1 Koronti 3
3
Naba nangang Kwamang
1Kebu mi̱m, mang mebu mang fwa chimi̱nbu ya̱m yinang bi̱bu Fi̱ki̱m a ti chimi̱n kaki̱m, aya mi̱n fwa chimi̱nu yinang ni̱bu ti̱ti̱nim, yinang bi̱bu a tibu rudu we di̱n Masiyani̱m. 2N bunti̱ ki̱ni chi̱n yinang bwesi̱mu ki̱ka̱r ya̱ri̱m, a newe yinang bi̱bu ki̱chau chabti̱m. Di̱ne ta lambi̱ bi̱bu ka chau chabti̱mu. Lanta ki̱ka̱ng ta lakabu n ti bwesi̱mu. 3Di̱ne n we chikku ta dubu da bwiye, ka ti̱kube chi a niitu, ti̱ma di̱kulanu n ti yichiye, a yung ta dubu da wu a bwiye. Ti̱nti̱ne ti̱chakakku ki̱ni da bwiye. 4Ka wu a yi ko, “M mi̱n mi̱bunti̱ Bulus,” Wuka ko, “M mi̱n mi̱bunti̱ Afolos,” Ki̱chitu wu a yungbu yinangu n ti̱n n bi̱u ti̱ti̱niyanga?
5Ti̱yalin wure ki̱ni Afolos? M Bulus n wure? N chi n ke kana ni̱bu nangang Kwama ma? N chi n ke ni̱bu a ma chimi̱n wa̱re ta ke bi̱yili̱m a di̱Kwama ma? N kawure ki̱ma nangangu yinangu n Tewuduwe a ke ki̱mi̱nang. 6M mi̱n wu mang mwe mang ma chimi̱n di̱mware, yinang wu a fi dume, Afolos a miya chimi̱n ya̱m Kwamamu nabwene yinang nii ki̱kur mwe, aya n Kwama nang wu ki̱yo ni̱bu ki̱dwiyedu we Fi̱ki̱me.
7Di̱ne yiko, wu a fiye, n ti wu a kur mwe, n ke ti̱kan chi, aya kana Kwama wu a yo chitu a dwiyene. 8Wu a fiye n ti wu a kur mwe ki̱ma nangang sureng. N kawure ka ya ki̱ti̱me sure ko. 9N ni̱nni kwang ni̱ma nangang Kwamang yinang bi̱bu ki̱su kali̱m, n ti̱n yinang kuu Kwama, nangang fa̱li Kwamang n ke nangang niyang.
10Di̱ne yili̱n li̱me Kwama, m mwe n ru tamme we ya̱m Kwamamu mang fwa chimi̱ni̱mu. Wuka nii ka chakakku we fi mang ti mi̱ne, ka nang wuwule niye ka yim dum mukki̱mu ki̱madi̱mu. 11Aya a ne wuka nii wu ka ki̱ladu ka ruti̱ wuka tamme, ka la wu n Yesu Masiya a rubbe we.
12Wu ka chakakku ki̱ni mukku we tamme wu ka ki̱ni si̱nariya ka asurfa ka kali yiyiliye ka ti̱ti̱niye, ka swa̱ki̱ ka rudenge ka mwariye. 13A ne ti ke, ni̱bu ka swa̱ka̱ nangi̱n ti̱tu ki̱ni ki̱rang, chi ki̱rang ka twide a yung a mabu ki̱kwi, ka nangang mwangu a twiye, a yung n twiyan ki̱diya. 14Ka nangangu nii a mu we tammengu a twibe, n ki̱n ka ya ki̱ti̱me. 15Ka nangi̱n ni̱tu a twiye, a yung bunitu a tau nii wuko. Kasi ki̱ku n ki̱n ka swidangu, aya ka kaddu yinang wu a su a ki̱range.
16Yoye ta swaanbu ti n ti̱n se Kwama, ka nang chikiye fi swe Kwama? Ta yimbu ti Fi̱ki̱m ki̱mu we ni̱tu chinta? 17Aya ni ka kai se Kwamange, n Kwama ka kaiti̱ ki̱nu, di̱ne kan Kwamanu fi wauwade, aya n chi̱n nang kan Kwamamu.
18Ti̱buti̱du yichiyu we, Ka wuka nii ki̱kudu ko ki̱kasane ki̱ka̱nge, a mar dur ki̱nu yinang di̱r ke a kau wu a kasane. 19Nangki̱n yingku ti̱ti̱ni ti̱tangu kana di̱ttu we di̱Kwama. Di̱ne a mwal ko, “Ki̱tau ni̱bu yingkumu ki̱ni furali chitu.”
20Ti̱nti̱ne a mwal ko, “Tewuduwe a yim ko ti̱kurantu a ni̱bu yingki̱miti kwang ka ti̱kusi.” 21Di̱ne yiko, ngaddu kwiye we bunti̱ki̱ wuka niyangu mwiko mwang nabi̱du, n ti̱n ki̱ni kwang ti̱ma bunti̱ki̱ku. 22Ka m Bulus, ka n Afolos, ka n Kefase, ka ti̱ti̱niye ka ti̱kuriye, ka bwa, ka chi ki̱ka̱nge ka ti̱tu a kakkiye, ka ti̱ti̱le chiye n ti̱u chi̱n.
23M ti̱n m bi̱u Masiya, m Masiya wu Kwama.
Currently Selected:
1 Koronti 3: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
