Dwakam 7
7
Ni̱bu Kwama 144,000 ba ya kale dukane
1A kuteng ki̱ku, n ki̱la n ku ni̱bu ti̱tumbi̱ri Kwamami baana a tiran we fwiti̱neti yana a ti̱ti̱niyu. A tau ki̱fi̱be ti̱ti̱niye ko ke bwila a ledu ti̱ti̱nitu we ka mwetiye ka tiyang. 2Yinu n ku wuka naba di̱tumbi̱ri Kwama a chire a twa̱r ki̱fi̱l twiye, ki̱ni kale dukan Kwaman, a yal ni̱bu ti̱tumrim Kwamami baanamu, bi̱bu n Kwama a ni chi dukanu ko a kai ti̱ti̱nitu n ti mwetiyu n ti tiyang: 3Naba di̱tumbi̱re Kwama a yi ko, ti̱kaiyu ti̱mu we n ti mwetiyu n ti tiyang, lanta yo nang yo di̱mwal kale dukane we kabi̱ni ni̱bu nanga Kwamamu. 4Yinu n nwe nabwe ni̱be a ya di̱mwal kale dukani̱nu, kuniritu kul ki̱ni ti̱wan taana chiri yana bi̱bu we kutiyi kub chiri yurau yiya Yisrela.
5We ki̱fi̱ku Yafudangu, ni̱bi kuniriti kub chiri yurau (12,000).
We ki̱fi̱ku Rubenangu, ni̱bi kuniriti kub chiri yurau (12,000).
We ki̱fi̱ku Ka̱d, ni̱bi kuniriti kub chiri yurau (12,000).
6We ki̱fi̱ku Acher, ni̱bi kuniriti kub chiri yurau (12,000).
We ki̱fi̱ku Nafi̱taliyangu, ni̱bi kuniriti kub chiri yurau (12,000).
We ki̱fi̱ku Manasengu, ni̱bi kuniriti kub chiri yurau (12,000).
7We ki̱fi̱ku Simiyonangu, ni̱bi kuniriti kub chiri yurau (12,000).
We ki̱fi̱ku Lawi, ni̱bi kuniriti kub chiri yurau (12,000).
We ki̱fi̱ku Yisakar, ni̱bi kuniriti kub chiri yurau (12,000),
8We ki̱fi̱ku Chabulum, ni̱bi kuniriti kub chiri yurau (12,000).
We ki̱fi̱ku Yusufuwangu, ni̱bi kuniriti kub chiri yurau (12,000),
We ki̱fi̱ku Benyami, ni̱bi kuniriti kub chiri yurau (12,000).
Nabwe ki̱tuu ni̱be wa kuutiye
9A kuteng ki̱ku n da̱ng, ki̱la n ku we kakku mangu, nabwe ki̱tuu ni̱be wu nii a ne yin kide, bi̱bu a chire we ka nang wuwule kuuti ye, n ti ki̱kuwange, n ti ka ki̱ki̱le ki̱fi̱ke, n ti ni̱bu, n ti ka nang wuwule yiiye, a ti we kakku ki̱di̱ng mati̱nangu n ti kakku Kwannangu. A dora kuli̱niti wa̱la̱k n kawure ki̱ni lwangi̱n ti̱kweni#7:9 Lwangi̱n ti̱kwenitu ki̱yung delaku Kwamang we da ni̱bu Yisrelamu. we fa̱liyu chiyu. 10N chi a bwe keme ko,
“Yuku chirengu ki̱chiredu a di̱Kwama,
wu a swe a ki̱di̱ng mati̱nange
ti̱nti̱n n ti Be Kwane!”
11Ni̱bu di̱tumbi̱ri Kwamamu ki̱ni kwang a tiran a bwal ki̱di̱ng mati̱nangi di̱bi̱l n ti Seli̱bu n ti bi̱kuri̱m bi̱bi baanamu. N chi a sungen we kakku ki̱di̱ng mati̱nangu, ki̱ sii Kwama. 12Ki̱fwadu ko,
“Amin, delaku n ti ri̱kaku,
n ti kasantu n ti ti̱wannantu n ti dwiyentu
n ti dukan Kwamanu n ti dukan ni̱nu
a da ti̱bu we di̱Kwama,
a mwintuwe ki̱diya kwadu! Amin!”
13Yinu wuka we seli̱bu a bi̱u mi̱n ko, “N bi̱wure bi̱bu ki̱ni kuli̱ni walaki̱m bi̱bu, n chi a chire a fi̱re?” 14N yi ki̱n mi, “Tete a mwang yimbu.”
Yinu n ki̱n a yi ko, “Bi̱bu nang ni̱bu a chire we nabwe riye fumake wu a ti̱ti̱niye. Di̱ne ki̱tuum Be Kwani̱mu a nura ki̱leti chiyu a du chi wa̱la̱k. 15Di̱ne yiko,
N chi a tiran we kakku ki̱di̱ng mati̱nangu,
ki̱ma ki̱mi̱n nangang kum n ti kuko we se ko,
N ki̱n wu a swe we ki̱di̱ng mati̱nange,
n ki̱n ka buli̱m chi ki̱ni ti̱kni dwiyeniyu yinang,
ka to ti̱n chidu.
16N chi a ne nweti̱ chunu we ki̱da,
a ne nweti̱ dimwenu we ki̱da,
a ne nweti̱ kuko we ki̱da,
a neti̱ wuka balbale ka twi ti̱n chide we.
17Be Kwane wu a tibe ki̱di̱ng mati̱nange
n nang naba tore chi.
ka yikadu ki̱ni chi a neti̱bwi mwei.
Yinu n Kwama ka musu chimi̱n ti̱mweni nui chintu.”
Currently Selected:
Dwakam 7: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
