আছমানি কিতাব: সুলাইমানি ছিল্লেখ 14
14
1গিয়ানি বেটিয়ে সংসার গাথে,
বেআখল বউয়ে সংসার ভাংগে।
2হক পথে চলরায় ডরায় মাবুদরে,
এলা করে তানরে বেকা পথিয়ে।
3আম্মকর মুখো গরিমা গজায়,
গিয়ানির ঠোটে রেহাই মিলায়।
4বলদর বলে ফসল বেশি,
বলদ বিনে উগার খালি।
5সঠিক সাক্ষিয়ে মিছা মাত না মাতে,
দমে দমে মিছা মাতে মিছা সাক্ষিয়ে।
6ঠাট্টাকারিয়ে তালাশ করি পায় না গিয়ানরে,
আখলদারর গেছে ইলিম ধরা দেয় সহজে।
7আম্মক থাকি দুরই হরো,
ইলিমর ঠোট নাই অনো।
8আপন পথ চিনাউ আখলদারর গিয়ান,
বেআখলর আম্মকি দাগাবাজির কাম।
9বেআখলে দুষ করিয়া তামশা করে,
হক মানষর মাজে মিটমাট আছে।
10কত দুখ কত সুখ আছে মনে,
বুজে না পুরাপুর অইন্য জনে।
11হক মানষর তাম্বুর অইবো উন্নতি,
নাশ অইবো নাফরমানর ঘর-বাড়ি।
12কেউ কেউ মনো করে নিজর পথউ সঠিক,
সর্বনাশ বওয়াল আছে ই পথর হেশর দিক।
13আসির দিনোও দুখ আছে দিলো,
ফুর্তি ফুড়াইলে জালা থাকে মনো।
14বে-পথিয়ে ফল পায় কু-কামর,
হক মানষে ফল পায় নেক কামর।
15সরল-সিধায় একিন করে হকল মাত,
আখলদার হুশিয়ার থাকে চলা-ফিরাত।
16গিয়ানি ডরাইয়া মন্দ থাকি দুরই রয়,
আম্মকে নিজর বলে বদ সাওসি অয়।
17বদ-মিজাজি জনে আম্মকি করে,
হকলে ঘিন্নায় কু-মতলবি জনরে।
18সরল-সিধার পাওনা আম্মকি,
আখলদারে পুরুস্কার পায় বুদ্ধি।
19হক মানষর গেছে মাথা নোয়ায় বজ্জাতে,
পরেজগারর দুয়ারো নত অয় নাফরমানে।
20গরিবরে আপন জনেও চিনে না,
ধনি মানষর বন্ধুর অভাব অয় না।
21আরি-ফরিরে এলা করলে গুনা অয়,
গরিব-দুখিরে দয়া করলে সুখে রয়।
22কু-মতলবি জনে বে-পথে যায়গি নায় নি?
নেক-নিয়তিয়ে পায় দয়া-মায়া, হক-হালালি।
23মেনতে আনে লাভ,
বেকামা মাতে অভাব।
24ধনউ তো তাজ গিয়ানির লাগি,
বেআখলর আম্মকিউ বেআখলি।
25হক সাক্ষিয়ে জানে বাচায়,
চতুরি করে মিছা মাতরায়।
26মাবুদর ডর-খফে যারার আসল ভরসা,
তাইনউ আশ্রয় তারার হুুরুতার লাগিয়া।
27মাবুদর ডর-ভয় জিন্দেগির ঝরনা,
মরনর ফান্দ থাকি রাখে বাচাইয়া।
28বাদশার গৌরব বেশি প্রজায়,
প্রজা না থাকলে পতন অইযায়।
29বুদ্ধিমানে তার গুছারে দমায়,
বেশি গুছা তো আম্মক দেখায়।
30ঠান্ডা মনে শরিলর শান্তি,
ইংসায় পচে কায়ার আড্ডি।
31গরিবরে জুলুমউ পয়দাকারিরে বেইজ্জত করা,
কাংগালর উপর দয়াউ তানরে ইজ্জত দেওয়া।
32নিজর নাফরমানিত নাফরমান পতন অয়,
নিজর হক-হালালিত পরেজগারর আশ্রয়।
33বুদ্ধিমানর দিলো গিয়ান থাকে,
আম্মকর মনো ইতা নি মিলে?
34পরেজগারিয়ে অয় জাতির উন্নতি,
গুনায় জাতিরে করে কলংকিনি।
35বুদ্ধিমান কামলায় রাজার মন পায়,
তানরে শরম দিলে তো গুছা তুলায়।
Currently Selected:
আছমানি কিতাব: সুলাইমানি ছিল্লেখ 14: sylB
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
