3 Yowana 1
1
Di̱siir
1M mi̱na Yowana sele we seli̱bu, mi̱n mwal mi̱nu Ka̱yus, m mun wu mang mi̱lan yinange.
2Fati̱mi, mi̱n twa̱ba̱ mi̱n bunitu mi ke n ya li̱mang we ka ti̱ti̱le chiye, yinu mwan yati̱ li̱mang bwiyangu yinang yinangu mwan ti we fi̱ki̱m Kwamangu. 3M ma furi mwemwen yinangu bi̱kamu kebu a ki̱lawe a fwami yinangu keku bi̱yili̱m mwangu a ti ki̱ri̱ngangu n ti yinangu mun bunti̱ da wa bi̱yili̱me. 4A ne chi ki̱ni furi mwemwen a la chiye we, ka n nwe bwesi̱mi̱mu ki̱chakakku we bi̱yili̱me.
Ni̱bu a wer Kayu
5Fati̱mi, mun ma nangangu yinangu a dakan naba bunti̱ke ka madangu, mun madu di̱ne kebi̱bu n ti bi̱bu n chi rungkomu. 6Ni̱bu bi̱bu mwang maka chimu, ki̱fwa ni̱bu bunti̱ki̱m bi̱bu a fimu mi̱n ki̱duum mi̱laki̱mu mwang yung chi mi̱nangu. N chakakku mun maka ki̱duum ni̱bu bi̱bu we yayu chi tiyangu ka li̱ma Kwama ka nwe ta̱ma̱ngu. 7Ni̱bu bi̱bu ki̱chiru di̱ne di̱mwar ya̱m Kwamame, a yibu ti̱kan chi we ni̱bu a yimbu Kwamamu. 8Di̱ne yiko, a dakan ni yiu ki̱duum ni̱bu bi̱bumu, ke a yung n chi̱ni fati̱bu nangang wuyile.
Diyotarifu n ti Di̱mitriyu
9M mwal ni̱bu bunti̱ki̱mu mi̱n ya̱m bi̱bu aya n Diyotarifu wu ti̱kuran kitu a ki̱la baku dwiyenange, a ko a yibu ya̱m bi̱bu. 10Di̱ne yiko, ka n yange, ma kwa̱l chi ti̱laiyiri kitu, n ti ya̱miyu n ki̱n ki̱fwaradu a li̱mbi̱li̱me a dutu chi̱rentu. A titi̱bu we ti̱tu, n ki̱n a yibu kebu ni̱bu bunti̱ki̱mu, yinu a keti̱bu ko wuka nii a yiu chi. N ki̱n ki̱kaka bi̱bu ki̱baddu kama makaki̱mu.
11Fati̱mi, bunti̱nu da wu a lebe we, nang ma ti̱yilitu. Nii wu ki̱tum yile n wu Kwama, aya wu ki̱ma chi a lebite a yimbu Kwama. 12Ka nang wuwule niye ki̱fwa ya̱m bi̱bu a lelem we dur Dimitiriyu, dako ki̱fwan ki̱yungdu n ki̱n nii wuyile. Ni̱n ni̱n fwa ti̱nu, m mun n yim chi nang fwa bi̱yili̱m.
Di̱siiru a swan mi̱ni̱n
13Ya̱mu mi̱n baddu mang fwa mi̱ni̱mu nabwen aya ka lachi ni tekadu kabu n ti kabu n ti ki̱ku mang mwalumwalengu. 14N yo ni̱ru mang ya bwa di̱mune ke ni kukan kabu n ti kabu, ni fwa ya̱mu. 15Li̱mangu a swe n ti mun. Fati̱bi̱ mumu a fimu ki̱siintedu. Sii miti̱n fati̱bu chi̱remu we bwakomu.
Currently Selected:
3 Yowana 1: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.