Tourat 2: Hizrot 29
29
Imam hishabe boail ḳorar niom
1Mabude Musare ḳoila, “Tumi imam oḳolre ou laḳan fak-saf ḳorio, zate imam bonia tara amar ebadot ḳam salaita faroin. Tumi nikut egu bisal ar dugu meṛar faṭa anaio. 2Erloge moydadi ruṭi, teldi baza fiṭa, ar tel maḳail safaṭi banaio. Ita kuntat-u ḳamir mishaio na. 3Ota banaia eḳ ṭukrit loio, erloge hou bisal ar duio meṛar faṭa loia amar samne aio. 4Bade Harun ar tar fuaintore Milon-tambur duaror ḳasat ania, fanidi naoai dio. 5Ar hou fobitro lebas oḳol ania Harunre findaio. Fainjabi, alḳella, efron ar bukur ufror toli hoḳolta findaio. Efronor loge ustadi ator banail hou feṭor ufror belṭ ḳan-o bandia dio. 6Tar matat faugṛi findaio ar shunar fatdi banail fobitro taz ḳan-o lagaio. 7Bade ḳelafotir tel tar matat ḍalia tare ḳelafoti dio. 8Tar fuaintore-o ania fainjabi findaio. 9Harun ar tar fuaintore ḳomror bondoni bandia dio. Fuaintor matat dio toki. Ou laḳan Harun ar tar fuaintore imamor fodo boail ḳorio, zate siroḳalin niom hishabe imamotir fod ḳali tarar bongshot taḳe.
10“Bade hou bisalre tumi Milon-tambur samne anio, Harun ar tar fuainte ogur ḳolla ataia diba. 11Atanir bade ou bisalre Milon-tambur duaror ḳasat nia Mabudor samne zobo ḳorio. 12Zobo ḳoria harle tuṛa lou tumar angulit lagaia kurbani kanar hingor maze lagaio, ar baki lou kurbani kanar tole ḍali dio. 13Bisalor feṭor bitoror at-boṛor sorbi, ḳoiljar logor maṭia, duio kiḍni ar er sorbi, kurbani kanar ufre nia zalailio. 14Er gust, ḳal, at-boṛ gufor shudda Boni Israilor kempor bare nia zalailio, ita to gunar koforar kurbani.
15“Bade hou duio meṛa taki egu meṛa anio, anle Harune ar tar fuainte ogur ḳolla ataia diba. 16Ar ou meṛare zobo ḳoria er lou nia kurbani kanar sairo galat siṭai dio. 17Meṛare ḳaṭia ṭukraia tar ṭeng ar feṭor bitoror hoḳolta doia, ḳolla ar baki ṭukraintor loge toio. 18Heshe i astagu kurbani kanar ufre nia zalailio. Ita oilo Mabudor name zalail kurbani, Mabudor niote agunit deoa geran ala sodga.
19“Bade dusra meṛare-o ania Harune ar tar fuainte ḳolla atai diba. 20Atanir bade ogure zobo ḳoria er tuṛa lou nia Harun ar tar fuaintor ḍain ḳanor lotit, ḍain ator ar ḍain faor buṛi angulor maze lagaio. Ar baki lou nia kurbani kanar sairo galabae siṭai dio. 21Bade ḳelafotir tel ar kurbani kana taki tuṛa lou loia, Harun ar tar fuaintor gotro ar lebasor ufre siṭai dio. Teu lebas shudda Harun ar tar fuain fak-saf oiba. 22Tumi ou meṛar sorbi, sorbi ala lenguṛ, feṭor bitoror hoḳoltar ufror sorbi, ḳoiljar logor maṭia, duio kiḍni, er sorbi, ar ḍainor ran nio, iṭa oilo imamoti kamo boailor lagi boḳshia dibar meṛa. 23Bade Mabudor nozoro toa ḳamir saṛa ruṭir ṭukri taki ekḳan ruṭi, teldi baza ekḳan fiṭa ar tel maḳail safaṭi ekḳan loio. 24Loia ita hoḳolta Harun ar tar fuaintor ato dia, Mabudor samne raḳar niote dulona kurbani hishabe dulaibae. 25Ar ota tarar at taki nia, Mabudor samne kurbani kanar ufre, hou zalail kurbanir ufre zalailibae. Iṭa oilo Mabudor name agunit deoa sodga. Itar dumar gerane Mabud kushi oin.”
26Mabude Musare ḳoila, “Tumi Harunre imamotir ḳamo boail ḳorar lagi, ḳelafoti shomzibar meṛar sinar ṭukra loia Mabudor samne dulona kurbani hishabe dulaibae. Iṭa oilo tumar baṭ. 27Harun ar tar fuaintore imamotir ḳamo boailor lagi dulail ou sina ar ran tumi fak-fobitro ḳorio. 28Ou laḳan Boni Israilor deoa ou kurbanir ṭukrain hor-hamesha Harun ar tar fuainte faiba. Ita oibo Mabudor name Boni Israilor deoa salamoti kurbanir eḳṭa ongsho.
29“Harunor bebohar ḳora fobitro lebas oḳol tar oarish oḳole faiba. Ou lebas findia tara ḳelafoti faiba ar imamotir ḳamo boail oiba. 30Harunor bade tar ze fua imam oia Milon-tambur pak zagat ḳam ḳorbo, he shatdin forzonto i lebas tar gotro raḳbo.
31“Ḳelafoti shomzibar meṛar ou gust ḳanain nia kunu fobitro zagat randibae. 32Harun ar tar fuainte Milon-tambur duaror ḳasat boia, ṭukrit toa hou ruṭir loge ou gust ḳaiba. 33Imamor ḳamo boail ḳorar lagi, tarare fak-saf ḳorar lagi, ḳanir zeta siz oḳol gunar mafir lagi kurbani deoa oibo, ita ḳali Harun ar tar fuainte ḳaiba. Ar ḳeu ita ḳaito farto nae, ḳaron ita oilo fak-fobitro ḳana. 34Ou boail ḳorar kurbanir meṛar kunu gust ba ruṭi zudi bian forzonto roizae, te ita zalailite oibo, ḳeu ḳaito farto nae, ita to fak-fobitro.
35“Harun ar tar fuaintor lagi, ami tumare zotota ḳorar hukum disi, tumi oula ḳorio. Boail ḳorar ou ḳam tumi shatdin bora ḳorio. 36Gunar kofora hishabe tumi forteḳ din egu ḳori bisal kurbani dibae. Ar kurbani kanare fak-fobitro ḳorar lagi-o ou laḳan kurbani dio, ar fak-saf oar lagi fobitro tel ḍalio. 37Kurbani kanare fak-fobitro ḳorar lagi shatdin bora kurbani dia, guna mafir kofora adae ḳoria fak-fobitro ḳorio. Teu i kurbani kana eḳ moha-fobitro zaga oibo. Zekunu zinish i kurbani kanat soaile, ita fak-fobitro oizibo.
Forteḳ dinor kurbanir niom
38“Er bad taki forteḳ din i kurbani kanar ufre, eḳ boros boyoshor dugu meṛa-baichcha kurbani dibae, 39egu biane ar egu hainja bala. 40Foyla meṛa-baichchar loge dui sher moyda ar eḳ sher zoytunor fisha tel mishaite oibo. Ar shorbot-fanir sodgar lagi anguror eḳ sher shorbot-o Allar name dibae. 41Hainja bala ze meṛa kurbani dibae, erloge-o biankur laḳan dan-gomor sodga ar shorbot-fanir sodgar hoḳolta dite oibo. Ita oilo Mabudor niote agunit deoa geran ala kurbani.
42“Oarishor for oarish dori Milon-tambur duaror gese, mani amar samne forteḳ din i zalail kurbani dite oibo. Hono ami tumrare didar dimu, tumar loge batchit ḳormu. 43Boni Israilor gese ami hono didar dimu, ar amar kudrote ou zaga fak-fobitro oibo. 44Ami Milon-tambu ar kurbani kana fobitro ḳormu. Amar imamotir lagi Harun ar tar fuaintore-o ami fobitro ḳormu. 45Ami Boni Israilor Mabud oia tarar maze boshot ḳormu. 46Teu tara zanba, ami Alla-u tarar Mabud. Ami tarar loge boshot ḳorar lagi-u to tarare Mishor desh taki bar ḳoria anchi. Ami Alla-u tarar Mabud.”
Currently Selected:
Tourat 2: Hizrot 29: sylL
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
