1 A̱ta̱solonikawa 5
5
Yok Á̱niet Khwi ba̱ Swan Ma̱ng La̱p Vam Fwuong Bwuok Yesu
1Á̱niet khwi Yesu ba nang n chat a̱ni, tazwa njen ma̱ng a̱chak a̱kya, ku yet ta hwa zi̱ bu lyuut nyin ndyo bah. 2Mat nyin ma̱ á̱pyia̱ nyin lyen chi̱k, nang mam A̱tyoli Yesu na mbai gba̱ngba̱ng, nang a̱tang ni̱ mbai a̱tyetuk a̱ni. 3Jen nang á̱nietbishyi nshei ma̱ng á̱ghyang nyia̱, “Kuzang kyang kwai shansham ma̱ng swat nyinyang a̱ni!” Jen a̱ja ja a̱khwu ka na nkwa da̱ mba ma̱ gbi̱ri̱p da̱ a̱ka̱nyiung, ma̱nang a̱fa mbyin ni̱ ndoot a̱byii̱k ma̱ gbi̱ri̱p a̱ni! A̱wot ba̱ na shot bah.
4Á̱niet khwi Yesu ba nang n chat a̱ni, nyi shya̱ mi̱ ndyin bah, nang mam a̱hwa na mbwuo nyin bwung nang a̱tang a̱ni. 5A̱mgba̱m nyin, nyi yet mman a̱vwuo sai nia, ma̱ng mman a̱ta̱mam. Zi̱ yet á̱si̱ a̱tyetuk ku á̱si̱ mi̱ ndyin bah. 6Huhwa mbyia̱, nyi yok kai nda nang á̱kum á̱niet ka a̱ni bah. Da̱ a̱kwonu a̱kya, zi̱ swan fwuong cham ma̱ng la̱p vam hwa. 7Á̱niet ba̱ khat nda a̱ni, a̱tyetuk kya ba̱ ni̱ nkhat nda na. A̱wot á̱niet ba̱ hyeng a̱kan a̱ni, a̱tyetuk kya ba̱ ni̱ nhyeng na. 8A̱wot nang zi̱ ngyet á̱niet a̱ta̱mam bya a̱ni, yok zi̱ cham á̱pyia̱ nzi̱t, zi̱ ni̱ nnwuak fwuo di̱ Yesu zi̱ bu chat á̱ghyang. Ku na chok zi̱t ma̱nang nkubi ntswam ni̱ nkup vam a̱ni. A̱wot yok zi̱ tyia̱ fwuo di̱ shya̱ san sang sangba̱p, ku na chok zi̱t, ma̱nang bung ntswam ni̱ nkup a̱pyia̱ a̱ni.
9Mat A̱gwaza khai nzi̱t da̱nian a̱ ka nyiak zi̱t di̱ mwai lyen nggu hwa bah; da̱ a̱kwonu a̱kya, da̱nian zi̱ ka shya̱ san hwa mami A̱tyoli nzi̱t wu Yesu Kristi. 10Nggu wa khwu da̱nian nzi̱t, da̱nian ku zi̱ shya̱ ma̱ng swuan ku zi̱ khwu, zi̱ ka swan dundung ma̱ng a̱nggu si̱ nat sang sangba̱p. 11Mat a̱nia, nyi tyia̱ á̱ghyang nyin gba̱gbak. N nyi bu gbi̱ri̱ng á̱ghyang di̱ khwi Yesu, ma̱nang nyi nnyia̱ ma̱ninika a̱ni.
A̱lyiat Ngaan ma̱ng Byiat Saak
12Á̱niet khwi Yesu ba nang n chat a̱ni, zi̱ chat nyi nwuak á̱niet ba ba̱ nyia̱ ta̱m mami nyin a̱ni shi. Bibya bu kwak nyin a̱son mami nta̱m A̱gwaza na, a̱wot ba̱ bu gba nyin. 13Nyi nwuak ba a̱tsatsak shi, nyi bu chat ba, mat ta̱m hu nang ba̱ nyia̱ da̱nian nyin a̱ni. A̱wot nyi swan swat nyinyang ma̱ng á̱ghyang nyin.
14Á̱niet khwi Yesu ba nang n chat a̱ni, zi̱ naai nyin, nyi gba á̱niet a̱ka̱li̱t. Nyi tyia̱ á̱niet fwuong nsum gba̱gbak. Nyi beang á̱niet sang chet. Nyi ni̱ nyap nfwuo ma̱ng konyan. 15Nyi kwan nyi li nang a̱yin ma̱ nyin tan a̱ka̱tuk ma̱ng a̱ka̱tuk bah. Da̱ a̱kwonu a̱kya, nyi kwan nyi nyia̱ á̱ghyang nyin ma̱ng kuzang a̱yin a̱tan nta̱m.
16Nyi ni̱ nshya̱ ma̱ng a̱lyia̱ sai kuzang jen. 17Nyi ni̱ naai A̱gwaza nchi̱ri̱ng. 18Nyi ni̱ ntak a̱gwai di̱ kuzang kyang ku bai a̱ni. Mat si̱ huni hwa yet kyang nang A̱gwaza chat da̱ a̱vwuo nyin á̱niet khwi ba̱ mun á̱pyia̱ ma̱ng Yesu Kristi a̱ni.
19Nyi yok nvwuong A̱za̱za̱rak Ntswa wu nyia̱ nta̱m ma̱ nyin bah. 20Nyi yok jhyuai a̱lyiat na nang a̱yaata̱m a̱kwonu A̱gwaza mami nyin ba̱ tak ba̱ si̱ tyai nyin dyo a̱ni bah. 21Nyi ni̱ mmak kuzang kyang á̱ tak nyin a̱ni. Nyi ba̱ng si̱ ku yet a̱tan a̱ni. 22Nyi ni̱ ntyong kuzang tangka̱i a̱ka̱tuk a̱lyiat.
23Ma̱ninika, yok A̱gwaza ma̱ a̱pyia̱ gu a̱ nwuat swat nyinyang a̱ni, gu jaat a̱mgba̱m nyin nyi yet a̱za̱za̱rak a̱jhyem. Yok á̱ bu tyia̱ a̱mgba̱m tswá nyin ji, nfwuo nyin na, ma̱ng nvam nyin na, na̱ sang a̱bun, si̱ nat jen ji nang A̱tyoli nzi̱t wu, Yesu Kristi, na mbwuok a̱ bai a̱ni. 24A̱gwaza a̱ yei nyin a̱ni, a̱ yet a̱tsotswat wa, a̱ na nyia̱ a̱nia za̱m.
25Á̱niet khwi Yesu ba nang n chat a̱ni, nyi ni̱ naai A̱gwaza da̱nian nzi̱t.
26Nyi byiat a̱mgba̱m á̱niet khwi ba ma̱ng vwuk chat á̱ghyang.
27N kam nyin mami a̱lyoot A̱tyoli Yesu, nyi fang wusika jini a̱zaghyi a̱mgba̱m á̱niet khwi ba.
28Yok A̱tyoli nzi̱t wu, Yesu Kristi, a̱ fa̱k shok nyin a̱mgba̱m.
Currently Selected:
1 A̱ta̱solonikawa 5: TyapNT
Highlight
Share
Compare
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
