Tourat 3: Lebian 24
24
Serag danir kezmot ḳorar hukum
1Bade Mabude Musa nobire ḳoila, 2“Tumi Boni Israilre hukum deo, serag danir serag oḳol hamesha zalaia raḳar niote, tara zoytun sesia ḳaṭi tel banaia tumar gese loia aito. 3Ar Kaba goror bitre shahadot shondukor fordar bare, imam Harune hainja taki fozor forzonto serag danir serag oḳol zalai raḳba. Oarishor for oarish dori hor-hamesha ita zari roibo. 4Mabudor samne toa ou ḳaṭi shunar serag danir serag oḳolre tain hamesha zae-zoton ḳorba.
Kaba goror fobitro ruṭi
5“Ar huno, moyda dia baro ḳan ruṭi banaio, forteḳ ruṭi oibo dui sher moydar. 6Banaia ou ruṭire Mabudor samnor ḳaṭi shunar ṭebulor ufre soyḳan soyḳan ḳori dui laine hazai toio. 7Forteḳ lainor ruṭir daro ḳaṭi loban-agor toio. Toia nishana hishabe ruṭir bodla ou agordi Mabudor name agunit deoa kurbani adae ḳorio. 8Forteḳ Zummabare Boni Israilor fokko taki fobitro ou ruṭire imam sabe Mabudor nozoror samne hazaia toiba. Tarar ou ruṭi deoa to hor-hamesha siroḳal zari roibo. 9Bade imam Harun ar tan bongshodore fobitro Kaba goror shimanar bitre ou ruṭi kaiba, ita oilo Mabudor name agunit deoa kurbanir zinishor maze ek kas fobitro zinish. Ita to imam oḳlor faona, ou niom hor-hamesha zari roibo.”
Kufuri mator shaza
10Boni Israilor maze ola eḳ beṭa asil, zegur baf oilo Mishori ar ma Boni Israil zatir. I beṭae ar Boni Israilor aroḳ beṭae kempor bitre maramari laglo. 11Ou shomoy Boni Israili beṭir fuae Mabudor name kufuri mat matia lannot dilo. Ita hunia manshe tare Musa nobir gese loia gela. Ou beṭar maʼr nam Shalumi, tai asil Dan ḳandanor Dibrir fuṛi. 12Ar manshe ou befare Mabudor morzi hunar lagi ou beṭare aṭḳaia toila.
13Bade Mabude Musa nobire ḳoila, 14“Amar name lannot deora ou beṭare loia kempor bare zao. Gele zeta manshe ou kufuri mat hunche, tara hoḳole ogur mata atai deuk, bade shomazor hoḳol manshe fattor maria tare zane marouk. 15Ar tumi Boni Israilre zanai deo, ze manshe Allare lannot dey, tar naformanir lagi he nize-u dayi. 16Ar ze manshe Mabudor name kufuri mat matibo, tare zane marilibae. Boni Israilor shomaze tare fattor maria zane marba. He Boni Israili ouk ba tarar loge boshot ḳorra bin zatir manush ouk, Allar name zegie kufuri mat matibo, tare nichchit zane marbae.
17“Kunu manshe zudi dusra manshore kun ḳorilae, te tumra tare-o kun ḳorbae. 18Kunu manshe zudi dusra manshor kunu foshure marilae, te ogur bodla he aroḳ foshur dam dia ḳeti-furon dibo. Zanor bodla zan. 19Ḳeu zudi aroḳzonre mare, ar ou mairor lagi shorilor kunu ongor ḳeti oy, te he zela ḳeti korse, tar ongore-o ola ḳeti korbae. 20Aḍḍi bangar bodla aḍḍi bangibae, souḳor bodla souk, dator bodla dat. Hou zonor ze ongore he ḳeti korse, tar-o ola ḳeti korbae. 21Kunu foshure zane marle er ḳeti-furon dite oibo, oile kunu manushre kun ḳorle tare-u zane marilibae. 22Boni Israil ba tumrar loge boshot ḳorra bin zatir manshor lagi ou eḳoi ain zari roibo. Mono rakio, ami Alla-u tumrar Mabud.”
23Bade Musa nobie Boni Israilre ita hoḳolta zanaila. Teu ze beṭae hou kufuri matisil, manshe ogure kempor bare nia fattor maria zane marilila. Mabude Musare zela hukum disla, Boni Israile ṭik ola-u ḳorla.
Currently Selected:
Tourat 3: Lebian 24: sylL
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
