Injil 27: Zaira Kalam Forisiti
Forisiti
Zaira Kalam sifaraḳan oilo, Asmani Kitab Fobitro Injil Shorifor shesh sifara. Alla Pakor hukume ou sifara leḳsoin, Hozrot Isa al-Mosir mayar sahabi Hozrot Hannan (ra:). Hozrot Isae behesto toshrif neoar bade 60–65 bosoror ḳalo ikan leḳa oise. Ou sifara leḳar shomoy al-Mosir ummot oḳlor ufre kub beshi zulum-ottasar asil. Ou halotor maze mumin oḳolre asha-utshaho zugani, sobor ḳora, ar ou zulumor maze-o imane mozbut roia Allar dorbaror furuskaror lagi zuit roite foramish deoa oise. Ou sifarar loge agor zomanar nobi Hozrot Danial, Hozrot Hezkil ar Hozrot Zakaria (a:)or kitabor loge bout mil ase. Er maze leḳa ase, kiamotor age mumin oḳlor hal-hokikot kila oibo, ḳoto beshi zulum-mosibot oibo, bade Alla Pake Hozrot Isa al-Mosir usillae lannoti Shoytanre ekkebare binash ḳoriliba, ar ou shomoy zera imane mozbut roiba, tara Allar dorbar taki furuskar faiba.
I sifarat faiba, shatṭa Isayi zomator gese siṭir bashae boyani leḳa ase. Ou shato zomator ṭikana oilogi, hou amolor Ruman bashshair Asiya desh, bortoman Turoshko deshor fochchim elaḳa. Zomator hal-hokikot buza, ar amra zania hari nizor zindegit amol ḳora zorur.
Ou sifarat bout batuni nombor leḳa ase. Ou nomboror kisu mani oula oito fare:
2 = hokor befare shakki deoa; hamesha duizonor shakki zorur.
4 = Allar arosh ar ou befare; erlagi Kaba Shorif oilo sair kuni, zate ou arshor loge mil deḳa zae.
6 = manush ar gunagar manshor befare; soy nombor din manush foyda, ar soy oilo fobitro nombor 7 taki kom. Erlagi 666 buzae, kiamotor age asta duniare be-fote nibar lagi ze dorjal aibo tar namor marka ba nombor.
7 = Allar fobitro nombor, ḳas ḳori tan nizor furafur ḳamor befare; shat dine asman-zominor hoḳolta foyda, ou sifarar maze Allar furafur fobitro prozar shat zomat, ar tan furafur gozob ḍalibar shat nomuna bar bar ullek kora oise.
12 = Allar ḳas proza; Hozrot Isar age asil Boni Israilor baro ḳandan, bade Hozrot Isar barozon ḳas sahabi, erlagi 12+12=24 ar 12×12=144 buzae, hoḳol zomanar Allar ḳas proza oḳol.
1000 = asta dunia ba fura eḳ zug; erlagi 144000 buzae hoḳol zomanar ar asta duniar Allar ḳas proza oḳol.
1260 = shat bosoror ordeḳ din. Ufror shat deḳba.
Zaira Kalam sifarar maze nanan nomunar doroshonor mazdi, otit, bortoman, bobishot hoḳol zomanar ḳota leḳa oise. 1 ruku 19 ayato ase, “Erlagi-u tumi oḳon zeta deḳrae, er age zeta goṭise ar bade zeta goṭibo, ita hokkolta tumi lekia to.”
Ermaze ase,
(1) Sahabi Hannanor behesti doroshon 1 ruku
(2) Shato zomator lagi ufodesh 2—3 ruku
(3) Allar fobitro toḳtor doroshon 4—5 ruku
(4) Gozobi shatṭa sil-sappoṛ ar shatṭa shinga 6—11 ruku
(5) Shoytan danobor loge Allar ḳas bondar zuddo 12:1—14:5 ayat
(6) Aḳeri shatṭa gozob 14:6—16:21
(7) Naforman Babil ṭaunor bisar 17:1—19:10
(8) Aḳerator bisar 19:11—20:15
(9) Noya foyda 21—22 ruku
Currently Selected:
Injil 27: Zaira Kalam Forisiti: sylL
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.