1 Koronti 16
16
Makaku di̱ne ni̱bu bunti̱ki̱m
1Ki̱ka̱ngu we ya̱m makaku ni̱bu bunti̱ki̱mangi̱mu ti̱ma yinangu mang yii bi̱bu a Ka̱latiya mi a mangu. 2Kanang wuwule difi̱kare, n kawure a nang yo ti̱kan chi, yinangu dukan ki̱nu we mi̱nangu, ti̱yanduwe ti se mang be. 3Ka n yange, ti̱sutu bi̱kam we tibe chi̱n, mang nika chi lwangi̱n ti̱tu ka maka chi̱ntu, yinu n chi ka yika Wurchalima. 4Ka a le mang ya ti̱ne, yamang yote chi̱nu.
Ya̱mu m Bulus a swammi̱ni̱mu
5Mang ya chimi̱n siram, a kutengu mang kana ti̱m Makidoniyamu. Di̱ne n tu m bwa̱u we ni̱ru mang ya Makidoniya. 6A ne mang swedu nabwen we bwa di̱chine, ka sa̱na̱ng ka tai ti̱nu we bwako. Ka yati̱ yoye we bwa mang yade kwang. 7Aya mang babu mang sudu, mang kubu chi̱n. Di̱ne no mi̱n baddu mang ma yikai diti n ti chi̱n ka Tewuduwe a kemiye. 8Aya mang tidu we Afisa ka lami̱nti̱ di Fentikose.
9Nangangu a wuden we fi nabwen, ni̱bu nabwen ki̱bedu kasi ki̱ku mi̱ni ki̱ni kati̱bu nabwenangu. 10Ka Timoti a benge, a swe n ti chi̱n a nwedu tayi we. Di̱ne n ki̱n ki̱ma nangang Tewuduwe yinang kangu mi̱n madangu. 11Di̱ne yiko, ti̱kedu wuka nii a swa̱badu ki̱n we, ti̱yo ki̱n li̱mang a be fi a di̱ mi̱ne, di̱ne mi̱n da̱ng wa̱re ko n ti kebi̱bu ware.
12Nangki̱n n ti ke chire n Afolos ti̱n, n wana ki̱n mi a be bwa di̱ chi̱ne ware n ti kebi̱bu, aya a kebu ka bedu ki̱ka̱ngu. Ka bedu we ki̱swi n ki̱n a da̱ng a da̱nge.
Ya̱mu a swan mi̱ni̱m
13Ti̱swengi doku bwiyang, ti̱ti ki̱ri̱ng we keku bi̱yili̱mang changu, ti̱ kunka yichiyu, ti̱madu ti̱kali we. 14Chitu ta maditi kwang, ti̱ma ki̱ni mi̱laku. 15Kebu mi̱m, ti̱yim ni̱bu a mwe a wo ki̱ti̱m a ti̱m Akayamu nang di̱kur lon Yistifanuse, n chi a ni yichiyuki̱maka ni̱bu bunti̱ki̱mu. 16Mi̱n wana chi̱nu, ti̱ma duum ni̱bu bi̱bi̱mumi̱n kwa̱mbi̱r ki̱ni ni̱bu niyang nwe riye waremu. 17N nwe ta̱ma̱ng beku Yistifanusengu n ti Fatunatus, n ti Akakus, wu a kammi yinangu n ti̱n ta benge. 18Di̱ne n chi a ribe mi ni̱ri ki̱ri̱m, yinangu n chi n ti chi̱nangu. Duum ni̱bu bi̱bi̱mu ti̱ni chi dwiyen.
M Bulus a swan di̱siir ki̱nu
19Ni̱bu bunti̱ki̱mu a ti̱m Asiyamu ki̱siite chi̱nu. N Akila n ti Biriskila, n ti ni̱bu bunti̱ki̱m bi̱bu ki̱muradu a lo chimu, ki̱siite chi̱ni kwang we di̱n Tewuduwe. 20Kebi̱bi kwang ki̱siite chi̱nu. Ti̱siti̱ kebu chimu ki̱ni kwarkaki̱ wauwadang. 21M mi̱na Bulus, mi̱n mwal di̱siru ki̱ni fa̱la̱ng mang. 22Kanang wuwule niye wu a mi̱labu Tewuduwe, a kau ki̱mi̱n yo yii. Bengi daatu Tewuduwe. 23Li̱me Yesu Tewuduwe a swe ware n ti chi̱n. 24Mi̱n mi̱la chi̱ni kwang a di̱n Yesu Masiyanu. Amin.
Currently Selected:
1 Koronti 16: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
