ꠁꠘ꠆ꠎꠤꠟ ১: ꠝꠕꠤ 16
16
ꠝꠣꠘꠡꠦ ꠈꠣꠟꠤ ꠇꠦꠞꠣꠝꠔꠤ ꠖꠦꠈꠔꠣ ꠌꠣꠁꠘ
1ꠛꠣꠖꠦ ꠁꠍꠣꠞꠦ ꠙꠞꠤꠇ꠆ꠇꠣ ꠇꠞꠣꠞ ꠟꠣꠉꠤ ꠚꠞꠤꠡꠤ ꠀꠞ ꠍꠤꠖ꠆ꠖꠦꠇꠤꠀ ꠝꠎꠛꠞ ꠇꠤꠍꠥ ꠝꠣꠘꠥꠡ ꠀꠁꠟꠣ, ꠀꠁꠀ ꠀꠍꠝꠣꠘꠤ ꠇꠥꠘꠥ ꠘꠤꠡꠣꠘꠣ ꠖꠦꠈꠔꠣ ꠌꠣꠁꠟꠣ। 2ꠁꠍꠣꠄ ꠇꠁꠟꠣ, “ꠛꠤꠀꠟꠤ ꠛꠣꠟꠣ ꠀꠍꠝꠣꠘꠞ ꠟꠣꠟ ꠞꠋ ꠖꠦꠈꠤꠀ ꠀꠙꠘꠣꠞꠣ ꠇꠂꠘ, ꠇꠣꠁꠟꠇꠥꠞ ꠖꠤꠘ ꠔ ꠜꠣꠟꠣ ꠅꠁꠛ। 3ꠀꠞ ꠛꠤꠀꠘꠤ ꠛꠣꠟꠣ ꠀꠍꠝꠣꠘꠅ ꠇꠣꠟꠘꠤ ꠖꠦꠈꠤꠀ ꠇꠂꠘ, ꠀꠁꠎ ꠝꠦꠊ-ꠔꠥꠚꠣꠘ ꠅꠁꠛ। ꠔꠦ ꠀꠍꠝꠣꠘꠞ ꠢꠣꠟꠔ ꠀꠙꠘꠣꠞꠣ ꠑꠤꠇꠃ ꠛꠥꠎꠂꠘ, ꠅꠁꠟꠦ ꠎꠝꠣꠘꠣꠞ ꠢꠣꠟꠔ ꠀꠙꠘꠣꠞꠣ ꠛꠥꠎꠂꠘ ꠘꠣ। 4ꠅꠃ ꠎꠝꠣꠘꠣꠞ ꠛꠦꠁꠝꠣꠘ ꠀꠞ ꠘꠣꠚꠞꠝꠣꠘ ꠅꠇꠟꠦ ꠈꠣꠟꠤ ꠇꠦꠞꠣꠝꠔꠤ ꠖꠦꠈꠔꠣ ꠌꠣꠁꠘ, ꠅꠁꠟꠦ ꠁꠃꠘꠥꠍ ꠘꠛꠤꠞ ꠘꠤꠡꠣꠘꠣ ꠍꠣꠠꠣ ꠖꠥꠍꠞꠣ ꠇꠥꠘꠥ ꠘꠤꠡꠣꠘꠣ ꠔꠣꠞꠣꠞꠦ ꠖꠦꠈꠣꠁꠟ ꠅꠁꠔ ꠘꠣꠄ।” ꠅꠈꠣꠘ ꠇꠁꠀ ꠔꠣꠁꠘ ꠄꠞꠣꠞꠦ ꠕꠁꠀ ꠢꠞꠤꠉꠦꠟꠣ।
5ꠛꠣꠖꠦ ꠀꠅꠞ ꠙꠣꠠꠤ ꠖꠤꠀ ꠎꠣꠅꠀꠞ ꠇꠣꠟꠅ ꠍꠣꠢꠣꠛꠤ ꠅꠇꠟꠦ ꠟꠉꠦ ꠇꠞꠤ ꠞꠥꠐꠤ ꠘꠤꠔꠣ ꠚꠣꠃꠞꠤꠟꠤꠟꠣ। 6ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠡꠣꠛꠗꠣꠘ ꠅꠅ, ꠚꠞꠤꠡꠤ ꠀꠞ ꠍꠤꠖ꠆ꠖꠦꠇꠤꠀ ꠖꠟꠞ ꠈꠣꠝꠤꠞ ꠕꠣꠇꠤ ꠢꠥꠡꠤꠀꠞ ꠞꠁꠅ।”
7ꠁꠈꠣꠘ ꠢꠥꠘꠤꠀ ꠍꠣꠢꠣꠛꠤ ꠅꠇꠟꠦ ꠇꠣꠘꠣ-ꠇꠣꠘꠤ ꠇꠞꠤ ꠇꠁꠟꠣ, “ꠀꠝꠞꠣ ꠞꠥꠐꠤ ꠀꠘꠍꠤ ꠘꠣ ꠇꠞꠤ ꠝꠘꠅꠟꠄ ꠔꠣꠁꠘ ꠅꠈꠣꠘ ꠇꠁꠞꠣ।” 8ꠁꠍꠣꠄ ꠔꠣꠞꠣꠞ ꠜꠣꠛ ꠛꠥꠎꠤꠟꠤꠟꠣ, ꠛꠥꠎꠤꠀ ꠇꠁꠟꠣ, “ꠢꠣꠄꠞꠦ ꠇꠝꠎꠥꠞ ꠁꠝꠣꠘꠖꠣꠞ ꠅꠇꠟ, ꠔꠥꠝꠞꠣꠞ ꠉꠦꠍꠦ ꠞꠥꠐꠤ ꠘꠣꠁ, ꠁꠈꠣꠘ ꠇꠁꠞꠣꠄ ꠇꠦꠘꠦ? 9ꠔꠥꠝꠞꠣ ꠅꠈꠘꠅ ꠇꠥꠘ꠆ꠔꠣ ꠛꠥꠎꠅ ꠘꠣ ꠘꠤ, ꠇꠥꠘ꠆ꠔꠣ ꠝꠘꠅ ꠅꠞ ꠘꠣ ꠘꠤ? ꠀꠝꠤ ꠎꠦꠛꠟꠣ ꠙꠣꠌꠈꠣꠘ ꠞꠥꠐꠤꠖꠤ ꠙꠣꠌ ꠀꠎꠣꠞ ꠝꠣꠘꠡꠞꠦ ꠈꠣꠅꠀꠁꠍꠟꠣꠝ, ꠈꠣꠘꠤꠞ ꠛꠣꠖꠦ ꠔꠥꠝꠞꠣ ꠇꠔ ꠐꠥꠇꠞꠤ ꠉꠥꠠꠣ-ꠉꠣꠠꠣ ꠖꠟꠣ ꠇꠞꠍꠟꠣꠄ? 10ꠀꠞ ꠢꠃ ꠎꠦ ꠡꠣꠔꠈꠣꠘ ꠞꠥꠐꠤꠖꠤ ꠌꠣꠁꠞ ꠀꠎꠣꠞ ꠝꠣꠘꠡꠦ ꠈꠣꠁꠍꠟꠣ, ꠈꠣꠁꠀ ꠢꠣꠞꠟꠦ ꠇꠔ ꠐꠥꠇꠞꠤ ꠖꠟꠣ ꠇꠞꠍꠟꠣꠄ? 11ꠔꠦ ꠅꠈꠘ ꠔꠥꠝꠞꠣ ꠛꠥꠎꠅ ꠘꠣ ꠇꠦꠘꠦ, ꠀꠝꠤ ꠅꠃ ꠞꠥꠐꠤꠞ ꠛꠦꠙꠣꠞꠦ ꠇꠁꠀꠞ ꠘꠣ? ꠢꠥꠘꠅ, ꠚꠞꠤꠡꠤ ꠀꠞ ꠍꠤꠖ꠆ꠖꠦꠇꠤꠀ ꠅꠇꠟꠞ ꠈꠣꠝꠤꠞ ꠕꠣꠇꠤ ꠢꠥꠡꠤꠀꠞ ꠅꠅ।” 12ꠔꠦꠃ ꠍꠣꠢꠣꠛꠤ ꠅꠇꠟꠦ ꠛꠥꠎꠟꠣ, ꠔꠣꠁꠘ ꠀꠍꠟꠦ ꠈꠣꠁꠛꠣꠞ ꠈꠣꠝꠤꠞ ꠕꠣꠇꠤ ꠢꠥꠡꠤꠀꠞꠞ ꠇꠕꠣ ꠇꠁꠞꠣ ꠘꠣ, ꠛꠞꠋ ꠚꠞꠤꠡꠤ ꠀꠞ ꠍꠤꠖ꠆ꠖꠦꠇꠤꠀ ꠅꠇꠟꠞ ꠔꠣꠟꠤꠝ ꠕꠣꠇꠤ ꠢꠥꠡꠤꠀꠞ ꠅꠁꠔꠦ ꠇꠁꠍꠂꠘ।
ꠢꠎꠞꠔ ꠁꠍꠣ ꠀꠍꠟꠦ ꠇꠦ?
13ꠛꠣꠖꠦ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠇꠂꠍꠞꠤꠀ-ꠚꠤꠟꠤꠙꠤ ꠐꠣꠃꠘꠞ ꠇꠣꠘ꠆ꠖꠣ-ꠇꠣꠍꠣꠔ ꠉꠦꠟꠣ। ꠙꠕꠅ ꠍꠣꠢꠣꠛꠤ ꠅꠇꠟꠞꠦ ꠎꠤꠇꠣꠁꠟꠣ, “ꠇꠅ ꠌꠣꠁꠘ, ꠝꠣꠘꠡꠦ ꠇꠤꠔꠣ ꠝꠘꠅ ꠇꠞꠂꠘ, ꠀꠝꠤ ꠛꠤꠘ-ꠀꠖꠝ ꠇꠦ?” 14ꠄꠞꠣ ꠎꠥꠀꠙ ꠖꠤꠟꠣ, “ꠇꠥꠘꠥ ꠇꠥꠘꠥ ꠝꠣꠘꠡꠦ ꠇꠂꠘ, ꠀꠙꠘꠦ ꠄꠢꠤꠀ ꠘꠛꠤ। ꠇꠥꠘꠥ ꠎꠘꠦ ꠇꠂꠘ ꠁꠟꠤꠀꠍ ꠘꠛꠤ। ꠇꠦꠃ ꠇꠦꠃ ꠇꠄ ꠁꠀꠞꠝꠤꠀ ꠘꠛꠤ, ꠛꠣ ꠅꠁꠘ꠆ꠘ ꠇꠥꠘꠥ ꠘꠛꠤ।” 15ꠅꠃ ꠔꠣꠁꠘ ꠇꠁꠟꠣ, “ꠅꠁꠟꠦ ꠔꠥꠝꠞꠣ ꠇꠤꠔꠣ ꠝꠘꠅ ꠇꠞꠅ, ꠀꠝꠤ ꠇꠦ?” 16ꠍꠣꠢꠣꠛꠤ ꠍꠣꠁꠝꠘ-ꠙꠤꠔꠞꠦ ꠎꠥꠀꠙ ꠖꠤꠟꠣ, “ꠀꠙꠘꠦ ꠔ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ ꠁꠛꠘꠥꠟ꠆ꠟꠣ, ꠎꠤꠘ꠆ꠖꠣ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ।” 17ꠁꠍꠣꠄ ꠇꠁꠟꠣ, “ꠅ ꠍꠣꠁꠝꠘ ꠛꠤꠘ ꠁꠃꠘꠥꠍ, ꠔꠥꠝꠤ ꠛꠠ ꠘꠦꠇ-ꠇꠙꠣꠟꠤ, ꠇꠣꠞꠘ, ꠖꠥꠘꠤꠀꠞ ꠇꠥꠘꠥ ꠝꠣꠘꠡꠦ ꠔꠥꠝꠣꠞꠦ ꠁꠔꠣ ꠎꠣꠘꠣꠁꠍꠦ ꠘꠣ, ꠅꠁꠟꠦ ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄꠃ ꠎꠣꠘꠣꠁ ꠖꠤꠍꠂꠘ। 18ꠔꠦ ꠀꠝꠤ ꠔꠥꠝꠣꠞꠦ ꠇꠁꠞꠣꠝ, ꠔꠥꠝꠤ ꠔ ꠙꠣꠔ꠆ꠔꠞ, ꠄꠞꠟꠣꠉꠤ ꠔꠥꠝꠣꠞ ꠘꠣꠝ ꠖꠤꠍꠟꠣꠝ ꠙꠤꠔꠞ, ꠀꠞ ꠅꠃ ꠙꠣꠔ꠆ꠔꠞꠞ ꠃꠙꠞꠦꠃ ꠀꠝꠣꠞ ꠔꠞꠤꠇꠣꠞ ꠔꠣꠝꠣꠝ ꠎꠝꠣꠔ ꠉꠠꠤꠀ ꠔꠥꠟꠝꠥ। ꠖꠥꠎꠈꠤ ꠇꠥꠘꠥ ꠡꠇ꠆ꠔꠤꠄꠃ ꠄꠞ ꠟꠉꠦ ꠙꠣꠞꠔ ꠘꠣꠄ। 19ꠔꠥꠝꠣꠞ ꠀꠔꠅ ꠀꠝꠤ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠌꠣꠛꠤ ꠖꠤꠝꠥ, ꠅꠃ ꠖꠥꠘꠤꠀꠔ ꠔꠥꠝꠤ ꠎꠦꠔꠣꠞꠦ ꠘꠣꠎꠣꠁꠎ ꠇꠁꠛꠣꠄ, ꠁꠔꠣ ꠀꠟ꠆ꠟꠣꠞ ꠖꠞꠛꠣꠞꠅ ꠘꠣꠎꠣꠁꠎ ꠅꠁꠎꠤꠛ, ꠀꠞ ꠔꠥꠝꠤ ꠎꠦꠔꠣꠞꠦ ꠎꠣꠁꠎ ꠇꠁꠛꠣꠄ, ꠀꠟ꠆ꠟꠣꠞ ꠖꠞꠛꠣꠞꠅ-ꠅ ꠁꠔꠣ ꠎꠣꠁꠎ ꠅꠁꠎꠤꠛ।”
20ꠛꠣꠖꠦ ꠁꠍꠣꠄ ꠔꠣꠞꠣꠞꠦ ꠖꠠꠣꠁꠀ ꠇꠁꠟꠣ, “ꠀꠝꠤꠃ ꠎꠦꠘ ꠢꠃ ꠀꠟ-ꠝꠍꠤ, ꠁꠔꠣ ꠇꠦꠃꠞꠞꠦ ꠢꠥꠘꠣꠁꠅ ꠘꠣ।”
ꠙꠄꠟꠣ ꠛꠣꠞ ꠘꠤꠎꠞ ꠝꠃꠔꠞ ꠀꠉꠣꠝ ꠈꠛꠞ
21ꠅꠃ ꠡꠝꠄ ꠕꠣꠇꠤ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠎꠣꠘꠣꠘꠤ ꠗꠞꠟꠣ, ꠔꠣꠁꠘ ꠎꠦꠞꠥꠎꠣꠟꠦꠝꠅ ꠎꠣꠁꠔꠦ ꠅꠁꠛ। ꠢꠘꠞ ꠝꠥꠞꠛ꠆ꠛꠤ ꠅꠇꠟꠦ, ꠛꠠ ꠁꠝꠣꠝ ꠅꠇꠟꠦ ꠀꠞ ꠝꠃꠟꠣꠘꠣ ꠅꠇꠟꠦ ꠔꠣꠘꠞꠦ ꠛꠃꠔ ꠖꠥꠈ-ꠝꠍꠤꠛꠔꠅ ꠚꠣꠟꠣꠁꠛꠣ। ꠛꠣꠖꠦ ꠔꠣꠘꠞꠦ ꠎꠣꠘꠦ ꠝꠣꠞꠣ ꠅꠁꠛ, ꠅꠁꠟꠦ ꠝꠃꠔꠞ ꠔꠤꠘ ꠖꠤꠘꠞ ꠖꠤꠘ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠛꠣ।
22ꠁꠈꠣꠘ ꠢꠥꠘꠤꠀ ꠍꠣꠢꠣꠛꠤ ꠙꠤꠔꠞꠦ ꠔꠣꠘꠞꠦ ꠕꠥꠠꠣ ꠢꠞꠣꠁꠀ ꠘꠤꠀ ꠇꠁꠟꠣ, “ꠢꠥꠎꠥꠞ, ꠅꠡꠝ꠆ꠛꠛ, ꠀꠙꠘꠣꠞ ꠃꠙꠞꠦ ꠇꠥꠘꠥꠝꠘ꠆ꠔꠦꠃ ꠁꠔꠣ ꠅꠁꠔꠦ ꠙꠣꠞꠦ ꠘꠣ।” 23ꠁꠍꠣꠄ ꠙꠤꠔꠞꠞ ꠛꠣꠄ ꠚꠤꠞꠤꠀ ꠇꠁꠟꠣ, “ꠗꠥꠞ ꠁꠛꠟꠤꠍ, ꠀꠝꠣꠞ ꠉꠦꠍ ꠕꠣꠇꠤ ꠜꠣꠉ! ꠔꠥꠁ ꠀꠝꠣꠞ ꠙꠕꠞ ꠎꠁꠘ꠆ꠎꠣꠟ। ꠔꠥꠁ ꠀꠟ꠆ꠟꠣꠁ ꠝꠥꠘꠡꠣꠞꠦ ꠛꠣꠖ ꠖꠤꠀ, ꠝꠣꠘꠡꠞ ꠟꠣꠈꠣꠘ ꠌꠤꠘ꠆ꠔꠣ ꠇꠞꠞꠦ।”
24ꠛꠣꠖꠦ ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠇꠦꠃ ꠎꠥꠖꠤ ꠀꠝꠣꠞ ꠔꠞꠤꠇꠣꠔ ꠀꠁꠔ ꠌꠣꠄ, ꠔꠦ ꠢꠦ ꠔꠣꠞ ꠘꠤꠎꠞ ꠈꠥꠡꠤꠄ ꠌꠟꠣ ꠛꠣꠖ ꠖꠦꠃꠇ, ꠔꠣꠞ ꠀꠙꠘ ꠖꠥꠈ-ꠇꠡ꠆ꠐꠞ ꠍꠟꠤꠛ ꠛꠁꠀ ꠟꠁꠀ ꠀꠝꠣꠞ ꠈꠞꠦ ꠀꠃꠇ। 25ꠎꠦ ꠝꠣꠘꠡꠦ ꠔꠣꠞ ꠘꠤꠎꠞ ꠎꠣꠘ ꠛꠣꠌꠣꠁꠔ ꠌꠣꠄ, ꠢꠦ ꠔꠣꠞ ꠀꠍꠟ ꠎꠤꠘ꠆ꠖꠦꠉꠤ ꠈꠥꠀꠁꠛ। ꠅꠁꠟꠦ ꠎꠦ ꠎꠘꠦ ꠀꠝꠣꠞ ꠟꠣꠉꠤ ꠔꠣꠞ ꠎꠣꠘ ꠇꠥꠞꠛꠣꠘꠤ ꠖꠦꠄ, ꠢꠦ ꠀꠍꠟ ꠎꠤꠘ꠆ꠖꠦꠉꠤ ꠙꠣꠁꠛ। 26ꠇꠥꠘꠥ ꠝꠣꠘꠡꠦ ꠀꠡ꠆ꠔꠣ ꠖꠥꠘꠤꠀ ꠙꠣꠁꠀꠅ ꠎꠥꠖꠤ ꠔꠣꠞ ꠀꠍꠟ ꠎꠤꠘ꠆ꠖꠦꠉꠤ ꠈꠥꠀꠁꠟꠣꠄ, ꠔꠦ ꠔꠣꠞ ꠇꠥꠘꠥ ꠚꠣꠄꠖꠣ ꠅꠁꠟ ꠘꠤ? ꠢꠦꠡꠦ ꠀꠍꠟ ꠎꠤꠘ꠆ꠖꠦꠉꠤ ꠙꠣꠅꠀꠞ ꠟꠣꠉꠤ ꠢꠦ ꠇꠥꠘ ꠗꠘ ꠛꠤꠟꠣꠁꠛ? 27ꠀꠝꠤ ꠛꠤꠘ-ꠀꠖꠝꠦ ꠎꠦꠛꠟꠣ ꠀꠝꠣꠞ ꠚꠤꠞꠤꠡ꠆ꠔꠣ ꠅꠇꠟꠞꠦ ꠟꠉꠦ ꠟꠁꠀ ꠀꠝꠣꠞ ꠉꠣꠁꠛꠤ ꠛꠣꠚꠞ ꠇꠥꠖꠞꠔꠤ ꠝꠢꠤꠝꠣꠄ ꠎꠉꠔꠅ ꠢꠤꠞꠛꠣꠞ ꠀꠁꠝꠥ, ꠅꠃ ꠡꠝꠄ ꠙꠞꠔꠦꠇ ꠝꠣꠘꠡꠞꠦ ꠔꠣꠞ ꠀꠝꠟ ꠝꠣꠚꠤꠇ ꠚꠟ ꠖꠤꠝꠥ। 28ꠢꠥꠘꠅ, ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠅꠘꠅ ꠁꠟꠣꠈꠣꠘ ꠇꠄꠎꠘ ꠀꠎꠤꠞ ꠀꠍꠂꠘ, ꠀꠝꠤ ꠛꠤꠘ-ꠀꠖꠝ ꠛꠣꠖꠡꠣ ꠢꠣꠟꠔꠦ ꠘꠣ ꠀꠅꠀ ꠙꠞ꠆ꠎꠘ꠆ꠔ, ꠇꠥꠘꠥꠝꠘ꠆ꠔꠦꠃ ꠄꠞꠣꠞ ꠝꠃꠔ ꠅꠁꠔ ꠘꠣꠄ।”
Currently Selected:
ꠁꠘ꠆ꠎꠤꠟ ১: ꠝꠕꠤ 16: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
