ꠁꠘ꠆ꠎꠤꠟ ১: ꠝꠕꠤ 21

ꠙꠛꠤꠔ꠆ꠞ ꠎꠦꠞꠥꠎꠣꠟꠦꠝꠅ ꠢꠎꠞꠔ ꠁꠍꠣ

1ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠎꠦꠞꠥꠎꠣꠟꠦꠝꠞ ꠇꠣꠍꠣꠔ, ꠎꠄꠔꠥꠘ ꠙꠣꠠꠞ ꠟꠉꠦ ꠛꠣꠄꠔ-ꠚꠣꠁꠎ꠆ꠎꠣ ꠉꠣꠃꠔ ꠀꠁꠀ ꠀꠎꠤꠟꠣ। ꠅꠘꠅ ꠀꠁꠀ ꠔꠣꠘ ꠖꠥꠁꠎꠘ ꠍꠣꠢꠣꠛꠤꠞꠦ ꠇꠁꠟꠣ, 2“ꠔꠥꠝꠞꠣ ꠅꠃ ꠍꠣꠝꠘꠞ ꠉꠣꠃꠔ ꠎꠣꠅ। ꠉꠣꠃꠔ ꠢꠣꠝꠣꠁꠔꠦꠃ ꠖꠦꠈꠛꠣꠄ ꠄꠉꠥ ꠉꠣꠗꠣ ꠛꠣꠘ꠆ꠖꠣ ꠀꠍꠦ, ꠟꠉꠦ ꠔꠣꠞ ꠛꠣꠁꠌ꠆ꠌꠣꠅ ꠛꠣꠘ꠆ꠖꠣ। ꠅꠉꠥꠁꠘ꠆ꠔꠞ ꠉꠟꠣꠞ ꠖꠠꠤ ꠈꠥꠟꠤꠀ ꠅꠘꠅ ꠟꠁꠀ ꠀꠁꠅ। 3ꠇꠦꠃ ꠇꠥꠘ꠆ꠔꠣ ꠎꠤꠇꠣꠁꠟꠦ ꠇꠁꠅ, ꠢꠥꠎꠥꠞꠞ ꠖꠞꠇꠣꠞ ꠀꠍꠦ, ꠄꠞꠖꠣꠄ ꠘꠤꠞꠣꠝ। ꠔꠦꠃ ꠢꠦ ꠟꠉꠦ ꠟꠉꠦ ꠞꠣꠎꠤ ꠅꠁꠎꠤꠛ।”

4ꠁꠔꠣ ꠅꠁꠟ ꠎꠣꠔꠦ ꠀꠉꠞ ꠎꠝꠣꠘꠣꠞ ꠢꠃ ꠘꠛꠤꠞ ꠝꠣꠎꠖꠤ ꠎꠦꠔꠣ ꠛꠣꠔꠣꠁꠟ ꠅꠁꠍꠦ, ꠅꠔꠣ ꠅꠈꠘ ꠚꠟꠤꠎꠣꠄ। 5ꠔꠣꠁꠘ ꠇꠁꠍꠟꠣ, “ꠍꠤꠅꠘ-ꠇꠁꠘꠣ ꠎꠦꠞꠥꠎꠣꠟꠦꠝꠞꠦ ꠔꠥꠝꠞꠣ ꠇꠁꠅ, ꠔꠥꠝꠣꠞ ꠛꠣꠖꠡꠣ ꠔꠥꠝꠣꠞ ꠉꠦꠍꠦ ꠀꠁꠞꠣ। ꠔꠣꠁꠘ ꠈꠥꠛ ꠘꠞꠝ ꠝꠤꠎꠣꠎꠤ। ꠔꠣꠁꠘ ꠉꠣꠗꠣ ꠌꠠꠤꠀ, ꠉꠣꠗꠤꠞ ꠛꠣꠁꠌ꠆ꠌꠣ ꠌꠠꠤꠀ ꠀꠁꠞꠣ।”

6ꠔꠦꠃ ꠁꠍꠣꠄ ꠎꠦꠟꠣ ꠢꠤꠇꠣꠁ ꠖꠤꠍꠟꠣ, ꠖꠥꠁꠅ ꠍꠣꠢꠣꠛꠤꠄ ꠉꠤꠀ ꠅꠟꠣ ꠇꠞꠟꠣ। 7ꠅꠃ ꠉꠣꠗꠣ ꠀꠞ ꠔꠣꠞ ꠛꠣꠁꠌ꠆ꠌꠣ ꠀꠘꠣꠞ ꠛꠣꠖꠦ ꠍꠣꠢꠣꠛꠤ ꠅꠇꠟꠦ ꠘꠤꠎꠞ ꠉꠔꠞꠞ ꠌꠣꠖ꠆ꠖꠞ ꠈꠥꠟꠤꠀ ꠉꠣꠗꠣꠞ ꠙꠤꠑꠤꠔ ꠛꠤꠍꠣꠁ ꠖꠤꠟꠣ, ꠔꠦꠃ ꠁꠍꠣ ꠄꠞ ꠃꠙꠞꠦ ꠍꠅꠀꠞ ꠅꠁꠟꠣ। 8ꠀꠞꠅ ꠛꠃꠔ ꠝꠣꠘꠡꠦ ꠔꠣꠞꠣꠞ ꠉꠔꠞꠞ ꠌꠣꠖ꠆ꠖꠞ ꠈꠥꠟꠤꠀ ꠙꠕꠞ ꠝꠣꠎꠦ ꠛꠤꠍꠣꠁ ꠖꠤꠟꠣ, ꠀꠞ ꠛꠃꠔꠦ ꠡꠥꠘ꠆ꠖꠞ ꠡꠥꠘ꠆ꠖꠞ ꠉꠣꠍꠞ ꠙꠣꠔꠣꠁꠘ ꠍꠤꠠꠤꠀ ꠀꠘꠤꠀ ꠙꠕꠅ ꠛꠤꠍꠣꠁꠟꠣ। 9ꠁꠍꠣꠞ ꠀꠉꠦ-ꠈꠞꠦ ꠀꠞꠅ ꠛꠃꠔ ꠝꠣꠘꠥꠡ ꠎꠣꠅꠀꠔ ꠀꠍꠤꠟ, ꠄꠞꠣ ꠎꠥꠞꠦ ꠎꠥꠞꠦ ꠝꠤꠍꠤꠟ ꠖꠤꠟꠣ,

“ꠛꠣꠖꠡꠣ ꠖꠣꠃꠖꠞ ꠀꠅꠟꠣꠖ, ꠝꠣꠞꠢꠣꠛꠣ!

ꠝꠣꠛꠥꠖꠞ ꠘꠣꠝꠦ ꠎꠦꠁꠘ ꠀꠁꠞꠣ,

ꠔꠣꠘ ꠔꠣꠞꠤꠚ ꠅꠃꠇ।

ꠛꠦꠢꠦꠡ꠆ꠔꠅ-ꠅ ꠝꠣꠞꠢꠣꠛꠣ!”

10ꠢꠎꠞꠔ ꠁꠍꠣ ꠎꠦꠞꠥꠎꠣꠟꠦꠝ ꠀꠁꠀ ꠢꠣꠞꠟꠦ ꠀꠡ꠆ꠔꠣ ꠐꠣꠃꠘꠅ ꠃꠟꠁꠡ꠆ꠔꠟ ꠟꠣꠉꠤꠉꠦꠟ। ꠢꠇꠟꠦ ꠎꠤꠇꠣꠁꠟꠣ, “ꠅꠛꠣ, ꠄꠁꠘ ꠇꠦ?” 11ꠝꠣꠘꠡꠦ ꠇꠁꠟꠣ, “ꠄꠁꠘ ꠔ ꠢꠃ ꠁꠍꠣ ꠘꠛꠤ, ꠄꠘ ꠛꠣꠠꠤ ꠉꠣꠟꠤꠟꠞ ꠘꠣꠍꠣꠞꠔ ꠉꠣꠃꠔ।”

ꠎꠦꠞꠥꠎꠣꠟꠦꠝ ꠇꠣꠛꠣ ꠡꠞꠤꠚꠞꠦ ꠙꠣꠇ-ꠍꠣꠚ ꠇꠞꠣ

12ꠛꠣꠖꠦ ꠎꠦꠞꠥꠎꠣꠟꠦꠝ ꠀꠁꠀ ꠔꠣꠁꠘ ꠙꠛꠤꠔ꠆ꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠣꠝꠣꠁꠟꠣ। ꠢꠘꠅ ꠇꠣꠛꠣ ꠊꠞꠞ ꠡꠤꠝꠣꠘꠣꠔ ꠎꠦꠞꠣ ꠈꠞꠤꠖ-ꠛꠤꠇꠤꠞ ꠇꠣꠞꠛꠣꠞꠤ ꠀꠍꠤꠟ, ꠁꠔꠣꠞꠦ ꠈꠦꠖꠣꠁ ꠖꠤꠟꠣ। ꠔꠣꠁꠘ ꠐꠦꠇꠣꠞ ꠛꠣꠐ꠆ꠐꠣꠞ ꠇꠣꠞꠛꠣꠞꠤ ꠅꠇꠟꠞ ꠇꠦꠡ ꠛꠣꠇ꠆ꠡ, ꠀꠞ ꠒꠥꠙꠤ-ꠙꠣꠞꠅ ꠛꠦꠌꠞꠣ ꠅꠇꠟꠞ ꠀꠡꠘ ꠃꠟꠐꠣꠁꠀ ꠚꠣꠟꠣꠁ ꠖꠤꠟꠣ। 13ꠔꠣꠁꠘ ꠇꠁꠟꠣ, “ꠀꠟ꠆ꠟꠣꠞ ꠇꠣꠟꠣꠝꠅ ꠛꠣꠔꠣꠁꠟ ꠅꠁꠍꠦ, ꠀꠝꠣꠞ ꠊꠞ ꠅꠁꠛ ꠄꠛꠣꠖꠔꠞ ꠊꠞ, ꠅꠁꠟꠦ ꠔꠥꠝꠞꠣ ꠁꠈꠣꠘꠞꠦ ꠒꠣꠇꠣꠁꠔꠞ ꠀꠒ꠆ꠒꠣꠈꠣꠘꠣ ꠛꠣꠘꠣꠁꠟꠤꠍ।”

14ꠄꠞꠛꠣꠖꠦ ꠀꠘ꠆ꠖꠣ, ꠟꠥꠟꠣ-ꠟꠦꠋꠠꠣ ꠝꠣꠘꠥꠡ ꠅꠇꠟ ꠁꠍꠣꠞ ꠉꠦꠍꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠀꠁꠟꠣ, ꠔꠣꠁꠘ ꠄꠞꠣ ꠢꠇꠟꠞꠦ ꠜꠣꠟꠣ ꠇꠞꠟꠣ। 15ꠢꠎꠞꠔ ꠁꠍꠣꠄ ꠎꠦ ꠇꠥꠖꠞꠔꠤ ꠝꠥꠎꠦꠎꠣ ꠇꠣꠝ ꠇꠞꠍꠟꠣ, ꠛꠠ ꠁꠝꠣꠝ ꠀꠞ ꠝꠃꠟꠣꠘꠣ ꠅꠇꠟꠦ ꠁꠔꠣ ꠖꠦꠈꠟꠣ। ꠔꠣꠞꠣ ꠢꠥꠘꠟꠣ, ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠜꠤꠔꠞꠦ ꠢꠥꠞꠥꠔ꠆ꠔꠣꠁꠘ꠆ꠔꠦ ꠇꠁꠞꠣ, “ꠝꠣꠞꠢꠣꠛꠣ, ꠖꠣꠃꠖꠞ ꠀꠅꠟꠣꠖ, ꠝꠣꠞꠢꠣꠛꠣ।” ꠁꠈꠣꠘ ꠢꠥꠘꠤꠀ ꠔꠣꠞꠣ ꠎꠟꠤ-ꠙꠥꠠꠤ ꠃꠑꠟꠣ। 16ꠔꠣꠞꠣ ꠁꠍꠣꠞꠦ ꠇꠁꠟꠣ, “ꠅꠃ ꠢꠥꠞꠥꠔ꠆ꠔꠣꠁꠘ꠆ꠔꠦ ꠇꠤꠔꠣ ꠌꠤꠟ꠆ꠟꠣꠁꠞꠣ, ꠁꠔꠣ ꠔꠥꠝꠤ ꠢꠥꠘꠞꠣꠄ ꠘꠣ ꠘꠤ?” ꠔꠣꠁꠘ ꠇꠁꠟꠣ, “ꠅꠄ, ꠢꠥꠘꠤꠀꠞ ꠔ। ꠀꠟ꠆ꠟꠣꠞ ꠇꠣꠟꠣꠝꠅ ꠙꠠꠍꠂꠘ ꠘꠣ ꠘꠤ, ‘ꠘꠣꠛꠣꠟꠤꠇ ꠢꠥꠞꠥꠔ꠆ꠔꠣꠁꠘ꠆ꠔꠞ ꠝꠥꠈ ꠕꠣꠇꠤ ꠔꠥꠝꠤ ꠔꠥꠝꠣꠞ ꠔꠣꠞꠤꠚ ꠀꠖꠣꠄ ꠇꠞꠍ’?”

17ꠛꠣꠖꠦ ꠢꠎꠞꠔ ꠁꠍꠣ ꠔꠣꠞꠣꠞ ꠉꠦꠍ ꠕꠣꠇꠤ ꠉꠦꠟꠣꠉꠤ, ꠉꠤꠀ ꠐꠣꠃꠘꠞ ꠛꠣꠞꠦ ꠛꠣꠄꠔ-ꠀꠘꠤꠀ ꠉꠣꠃꠔ ꠞꠣꠁꠔ ꠞꠁꠟꠣ।

ꠝꠎꠛꠥꠔ ꠁꠝꠣꠘꠞ ꠝꠥꠘꠣꠎꠣꠔ

18ꠛꠣꠖꠞ ꠖꠤꠘ ꠛꠤꠀꠘꠦ ꠛꠣꠄꠔ-ꠀꠘꠤꠀ ꠕꠣꠇꠤ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠀꠅꠀꠞ ꠡꠝꠄ ꠔꠣꠘ ꠙꠦꠐꠅ ꠜꠥꠇ ꠟꠣꠉꠟ। 19ꠅꠃ ꠔꠣꠁꠘ ꠙꠕꠞ ꠇꠣꠘ꠆ꠖꠣꠔ ꠄꠉꠥ ꠒꠥꠝꠥꠞ ꠉꠣꠍ ꠖꠦꠈꠤꠀ, ꠅꠉꠥꠞ ꠚꠟ ꠈꠣꠅꠀꠞ ꠈꠤꠀꠟꠦ ꠉꠣꠍꠞ ꠗꠣꠞꠅ ꠉꠦꠟꠣ। ꠉꠤꠀ ꠖꠦꠈꠟꠣ, ꠉꠣꠍꠞ ꠝꠣꠎꠦ ꠈꠣꠟꠤ ꠙꠣꠔꠣ, ꠇꠥꠘꠥ ꠚꠟ ꠘꠣꠁ। ꠔꠣꠁꠘ ꠅꠃ ꠉꠣꠍꠞꠦ ꠇꠁꠟꠣ, “ꠔꠥꠝꠣꠞ ꠝꠣꠎꠦ ꠎꠣꠘꠥ ꠀꠞ ꠇꠥꠘꠥꠖꠤꠘ ꠚꠟ ꠘꠣ ꠗꠞꠦ।” ꠅꠈꠣꠘ ꠇꠅꠀꠞ ꠟꠉꠦ ꠟꠉꠦꠃ ꠉꠣꠍꠐꠣ ꠢꠥꠇꠣꠁꠀ ꠝꠞꠤꠉꠦꠟ। 20ꠍꠣꠢꠣꠛꠤ ꠅꠇꠟꠦ ꠁꠔꠣ ꠖꠦꠈꠤꠀ ꠔꠣꠁꠎ꠆ꠎꠥꠛ ꠅꠁꠀ ꠇꠁꠟꠣ, “ꠉꠣꠍꠐꠣ ꠅꠔ ꠎꠟꠖꠤ ꠢꠥꠇꠣꠁ ꠉꠦꠟ ꠇꠤꠟꠣ?” 21ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠔꠥꠝꠞꠣ ꠎꠥꠖꠤ ꠖꠤꠟꠞ ꠝꠣꠎꠦ ꠡꠘ꠆ꠖꠄ ꠘꠣ ꠇꠞꠤꠀ, ꠙꠥꠞꠣꠙꠥꠞ ꠁꠝꠣꠘꠦ ꠝꠎꠛꠥꠔ ꠕꠣꠇ, ꠔꠦ ꠀꠝꠤ ꠅꠃ ꠒꠥꠝꠥꠞ ꠉꠣꠍꠞꠦ ꠎꠦꠔꠣ ꠇꠞꠍꠤ, ꠔꠥꠝꠞꠣꠅ ꠅꠟꠣ ꠙꠣꠞꠛꠣꠄ। ꠈꠣꠟꠤ ꠁꠈꠣꠘ ꠘꠣꠄ, ꠔꠥꠝꠞꠣ ꠎꠥꠖꠤ ꠅꠃ ꠙꠣꠠꠞꠦ ꠇꠅ, ‘ꠃꠠꠤꠀ ꠉꠤꠀ ꠖꠞꠤꠀꠔ ꠙꠠꠅ,’ ꠔꠦ ꠅꠟꠣꠃ ꠅꠁꠛ। 22ꠔꠥꠝꠞꠣ ꠎꠥꠖꠤ ꠈꠣꠟꠤꠍ ꠘꠤꠅꠔꠦ ꠄꠇꠤꠘ ꠇꠞꠤꠀ ꠖꠥꠀ ꠇꠞꠅ, ꠔꠦ ꠔꠥꠝꠞꠣ ꠎꠦꠔꠣ ꠌꠣꠁꠛꠣꠄ, ꠅꠔꠣꠃ ꠙꠣꠁꠛꠣꠄ।”

ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠎꠞꠔ ꠁꠍꠣ ꠀꠟ-ꠝꠍꠤ

23ꠛꠣꠖꠦ ꠢꠎꠞꠔ ꠁꠍꠣ ꠢꠤꠞꠛꠣꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠀꠁꠀ ꠅꠀꠎ-ꠘꠍꠤꠅꠔ ꠇꠞꠣꠔ ꠀꠍꠟꠣ। ꠅꠃ ꠡꠝꠄ ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟ ꠀꠁꠀ ꠔꠣꠘꠞꠦ ꠎꠤꠇꠣꠁꠟꠣ, “ꠀꠁꠌ꠆ꠍꠣ, ꠇꠅ ꠌꠣꠁꠘ, ꠔꠥꠝꠤ ꠇꠥꠘ ꠄꠈꠔꠤꠀꠞꠦ ꠁꠔꠣ ꠇꠞꠞꠣꠄ? ꠇꠦ ꠔꠥꠝꠣꠞꠦ ꠁ ꠈꠦꠝꠔꠣ ꠖꠤꠍꠦ?” 24ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠝꠤꠅ ꠀꠙꠘꠣꠞꠣꠞꠦ ꠄꠇꠈꠣꠘ ꠍꠅꠀꠟ ꠇꠞꠤꠀꠞ, ꠀꠙꠘꠣꠞꠣ ꠄꠞ ꠎꠥꠀꠙ ꠖꠤꠟꠣꠁꠟꠦ ꠀꠝꠤꠅ ꠇꠁꠝꠥ, ꠇꠥꠘ ꠄꠈꠔꠤꠀꠞꠦ ꠀꠝꠤ ꠁꠔꠣ ꠇꠞꠞꠣꠝ। 25ꠀꠙꠘꠣꠞꠣ ꠇꠃꠇ꠆ꠇꠣ ꠌꠣꠁꠘ, ꠢꠎꠞꠔ ꠄꠢꠤꠀꠄ ꠔꠞꠤꠇꠣꠞ ꠉꠥꠍꠟ ꠖꠦꠅꠀꠞ ꠄꠈꠔꠤꠀꠞ ꠇꠣꠞ ꠉꠦꠍ ꠕꠣꠇꠤ ꠙꠣꠁꠍꠟꠣ? ꠝꠣꠘꠡꠞ ꠉꠦꠍ ꠕꠣꠇꠤ, ꠘꠣ ꠀꠟ꠆ꠟꠣꠞ ꠉꠦꠍ ꠕꠣꠇꠤ?” ꠁꠈꠣꠘ ꠢꠥꠘꠤꠀ ꠔꠣꠞꠣ ꠇꠣꠘꠦ ꠇꠣꠘꠦ ꠝꠣꠔꠤꠟꠣ, “ꠀꠝꠞꠣ ꠎꠥꠖꠤ ꠇꠁ, ꠀꠟ꠆ꠟꠣꠞ ꠉꠦꠍ ꠕꠣꠇꠤ, ꠔꠦ ꠢꠦ ꠇꠁꠛ, ꠔꠣꠁꠟꠦ ꠔꠥꠝꠞꠣ ꠔꠣꠘ ꠃꠙꠞꠦ ꠁꠝꠣꠘ ꠀꠘꠟꠣꠄ ꠘꠣ ꠇꠦꠘꠦ? 26ꠀꠞ ꠎꠥꠖꠤ ꠇꠁ, ꠝꠣꠘꠡꠞ ꠉꠦꠍ ꠕꠣꠇꠤ, ꠔꠦ ꠝꠣꠘꠡꠦ ꠀꠝꠞꠣꠞꠦ ꠝꠣꠞꠛꠣ, ꠇꠣꠞꠘ ꠝꠣꠘꠡꠦ ꠔ ꠄꠢꠤꠀꠞꠦ ꠘꠛꠤ ꠇꠁꠀ ꠝꠣꠘꠂꠘ।” 27ꠄꠞꠟꠣꠉꠤꠃ ꠔꠣꠞꠣ ꠎꠥꠀꠙ ꠖꠤꠟꠣ, “ꠀꠝꠞꠣ ꠁꠈꠣꠘ ꠎꠣꠘꠤ ꠘꠣ।” ꠁꠍꠣꠄ ꠇꠁꠟꠣ, “ꠔꠦ ꠀꠝꠤꠅ ꠇꠁꠔꠣꠝ ꠘꠣꠄ, ꠇꠥꠘ ꠈꠦꠝꠔꠣꠄ ꠀꠝꠤ ꠁꠔꠣ ꠇꠞꠞꠣꠝ।”

28ꠄꠞꠛꠣꠖꠦ ꠁꠍꠣꠄ ꠇꠁꠟꠣ, “ꠀꠁꠌ꠆ꠍꠣ, ꠀꠙꠘꠣꠞꠣ ꠇꠤꠔꠣ ꠝꠘꠅ ꠇꠞꠂꠘ? ꠗꠞꠃꠇ꠆ꠇꠣ, ꠄꠇ ꠛꠦꠐꠣꠞ ꠖꠥꠁ ꠙꠥꠀ ꠀꠍꠤꠟ। ꠛꠦꠐꠣꠄ ꠔꠣꠞ ꠛꠠ ꠙꠥꠀꠞꠦ ꠇꠁꠟ, ‘ꠔꠥꠝꠤ ꠀꠁꠎ ꠀꠋꠉꠥꠞꠞ ꠛꠣꠉꠣꠘꠅ ꠇꠣꠝꠅ ꠎꠣꠅ।’ 29ꠙꠥꠀꠄ ꠙꠄꠟꠣ ꠇꠁꠟ, ‘ꠀꠝꠤ ꠙꠣꠞꠔꠣꠝ ꠘꠣꠄ।’ ꠅꠁꠟꠦ ꠛꠣꠖꠦ ꠔꠣꠞ ꠝꠘ ꠛꠖꠟꠣꠁꠀ ꠇꠣꠝꠅ ꠉꠦꠟ। 30ꠛꠣꠖꠦ ꠛꠦꠐꠣꠄ ꠔꠣꠞ ꠢꠥꠞꠥ ꠙꠥꠀꠞ ꠉꠦꠍꠦ ꠉꠦꠟ, ꠉꠤꠀ ꠅꠃ ꠇꠣꠝꠞ ꠇꠕꠣ ꠇꠁꠟ। ꠢꠦ ꠎꠥꠀꠙ ꠖꠤꠟ, ‘ꠀꠁꠌ꠆ꠍꠣ ꠀꠝꠤ ꠎꠣꠁꠝꠥꠘꠦ,’ ꠅꠁꠟꠦ ꠛꠣꠖꠦ ꠉꠦꠟ ꠘꠣ। 31ꠔꠦ ꠇꠃꠇ꠆ꠇꠣ ꠌꠣꠁꠘ, ꠅꠃ ꠖꠥꠁꠅ ꠙꠥꠀꠞ ꠝꠣꠎꠦ ꠇꠦ ꠛꠣꠚꠞ ꠢꠥꠇꠥꠝ ꠝꠣꠘꠟ?” ꠔꠣꠞꠣ ꠇꠁꠟꠣ, “ꠛꠠ ꠙꠥꠀꠄ।” ꠔꠦꠃ ꠁꠍꠣꠄ ꠇꠁꠟꠣ, “ꠀꠝꠤ ꠀꠙꠘꠣꠁꠘ꠆ꠔꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠊꠥꠡꠈꠥꠞ ꠔꠡꠤꠟꠖꠣꠞ ꠀꠞ ꠍꠤꠟꠣꠘ ꠛꠦꠐꠤꠘ ꠀꠙꠘꠣꠁꠘ꠆ꠔꠞ ꠀꠉꠦ ꠅꠁꠀ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠁꠎꠤꠞꠣ। 32ꠇꠣꠞꠘ ꠄꠢꠤꠀ ꠘꠛꠤꠄ ꠢꠇ ꠙꠕ ꠛꠣꠔꠣꠁꠀ ꠖꠦꠅꠀꠔ ꠀꠁꠍꠟꠣ, ꠔꠣ-ꠅ ꠀꠙꠘꠣꠞꠣ ꠔꠣꠘ ꠇꠕꠣꠄ ꠁꠝꠣꠘ ꠀꠘꠍꠂꠘ ꠘꠣ। ꠅꠁꠟꠦ ꠊꠥꠡꠈꠥꠞ ꠔꠡꠤꠟꠖꠣꠞ ꠀꠞ ꠍꠤꠟꠣꠘ ꠛꠦꠐꠤꠘ꠆ꠔꠦ ꠁꠝꠣꠘ ꠀꠘꠟꠣ। ꠅꠔꠣ ꠖꠦꠈꠣꠞ ꠛꠣꠖꠦꠅ ꠀꠙꠘꠣꠞꠣ ꠁꠝꠣꠘ ꠀꠘꠍꠂꠘ ꠘꠣ, ꠔꠃꠛꠣꠅ ꠇꠞꠍꠂꠘ ꠘꠣ।”

ꠀꠋꠉꠥꠞ ꠛꠣꠉꠣꠘꠞ ꠉꠤꠞꠡ꠆ꠔꠞ ꠇꠤꠌ꠆ꠍꠣ

33ꠛꠣꠖꠦ ꠢꠎꠞꠔ ꠁꠍꠣꠄ ꠇꠁꠟꠣ, “ꠀꠙꠘꠣꠞꠣ ꠅꠈꠘ ꠀꠞꠇ ꠇꠤꠌ꠆ꠍꠣ ꠢꠥꠘꠃꠇ꠆ꠇꠣ। ꠄꠇꠎꠘ ꠉꠤꠞꠡ꠆ꠔꠦ ꠀꠋꠉꠥꠞꠞ ꠛꠣꠉꠣꠘ ꠇꠞꠤꠀ ꠌꠣꠁꠞꠅꠛꠣꠄ ꠛꠦꠠꠣ ꠖꠤꠟ। ꠛꠣꠖꠦ ꠌꠇꠤꠖꠣꠞꠞ ꠟꠣꠉꠤ ꠃꠌꠣ ꠇꠞꠤ ꠄꠇꠈꠣꠘ ꠐꠋ-ꠊꠞ ꠛꠣꠘꠣꠁꠟ ꠀꠞ ꠀꠋꠉꠥꠞꠞ ꠞꠡ ꠛꠣꠞ ꠇꠞꠣꠞ ꠟꠣꠉꠤ ꠉꠣꠔ ꠈꠥꠖꠤꠟ। ꠢꠦꠡꠦ ꠈꠦꠔ ꠛꠣꠉꠤ ꠖꠤꠀ ꠉꠤꠞꠡ꠆ꠔ ꠛꠤꠖꠦꠡ ꠉꠦꠟꠉꠤ। 34ꠀꠋꠉꠥꠞ ꠙꠣꠇꠤꠀ ꠢꠣꠞꠟꠦ ꠉꠤꠞꠡ꠆ꠔꠦ ꠔꠣꠞ ꠛꠣꠐ ꠘꠤꠛꠣꠞ ꠟꠣꠉꠤ, ꠛꠣꠉꠤꠖꠣꠞ ꠅꠇꠟꠞ ꠉꠦꠍꠦ ꠔꠣꠞ ꠌꠣꠇꠞ ꠅꠇꠟ ꠙꠣꠑꠣꠁꠟ। 35ꠅꠁꠟꠦ ꠛꠣꠉꠤꠖꠣꠞꠦ ꠉꠤꠞꠡ꠆ꠔꠞ ꠄꠇ ꠌꠣꠇꠞꠞꠦ ꠗꠞꠤꠀ ꠈꠥꠛ ꠝꠣꠁꠞ-ꠗꠁꠞ ꠇꠞꠟ, ꠖꠥꠍꠞꠣ ꠌꠣꠇꠞꠞꠦ ꠙꠣꠔ꠆ꠔꠞꠖꠤ ꠝꠣꠞꠤꠀ ꠎꠈꠝ ꠇꠞꠟ ꠀꠞ ꠀꠞꠇ ꠌꠣꠇꠞꠞꠦ ꠎꠣꠘꠦ ꠝꠣꠞꠤꠟꠤꠟ। 36ꠛꠣꠖꠦ ꠔꠣꠁꠘ ꠀꠞꠅ ꠛꠦꠡ ꠇꠞꠤ ꠄꠇ ꠖꠟ ꠌꠣꠇꠞ ꠙꠣꠑꠣꠁꠟꠣ, ꠅꠁꠟꠦ ꠛꠣꠉꠤꠖꠣꠞ ꠅꠇꠟꠦ ꠔꠣꠞꠣꠞ ꠟꠉꠦꠅ ꠅꠃꠟꠣ ꠛꠦꠛꠢꠣꠞ ꠇꠞꠟ। 37ꠢꠦꠡ-ꠝꠦꠡ ꠉꠤꠞꠡ꠆ꠔꠦ ꠔꠣꠘ ꠘꠤꠎꠞ ꠙꠥꠀꠞꠦ ꠔꠣꠞꠣꠞ ꠉꠦꠍꠦ ꠙꠣꠑꠣꠁꠟꠣ, ꠝꠘꠅ ꠇꠞꠟꠣ, ꠔꠣꠞꠣ ꠔꠣꠘ ꠙꠥꠀꠞꠦ ꠖꠣꠝ ꠖꠤꠛ। 38ꠅꠁꠟꠦ ꠛꠣꠉꠤꠖꠣꠞ ꠅꠇꠟꠦ ꠙꠥꠀꠞꠦ ꠖꠦꠈꠤꠀ, ꠄꠇꠦ-ꠅꠁꠘ꠆ꠘꠦ ꠙꠞꠣꠝꠤꠡ ꠇꠞꠤ ꠇꠁꠟ, ꠅꠃ ꠙꠥꠀꠃ ꠔ ꠛꠣꠖꠦ ꠁ ꠡꠝ꠆ꠙꠔ꠆ꠔꠤꠞ ꠝꠣꠟꠤꠇ ꠅꠁꠛ। ꠔꠦ ꠀꠅ, ꠅꠉꠥꠞꠦ ꠝꠣꠞꠤꠟꠣꠁ, ꠔꠦꠃ ꠀꠝꠞꠣꠃ ꠁꠔꠣꠞ ꠝꠣꠟꠤꠇ ꠛꠘꠤꠎꠤꠝꠥ। 39ꠇꠁꠀꠃ ꠔꠣꠞꠣ ꠙꠥꠀꠞꠦ ꠗꠞꠤꠀ ꠀꠋꠉꠥꠞ ꠛꠣꠉꠣꠘꠞ ꠛꠣꠞꠦ ꠘꠤꠀ ꠎꠣꠘꠦ ꠝꠣꠞꠤꠟꠤꠟ। 40ꠅꠈꠘ ꠇꠃꠇ꠆ꠇꠣ ꠌꠣꠁꠘ, ꠛꠣꠉꠣꠘꠞ ꠝꠣꠟꠤꠇ ꠎꠦꠛꠟꠣ ꠀꠁꠛꠣ, ꠀꠁꠀ ꠅꠃ ꠛꠣꠉꠤꠖꠣꠞ ꠅꠇꠟꠞꠦ ꠇꠤꠔꠣ ꠇꠞꠛꠣ?” 41ꠔꠣꠞꠣ ꠇꠁꠟꠣ, “ꠔꠣꠁꠘ ꠀꠁꠀ ꠔ ꠅꠃ ꠘꠣꠚꠞꠝꠣꠘ ꠅꠇꠟꠞꠦ ꠈꠥꠘ ꠇꠞꠛꠣ ꠀꠞ ꠡꠝꠄ ꠝꠔ ꠎꠦꠞꠣ ꠚꠡꠟꠞ ꠛꠣꠐ ꠖꠤꠛ, ꠔꠣꠞꠣꠞ ꠉꠦꠍꠦ ꠈꠦꠔ ꠛꠣꠉꠤ ꠖꠤꠛꠣ।” 42ꠢꠎꠞꠔ ꠁꠍꠣꠄ ꠇꠁꠟꠣ, “ꠀꠙꠘꠣꠞꠣ ꠀꠟ꠆ꠟꠣꠞ ꠇꠣꠟꠣꠝꠅ ꠙꠠꠍꠂꠘ ꠘꠣ ꠘꠤ,

ꠞꠣꠎ ꠝꠦꠡ꠆ꠔꠁꠞ ꠅꠇꠟꠦ ꠎꠦ ꠙꠣꠔ꠆ꠔꠞꠞꠦ ꠛꠦꠇꠣꠝꠣ ꠇꠁꠀ ꠚꠣꠟꠣꠁ ꠖꠤꠍꠤꠟ,

ꠅꠇꠐꠣ ꠖꠤꠀꠃ ꠊꠞꠞ ꠁꠀꠘ ꠈꠥꠐꠤ ꠅꠁꠟ।

ꠝꠣꠛꠥꠖꠦ ꠘꠤꠎꠦꠃ ꠁꠔꠣ ꠅꠀꠁꠟꠣ,

ꠁꠔꠣ ꠖꠦꠈꠤꠀ ꠔ ꠀꠝꠞꠣꠞ ꠔꠣꠁꠎ꠆ꠎꠥꠛꠤ ꠟꠣꠉꠦꠞ।

43ꠄꠞꠟꠣꠉꠤ ꠇꠁꠞꠣꠝ, ꠀꠟ꠆ꠟꠣꠞ ꠛꠣꠖꠡꠣꠁ ꠀꠙꠘꠣꠞꠣꠞ ꠉꠦꠍ ꠕꠣꠇꠤ ꠇꠣꠠꠤꠀ ꠘꠦꠅꠀ ꠅꠁꠛ। ꠀꠞ ꠎꠦꠞꠣꠞ ꠎꠤꠘ꠆ꠖꠦꠉꠤꠔ ꠅꠃ ꠛꠣꠖꠡꠣꠁꠞ ꠚꠟ ꠖꠦꠈꠣ ꠎꠣꠁꠛ, ꠔꠣꠞꠣꠞꠦꠃ ꠅꠃ ꠛꠣꠖꠡꠣꠁ ꠖꠦꠅꠀ ꠅꠁꠛ। 44ꠢꠥꠘꠅ, ꠅꠃ ꠙꠣꠔ꠆ꠔꠞꠞ ꠃꠙꠞꠦ ꠎꠦ ꠎꠘ ꠙꠠꠛ, ꠢꠦ ꠐꠥꠇꠞꠣ ꠐꠥꠇꠞꠣ ꠅꠁꠎꠤꠛ। ꠀꠞ ꠅꠃ ꠙꠣꠔ꠆ꠔꠞꠅ ꠎꠣꠞ ꠃꠙꠞꠦ ꠙꠠꠛ, ꠢꠦ-ꠅ ꠌꠥꠞꠝꠣꠞ ꠅꠁꠎꠤꠛ।”

45ꠁꠍꠣꠞ ꠅꠃ ꠔꠣꠟꠤꠝ ꠢꠥꠘꠤꠀ ꠛꠠ ꠁꠝꠣꠝ ꠀꠞ ꠚꠞꠤꠡꠤ ꠅꠇꠟꠦ ꠛꠥꠎꠤꠟꠤꠟꠣ, ꠔꠣꠁꠘ ꠁꠔꠣ ꠔꠣꠞꠣꠞ ꠛꠤꠙꠇ꠆ꠇꠦꠃ ꠇꠁꠞꠣ। 46ꠄꠞꠖꠣꠄ ꠔꠣꠞꠣ ꠁꠍꠣꠞꠦ ꠗꠞꠤꠟꠤꠔ ꠌꠣꠁꠟ। ꠅꠁꠟꠦ ꠝꠣꠘꠡꠞꠦ ꠒꠞꠣꠁꠀ ꠔꠣꠘꠞꠦ ꠇꠥꠘ꠆ꠔꠣ ꠇꠞꠟ ꠘꠣ। ꠝꠣꠘꠡꠦ ꠔ ꠢꠎꠞꠔ ꠁꠍꠣꠞꠦ ꠘꠛꠤ ꠢꠤꠡꠣꠛꠦ ꠝꠣꠘꠔꠣ।

Currently Selected:

ꠁꠘ꠆ꠎꠤꠟ ১: ꠝꠕꠤ 21: sylN

Highlight

Copy