1 A̱korontiyawa 5

Bulut Gba Á̱niet Khwi mat A̱shi̱shi̱k Nyia̱

1Ku yet nung kyang nsum hwa di̱ si̱sak nang n nfa̱k nkhang nyi naat mbwuot da̱ a̱shi̱shi̱k nyia̱ a̱ni; kyang nang ku nnwap na̱ chyi A̱gwaza a̱ni si̱ mi̱n nyia̱ a̱ni bah! Á̱ tak ma̱ng a̱nung nang a̱tyo nyiung ma̱ á̱niet khwi nyin ba nkhwat a̱yang a̱feang nggu! 2A̱wot nyi tam! Ku myim nyi byian nfwuo nyin na, nyi bu fa̱k nsum. A̱wot ku myim nyi ti̱n a̱tyu a̱wa á̱ ghwut ndyo ma̱ a̱tung sot á̱niet khwi ka.

3Ku nang n nwai shya̱ dundung ma̱ng a̱nyin mi̱ vam a̱ni, fwuo nung hu shya̱ dundung ma̱ng a̱nyin. A̱wot n wa ka̱n faat a̱tyu a̱ nyia̱ a̱shi̱shi̱k nyia̱ a̱wa a̱ni shi̱ri̱ya; á ngyei n shya̱ dundung ma̱ng a̱nyin ma̱ a̱pyia̱ nung mami tyok a̱lyoot Yesu Kristi. 4Ku yet ta hwa nyi yorong a̱tung sot á̱niet khwi. A̱wot fwuo nung hu ma̱ng chet A̱tyoli Yesu nzi̱t hu, na shya̱ dundung ma̱ng a̱nyin. 5Di̱n jen a̱jaja, nyi na mvwuong nggu ghwut ndyo. A̱wot nyi tyia̱ nggu mbwak A̱ta̱nyeang#5:5a Lyuut cha̱chaat: Sha̱tan. ka, da̱nian á̱ ka hyat za̱kwa a̱ka̱tuk nyia̱ nggu ji,#5:5b Lyuut cha̱chaat: “Da̱nian á̱ ka hyat vam nggu hu.” Ku: “Da̱nian á̱ ka tyak ma̱ng vam nggu hu.” a̱wot á̱ ka san tswa nggu ji a̱tuk nang A̱tyoli Yesu na mbwuok a̱ni.

6Tam hu nyi tam a̱ni, ku yet a̱sham bah. Nyi lyen nang nkyuo yit nia ma̱ a̱da̱dei ni̱ nteak na̱ tyia̱ a̱mgba̱m a̱nwai a̱lka̱ma na, na̱ mwai baa? 7Nyi weam nkyuo a̱khwukhwop yit a̱nia na̱ yet kidee a̱ka̱tuk nyia̱ a̱ni, di̱ vwuong a̱ka̱tuk a̱yin a̱wa ghwut ndyo mami nyin. A̱wot nyi na li nang a̱nwai a̱lka̱ma na̱ yet nfai nang á̱ nuu da̱ mi̱n yit a̱ni; a̱nia wa za̱m nang nyi na ndi. Mat Kristi, nggu wa yet Fi̱ng A̱nfwuk A̱yet Ghwut Mman Isi̱rela mi̱ Khwo wu, nang á̱ nneap za̱nang da̱nian nzi̱t a̱ni. 8Mat a̱nia, zi̱ song A̱yet Ghwut mi̱ Khwo wu, ma̱ng a̱khwukhwop burodi nang á̱ nyia̱ ma̱ng yit á̱ka̱tuk ma̱ng a̱ka̱kpa̱t a̱ni bah. Da̱ a̱kwonu a̱kya, nyi ya burodi a̱fai a̱ sang yit a̱ni; a̱si̱ a̱ yet a̱tsatsak ma̱ng a̱chuchuk a̱ni.

9Mami wusika nang n ku ntsa lyuut nyin ndyo a̱ni, n ku ntak ma̱ng a̱nyin, nyi yok mun á̱pyia̱ ma̱ng á̱niet nyia̱ a̱shi̱shi̱k nyia̱ bah. 10A̱wot n ku ndyiat tazwa á̱niet nwai khwi A̱gwaza, ba̱ yet á̱niet a̱shi̱shi̱k nyia̱ bya a̱ni bah; ku á̱niet nyia̱ wuwok bya bah, ku á̱niet shyuo á̱niet bya bah, ku á̱niet khwi nghwughwu a̱yaagwaza sang swuan bya a̱ni bah. Ka̱ ku li a̱nia, ku na yet ta hwa nyi ghwon swanta huni, nyi ka khap á̱pyia̱ nyin ma̱ng ntangka̱i á̱niet a̱nia.

11A̱wot ma̱ninika, n dyuut nyin wusika jini nyi khap pyipyia̱ nyin ma̱ng konyan a̱ yei a̱pyia̱ nggu a̱tyu khwi Yesu, a̱wot a̱ ni̱ nyia̱ a̱shi̱shi̱k nyia̱ a̱ni; ku a̱tyu wuwok, ku a̱tyu a̱ khwi nghwughwu a̱yaagwaza sang swuan a̱ni, ku a̱tyu a̱ fwoi á̱niet, ku a̱tyu a̱ hyeng a̱kan, ku a̱tyu a̱ shyuo á̱niet a̱ni. Nyi yok mak ya kyayak mi̱ kham jhyung ma̱ng ntangka̱i á̱niet a̱nia bah.

12Yihwa yet a̱ka̱ta nung ka, di̱ nyia̱ á̱niet ba̱ nwai yet á̱niet khwi a̱ni shi̱ri̱ya? A̱wot ku yet ta hwa za̱m, nyi nyia̱ á̱niet khwi ba̱ nyia̱ a̱ka̱tuk nyia̱ a̱ni shi̱ri̱ya ji baa? 13A̱gwaza wa na nyia̱ á̱niet ba̱ nwai yet á̱niet khwi ba a̱ni shi̱ri̱ya. A̱wot da̱ á̱niet khwi ba, nyi nyia̱ ma̱nang á̱ ndyuut ma̱ A̱lyiat A̱gwaza na a̱ni nyia̱,

“Ku yet ta hwa,

nyi vwuong a̱ka̱tuk a̱yin a̱wa

ghwut ndyo mami nyin.”#5:13 KDok 17:7.

Currently Selected:

1 A̱korontiyawa 5: TyapNT

Highlight

Copy