Afisam 1

Di̱siir Bulus

1M Bulus fandu Yesu we ki̱ke Kwama, a tum ni̱bu bunti̱ki̱m Kwama a Afisa mi̱n lwangi̱n di̱du, ka nang chikiye ni̱bu bi̱bu ki̱bunti̱ Yesu Masiya ki̱ni ni̱ri diini̱mu. 2Li̱me n ti li̱mangu ki̱bedu a Kwama Te n ti Tewuduwe Yesu Masiyangu a swe ware n ti chi̱n.

Delaki̱ku a fi̱ki̱m we Yesuwe

3Dela Kwama, n ki̱n Te Tewuduwe Yesu Masiya! N Ki̱n a dela ni ki̱ni chi ti̱yilitu nabwen ti̱tu a bwa diyetu ke a maka chi̱ni, ni dwiyen a Fi̱ki̱m Kwamam. N ki̱n a ma ti̱tu yo a kwarka chi̱ni n ti Masiya.

4N ki̱n a mi̱la chi̱ni, a sutu chi̱ni we tile bi̱rke yo a kwarka chi̱ni n ti Masiya, n ki̱n a ma yiko ko ke ni kau ni̱bu yinang ki̱ni̱m bi̱bu a ne der we bwim. 5N Kwama a tu a do feredi ka yiu chi̱ni ni kau bwesi̱m ki̱m a di̱n Yesu Masiya. N ki̱n a do ka madi yiko di̱ne a li̱m ki̱mi̱n we ni̱ru ka madi yiko. 6Di̱ne yiko ni dela Kwama di̱ne nabwe li̱me wu a dwiyen kiye, n ki̱n a kur nimi̱ne n chir bi̱bu niyang ti a ba̱la̱ng bwe ni̱re komu. 7Di̱ne bwa Yesuwe, n chi̱ni ni ya tuku we la̱n ki̱letinu. Bwa wu a tur wa̱re wu n Kwama a du nimi̱n ki̱leti chireyu di̱ne ki̱tuumu bweko a kuri̱mu. 8N ki̱n a yung ni li̱me ko, a yo n chi̱ni ni kabbi ki̱ni kasi no bi̱bi̱le duum kasani̱m n ti yingku.

9N Kwama a yo ni yim ti̱lairi ni̱r ki̱nitu n ki̱n a do we ya̱m Masiyamitu, doki̱ku ka riin furi mwen di̱yili̱n ki̱nu. 10N ki̱n a do we ni̱r ki̱nu ko ka ki̱swi a lame, ka mur chitu a diitu n ti ti̱tu a ti̱miti kwang a wume dukan Masiyane. Kanang chikiye, kwali̱n chi̱nu ki̱ni kwang.

11Di̱ne kwarkaki̱ chirengu n ti Masiya a yo niyang kabi wiinangu, n Kwama a sutu chi̱ni we di̱n Masiyanu ni kau ni̱bu ka ya ki̱ti̱me we kula komu, n ki̱n a do ya̱m bi̱bu feredi, yinangu n ki̱n a ke ka madangu. 12Di̱ne ke n chi̱ni ni̱bu Yafudam bi̱bu niyang mwe yo ni̱re a di̱Masiyamu, ni dela ki̱n di̱ne dwiyen kitu. 13We di̱n Yesunu ti̱kau ni̱bu Kwamam we ki̱dangu ta nwe ya̱m bi̱li̱m Kwamam bi̱bu a be chimi̱ne ki̱ni yukumu. We ki̱dangu ta ke bi̱yili̱mu we di̱Masiyangu, n Kwama a ni chi̱n Fi̱ki̱m ki̱mu yinangu a bwa̱u ka ni chi̱nangu. Ti̱tu a kau yinang di̱mwar di̱du ki̱yungdu n ti̱n m bi̱ki̱ni̱m. 14Fi̱ki̱m Kwamamu nang chi ti̱yoritu ki̱ni chi̱ni dukanu ko n chi̱ni ni yiu chi n Kwama a bwa̱u ka ni̱nidite. Ni swaan ti̱n ko n ki̱n a tu chi̱ni ni kau bi̱ki̱m ni̱bu. N ki̱n a ma yiko ko ke n chi̱ni ni dela ki̱n ni ri̱kati̱ ki̱n.

M Bulus a twa̱ba̱buni

15Di̱ne yiko, feredi n nwe yinangu keku bi̱yili̱mang changu a ti ki̱ri̱ng we di̱n Tewuduwe Yesunu, n ti yinangu ti̱mi̱la ni̱bu Kwamamu kasi no bwalengu. 16Mang dubu wanaki̱ Kwamangi kwadu mi̱n madu di̱ne chi̱n, mi̱n yo chi̱nu we twa̱ba̱ku mangi kwadu, mi̱n madi yiko mi, 17ke Kwama Tewuduwe Yesu Masiya, Te wu a lachi ki̱ni dwiyene, a nang ni chi̱n Fi̱ki̱m ki̱mu bi̱bu a yingki̱mu, a wudu chimi̱nti̱ yingku ke ti̱dwiyen we swaan ku Kwamangu. 18Ti̱nti̱ne, mi̱n twa̱ba̱bunitu mi Kwama a yo ti̱ri ki̱ni swaanku we ni̱tu chi̱ntu ke ti yim chi ti̱yilitu n Kwama a yo chimi̱nitu. Mi̱n baddu ta swaan ti̱n kulitu n ti dwiyentu ta yaditu, ti̱tu n ki̱n a ni ni̱bu ki̱mitu.

19Mi̱n twa̱ba̱bunitu mi Kwama a yo ti̱swaan dwiyen dukan ki̱ni ti̱tu a su ki̱nanti̱ng di̱ne chi̱ni bi̱bu niyang ke bi̱yili̱m a di̱Masiyatu. Di̱du dukan nang di̱diini̱n n ti di̱du a bwi chireyinu. 20Dukan di̱du n nang di̱du n Kwama a kukki̱n Masiya ki̱n we furi̱nu, a yo ki̱n a ki̱di̱ng mati̱nang we kang ki̱yilang Kwamangu we ti̱ti̱ni bwaditu.

21Ki̱ka̱ngu n ki̱n a la ka nang wuwule maiye n ti ka ti̱ti̱le mati̱ne n ti ka di̱di̱le dukane n ti ka wuwule tikake n ti kasi no ti̱ti̱le we ti̱ti̱ni ti̱tu n ti ti̱ti̱nitu ki̱beditu. 22Ti̱nti̱ne, n Kwama a du kanang ti̱ti̱le chiye a fa̱la̱ng Masiyang. A yo ki̱n a kau tikake wu a chiti kwange, ke ni̱bu bunti̱ki̱mi̱mu a nwe ta̱ma̱ng mati̱n kitangu. 23Nibu bunti̱ki̱mu yinang bwi Masiyai. M Masiya wu a ri kasi no bwa̱le, a riti̱ ni̱bu bunti̱ki̱mi ki̱ni dukani yiko.

Currently Selected:

Afisam 1: Tula

Highlight

Copy

Compare