2 Koronti 10
10
Yinangu m Bulus a so dur ki̱nu we ya̱m nangamangu
1M mi̱na Bulus m mi̱fwan, mi̱n wana chi̱nu mi̱n wu ni̱bu ki̱yidu ko, m mi̱ni “bubbuku” yo m mi̱n we ware n ti chi̱ne, aya “naba runni” yo mang newe n ti chi̱ne. Mi̱n fwa chimi̱n ya̱mu ki̱ni ni̱r ki̱bune n ti li̱me wu a di̱Masiya, 2mi̱n wana chi̱nu, ti̱kedu m ma chimi̱nu di̱kulan we ka n yange, di̱ne n yim ka n yange mang wela bi̱bu ki̱yidu ko chi ni̱n maditu, chi ti̱ti̱nimu. 3Kasi ki̱ku ni swedu a ti̱ti̱nitangu, kunnu ni ngaddi̱nu n ke di̱du a ti̱ti̱ni̱n. 4Nangki̱n, kuli̱n kunni̱n ni̱nu n ke di̱du a ti̱ti̱niin, aya di̱du a dukan Kwaman, nang kuli̱nu ki̱wur dukan la̱n Setanu.
5Ni̱n wur ya̱mi yikusiyu n ti chi ka yo ni̱bu a ne yim Kwamamu, ni̱n yo ti̱kuran ti̱bwilai chitu a ne dukan we, ni̱n yo ni̱bu ki̱bunti̱ yilang Masiya. 6Kasi ki̱ku ta yung ko ti̱ma kwa̱mbi̱rangu, ni̱n do bwi nang wela kanang wuwule niye wu a bunti̱bu miyaku mange, wu ki̱fwa yam bi̱kusi̱m we dur mi̱ne.
7Ti̱da̱ng chitu yinangi kwa̱rikwa̱riyang. Nii ka yidu ko n ki̱n wu Masiya a ma ti̱kan ti̱kuran, ka swaanu ko n ni̱n m bi̱tti̱ Yesu Masiya yinangu n ki̱n wemi̱nangu. 8Ka kadu yinangu mi̱n ngau kwiye nabwen ki̱ni dukanu n Tewuduwe a ni ni̱n ko ke ni̱n ru chini̱nu, n ke di̱ne ke a kai chi̱ne aya ke a mu chi̱n. A ne fi mang nween dibwiye we. 9Mang babu ta da̱ngdu yinangu mi̱n yo chimi̱n tayi ki̱ni lwangi̱n mitang.
10We bi̱kamu ni̱bu ki̱fwadu ko, “Lwangi̱n Bulusitu, a ma tureng ki̱ni dukan, aya ka n ki̱n we n ti chi̱ni n ki̱n n ki̱fwane, n ki̱n n ke naba ti̱welane, ti̱nti̱ne ya̱m ki̱mu n ke ti̱kan chi.” 11A dakan duum ni̱bu bi̱bi̱mu ka swaanu ko a ne lakakuwe chi nang mwalitu n ti ti̱tu nang maditu ka n ni̱n we ware n ti chiye.
12N ni̱na bi̱wure! Nang lwebu nang swa̱ka̱ dutu ni̱ntu n ti ni̱bu ki̱ ngau kwiye ko chi la ka nang wuwule niyemu. Ni̱bu bi̱bu ki̱swa̱ka̱ bwiti chiyu n chiyu chifwan, ki̱yung bi̱neku we dutu chitu, ki̱baddu ka yindu ka n wure a la chiye. N chi di̱bu.
13Aya a ne nang ngau kwiye ka nang yabu wuka dungkwale, nang titi̱nuwe we fi n Kwama a yo ka fi̱ri̱nde, ti̱tu a mur chi̱ni kwang we mure. 14Ti̱nti̱ne nang ngabbu kwiye di̱ne nangang nangu a twaiti̱ fi n Kwama a no nibu ko ni̱n ma nangang we. Di̱ne yiko nang yabi̱bu wuka dungkwale yinangu nang ya bwa di̱ chi̱ne ni̱n ma di̱mwar ya̱m bi̱li̱m Masiya.
15Ni̱n ngau kwiye aya nang yabi̱bu wuka dungkwale, nang twaiti̱bu nangang wuka niyang. Aya ni̱n yo ni̱ru ko keku bi̱yili̱mang changu ka ni̱n sudusube. Nang ki̱swi nangang nangu we tibe chi̱n ka ti̱rande. 16Yinu nang mang di̱mwar ya̱m bi̱li̱mi̱nu we bi̱nti̱tu a kakku n ti chinitu. Nang babu nangangu kwiye ki̱ni nangangu wuka nii a tu a ma a bale wukongu 17Aya yinangu bi̱mwali̱mu ya̱m Kwamamu a fwangu, “Kanang wuwule niye, wu ki̱baddu ka ngau kwiye, a ngau kwiye ki̱ni Tewuduwe.”
18Nangki̱n wu ki̱wer dur ki̱ne, ni̱bu a kebu ki̱ni ki̱n, kana nii wu n Tewuduwe a wer ki̱ne.
Currently Selected:
2 Koronti 10: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
