Luka 6
6
Di̱bi̱du a difi̱kare
(Mat 12:1-8; Mar 2:23-28)
1Wuka difi̱kare n Yesu n ti miyari̱m ki̱mu ki̱sudu we kuni alkamayu. Miyari̱m ki̱mu ki̱kiya ti̱changri alkamaitu ki̱muddu ki̱ni fa̱li chiyu ki̱ku ki̱nutiyu. 2Bi̱kamu we ni̱bu Farisamu a bi̱u chi ko, “A mayire ti̱ma chitu a dakabu ta madu we difi̱kare?”
3Yesu a ni di̱ki̱li̱n ko, “Kano ta kibu chitu n Dauda a maata, we ki̱dangu n ki̱n a nwe chun n ti ni̱bu ki̱mangu.#6:3-4 1Sam 21:1-6. 4N Dauda a le mure Kan Kwamanu, a da̱u ki̱danne wu a ya doku wauwade, wu a da kana fanseti ka chade, a chau, a niti̱ bi̱bu n ki̱n waremu.”#6:4 Fan 24:9. 5Yinu n ki̱n a chakakku, a yi ko, “Bwe Nii nang Tewuduwe difi̱kare.”
Nii wu fa̱la̱ngu a ngi̱rmane
(Mat 12:9-14; Mar 3:1-6)
6Wuka difi̱kare n ki̱n a le kan muraku ni̱bu Yafudamu yungku. We fiko, wuka nii we, wu fa̱la̱ng ki̱yilangu a ngi̱rmane. 7Bi̱kamu ni̱bu yungku yili̱n Musati̱mu n ti ni̱bu Farisamu bi̱bu a no ki̱bau chi wu n chi ka ta̱n Yesuwe, a fwal nui ki̱da̱ng ki̱nu, ko ka kano n ki̱n we be ni wu difi̱kare. 8Kangu n Yesu a yim ni̱tu chitangu, a yi nii wu fa̱la̱ng a ngi̱rmane ko, “Kun, be ti a kakku.” N ki̱n, a kun, a ti ti̱n.
9Yinu n Yesu a yi chi ko, “Mi̱n bi̱u chi̱nu, Yilang chirengu a fwa ko wule we difi̱kare: Ni ma ti̱yilita, ka ni ma ti̱ta lebiya? Ni yu ti̱kuriya, ka ni chi̱u ti̱kuriya?”
10N ki̱n a da̱ng ka nang wuwule niye, yinu a yi nii wu ko, “Tare fa̱la̱ngu.”
Nii wu a tar ti̱n, fa̱la̱ng kangu a be ti̱n. 11Ni̱bu yungki̱mu n ti ni̱bu Farisamu ni̱tu chitu a kayan. N chi a mwe ki̱twaiyadu we yichiyu, yinang ka, ka madu ki̱ni Yesuwangu.
Fandubu ki̱mi kub chiri burabi̱mu
(Mat 10:1-4; Mar 3:13-19)
12We diti yikiyu, n Yesu a fi̱l di̱kan kun ki̱twa̱ba̱ buni. N ki̱n a di kum ki̱twa̱ba̱ buni a di̱Kwama. 13Yo ti̱ma kwiyane, a yal miyari̱m ki̱mu, a swabbi kub chiri buramu, ko fandubu. 14Ni̱bu bi̱bi kub chiri burabi̱mu n Simun, wu n Yesu a yo ki̱mi̱n di̱nu ko, m Biti̱r n ti ke ko Andi̱riya n ti Yakubu n ti Yowana n ti Filibu n ti Bartolomi. 15N ti Matta n ti Toma n ti Yakubu bwe Alfiyus n ti Simun wu a yal ko Salote n ti. 16Yafuda bwe Yakube n ti Yafuda Yiskariyoti, wu a feku Yesuwe.
N Yesu ki̱ miya ni̱bu mi̱nu, ki̱beti̱ ni̱bu
(Mat 4:23-25)
17N Yesu a suwe n ti fandubu, a ti̱ya tanti̱lange wu a tile kune. Ni̱bu n ti Miyari̱m ki̱mu nabwen we fiko a ya beku, bi̱ba be a Yafudiya n ti Wurchalimamu n ti bi̱bu a be, a ki̱swatti la wuduwe, wu a ti̱m Taya n ti Sidone. 18Bi̱kamu a be ka nwe chi ki̱miyaditu, yinu bi̱kamu ko ke chi ya beku we buri̱n chitu. Bi̱bu ki̱ni ki̱fi̱bti yibwilayu a yati̱ beku. 19Ni̱bu we fikomi kwang ki̱funti̱bwi Ka twai Yesu, di̱ne dukan beki̱nu ki̱chiredu a di̱ki̱ne, ki̱be chidi kwang.
Delaku ti bwila
(Mat 5:1-12)
20Kangu n Yesu a da̱ng miyari̱m ki̱mangu, a yi ko,
N ti̱n bi̱bu ta kwala chimu
n Kwama ka yo chi̱mi̱n delaku,
Di̱ne ta chau mati̱n
bwaditu we bwa kake.
21Ni̱bu delaki̱m n ti̱n bi̱bu ti̱nwe chuni̱mu,
fur chi̱nu ka ridu we bwa kake.
Ni̱bu delaki̱m n ti̱n bi̱bu ti̱kira wiinimu,
ta nura chi we bwa kake.
22Ni̱bu delaki̱m yo ni̱bu ki̱ko chi̱nu,
ki̱chaku chi̱nu we tibe chi,
ki̱mi̱ku chi̱nu,
ki̱ko chi̱nu ko n ti̱n bi̱bwilam
di̱ne ta buntu Bwe Nii.#6:22 1Bit 4:14.
23“Ti̱ma furi mwen kasi no ti̱chitu wu a fwe fere. Ti̱ma furi mwen. Ki̱ti̱me chi̱n wuduwe we bwa diiye. N fwa bi̱bu di̱ne tukebu chimu a ma fa̱kubu Kwamamu mi̱ne yiko.”#6:23 2Ya̱m 36:16; Nfa 7:52.
24Yinu ka kau chi ki̱bune
we bi̱bu ki̱ni ka̱mbi̱r
nabwen ki̱ka̱ngi̱mu,
di̱ne a ne kaang ta̱ma̱ng
we bwa kake.
25A no chi̱n, n ti̱n bi̱bu
ti̱chadu ti̱kur ti̱nu a ti̱mi̱mu,
we bwa kake ta chau chun.
A no chi̱n n ti̱n bi̱bu
ti̱nura ka chi ki̱ka̱ngi̱mu,
we bwa kake ta wu be wure.
26“A no chi̱n, n ti̱n bi̱bu ni̱bu kwang ki̱wer chini̱mu. Tukebu feredimu a ma fa̱kubu ti̱kwanimu mi̱ne yiko.”
Mi̱la fakwarbi̱bu
(Mat 5:38-48; 7:12a)
27Aya, mi̱n fwa chimi̱nu, n ti̱n bi̱bu ti̱nweyimu: Ti̱mi̱la fakwarbu chimu, ti̱ma fakwarbu chimu mi̱n chi a dakani, 28Ti̱yo ni̱bu ki̱ma chimi̱n yii mu mi̱n delaku. Bi̱bu n chi ki̱nwe riye mu, twa̱ba̱ chimi̱n buni. 29Ka nii a ngan we di̱dane, sabi̱r ki̱mi̱n di̱kanu di̱dan a ngan ti̱n, ka wukane nii a yiti̱n luke wuduwenge, chaku wuti̱re nii ti̱n. 30Niwu a be ka̱li̱ne, da̱ngdu we. Wu a kaar mi̱n kuli̱ne, yiti̱duwe. 31Nang ma ni̱bu mi̱n chi mun baddu n chi kani̱n mami̱nde.#6:31 Mat 7:12.
32Ka ti̱mi̱la ka bi̱bu a mi̱la chi̱ni̱me, wer ki̱ku ka bedu a file? Di̱ne bi̱bu a yili̱n Musati̱mu ki̱mi̱lati̱ bi̱bu a mi̱la chimu. 33Ka ti̱ma ka bi̱bu ki̱ma chimi̱n chi a lelete mi̱n chi ti̱yilite, ta ya werki̱ku a file? Di̱ne kasi no n nang ni̱bu ki̱letimu ki̱mati̱ni yiko. 34Ka ti̱ni di̱si̱nu a ka ni̱bu ka medu ka fe chi̱ni̱me, ta ya werki̱ku a file? Kasi no nang ni̱bu ki̱letimu, ki̱ni ni̱bu ki̱letimu di̱si̱nu ko ke a fe chi yinang ka a dakanang.
35Aya ti̱n, ti̱ke ni̱bu ki̱ko chini̱mu, ti̱ma chimi̱n chi ti̱yili, ti̱ni chi di̱si̱nu, n ke di̱ne a mwintuwe ka fe chi̱nu. Yinu fal ki̱ti̱me ka kadu nabwen, ti̱nti̱ne, ni kau bwesi̱m Kwama wuduwe a la chiye. Di̱ne n ki̱n naba li̱me we bi̱bu a ne di̱wan wemu n ti bi̱bwilamu. 36Ti̱kau ni̱bu ki̱bunem, tiyangu n Te chire naba ki̱bunengu.
Ti̱yo nii mi̱nu ki̱le we
(Mat 7:1-5)
37Ti̱yodu ka nang wuwule niye mi̱nu ki̱lewe, a ne nii ka yo chimi̱nti̱ ki̱lewe ti̱nti̱n. Ti̱kaiyu di̱n ni̱nu we, ke ni̱bu a kai ti̱nu di̱chi̱nu we. Ti̱du ni̱bu mi̱n ki̱leti chiyu, ke ni̱bu a du chimi̱n yichiyu. 38“Ti̱ma ni̱bu mi̱n li̱mangu, ta yati̱ li̱mangu yinang ka a dakanang. N Kwama ka ni̱n chitu nabwen, ka n ki̱n a ku mun ni ni̱bu chite. A tiwe nii ki̱feku chiye, wu ki̱mi̱ksu chitu mi̱kse we kwa̱se sweke ko ke a rii, a twaka ti̱ni bubu yo kano ki̱ni wu ki̱ta̱ne.”
39N Yesu a ki̱la fwa chimi̱nti̱ kaang baltaku ko, “Kano ki̱du we medu ka twa̱ku keko ki̱duwa? Ka fwe yiko, n chii kwang, a ne fi̱tadu a kenga? #6:39 Mat 15:14. 40Miyare a labu naba yungke, aya wu a ya miyake, kanodu yinang wu a yung ki̱ne.”#6:40 Mat 10:23-25; Yow 13:16; 15:20.
41“A mayire, mun da̱ng ka be di̱fi̱li̱ne a nu ke mo, mun tabu ti̱nu ki̱ni ki̱twakulangu we nu monge? 42Mwang medi yire mwang yi kemo mwiko, kemi, be ki̱ni di̱fi̱li̱nu n chaku mi̱ne, yo m mun mwang kubu ki̱twakulangu we nu monge? M mun naba di̱bebeline! Chaku ki̱twakulangu we numo didiin, ke n ya da mwan ku be di̱fi̱li̱ne a nu ke mo, n chaku ki̱mi̱n.”
Tiyangu n ti ti̱kulan kitu
(Mat 7:16-20; 12:33-35)
43“Tiyang ki̱yilangu, a ne tu ti̱kulan ti̱tu a lebii. Ti̱nti̱ne, tiyang ki̱ku a lebangu a ne tu ti̱kulan ti̱tu a lelei. 44Ni yim tiyangu a ki̱duum ti̱kulani̱mu n ki̱n a tumu. Di̱lukene kwa̱da a ne tu ti̱kulan siniyitu, ti̱nti̱ne, rwabichai a ne tu Yinabi.#6:44 Mat 12:33. 45Nii wu yile ki̱fwa ti̱yili ti̱tu n ki̱n a yo we ni̱ritu, ti̱nti̱ne, nii wu bwila ki̱fwa ka ti̱bwilaitu n ki̱n a yo we ni̱ritu. Yii ki̱chake chi a ni̱ritu.”#6:45 Mat 12:34.
Ni̱bu muki̱mi burau
(Mat 7:24-27)
46N Yesu a yi chi ko, “A mayire ti̱yaliyu ti ‘Tewuduwe,’ yinu n ti̱n ta mabu chi ma yi chi̱nite? 47Kanang wuwule niye, wu ka nwe ya̱m mi̱mu, ka ma nanga ki̱ne, kanodi ying: 48Yinang nii wu ki̱mu lo, wu a ru tamme ko a kwam we mure ti̱me, yo mwe la a bulmawe ti̱me, a mi̱ku lo, a yabu dawe di̱ne lo a ti, a ya tamme wu yile. 49Aya wu a nwe ya̱m mi̱mu yinu a kur ti̱na bwa, a lakanbu n ti nii wu a ru lo, a ne tamme we. Ki̱dangu mwe ka bulmawe ti̱mangu, lo ka yari kuum! Ka wuredu a ne dutu chi we.”
Currently Selected:
Luka 6: Tula
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.