Ka̱la̱tiyam 4

1Ka bwe wu ka chau kula we yo n ki̱n we bwe ti̱re, n ki̱n n ti ka̱be a fi wiine, kasi ki̱ku kuli̱n tewuduwe kwanginu di̱ki̱nengu. 2N chi kani̱n bunti̱ tebu bi̱robi̱ chimu n ti wakili a tau chimu ka lami̱nti̱ ki̱swi te a yi ko n chi a lwe ni̱be. 3A fiwiine n ti chi̱ni, yo n Yesu a no tibu bede, n chi̱ni a no yinang bwesi̱m, dati ti̱ti̱niyu a no kwaba chi̱ni ni kau yinang ka̱bi. 4Aya yo ki̱swi siine a lame, n Kwama a tume wuko Bwe, fwan a bi̱u yinangu ni̱bu ki̱bi̱u bwesi̱mangu. N ki̱n a dwiyen we daati ni̱bu Yafudamu a bunti̱ yili̱n chitu.

5N Kwama a tum ki̱ne ko ke a bau chi̱nimi̱n da, n chi̱ni bi̱bu a no niyang le ka̱bi a yili̱n ni̱bu Yafudamu, ko ke ni kau kasi bwesi̱m Kwamami bi̱yili̱m. 6Di̱ne n chi̱ni bwesi̱m ki̱me, n Kwama a tume Fi̱ki̱m Bwekomu we ni̱tu chi̱retu, bi̱bu ki̱yalu ko, “Tete, temi.” 7Di̱ne yiko, n ti̱n n ke ka̱bi, aya n mun bwe, n Kwama yo m mun bweko, n Ki̱n ka ni chi̱n chi n ki̱n a yo bwesi̱m ki̱m mi̱ne.

Ya̱m ni̱bu Ka̱la̱tiyam a bu Bulus ni̱r

8Yo ferediye a no ta yimbu Kwama, a no n ti̱n ka̱bi kwamati yiyu a dakabu ta siidi. 9Aya ki̱ka̱ngu ta yim Kwamangu, a mayire ti̱badu ta ki̱la ti̱nu we siiku ti̱yobitu n ti ki̱fi̱btiyu a ne ka maka chiniye? Yoye ta ki̱lati̱ kabi ti̱tu a dati chiyu wenga? 10Da̱ng yinangu ti̱funti̱bwi ti̱ma yeni ni̱bu Yafudamu, ka nang wuwule wandi n ti swang n ti swa̱re ti ke n Kwama a nwe ta̱ma̱ng changu. 11Mi̱n ka̱ta̱ chi ti̱maditu. Ki̱yungdu nangi̱n mitu mang ma a di̱chi̱netu a kau ti̱kusi.

12Mi̱n wana chi̱nu kebu mi̱m ti̱chaku yichiyu we yilangu yinangu mang chaku yimiyangu. Ta ma mibu wuka ki̱le. 13Ki̱kumang ta kuru tiko ki̱dangu mang nwebu ta̱ma̱ngangu, nang ki̱dangu mang ya ki̱swi ya mang ma chimi̱ne di̱mwarangu. 14Kasi ki̱ku burang mangu, a bu chi̱n ni̱rangu, ta kobu mi̱n di̱ne bura mange, ti̱tai kani yurabu. Ti̱yiu mi̱n yinang naba di̱tumbi̱re Kwama a lakabu n ti yinangu ta yiu Yesu Masiyangu. 15A no ti̱ri ki̱ni ti̱mi̱lan ki̱dang kangu, a bwa̱le ti̱mi̱lan ti̱kitu. Mi̱n fwa bi̱yili̱m a no ne chi neta madu ke ti̱makaye we, kono nui chi no ta chaki̱du ta niyu ka ka kadi yiko. 16Ki̱ka̱ngu n kau chimi̱n fakware, di̱ne mang tau mi̱n fwa chimi̱n bi̱yili̱ma?

17Ni̱bu yungku ti̱kwanim bi̱bu ki̱baddu ta kau bi̱chimi̱mu, a mabu di̱ne ke ti̱ya li̱mang, n chi ki̱funti̱ bwi ka kera chi̱nu n ti mi̱n ko ke ti̱kau bi̱chiim. 18Kanang wuwule ni ta bunti̱de, a no dakan chi we ti̱tu a yo ti̱bunti̱ ki̱nitu, ti̱nang madi yiko kwadu n ke ka yo m mi̱n we n ti chi̱ne. 19N ti̱n bwesi̱m mi̱m, mi̱n nwedi bud we ni̱r mi̱nu yinang yo lur ki̱bu naye yaka bi̱dde, burang ki̱ku ka lami̱nti̱ yo n Yesu Masiya ka swe mati̱ntu we bwi chiye. 20Ka no ka kadi yiko, no n ke manodu n ti chi̱n, ke n fwa chimi̱n ti̱kwa̱li yii mitu yinangu ta swanangu. Di̱ne mi̱n ka̱ta̱ nangi̱n chi̱ntu.

Baltaku a dur Akar n ti Saratu

21Ti̱nwei n ti̱n bi̱bu ti̱badu ta bunti̱ yili̱ni̱mu, ti̱yim chi yilangu ki̱fwadita? 22Ya̱m Kwamamu a fwa ko, “M Yibrayim ki̱ni bwesi̱mi burau. Wuka n wu ka̱be naye ko, wuka n wu neloko.” 23Ka̱be naye Yibrayime a bi̱u bwe a wa̱re da bwiye, aya neloko, a bi̱u a wa̱re wu n Kwama a bwa̱umi̱n n ti ki̱ne.

24Nati̱m bi̱bu ki̱ni burako, a kau wa̱re wu a bwa̱ki̱ Kwamangu a ri mi̱ne. N Aka̱r ka̱be naye a ti we Kun Sinayine fi ni̱bu a mwe a kau ka̱biye we yilange. 25Ki̱ka̱ngu n Aka̱r a tiwe Kun Sinayine di̱du a ti̱m Wurchalimamu a Larabawam, n ki̱n n ti bwesi̱m ki̱mu a kau ka̱bi. 26Aya n Saratu neloko a ti we Wurchalima wu a diye, we bwako n ki̱n nang ne chire. 27Ti̱tu nang chi fa̱ku Yichaya a fwa ko,

“Ma ti̱mi̱lan m mun naye wu a ne bwe we,

ki̱kangu ta ngau yalte wa ti̱mi̱lane,

m mun wu mwang bi̱nbuwenge,

ki̱kangu mwang ma ti̱mi̱lan.

Di̱ne bwesi̱m naye wu kwarta a du ki̱ne a ma ki̱mi̱n nabwen

a la bwesi̱m naye wu ki̱ni kwartamu.”

28Ki̱ka̱ngu kebu, ni kau yinang bwesi̱m Kwamam we bwa̱ki̱ku yinang Yichaku. 29We ki̱dang ki̱ku, n chi bi̱bu ni ma nangangu ki̱ni Fi̱ki̱m Kwamamu, ni nwe riye a fa̱li bi̱bu ki̱baddu ni bunti̱ yili̱ni̱mu yinangu n Yichaku bwe ni̱bu a bwa̱u ya̱me, a nwe riye we Yismel bwe ka̱be naye.

30Aya ya̱m Kwamamu a fwa ko, “Ti̱chaku ka̱be naye n ti bwe ko, di̱ne bwe ka̱be naye a ne chau kula n ti bwe neelo.” 31Di̱ne yiko kebi̱mi̱m, kwartabu n ti nati̱bu, n chi̱ni n ke bwesi̱m ka̱be nayemu aya n chi̱ni bwesi̱m ne lo, bi̱bu n Kwama a yiu di̱ne keku bi̱yili̱mang.

Currently Selected:

Ka̱la̱tiyam 4: Tula

Highlight

Copy

Compare