Asmani kitab: Sulaimani misal 31
31
Lemuel razar buli
1Lemuel razar buli, muloto tan maʼe tanre ou buli hikaisla:
2Ore amar shuna fut, amar feṭor fua,
O amar mannotor fut, tumare ḳoitam kita?
3Tumar zuankir bol-shokti, dio na beṭintore,
razare-o binash ḳore, bol dio na itare.
4Raza oḳole shorab ḳaoa, ṭik nae re Lemuel,
shashonkarir modor nisha, bala nae re Lemuel;
5mod ḳaile to bulizibo, ain-ḳanunor ḳota,
dukir ḳota faurilibo, bisar ḳorat gia.
6Moron fote ase zara, tarare mod gilao,
monor ḳoshṭot ase zara, erare shorab dilao.
7Shorab ḳaia nizor obab, tara faurilauk,
nizor monor duk-koshṭo to, dilo na taḳouk.
8Mozlumor fokke muk kulo, tarar lagi mato,
nizor ḳota ḳoite zarar, kunu ufae nae to.
9Gorib, duki, mozlumor dae, tumar muk kulo,
obabi ar dukir lagi, hok bisar ḳoro..
Gunala bou
10Gunala bala bou, zuṭe ḳar ḳofalo?
Moni-mukta taki tain dami.
11Tainor ufre borosha, zamaie ḳoroin asha,
zamair labor oy na ḳomti.
12Nizor zamair lagi, hara zindegi bori,
burai saṛa ḳoroin bala.
13Suta-foshom zugain, atdi kafoṛ banain,
kushie ḳam ḳoroin hamesha.
14Ila bou oila to, befarir zazor moto,
bidesh taki kani anain.
15Zuit ḳoroin fotabala, foribaror ḳana-fina,
ḳamla beṭinre ḳani bilain.
16Loar age zomi, deḳoin zasai kori,
nizor ṭeḳadi angur folain.
17Tain ḳomor bandia, ḳam ḳoroin mon dia,
ator shoktidi kam deḳain.
18Deḳoin nizor souḳdi, bebshat lab oise ni?
Nibe na batti raitor bala.
19Atdi tula doria, sorkire guraia,
anguildi hazaita suta.
20Goribor bae saia, dein at baṛaia,
maya ḳoroin tain ḳangalre.
21Foribaror manshor dae, shito kunu sinta nae,
hokkolor gorom ḳafoṛ ase.
22Bisanar saddor tain, nize nize-u banain,
findoin tain ḳandani shaṛi.
23Ṭaunor geiṭor samne, deshor murobbir loge,
zamaie boia bone ijjoti.
24Shundor ḳafoṛ banain, banaia besilain,
ḳomror belṭ besoin faikari.
25Tan lebas oilogi, ijjot ar bol-shokti,
nisintae roin hara zindegi.
26Muk kulia-u tain, giandi matilain,
hukum dein ḳoria maya.
27Kial ḳoroin shobre, goror shob bishoyre,
menot ḳoroin alshi saṛa.
28Tan huruttainte ḳoy, “Tumi shuki nichchoy,”
zamaie-o ḳoin tarif ḳori:
29“Duniat bout ḳoina, tara-o gunala,
hoḳlor maze shera tumi.”
30Rufor zilkanidi, ḳora oy dukabazi,
shorilor shundor roy na re.
Oile ze beṭie, Mabudor ḍore sole,
manshe tainor tarif ḳore.
31Nizor ator ḳamor, faona fol tainor,
tan faona ijjot deoa ouk.
Ṭaunor geiṭor samne, shomazor manshor maze,
tan ḳame-u tan tarif ḳorouk..
Ḳotom..
Currently Selected:
Asmani kitab: Sulaimani misal 31: sylL
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
