maai nung san kyayak a̱ni bah. Da̱ nung, n gyet nyin kpa̱t da̱ a̱lyiat kurum bah. Da̱ a̱kwonu a̱kya, á̱niet khwi ba̱ ku neet mi̱ fam a̱byin Ma̱kidoniya a̱ni, bibya ku nwuat nung a̱mgba̱m kurum nang n chat a̱ni. Mat a̱nia, n ka̱n mak yet nyin kpa̱t bah. Da̱ nung, n na mak yet nyin kpa̱t bah. 10Nang a̱tsatsak a̱lyiat Kristi wu nshya̱ ma̱ nung a̱ni, á̱ mbyia̱ a̱yin mi̱ fam a̱byin A̱ka̱ya huni a̱ maai a̱ nvwuong nung tam huni a̱ni bah. 11Yihwa mbyia̱ n tam a̱nia? Mat n chat nyin wa ba kee? A̱gwaza lyen za̱m, nang n chat nyin!

12A̱wot kyang hu nang n ni̱ nyia̱ a̱ni, huhwa n na gya a̱son ma̱ng nyia̱ hu. Si̱ huni na fwun a̱yaata̱m a̱bya ba̱ shya̱ a̱wat, nang ba̱ na ntam di̱ nyia̱ ta̱m mba hu ku tai si̱ nzi̱t hu a̱ni. 13Á̱niet bani kyiak pyipyia̱ mba nang á̱tsatsak a̱yaata̱m Yesu bya a̱ni. Ba̱ yet á̱niet nta̱m laai á̱niet, ba̱ ni̱ bwuak ba̱ ka tai a̱tsatsak a̱yaata̱m Kristi. 14A̱mgba̱m ma̱ng a̱nia, ku yet nung kyang a̱ga̱de hwa bah! Ku A̱ta̱nyeang#11:14 Lyuut cha̱chaat: Sha̱tan. ka ma̱ a̱pyia̱ nka, ka ni̱ kyiak a̱pyia̱ nka nang a̱ta̱m tswa a̱ byia̱ sai a̱ni. 15Mat a̱nia, ku yet kyang a̱ga̱de hwa bah, ka̱ á̱khwo A̱ta̱nyeang ba meang, ba̱ ni̱ bwuak ba̱ tai á̱niet ba̱ nyia̱ á̱tsotswat nta̱m a̱ni. Di̱ nngaan hu, á̱ na tyia̱ á̱khwo A̱ta̱nyeang bani swuo a̱bung ku nat ma̱ cha̱chaat ma̱ng á̱ka̱tuk nta̱m nang ba̱ nyia̱ a̱ni.

Bulut Swuo A̱bung ba̱t da̱nian yet A̱ta̱m Kristi

16N bu na tak ma̱ng a̱nyin, nyi yok fa nyia̱ n gyet a̱bwuon a̱yin wa nang n dyiat a̱nia a̱ni bah. Ku nyi fa n gyet a̱bwuon a̱yin wa, nyi myiai a̱fufwuo nyi fa̱k a̱lyiat nung na; ma̱nang nyi na mmyiai a̱fufwuo nyi fa̱k a̱lyiat a̱bwuon a̱yin a̱ni. Da̱nian nung meang, n ka tam ma̱ a̱da̱dei nang á̱ghyang á̱niet ni̱ ntam a̱ni. 17Tangka̱i tam a̱hwa yet si̱ A̱gwaza hwa bah, a̱wot á̱ kyiak n nnyia̱ nang a̱bwuon a̱ni. 18Ma̱nang a̱yaata̱m ma̱ a̱di̱di̱t ntam di̱ nkyang nang ba̱ ka̱n nyia̱ mi̱ swanta hu a̱ni, nung meang, n mbyia̱ kyang nang n na ntam a̱ni.

19Kang ma̱ng a̱nia, nyi fa nyi byia̱ mumwang ba̱t. A̱wot nyi fwuong nyinyang hu dundung ma̱ng á̱bwuon á̱niet bya. 20Ka̱ a̱yin tyia̱ nyin khwo; ku a̱ ma san kuzang kyang nang nyi byia̱ a̱ni; ku a̱ shyok nyin; ku a̱ ma nyia̱ tyok di̱ kuzang kyang nang nyi byia̱ a̱ni; a̱wot a̱ si̱ lwi nyin ma̱ á̱ghyi, nyi ni̱ sak mi̱ fwuo. 21Ku li á ngyei zi̱ byia̱ luluk ba̱t, zi̱ nyia̱ nyin ntangka̱i nkyang a̱nia! N hyia̱ a̱nia, mat n fwuong nsum a̱pyia̱ nung!

A̱wot a̱mgba̱m kyang nang ba̱ na gbang a̱lyia̱ ba̱ tam tazwa hu a̱ni, n ma na gbang a̱lyia̱ n tam da̱ nhu. (Ku li nang nung, n bu ndyiat nang a̱bwuon a̱ni!) 22Ba̱ tam nyia̱ ba̱ yet Ibriniyawa byaa? Nung meang, ma a̱nia wa. Ba̱ tam nyia̱ ba̱ yet Isi̱relawa byaa? Nung meang, ma a̱nia wa. Ba̱ ta̱m nyia̱ ba̱ ghwut mi̱ kwai Ibrahim jaa? Nung meang, jija nang n ghwut.

23Ba̱ tam nyia̱ ba̱ yet á̱khwo Yesu Kristi byaa? A̱wot n ka̱n nyia̱ Kristi ta̱m swak mbaa! (N dyen ku li nang n dyiat ma̱ tai nang a̱pyia̱ nung ka bwuak wa a̱ni!)

N ka̱n nyia̱ ta̱m ba̱t,

á̱ si̱ nyii nung mi̱ jaru mi̱ njen ma̱ a̱di̱di̱t,

n si̱ swuo tsot ba̱t ma̱ng a̱ya̱u a̱ byia̱ pyipyia̱ ntswam a̱ni di̱n jen ma̱ a̱di̱di̱t.

A̱wot n si̱ ndi a̱khwu a̱ghyi ma̱ng a̱ghyi di̱n jen ma̱ a̱di̱di̱t.

24A̱yahudawa ba ku bwuo a̱ka̱fwuon nang ba̱ tsot nung ma̱ng chyong nswak ntat ma̱ng a̱kubunyiung.

25A̱ka̱tat kya nang a̱cha̱chet A̱romawa ba ku ntsot nung ma̱ng shán ntswam.

Á̱ si̱ mang nung ma̱ng nfang a̱ka̱nyiung.

Kukwon a̱wak si̱ fwuoi ma̱ng a̱nung a̱ka̱tat.

N ka̱n nyia̱ a̱ta̱mam ma̱ng a̱tyetuk nang n dya̱u mami kyai a̱sa̱khwot.

26N ka̱n chong a̱junjung a̱ka̱chyet ma̱ a̱di̱di̱t.

A̱sa̱khwot a̱ri̱giwa ma̱ng á̱niet á̱tsaai si̱ shim hyat nung.

A̱yahudawa ba̱ yet á̱niet nung ba a̱ni, si̱ shim hyat nung.

Ma a̱nia wa, Nnwap na̱ nwai yet A̱yahudawa a̱ni si̱ ma shim hyat nung.

N si̱ ndi a̱khwu ma̱ng á̱ghyi ma̱ a̱ka̱keang, tswá a̱yit, ma̱ng nkyai a̱sa̱khwot.

A̱wot á̱niet ba̱ kyiak á̱pyia̱ mba nang á̱tsatsak á̱niet khwi a̱ni, si̱ shim hyat nung.

27N ku nkyiak a̱junjung jen nang n nyia̱ ta̱m ba̱t,

n ni̱ mbwuo á̱tyetuk ma̱ a̱di̱di̱t nang nkhat nda bah.

N ni̱ nfwuong zong ma̱ng mashyi a̱sa̱khwot.

A̱wot n ni̱ nswan kuzang jen di̱ mi̱n kyayak.

Vam hu ni̱ tyi̱ri̱m nung ma̱ng shyishyim, mat n ku mbyia̱ a̱yaatoot shansham nang n na kup n fa̱k shut a̱ni bah.

28Kang ma̱ng swuo a̱bung nang n nwai hyia̱ a̱ni, n ku shya̱ ma̱ng a̱kpi̱di̱dyi̱k a̱di̱dam kuzang a̱tuk tazwa a̱mgba̱m susot á̱niet khwi ji.

29Ka̱ a̱yin sang chet di̱ nwuak a̱chuchuk hu, n ni̱ nfa̱k á ngyei nung gwa sang chet hu.

Ka̱ á̱ tyia̱ a̱yin si̱ teap di̱ khwi Yesu hu, n ni̱ mwai lyen ba̱t.

30(Ka̱ ku yet nung ta hwa n tam, si̱ n tam di̱ swuo a̱bung ku tak lat nung hu a̱ni. 31A̱gwaza a̱ yet A̱tyia̱ Yesu Kristi, A̱tyoli nzi̱t wu a̱ni, a̱tyu a̱ myim á̱ dyep gu si̱ nat sang sangba̱p a̱ni, a̱ lyen nang n bwoi a̱ka̱laa nia bah.)

32Jen nang n ku nshya̱ ma̱ a̱keang Da̱maskut ka a̱ni, a̱tyu a̱ ku yet gwomna wu mbwak A̱gwam A̱retat nang gu ku nnyia̱ tyok hu a̱ni, a̱ si̱ tyia̱ á̱niet chok si̱ cham á̱na̱nwuai a̱keang na, da̱nian ba̱ ka ta̱bat nung. 33Si̱ nang á̱ ntyia̱ nung ma̱ a̱cheang á̱ si̱ chyok ma̱ng a̱nung á̱ ghwut ndyo mi̱ taga di̱ mbat nang á̱ nok á̱ nfwun a̱keang ka a̱ni, n sii du shot mbwak gwomna wu.

Currently Selected:

2 A̱korontiyawa 11: TyapNT

Highlight

Copy