Tourat 5: Dusra-Boyani 28

Allar baiddotar lagi rohomot

1“O Boni Israil, ami aiz tumrare zeta hukum-ahkam diram, ota amol ḳorar niote tumra zudi nizor Mabud Allar kalamre kial ḳori mano, te tumrar Mabud Allae duniar hokkol zatir ufre tumrare usa ḳorba. 2Tumrar Mabud Allar kalam mania solle, tumra ou rohomot faibae, ar ou rohomot oḳol hamesha tumrar loge loge roibo,

3“Tumrar boshot-baṛi ar ḳet-ḳamaror maze rohom-borkot faibae.

4“Tan rohomote tumra bout aolad faibae, zomino bout foshol folibo, goru-sagole bout baichcha diba.

5“Tumar ugaro ar tumar saulor moṭkit borkot faibae.

6“Hoḳol halote hoḳol ḳamo tumi rohom-borkot faibae.

7“Dushmonir niote zetae tumrar loge lagba, Mabude itare tumrar gese araiba. Tara eḳ duaredi tumrare marat aile, shat duaredi bagiba.

8“Tumrar ugaror maze Mabude borkot diba, tumra ze ḳamo at dibae, ou ḳamo-u tain borkot diba. Tumrar Mabud Allae tumrare ze desh dan ḳorra, hono tumrare rohom-borkot diba.

9“Tumra zudi tumrar Mabud Allar hukum-ahkam mania, tan batail fote solo, te tain ḳosom ḳaia zela oada ḳorsoin, ola tan nizor fobitro proza hishabe tumrare ḳaim ḳorba. 10Ar asta duniar hoḳol zatie deḳba, tumra-u oilae Mabudor ḳas manush, dekia tara hoḳole tumrare ḍoraiba.

11“Tumrar Mabud Allae tumrar moy-murobbir gese ze desh dibar lagi kosom ḳaisla, ou desho tain tumrar bout balai korba, tumrare bout aolad diba, tumrar foshur falainte bout baichcha diba, zomino bout foshol folibo. 12Tumrar Mabud Allae tan asmani rohomotor duar kulia diba, zorur mafik meg-fani dia tumrar ator hoḳol ḳamor maze rohom-borkot diba, bout zatire tumra ṭeḳa-foysha aolat dibae, oile tumra kunu aolat nibar dorḳar oito nae. 13Mabude tumrare ola banaiba, zate tumra hoḳlor matar ufre ro, ḳeuror faor tolat na taḳo. Tumra ḳali tumrar Mabud Allar ou hukum-ahkam oḳol kub zoton ḳoria amol ḳorio, zeta aiz ami tumrare ḳoiar, teu tumra hoḳlor ufre roibae, tole foṛtae nae. 14Ar aiz ami tumrare zeta hukum diar, amar ou talim taki tumra ḍaine-baue horio na. Kunu deb-debir ḳoredi douṛaia itar puja ḳorat lagio na.

Naformanir lagi lannot

15“Oile tumra zudi tumrar Mabud Allar hukum na mano, tan zeta hukum-ahkam ar niom-ḳanun aiz ami zanaisi, tumra kub kiali oia ita na manle, tumrar ufre ou lannot oḳol foṛbo, ita hamesha tumrar loge loge roibo:

16“Tumrar boshot-baṛi, ḳet-ḳamar hoḳol zagat lannot foṛbo.

17“Tumrar ugaro ar saulor moṭkit lannot foṛbo.

18“Tumrar hurutta ḳom zonmiba, zomino foy-foshol ḳomizibo, goru-sagole baichcha ḳom diba, ou nomunae tumrar ufre lannot foṛbo.

19“Goro ba baira hoḳol ḳano tumra forti din lannot faibae.

20“Naformani kam ḳoria Mabudor ges taki hori zaoae, tumrar hoḳol ḳam-ḳazor maze tain lannot diba. Bala-mosiboto foṛia, Allai gozobor zatae, tumra ekkere binash oar ag forzonto, aste aste ḳali koy oibae. 21Tumra ze deshor doḳoldari fairae, Mabude hono tumrar ufre bemar saṛiba, bemare tumra morte morte hou desho taki binash oibae. 22Mabude tumrar shorilo nosṭo oa bemar, bakka taf ar zola-fuṛa, ota bemardi tumrar ufre gozob diba. Ar morki, hukna gorom batash, fosholor huna-ḳani hukai zaoar bemar ar fata mora, ota gozob oḳol tumrar zomino diba. Tumra moria fuṛanir ag forzonto i gozob tumrar ḳore ḳore roibo. 23Tumrar matar ufror asman oibo fitolor laḳan shokto, ar faor tolor zomin oibo luar laḳan ḳoṭin. 24Mabude megor bodla tumrar desho asman taki duil saṛiba, tumra binash oar ag forzonto ita hamesha foṛat roibo.

25“Mabude tumrar dushmon oḳlor mukabilat tumrare araiba, erare eḳ fotedi marat gele shat fotedi bagibae. Tumrar dosha dekia zogotor hoḳol zatie ḍoraia ḳafiba. 26Tumrar lash oibo foshu-fakintor kuraḳ. Itare ḳedanir lagi keu roito nae. 27Mabude hou Mishori oḳlor laḳan tumrar gotro gozobi bish-furi, ṭiumar, fuṭ-ḳauzli bemar diba, ita taki keu tumrare shifa ḳorar ḳemota nai. 28Tain tumrare fagol, anda ar bedisha banaiba. 29Andae zela andarir maze atai atai aṭe, tumra dinor bala ola aṭibae, tumrar kunu ḳam-u kamiab oito nae. Tumrar ufre hamesha zulum ar luṭ-toraz solbo, ita taki basanir lagi keu aito nae.

30“Shadi korar lagi ze ḳoinar loge tumar aḳt oibo, aroḳ beṭae aia ou ḳoinar ijjot luṭibo. Tumi gor banaibae, oile goro boshot ḳortae fartae nae. Anguror bagan ḳoria, fol ḳaoa ḳofalo zuṭto nae. 31Tumrar sokur samne tumrar goru zobo ḳora oibo, oile eḳ ṭukra gust-o tumrar feṭo zaito nae. Tumrar gadare tumrar at taki kaṛia neoa oibo, ita ar firot faitae nae. Tumrar meṛa-sagol tumrar dushmonor ato zaibo, ota bifod taki basanir lagi keu aguai aito nae. 32Tumrar fua-fuṛin dusra zatir ato aṭoḳ oiba, tarar ashae bar saite saite tumrar sokur zuti nosṭo oibo, oile kunta ḳorar shuzug oito nae. 33Tumrar osina bin zatie tumrar ḳetor foy-foshol, ar tumrar menotor hoḳol mozuri luṭia nibogi, tumra hara zindegi kali zulum-mosibot faibae ar surmar oibae. 34Tumrar souke i laḳan aro zeta deḳbae, dekia mata ḳaraf oibo. 35Mabude tumrar urato ar aṭut shuru ḳoria, faor tola taki matar talu forzonto asta gotro bish-furi diba, itar kunu shifa nai.

36“Tumrar ufre bashshai korar lagi tumra zare godit boaibae, Mabude hou bashsha ar tumrare bondi koraia omon eḳ zatir ato falaiba, zetar nam-u tumra huncho na, tumrar moy-murobbie-o hunchoin na. Hono gia tumra fattor ar laḳṛidi banail murtir puja ḳorbae. 37Mabude tumrare zeta zatir maze ḳedai diba, hotae tumrare dekia somkiziba, tumrar dosha siṛ ar ṭaṭṭa-moshkorar bishoy oibo.

38“Tumra ḳet ḳorbae bout, oile foshol faibae tuṛa, ḳaron fongofale ḳailiba. 39Tumra anguror bagan ḳoria zae-zoton ḳorbae, oile kiṛa ar fuke bagan ḳailibo, erlagi tumra angur-o faitae nae, er shorbot-o ḳaitae fartae nae. 40Tumrar hara desh zoytun gase bora roile-o, zoytun fol zoria foṛizibo, erlagi tumrar shorilo tel maḳa oito nae. 41Tumrar zoto aolad oiba, ita tumrar gese roita nae, itare bondi kori neoa oibo. 42Gozobi moua-fukor fal aia tumrar gas-gasali ar foshol ḳailiba.

43“Tumrar maze boshot ḳorra bin zatir manush oḳol aste aste ufredi uṭba, ar tumra toledi lambae. 44Tara tumrare ṭeḳa-foysha aolat diba, tumra tarare aolat dibar shaiddo oito nae. Tara roiba tumrar matar ufre, tumra roibae tarar faor tolat.

45“Ou tamam lannot tumrar ufre foṛbo. Tumrar Mabud Allar kushi mafik na solae, tan hukum-ahkam ar niom-ḳanun na manae ou lannot oḳol tumrar loge lagail roibo. Itae tumrare zatia doria binash ḳorilaibo. 46Ou lannot oḳol tumra ar tumrar aolador ufre, zug zug dori kudroti hushiari hishabe roibo. 47Tumra nizor shudinor ḳalo monor kushie ashik bonia nizor Mabud Allar gulami korso na, 48erlagi Mabude tumrar ḳoredi dushmon lagaiba, tumra feṭor buke, fanir fiase, obab-onoṭone hokir bonia tarar gulami korbae. Mabude tumrar ḳando luar zual findaiba, ou zualir tole tumrar binash oibo.

49“Mabude bout duroi taki, zogotor hesh shimana taki, ola eḳ zatire silor nomunae uṛaia anba, zetar mukor buli tumra buztae nae. 50Itar goṭon oibo bodsurot, itae kunu buṛa-buṛire ijjot dita nae, ar huruttare-o maya ḳorta nae. 51Tara tumrar foshur baichcha ar ḳetor foshol ḳailiba, hesh-mesh tumra binash oibae. Tara kunuzat foshol, noya kunu anguror shorbot, tel, goru-sagolor baichcha, kunta-u tumrar lagi toita nae, hesh-mesh tumra binash oizibae. 52Tara tumrar ṭaun oḳol beria raḳba, ar tumra zetar ufre borosha ḳorrae, tumrar hou usa usa mozbut baunḍorir oal oḳol hesh-mesh bangia foṛizibo. Tumrar Mabud Allae tumrare ze deshor doḳoldari dira, hou deshor hokkol gau ar ṭaun tara beriliba.

53“Ar dushmone beria raḳar ḳalo tumra oto boṛo mosiboto foṛbae, erlagi tumrar nizor fua-fuṛire ḳailibae, tumrar Mabud Allar deoa aolador gust nize ḳaibae. 54Hou shomoy tumrar maze zera bala manush, zera shuke ar aram-ayeshe ase, tarar mon-mizazo olaḳan oizibo, tara afon baire, nizor boure ar baki fua-fuṛire kunu doya-maya ḳorto nae. 55He tar ze aolador gust ḳaibo, itar ekkan ṭukra-o tarare dito nae. Ḳaron dushmone zebla tumrar ṭaun oḳol beria raḳba, ou shomoy tumrar feṭor buk miṭanir lagi nizor huruttar gust saṛa ar kunuta-o milto nae. 56Tumrar mazor kub norom dilor ze beṭi manush ase, ze beṭie shukila zindegir dae kunudin maṭit fao falaise na, hou beṭie-o tair zanor ṭukra zamai ba aolador bae kunu doya-maya ḳorto nae. 57Dushmone tumrare beria raḳae feṭor bukor zalae aolador zonom deoar loge loge, ou maʼe nizor aolador gust, ar feṭo taki baroil fuati-ful forzonto nize nize lukaia ḳailibo.

58“Ou kitabor maze shoriotor zoto hukum-ahkam leḳa ase, ita zudi tumra kub kial ḳoria amol na ḳoro, tumrar Mabud Allar mohima ar ḍor-ḳof ala namor ijjot na ḳoro, 59te Mabude tumra ar tumrar aolad oḳolre bezuita bemar diba, ou bemare tumra lamba shomoy buganti korbae. 60Mishoro taḳte bezuita zoto bemar-azar dekia tumra ḳafitae, hou bemar-azar oḳon tumrar ufre diba, itae tumrar fis saṛto nae. 61Ar ou Tourat Kitabo zeta bemaror nam leḳa nai, ola ḳoṭin gozobi aro bout bemar-azar Mabude tumrar ufre saṛiba, tumra binash oar ag forzonto ita salu roibo. 62Tumra nizor Mabud Allar hukum na manae, tumrar manshor foriman oḳon asmanor terar laḳan bout beshi oile-o, ita moria kub tuṛa basia roiba. 63Mabude kushi oia tumrare zela ay-unnoti dia baṛaisla, tumrar manshor foriman boṛo ḳorsla, hou laḳan kushi koria oḳon hirbar tumrare binash ḳoria nifat ḳorba. Tumra oḳon ze deshor doḳoldari fairae, hou desh taki tumrare ḳaṛia neoa oibo.

64“Bade zogotor ek kinara taki arok kinara forzonto, hoḳol zatir maze tumrare sitrai diba. Hono roia tumra ar tumrar moy-murobbir osina deb-debir sheba ḳorbae, laḳṛi ar fattoror murtire puja dibae. 65Hou zati oḳlor loge roia tumrar shanti milto nae, tumrar aramor lagi kunu zaga roito nae. Hono Mabude tumrar monor maze hae-hutash baṛaiba, tumrar sokur hoḳol asha-borosha, ar dilor shoḳre tain nirash, nistez ḳorba. 66Kita goṭibo ba na goṭibo ota sintae tumrar din guzoribo, din-rait hamesha ḳali zanor ḍor-boye oshantit roibae, basia roar kunu nichchoyota faitae nae. 67Tumra monor ḍore, zanor maire, souke kunu kul-kinar na dekia ḳali hae hae ḳorbae. Bian oile ḳoibae zoldi rait ouk, ar rait oile ḳoibae zoldi din ouk. 68Hou ze Mishor deshor befare ami koislam, tumra hino ar zaoa oito nae. Oile hou gozobor shomoy Mabude tumrare zazo ḳori hirbar Mishor desho neoaiba, nia harle tumra gulami korar lagi hono biki kaitae saibae, oile ḳeu tumrare kinto nae.”

Currently Selected:

Tourat 5: Dusra-Boyani 28: sylL

Highlight

Copy