2 Tassalonika 3
3
Ti̱twa̱ba̱ nimi̱n buni
1Mang swan ya̱mi ying kebi̱ mi̱m, ti̱twa̱ba̱ ni̱mi̱n buni ke ya̱m Kwamamu a ti̱rani daatu, a yati̱ dwiyentu yinangu a ya we di̱ chi̱nengu. 2Ti̱twa̱ba̱ bunitu ti̱nti̱n ke Kwama a yu ni̱n we ni̱bu muli̱ni̱mu n ti bi̱bwilanmu, di̱ne n chi a kebu bi̱yili̱mu ki̱ni kwang.
3Aya n Tewuduwe naba yile, ka ru chi̱nu, ka yu chi̱nu we ni wu bwila ka nang chikiye n Setan. 4Ni̱n ke ko Tewuduwe we yichiyu ki̱maka chi̱nu ti̱ma chi nang fwa chimi̱nitu. Ti̱nti̱ne a ne ta twi bwi ta chakakku.
5We yiko, Kwama a yo n Tewuduwe a yung chi̱n yinangu Kwama a mwan a mi̱la chi̱nangu n ti muku ni̱rangu ki̱chiredu a di̱Masiyangu.
Ki̱kure we da wu a dakane
6Aya ki̱ka̱ngu kebu, ni̱n ngau chimi̱n ki̱kure a di̱n Tewuduwe Yesu Masiya, ti̱bwa̱lu we n ti sulabi̱bu a babbu nanganmu, wu a bunti̱bu yili̱ntu ta ya a di̱ ni̱netu. 7N ti̱n n ti̱fwan ti̱yim a dakan ta bunti̱ nani niyu, di̱ne nang yung chimbu sulai ka fwitiye. 8Ti̱nti̱ne, nang chabu chabti li̱mang a fa̱la̱ng wuka niyang, aya ni̱n ma nangangu ki̱ni dukan ni̱n di̱ne ke ni̱n yo wuka nii mi̱nu ki̱dada̱ku we. 9N ke ko ne nang medu nang bi̱u chabti̱te, aya ni̱n baddu nang miya chimi̱nu yinangu ta ni̱n yadangu. 10Kasi no n nang ki̱dangu n ni̱n no we n ti chi̱nangu, ni̱n ngau chimi̱n ki̱kure “Ko ka nang wuwule niye wu a mabu nangange, a ne yadu ka chadu.”
11Ni̱n nwe ya̱mu ko bi̱kam chimu a mwan a ma fwiti. N chi a mabu nangang ki̱kai ki̱swi chi a didi̱kuni̱n we fantiyu ni̱bu ki̱mang nangi̱niyu. 12Ni̱n fwa duum ni̱bu bi̱bu mi̱nu we di̱n Tewuduwe Yesu Masiya, ni̱n ngau chimi̱n ki̱kure, a ma nangangu a chabi ki̱ni dur chi̱n.
13Aya n chi̱n Kebu mi̱m ti̱twidu bwi we ti̱na ma nangi̱n ti̱yilitu. 14Ka wuka chi̱n a bunti̱bu chitu nang mwal we lwangi̱n di̱dite, n kawure a swaan ni wuko yinang, ti̱bwa̱lu we ware, ke n ki̱n a nwe dibwi. 15Aya ti̱ kedu a kadu kati̱re chi̱n we, aya ti̱ wuki̱mi̱n ki̱tele yinangu mwang ma kemo mi̱nnang.
Ya̱mu a swan mi̱ni̱mu
16Ya̱mu n Tewuduwe Yesu wu ki̱ni ni̱bu ki̱mu li̱mange, a chakakku a ni chi̱n li̱mangu kasi no wuwule ki̱swiye. Yam n Tewuduwe Yesu a swe ware n ti chi̱ni kwang. 17M mi̱n m Bulus mi̱n mwal chimi̱n di̱siir di̱du m mi̱n m mi̱fwan ki̱ni fa̱la̱ng mang mi di̱mwal “Bulus” N nang ki̱swi mi̱n mwali̱n ka nang di̱di̱le lwangi̱ne. 18Li̱me Tewuduwe Yesu Masiya a swe ware n ti chi̱ni kwang.
Currently Selected:
2 Tassalonika 3: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
