1 Yoona 5

Á̱niet Khwi Swuo Chet Swanta hu

1Konyan wa nwuak a̱chuchuk nyia̱ Yesu wa yet Kristi, a̱tyu nang A̱gwaza kup gu tyok a̱ni, a̱tyu a̱wa yet nggwon A̱gwaza kya. Konyan wa chat A̱tyia̱ wu, a̱ na chat mman nggu na meang. 2Ki̱ zi̱ chat A̱gwaza, a̱wot zi̱ si̱ khwi doka nggu ji, zi̱ lyen nang zi̱ na nchat mman A̱gwaza na. 3Ki̱ zi̱ chat A̱gwaza, ku fa nang zi̱ na nkhwi doka nggu ji. A̱wot doka nggu ji vwuo a̱khwu bah. 4Mat kuzang nggwon A̱gwaza byia̱ chet hu, ku maai nang ka̱ na nswuo chet swanta hu a̱ni. Nwuak fwuo nzi̱t hu di̱ Yesu hwa na tyia̱ zi̱ nswuo chet swanta hu. 5Nggu a̱nyan wa maai a̱ swuo chet swanta hu? Si̱ ma̱ a̱tyu a̱ nwuak a̱chuchuk nang Yesu wa ma̱nyin nggu ngyet Nggwon A̱gwaza ka a̱ni.

A̱lama A̱tat a̱ yet Sheda tazwa Nggwon A̱gwaza a̱ni

6Yesu Kristi bai mi̱ swanta hu, a̱wot á̱ si̱ nyia̱ nggu ba̱ptisman ma̱ng a̱sa̱khwot. A̱wot a̱ si̱ nwuak a̱sok nggu na da̱ a̱team a̱khwu wu.#5:6 Lyuut cha̱chaat: “A̱tyu wuni wa ku bai ma̱ng a̱sa̱khwot ma̱ng a̱sok.” A̱ ku bai ma̱ng a̱sa̱khwot nia ma̱nyin na bah. A̱ ku bai ma̱ng a̱sa̱khwot nia ma̱ng a̱sok. A̱wot A̱za̱za̱rak Ntswa wu wa tak ma̱ng a̱nzi̱t nang nkyang nani ngyet a̱chuchuk, mat nang nggu wa ntak á̱niet ba a̱chuchuk wu a̱ni.

7Huhwa nang zi̱ ndi a̱lama a̱tat a̱ tak nang Yesu ngyet Nggwon A̱gwaza kya#5:7 Lyuut cha̱chaat: “A̱tat bani nwuat sheda.” a̱ni: 8#5:8 Lyuut ghyang mbyia̱: “A̱tat bani nwuat sheda, A̱tyia̱ wu, Swang a̱lyiat ji, ma̱ng A̱za̱za̱rak Ntswa wu. A̱wot a̱tat bani yet kyang nyiung hwa. A̱wot zi̱ byia̱ sheda mi̱ swanta hu.”A̱lama wu wa yet, A̱za̱za̱rak Ntswa A̱gwaza wu, a̱sa̱khwot na, ma̱ng a̱sok na, nkyang tat nani tak kyang nyiung hwa. 9Mat nang zi̱ nwuak a̱chuchuk di̱ sheda nang a̱tyubishyi tak zi̱t a̱ni, a̱tsak a̱lyiat zi̱ na nwuak a̱chuchuk di̱ a̱gba̱ndang sheda nang A̱gwaza tak zi̱t a̱ni a̱ swaak. A̱wot A̱gwaza nwuak sheda tazwa Nggwon nggu ka.

10Konyan wa nwuak fwuo di̱ Nggwon A̱gwaza ka, a̱ lyen mi̱ fwuo nggu hu nang sheda huni ngyet a̱chuchuk wa. Ma a̱nia wa, konyan wa da̱ a̱ nwuak fwuo da̱ A̱gwaza bah, ku fa, a̱ tyia̱ A̱gwaza a̱tyu bwoi a̱ka̱laa. Mat nang gu nwai nwuak a̱chuchuk da̱ a̱lyiat nang A̱gwaza tak tazwa Nggwon nggu ka a̱ni.

11A̱wot a̱lyiat na A̱gwaza tak zi̱t a̱ni ni̱nia yet: A̱gwaza nang nzi̱t swuan sang sangba̱p. A̱wot swuan jini nang á̱ shyat di̱ mun á̱pyia̱ ma̱ng Nggwon nggu kikya. 12Konyan wa byia̱ Nggwon A̱gwaza ka, a̱ byia̱ swuan. A̱wot konyan wa da̱ a̱ byia̱ Nggwon A̱gwaza ka a̱ni bah, a̱ byia̱ swuan bah.

Swuan Sang Sangba̱p ji

13N dyuut nyin nkyang nani, nyin á̱niet ba nyi nwuak a̱chuchuk di̱ chet a̱lyoot Nggwon A̱gwaza ka a̱ni, da̱nian nyi ka lyen za̱m nang nyi mbyia̱ swuan sang sangba̱p ji. 14A̱wot gbang a̱lyia̱ nzi̱t hu nang zi̱ byia̱ a̱zaghyi A̱gwaza a̱ni, huhwa yet; ki̱ zi̱ naai gu kuzang kyang ku myim nggu a̱ni, a̱ na fa̱k zi̱t. 15A̱wot mat nang zi̱ ndyen nang gu nfwuong zi̱t kuzang jen nang zi̱ nnaai gu kyang a̱ni, zi̱ ma ndyen nang zi̱ na nshya̱ kyang hu nang zi̱ naai da̱ a̱vwuo nggu a̱ni.

16Ka̱ a li a̱na̱nyiuk ang, a̱ yet a̱tyu khwi a̱ni, nang gu nnyia̱ a̱ka̱tuk nyia̱ da̱ a̱ tyei a̱khwu a̱ni bah, si̱ a naai A̱gwaza da̱nian a̱ ka nang a̱tyu a̱wa swuan, A̱gwaza na nang gu swuan ji. A̱wot á̱ mbyia̱ a̱ka̱tuk nyia̱ a̱ tyei a̱khwu a̱ni, nggu wa nang n nyia̱ nyi naai da̱nian nggu bah. 17Kuzang a̱ka̱kpa̱t yet a̱ka̱tuk nyia̱ wa. A̱wot a̱ka̱tuk nyia̱ a̱ghyang nshya̱ da̱ a̱ tyei a̱khwu a̱ni bah.

18Zi̱ lyen nang konyan wa yet nggwon A̱gwaza a̱ ya a̱son mi̱ nyia̱ a̱ka̱tuk nyia̱ nchi̱ri̱ng bah, mat Yesu a̱ yet a̱tsak Nggwon A̱gwaza ka a̱ni, chok gu, kalak A̱ta̱nyeang ka ka̱ du tyia̱ nggu swuo a̱bung. 19Zi̱ lyen nang zi̱ ngyet mman A̱gwaza nia, a̱wot a̱mgba̱m swanta hu shya̱ mbwak tyok A̱ta̱nyeang hwa.

20A̱wot zi̱ lyen nang Nggwon A̱gwaza ka mbai mi̱ swanta hu, ka̱ si̱ tat zi̱t a̱ghyi ba, da̱nian zi̱ ka lyen A̱gwaza a̱ yet a̱chuchuk wu a̱ni. A̱wot ma̱ninika zi̱ byia̱ a̱meang di̱ mun á̱pyia̱ ma̱ng A̱gwaza, a̱ yet a̱chuchuk wu a̱ni, mat nang zi̱ mbyia̱ a̱meang di̱ mun á̱pyia̱ ma̱ng Yesu Kristi a̱ yet Nggwon nggu ka a̱ni. Nggu#5:20 Wa̱i a̱lyiat: Nggu fa, “Yesu” ku “A̱gwaza.” wa ma̱nyin nggu yet a̱chuchuk A̱gwaza wu. A̱wot a̱ si̱ yet swuan sang sangba̱p ji.

21Mman nung, nyi khap á̱pyia̱ nyin zan ma̱ng nghwughwu a̱yaagwaza sang swuan#5:21 Wa̱i a̱lyiat: Shimba, nghwughwu a̱yaagwaza sang swuan fa, tyiet a̱ka̱laa ku tyei á̱niet khwi ba̱ teap á̱ tyia̱ zan di̱ nwuak fwuo mba hu di̱ Yesu.!

Currently Selected:

1 Yoona 5: TyapNT

Highlight

Compare

Copy