Tourat 3: Lebian 14
14
Fosa-kusṭo bemarire fak-saf
1Bade Mabude Musare ḳoila, 2“Fosa-kusṭo bemarire fak-saf ḳorar din ou niom manio. Imam sabe tare deḳar lagi, 3kempor bare gia forikka ḳoria deḳba. Tain zudi deḳoin he hasau bala oigese, 4te imame hukum diba, fak-saf oa zonor niote zita duiṭa halal faki, debdaru gasor kisu laḳṛi, esub gasor ḍeṭa ar lal suta loia aita. 5Bade imame hukum diba, futor fani taki fani ania maṭir gamlat toa fanir ufre, hou duio fakir mazor eḳṭare zobo ḳorar lagi. 6Zobor bade imame baki hou zita fakire, debdaru gasor laḳṛire, lal sutare ar esub gasor ḍeṭare, futor fanir gamlar ufre zobo ḳora hou fakir lour maze subaiba. 7Ar ou ze bemarire fak-saf ḳora oito, imame tar ufre hou lou shatbar siṭaia hari, tare fak-saf ḳoia elan ḳorba. Bade imame hou zita fakire kula zagat saṛi diba. 8Ar fak-saf bonra ou bemarie tar ḳafoṛ-sufoṛ doibo, tar gotror ar matar hoḳol sul-rum ḳamaia hari fani dia naite oibo, teu he fak-saf bonbo. Erbade he aia Boni Israilor kempor bitre hamaito farbo, oile tar nizor tambur bare shat din roite oibo. 9Bade shat dinor din hirbar tar shorilor hoḳol sul, mani matar sul, daṛi-mus, sokur buri ar gotror hoḳol ruma ḳamaite oibo. Bade tar ḳafoṛ-sufoṛ doia naia harle he furafur fak-saf oibo.
10“Bador din he furafur nikut duiṭa meṛa-baichcha ar eḳ bosoror egu meṛi loia aibo. Ar er logor dan-gomor sodgar niote he soy sher tel maḳail moyda ar eḳ faoa tel anbo. 11Ania harle tar fak-safor lagi ze imam sabe ḳam ḳorra, ein ou zonre ar kurbanir mal-samanare Milon-tambur duaror gese Mabudor samne azir ḳorba.
12“Imam sabe hou duio meṛa-baichcha taki egu meṛa ar hou tel nia dush-ḳosurir koforar kurbani adae ḳorba, ḳoria dulona kurbani hishabe Mabudor samne ita dulaiba. 13Bade fobitro Kaba goror shimanar ze zagat gunar koforar kurbani ar zalail kurbanir foshu zobo ḳora oy, hou zagat ou foshure-o zobo ḳorba. Gunar koforar kurbanir laḳan dush-ḳosurir koforar kurbanir gust-o imam sabe faiba, ita to ḳas fobitro gust. 14Ze zonre fak-saf ḳora oibo, imam sabe dush-ḳosurir koforar kurbanir kisu lou nia tar ḍain ḳanor lotit, ḍain ator ar ḍain faor buṛi angulit lagaiba. 15Bade imame hou tel taki kisu tel tan bau ator talur maze ḍaliba. 16Ar ḍain ator anguil dia, bau at taki tel tulia Mabudor name shatbar siṭaiba. 17Bade ator talur bad-baki tel taki kisu tel nia imame hou zonor ḍain ḳanor lotit, ḍain ator ar ḍain faor buṛi angulit dush-ḳosurir koforar kurbanir lour ufre lagaiba. 18Ar ator talur baki tel tain hou fak-saf oa zonor matat lagaiba.
“Ar ou nomunae tar kofora adae ḳorba, 19ze zonre fak-saf ḳora oibo, tar ana gunar koforar kurbanir foshure imam sabe zobo ḳorba. Bade zalail kurbanir foshu-o zobo ḳoria, 20dan-gomor sodgar zinishor loge milaia, imam sabe kurbani kanar ufre ita diba. Ou nomunae tar kofora adae ḳoria tar nafaki horaiba.
21“Oile ou zon zudi gorib oy, ita hoḳolta anar tofik tar na taḳe, te dush-ḳosurir koforar kurbanir lagi kali egu meṛa-baichcha ante oibo, anle imame tar kofora adae ḳorar lagi oḳṭare kurbani dia dulaiba. Ar er logor dan-gomor sodga hishabe tar ana tel maḳail dui sher moyda, eḳ faoa tel 22ar tar duiṭa ḍufi faki ba faro ante oibo, zela tar takkote kulae. Duio fakir mazor eḳṭa gunar koforar kurbanir lagi, ar eḳṭa zalail kurbanir lagi. 23Bade aṭ dinor din fak-saf oar niote he ita hoḳolta ania Milon-tambur duaror daro Mabudor samne imamor gese shomzaite oibo. 24Imame dush-ḳosurir koforar kurbanir meṛa ar ou tel nia Mabudor samne dulona kurbani hishabe dulaiba. 25Bade imame meṛare zobo ḳoria ogur kisu lou nia hou zonor ḍain ḳanor lotit, ḍain ator ar ḍain faor buṛi angulit lagaiba. 26Bade hou tel taki kisu tel tan bau ator talur maze ḍaliba. 27Ar ḍain ator anguil dia imame bau ator kisu tel tulia Mabudor samne shatbar siṭaiba. 28Erloge tar ḍain ḳanor lotit, ḍain ator ar ḍain faor buṛi angulir ze zagat dush-ḳosurir koforar kurbanir lou lagail oise, hou zagar ufre ou tel-o lagaiba. 29Mabudor samne hou fak-saf oa zonor koforar niote imamor ator baki tel tar matat ḍali diba. 30Bade hou zonor takkot mafik ana ḍufi ba faro zuṛa nia, 31imame egure gunar koforar kurbani hishabe, ar dusraṭare zalail kurbani hishabe kurbani diba. Loge dan-gomor sodgare-o diba. Imame ou nomunae Mabudor samne tar kofora adae ḳorba. 32Fosa-kusṭo bemari fak-saf oar lagi zelaḳan kurbani adae ḳorar ḳota, ita adae ḳorar takkot zerar nai, tarar lagi ou niom deoa oise.”
Feukni foṛa gor
33Bade Mabude Musa ar Harunre ḳoila, 34“Ami ze deshḳanre tumrar malikanae dimu, ou Kenan desho hamanir bade, ami zudi honor kunu goror maze nafak-feukni bemar faṭai, 35te goror malike gia imam sabre ḳoiba, amar goro nafak-feuknir laḳan kita zanu dekiar. 36Teu imame i feukni forikka ḳoria deḳat aia, goror hoḳol mal-samanare zate nafak koia elan ḳora na lage, ou niote tain malikre hukum diba, ami goro hamanir age tumar goror hoḳol mal-samana bare bar ḳorilao. Hoḳolta bar ḳoria harle tain goro hamaia forikka ḳorba. 37Tain zudi deḳoin, goror oalor kunu feuknir dag gia bitredi hamaise, ar ou dagor rong kosua ba lalṭi, 38te tain i gor taki baroi aia, goror duar shat din bond ḳori toiba. 39Ou shat din bade hirbar forikka ḳori deḳba, zudi deḳa zae, i dag oalor maze aro sitrise, 40te tain hukum diba, ou oalor dag ala fattor ba iṭ kulia hari, gau ba ṭaunor bare nia nafak kunu zagat falai dita. 41Bade asta goror bitoror hoḳol oal sasia astor tulia hari, ota nia ṭaunor bare nafak kunu zagat falaita. 42Ar oalor ze zaga taki fattor ba iṭ kula oise, hono noya fattor lagaiba, lagaia asta gor hirbar noya astor ḳorta.
43“Oalor fattor kulia falaia sasia astor tular bade, noya astor lagaia harle-o zudi oalo hirbar ola dag deḳa zae, 44te imame hirbar gia ita forikka ḳori deḳba. Tain zudi deḳoin, oalor mazor dag sitria aro baṛse, te buzba, ou goro nafak-feukni bemar ase, erlagi i gor ḳan nafak. 45Nafak ou goror hoḳol fattor ba iṭ, hoḳol astor, goror laḳṛi, hokkolta bangia ṭaunor bare kunu nafak zagat nia falaite oibo.
46“Ar hou shat din bond raḳar ḳalo zudi kunu manush gia i goro hamae, te he ou din hainja forzonto nafak halote roibo. 47Ar ḳeu zudi ou goro ḳana-fina ḳae ba gumae, te tar finnor ḳafoṛ-sufoṛ doia dite oibo.
48“Oile i gor astor ḳorar bade imame forikka ḳoria zudi deḳoin, oalor dag ar deḳa zar na, te imame i gorre fak-saf ḳoia elan ḳorba. I goro to nafak-feukni bemaror kunu alamot oḳon nai. 49Ar gorre fak-saf ḳorar lagi imam sabe duiṭa faki, debdaru gasor kisu laḳṛi, esub gasor ḍeṭa, ar lal rongor suta loia ono aiba. 50Aia futor fani taki ana maṭir gamlat toa ou fanir ufre eḳṭa fakire zobo ḳorba. 51Ar dusra zita fakire, debdaru gasor laḳṛire, lal suta ar esub gasor ḍeṭare, futor fanir gamlar ufre zobo ḳora hou fakir lour maze imam sabe subaiba, subaia hari ou goror maze shatbar siṭaiba. 52Fakir lou, futor fani, zita faki, debdaru gasor laḳṛi, esub gasor ḍeṭa ar lal suta dia ou gorre fak-saf ḳora oibo. 53Erbade ou zita fakire nia gau ba ṭaunor bare kula zagat saṛi diba. Ou nomunae hou goror nafaki horaia harle, ikan fak-saf oibo.”
54Te hoḳol laḳan fosa-kusṭo bemar, daud-ḳauzli, 55ḳafoṛ ba goror oalor feuknir dag, 56gotror samṛat kulosh uṭa, boron ba kunu zator dagor befare ou laḳan hukum zanail oilo. 57Ita bemare kun shomoy pak, ar kun shomoy nafak, oḳan zananir lagi ou niom-ḳanun deoa oilo.
Currently Selected:
Tourat 3: Lebian 14: sylL
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
