Matta 5
5
Miyaku a bale kunne
(Mat 7:29)
1Yo n Yesu a ku ki̱tuu ni̱be, a fi̱l bale kunne a swe we, miyari̱m ki̱mu a swe ki̱mi̱ntuwe, 2a mwe ki̱miya chi mi̱nu.
Delaku ki̱yilang
(Luk 6:20-23)
3“Ni̱bu delaki̱m bi̱bu a yim ki̱taku chiyangi̱mu,
Yaa Kwama n wu chi.
4Ni̱bu delaki̱m, bi̱bu ni̱tu chitu a kaiyani̱mu,
n Kwama ka kire chi mi̱nu.
5Ni̱bu delaki̱m bi̱bu
a kukubu dutu chiti̱mu, ka chau ti̱ti̱nitu.
6Ni̱bu delaki̱m bi̱bu ni̱tu chitu
ki̱baddu ka tum chi
n Kwama ki̱badde,
n Kwama ka ri chimi̱ndi chib.
7Ni̱bu delaki̱m bi̱bu ki̱nwe ki̱bunemu,
n Kwama ka nwe ki̱bune chi ti̱n.
8Ni̱bu delaki̱m bi̱bu ni̱tu
chiti wa̱la̱k,
Nangki̱n, n chi ka ku Kwama.
9Ni̱bu delaki̱m bi̱bu ki̱yo kunkaki̱mu
ka yal chidu ko bwesi̱m Kwama.
10Ni̱bu delaki̱m bi̱bu ki̱nwe
riye di̱ne yilemu
Yaa Kwama n wu chi.
11“Ni̱bu delaki̱m n ti̱n bi̱bu ni̱bu ki̱mi̱ki̱ chi̱nu, ki̱fumachi̱nu, ki̱mwe chimi̱n kasi no bi̱bi̱le ki̱duum ti̱kwanim di̱ne mi̱ni̱mu. 12Ti̱ma ti̱mi̱lan ki̱ni furi mwemwe di̱ne ki̱ti̱me chi̱n wuduwe we bwa diye, di̱ne a lakanbu n ti kangu n chi a ma ki̱ni fa̱kubu feredimu.
Bum n ti yiiku
(Mar 9:50; Luk 14:34-35)
13“N ti̱n nang bum ti̱ti̱nimu. Aya ka li̱mang bumangu a riye, yili̱me ko ka ki̱lawedi yire? Bwa kake a ne chi ni madi ki̱ne we, ka n ke ni fwalu a bwa, ni̱bu ka fabadi naniye.”
14“N ti̱n nang yiiku ti̱ti̱niyangu. Yinang bi̱n di̱du a di a kunni tasi̱n. 15Sunti̱du kwefi̱ra we fiti̱la mo! A la chi ni yodu a ti̱du, ko ke a yii ka nang bwa̱le kwang. 16A fiwine, ti̱yung yiiku changu, ke ni̱bu a ku, a swaan nangi̱ri chi̱ntu, a dela Kwama wu a diye.”
Miyaku a yili̱n
17“Ti̱kamaduwe ti kanodu m be mang kwi yili̱n Musatu n ti chi fa̱kubu a miyanitu, mang bebu kwiku aya m be ke n ri ya̱m bi̱bu. 18Mi̱n fwa chimi̱n bi̱yili̱m, ka dii n ti ti̱ti̱nitu we ki̱yade, a ne chi a ne ride we. Ka ki̱kwi ya̱me, ka ti̱tu ni̱bu ki̱kudu ko n ke ti̱kan chite. 19Di̱ne yiko, nii wu ka ki kaang yilang kasi no nang ki̱ti̱rangu we yili̱n ti̱tu yinu ka miya bi̱kam mi̱nu ko a ma ti̱ni yiko, ka kau wuti̱re we Yaa Kwama. We yiko, wu ka bunti̱ yilangu ka miya ni̱bu mi̱nti̱nu ko a nang bunti̱ne, ka ya dwiyen ti̱dui we Yaa Kwama. 20Mi̱n fwa chimi̱nu, a dakan yile chi̱n ka la wu ni̱bu yungku yili̱n Musati̱mu n ti ni̱bu Farisamu. Ka a newe yiko, a ne ta le yaa wu a diye ko bayim.”
Miyaku a ki̱fwini
(Luk 12:57-59)
21“Ti̱nwe ni̱bu a yi tukebu chi̱remu ko, ‘Chidu ni we. Wu ka chi̱u niye, ka ya mwataku.’ 22Aya m mi̱n, mi̱n yi chi̱nu mi: Ni ki̱ma ki̱fwini n ti ke ko ka ya mwataku. Ti̱nti̱ne, wu ka yi keko ko, ‘M mun nii wu kuse,’ ka ya kakku kwa̱l kabaki̱n. Yinu wu ka tu keko ko, ‘Di̱rre,’ ka wuran bwi ki̱ni far ki̱ran.”
23Di̱ne yiko, ka mun yadu mwang ma niku a se Kwama, yinu n kur chi mwang ma ke mo mi̱ne, 24du niku mwangu we se Kwama, yan doka we ti kemo didin, yinu m be ni niku mwangu.
25“Do tibe mo datu n ti fakwaremo wu ki̱yadu ka yali̱nu a kan kabaki̱ fanseti. Ti̱doka we wa̱re yo ta tibu lam kan kabaki̱ ne, ka newe yiko, ka dunu n ti Mai kabake, wuko ka dunu n ti di̱karan, di̱karanu ka mari̱nu a di̱bi̱nti̱l. 26Bi̱yili̱m mi̱n fwa mi̱nu, a ne mwang chiredu ka mwang febu di̱si̱nu ki̱ni kwange.”
Miyaku a ti̱kuli
27“Ti̱nwe a fwa chimi̱n ko, ‘Madu ti̱kuli we.’ 28Aya mi̱n fwa chimi̱nu, ‘Ka nii a da̱ng naye ri̱i̱ng, a kubene, a tu a ma ti̱kulitu n ti naye wuko we ni̱r ki̱nu.’ ” 29Di̱ne yiko, “Ka nu wu a kang ki̱yilange ki̱yonu ki̱ni ki̱lenge, chaku n mau a bwa, a la chi mwang kwala balangi kiin we bwiyu n ti ki̱ku bwiyi kwang ka le ki̱rangangu. 30Ka fa̱la̱ng ki̱yilangu nang ki̱ku ki̱bedu ki̱ni ki̱lenge, chaku n mau a bwa. Ka la chi mwang kwala balangi kiin n ti ki̱ku bwiyi kwang ka le ki̱rangangu.”
Miyaku a chiku ki̱nang
(Mat 19:9; Mar 10:11-12; Luk 16:18)
31Ni̱bu a fwa chimi̱n ti̱n ko, “Ni ka chi̱u naye ko mi̱n ki̱na, ka nii naye ko lwangi̱n chiku ki̱nanu. 32Aya mi̱n fwa chimi̱nu, ‘Ni ka chi̱u ki̱na we naye ko, ka n ke di̱ne yariye, a yo naye ki̱ni sulai.’ Aya wu ka yiu naye, ki̱ma ti̱kuli.”
Miyaku a di̱twa̱mbi̱r
33Yinu ti̱ nwe a yi tukebi̱ chi̱remu ko, “A twa̱ndu ti̱kwanitu we, aya ri chi mwan bwa̱u mwang ni Tewuduwe. 34Aya mi̱n fwa chimi̱nu, ti̱twandu chi we, ko bayim ka ki̱ni bwa diye, di̱ne kweer Kwama. 35Ka ki̱ni ti̱ti̱niye, di̱ne nang fi ki̱fwali̱n naniye. Ka ki̱ni Wurchalima di̱ne nang bi̱n Mai Wuduwenu. 36Twa̱nduwe ki̱ni dur mun di̱ne kasi no ki̱riyangi kiin a ne mwang medu mwang sutedi tweng ka ki̱liye. 37A dakan ya̱m chimu kanodu ‘ngo’ ka ‘ngango.’ Ka a su ti̱te n ti̱u fakware.”
Miyaku a ki̱yerang
(Luk 6:29-30)
38Ti̱nwe a fwa ko, “Kwalange di̱ne kwalange, nuum di̱ne nuum. 39Aya mi̱n fwa chimi̱nu, ti̱yeduwe ka nii a ngan a di̱dane, yo ki̱mi̱nti̱ di̱kanu a ngau ti̱n. 40Ka wuka nii a mar keme di̱ne ke a yiti̱n belukemo, chaku wuduwe niti̱ ki̱n. 41Ka wuka nii wu ki̱ni dukane a mwintuwe ko ti̱ya yayu wu a si̱re wiine, ti̱ya wu a si̱ri yurabu. 42Nii wu a bi̱n chiye, ni. Wu a be ki̱bau di̱si̱ne, dangduwe we.”
Ke ki̱ni bi̱bu a koni̱mu
(Luk 6:27-28)
43Ti̱nwe a yi chi ko, “Mi̱la kemo, ko fakware mo. 44Aya mi̱n yi chi̱nu mi, mi̱la fakwarbu mumu, twa̱ba̱ bi̱bu ki̱fumani̱mu mi̱n. 45Ke ti̱kau bwesi̱m Te wu a diye, n ki̱n ki̱yo dii ki̱fwe kuko we ni̱bu bi̱yili̱m n ti̱ bi̱bwilamu. Ti̱nti̱ne, ki̱tume mwe we ni̱bu yilemu n ti bi̱bu a tumbu yilemu. 46Ka ti̱mi̱la kana bi̱bu ki̱mi̱la chi̱ni̱me, ta ya wuwule ki̱ti̱me? Bi̱bu ki̱yiu sangkali̱mu ki̱ma ti̱ni yiko? 47Ka ti̱si kana kebu chime, ti̱lakan a file n ti bi̱kamu? N ke chi bi̱bu a yimbu Kwamamu ki̱ma ti̱na? 48Ti̱buli̱m yichiyu ki̱ni yile, ti̱ri ki̱ni yile yinangu Te chi̱n wu a diye a ri ki̱nangu.”
Currently Selected:
Matta 5: Tula
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.