Yibraniyam 1
1
N Yesu Masiya Bwe Kwama
1Feredi n Kwama a fwa tukebu chi̱remu mi̱n ya̱mu we yii fa̱kubi̱bi a wa̱riyu dangtidangti n ti ki̱switiyu dangtidangti. 2Aya we a diti swan kute yiyu, a fwa nimi̱n ya̱mu a di̱bweko wu n ki̱n nan chakkula chiti kwange. We ti̱le bi̱rke, n Kwama a mu ti̱ti̱nitu a di̱ki̱ne, yinu ki̱na yo wule ti̱ti̱niye a di̱ki̱ne. 3N ki̱n nang ki̱yiye wu a dwiyen Kwamaye, n ki̱n a fiwiine n ti Kwama. N ki̱n ki̱yikadu ki̱ni ka nang ti̱ti̱le chiye we fi a no dakan ka yade ki̱ni dukan di̱kwa̱l yiin ki̱nu. A kuteng ki̱ku, n ki̱n a nura ni we ki̱leti chireyangu, a swe a kang ki̱yilang Kwamang we bwa diye ki̱to chitu ki̱ni kwang we dukang Kwamanu.
N Yesu a la ni̱bu ti̱tumbi̱rim Kwamamu
4We ti̱tu fal a yung n ki̱n a la ni̱bu ti̱tumbi̱rimu nabwen, yinangu di̱nu n Kwama a ni ki̱ni̱nu a la di̱mbi chiti̱ti kwangangu.
5Nang wuwule naba di̱tumbi̱re n Kwama a yiko,
“M mun Bwemi,
diwu n kau Temun.”
A yiinti̱bu wuka naba di̱tumbi̱ri ko we ko,
“mang kau Temun,
mwan kau Bwemi.”
6Yo yaka tum Bwe wu kake n Yesu we ti̱ti̱nite a yi ko, “Yam, ni̱bu ti̱tumbi̱ri Kwamamu a sii a delan ti̱n.”
7We ni̱bu ti̱tumbi̱ri Kwamamu a yi ko,
“Kwama ki̱yo ni̱bu ti̱tumbi̱rim ki̱mu ki̱kau ki̱fi̱be,
yinu ni̱bu nangang ki̱mu yinang ben ki̱rang.”
8Aya we Bwe a yi ko,
“Fi swe mati̱nmwitu, Kwama,
wu ki̱diya kwade
yinu tungku yilengu ka kau ki̱twalang yaamongu.
9Mun bau nangang yilengu,
n ko bwila.
Nang chi a yo Kwamamo a kukki̱n kakku ti kalmunu,
a ki̱kur mi̱n ki̱nung li̱mengu.”
10A ki̱la fwa ko,
“Tewuduwe, we ti̱le bi̱rke,
n ru tame ti̱ti̱niye,
bwa diye kwang ka nangang fa̱li mwiyang.
11N chi ka twiyadu,
aya m mun we kwadu,
aya n chi ka twiyadu yinang kuri.
12Mwang dal ki̱nu yinang luke,
aya ka twiyadu yinang luke a ka̱ra̱ne,
m mun mwang sutenbu we,
swa̱tu mwitu a ne riduriye.”
13Aya n Kwama a yiinbu wuka naba di̱tumbi̱ri we yinangu a yi bwe kongu ko,
“Swe ki̱ni dwiyen we kangki̱yi̱lang mangu,
ka lami̱nti̱ yo mang yo fakwarbi̱ mumu
a wana namo.”
14Kanodu ni̱bu ti̱tumbi̱rimu kwang n ke fi̱ki̱m delaku n Kwama tum ko ke a to chini bi̱bu ka ya yuki̱ma?
Currently Selected:
Yibraniyam 1: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
