ꠔꠃꠞꠣꠔ ৩: ꠟꠦꠛꠤꠀꠘ 5
5
ꠇꠥꠘ ꠇꠥꠘ ꠉꠥꠘꠣꠞ ꠟꠣꠉꠤ ꠇꠚꠞꠣ ꠎꠞꠥꠞ
1“ꠇꠥꠘꠥ ꠝꠣꠘꠡꠦ ꠎꠥꠖꠤ ꠘꠤꠎꠞ ꠌꠃꠈꠦ ꠖꠦꠈꠣ ꠛꠣ ꠇꠣꠘꠦ ꠢꠥꠘꠣ ꠇꠥꠘꠥ ꠊꠐꠘꠣ ꠎꠣꠘꠦ, ꠀꠞ ꠛꠤꠌꠣꠞꠞ ꠇꠣꠟꠅ ꠀꠖꠣꠟꠔꠅ ꠡꠣꠇ꠆ꠇꠤꠞ ꠡꠥꠎꠥꠉ ꠙꠣꠁꠀꠅ ꠡꠣꠇ꠆ꠇꠤ ꠘꠣ ꠖꠦꠄ, ꠔꠦ ꠁꠔꠣꠞ ꠟꠣꠉꠤ ꠢꠦ ꠉꠥꠘꠣ ꠇꠞꠦ, ꠔꠣꠞ ꠁ ꠅꠙꠞꠣꠗꠞ ꠡꠣꠎꠣ ꠢꠦ ꠛꠁꠛ।
2“ꠇꠦꠃ ꠎꠥꠖꠤ ꠘꠣ ꠎꠣꠘꠤꠀ ꠇꠥꠘꠥ ꠘꠣꠙꠣꠇ ꠎꠤꠘꠤꠡ ꠍꠁꠟꠣꠄ, ꠔꠦ ꠢꠦ ꠘꠣꠙꠣꠇ ꠀꠞ ꠖꠥꠡꠤ ꠛꠘꠛ। ꠁꠔꠣ ꠇꠥꠘꠥꠎꠣꠔꠞ ꠎꠋꠟꠤ ꠢꠣꠞꠣꠝ ꠝꠞꠣ ꠙꠡꠥ, ꠊꠞꠅ ꠙꠣꠟꠣ ꠇꠥꠘꠥ ꠝꠞꠣ ꠎꠣꠘꠖꠣꠞ ꠛꠣ ꠝꠣꠐꠤꠞ ꠝꠣꠎꠦ ꠛꠥꠇꠦ ꠌꠟꠞꠣ ꠎꠦꠇꠥꠘꠥ ꠝꠞꠣ ꠎꠣꠘꠖꠣꠞꠞꠦ ꠘꠣ ꠎꠣꠘꠤꠀ ꠍꠁꠟꠦꠅ ꠖꠥꠡꠤ-ꠘꠣꠙꠣꠇ ꠛꠘꠛ।
3“ꠝꠣꠘꠡꠞ ꠡꠞꠤꠟꠞꠦ ꠎꠦꠔꠣꠄ ꠘꠣꠙꠣꠇ ꠇꠞꠤꠟꠣꠄ, ꠡꠞꠤꠟ ꠕꠣꠇꠤ ꠛꠣꠞꠅꠁꠟ ꠅꠃ ꠟꠣꠈꠣꠘ ꠇꠥꠘꠥꠔꠣ ꠇꠦꠃ ꠎꠥꠖꠤ ꠘꠣ ꠎꠣꠘꠤꠀ ꠍꠁꠟꠣꠄ, ꠔꠦ ꠁꠔꠣ ꠎꠣꠘꠣꠞ ꠛꠣꠖꠦ ꠢꠦ ꠖꠥꠡꠤ ꠅꠁꠛ।
4“ꠀꠈꠟ-ꠛꠤꠛꠦꠇ ꠘꠣ ꠈꠣꠐꠣꠁꠀ ꠀꠈꠔꠣ ꠎꠥꠖꠤ ꠇꠦꠃ ꠇꠥꠘꠥ ꠇꠍꠝ ꠇꠞꠤꠟꠣꠄ, ꠜꠣꠟꠣ ꠛꠣ ꠛꠥꠞꠣ ꠇꠥꠘ꠆ꠔꠣ ꠇꠞꠝꠥ ꠇꠁꠀ ꠝꠘꠞ ꠛꠦ-ꠈꠤꠀꠟꠦ ꠇꠦꠃ ꠇꠥꠘꠥ ꠇꠍꠝ ꠈꠣꠁꠟꠦꠅ, ꠢꠦ ꠎꠦꠛꠟꠣ ꠁꠈꠣꠘ ꠛꠥꠎꠤꠟꠤꠛ ꠅꠃ ꠡꠝꠄ ꠢꠦ ꠖꠥꠡꠤ ꠛꠘꠛ।
5“ꠅꠃ ꠟꠣꠈꠣꠘ ꠎꠦꠇꠥꠘꠥ ꠅꠙꠞꠣꠗ ꠇꠞꠤꠀ ꠇꠦꠃ ꠖꠥꠡꠤ ꠛꠘꠤꠉꠦꠟꠦ, ꠢꠦ ꠘꠤꠎꠞ ꠉꠥꠘꠣꠞꠦ ꠡ꠆ꠛꠤꠇꠣꠞ ꠇꠞꠔꠦ ꠅꠁꠛ। 6ꠀꠞ ꠅꠃ ꠉꠥꠘꠣꠞ ꠎꠞꠤꠝꠣꠘꠣ ꠢꠤꠡꠣꠛꠦ ꠢꠦ ꠝꠣꠛꠥꠖꠞ ꠘꠣꠝꠦ, ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠘꠤꠅꠔꠦ ꠄꠇꠐꠣ ꠝꠦꠠꠤ ꠛꠣ ꠍꠣꠉꠤ ꠀꠘꠛ, ꠀꠞ ꠁꠝꠣꠝꠦ ꠔꠣꠞ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠛꠣ।
7“ꠀꠞ ꠢꠦ ꠎꠥꠖꠤ ꠝꠦꠠꠤ ꠛꠣ ꠍꠣꠉꠤ ꠀꠘꠔꠦ ꠅꠙꠣꠞꠉ ꠅꠄ, ꠔꠦ ꠅꠃ ꠉꠥꠘꠣꠞ ꠎꠞꠤꠝꠣꠘꠣ ꠛꠣꠛꠔ ꠖꠥꠁꠐꠣ ꠒꠥꠙꠤ ꠙꠣꠈꠤ ꠛꠣ ꠙꠣꠞꠅ ꠀꠘꠤꠀ ꠝꠣꠛꠥꠖꠞ ꠘꠣꠝꠦ ꠖꠤꠔꠦ ꠅꠁꠛ। ꠁꠔꠣꠞ ꠝꠣꠎꠞ ꠄꠉꠥ ꠅꠁꠛ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ, ꠀꠞ ꠖꠥꠍꠞꠣꠐꠣ ꠎꠣꠟꠣꠁꠟ ꠇꠥꠞꠛꠣꠘꠤ। 8ꠀꠞ ꠢꠦ ꠁꠔꠣ ꠀꠘꠤꠀ ꠁꠝꠣꠝꠞ ꠀꠔꠅ ꠖꠤꠛ, ꠁꠝꠣꠝꠦ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠢꠤꠡꠣꠛꠦ ꠙꠄꠟꠣ ꠄꠉꠥ ꠙꠣꠈꠤꠞꠦ ꠇꠥꠞꠛꠣꠘꠤ ꠖꠤꠛꠣ। ꠔꠣꠁꠘ ꠅꠉꠥꠞ ꠇꠟ꠆ꠟꠣ ꠝꠥꠞꠣꠁꠀ ꠝꠣꠞꠛꠣ, ꠅꠁꠟꠦ ꠇꠟ꠆ꠟꠣ ꠀꠟꠉꠣꠁꠔꠣ ꠘꠣꠄ। 9ꠛꠣꠖꠦ ꠅꠉꠥꠞ ꠕꠥꠠꠣ ꠟꠃ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠔ ꠍꠤꠐꠣꠁ ꠖꠤꠛꠣ, ꠀꠞ ꠛꠣꠖ-ꠛꠣꠇꠤ ꠟꠃ ꠇꠥꠞꠛꠣꠘꠤ ꠈꠣꠘꠣꠞ ꠔꠟꠦ ꠓꠣꠟꠤ ꠖꠤꠛꠣ। ꠁꠔꠣ ꠅꠁꠟ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠇꠥꠞꠛꠣꠘꠤ। 10ꠀꠞ ꠖꠥꠍꠞꠣ ꠙꠣꠈꠤꠐꠣꠞꠦ ꠁꠝꠣꠝ ꠍꠣꠛꠦ ꠘꠤꠅꠝ ꠝꠣꠚꠤꠇ ꠎꠣꠟꠣꠁꠟ ꠇꠥꠞꠛꠣꠘꠤ ꠖꠤꠛꠣ। ꠖꠤꠀ, ꠔꠣꠞ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠛꠣ, ꠔꠦꠃ ꠢꠦ ꠝꠣꠚꠤ ꠙꠣꠁꠛ।
11“ꠀꠞ ꠎꠥꠖꠤ ꠅꠃ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠖꠥꠁꠐꠣ ꠒꠥꠙꠤ ꠙꠣꠈꠤ ꠛꠣ ꠙꠣꠞꠅ ꠀꠘꠔ ꠘꠣ ꠙꠣꠞꠦ, ꠔꠦ ꠢꠦ ꠖꠥꠁ ꠡꠦꠞ ꠝꠄꠖꠣ ꠀꠘꠔꠦ ꠅꠁꠛ। ꠁꠔꠣ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠅꠀꠄ ꠁꠔꠣꠞ ꠃꠙꠞꠦ ꠇꠥꠘꠥ ꠔꠦꠟ ꠛꠣ ꠟꠥꠛꠣꠘ-ꠀꠉꠞ ꠖꠤꠅ ꠘꠣ। 12ꠅꠃ ꠝꠄꠖꠣ ꠟꠁꠀ ꠢꠦ ꠁꠝꠣꠝꠞ ꠉꠦꠍꠦ ꠎꠣꠁꠛ, ꠉꠦꠟꠦ ꠅꠃ ꠀꠡ꠆ꠔꠣ ꠇꠥꠞꠛꠣꠘꠤꠞ ꠛꠖꠟꠣ ꠘꠤꠡꠣꠘꠣ ꠢꠤꠡꠣꠛꠦ ꠄꠇ ꠝꠥꠁꠐ ꠝꠄꠖꠣ ꠁꠝꠣꠝ ꠍꠣꠛꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠝꠣꠛꠥꠖꠞ ꠘꠣꠝꠦ ꠎꠣꠟꠣꠁꠟꠤꠛꠣ। ꠁꠔꠣ ꠅꠁꠟ ꠝꠣꠛꠥꠖꠞ ꠘꠣꠝꠦ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ। 13ꠢꠦ ꠎꠦ ꠅꠙꠞꠣꠗ ꠇꠞꠍꠦ, ꠅꠔꠣꠞ ꠝꠣꠚꠤꠞ ꠟꠣꠉꠤ ꠁꠝꠣꠝꠦ ꠅꠟꠣ ꠇꠚꠞꠣ ꠀꠖꠣꠄ ꠇꠞꠛꠣ, ꠔꠦꠃ ꠔꠣꠞ ꠉꠥꠘꠣꠞ ꠝꠣꠚꠤ ꠙꠣꠁꠛ। ꠀꠞ ꠇꠥꠞꠛꠣꠘꠤ ꠖꠦꠅꠀꠞ ꠛꠣꠖꠦ ꠁ ꠝꠄꠖꠣꠞ ꠎꠔꠈꠣꠘ ꠞꠁꠛ, ꠗꠣꠘ-ꠉꠝꠞ ꠍꠖꠉꠣꠞ ꠟꠣꠈꠣꠘ ꠁꠔꠣ ꠢꠇꠟꠔꠣ ꠁꠝꠣꠝꠦ ꠙꠣꠁꠛꠣ।”
ꠖꠥꠡ-ꠇꠍꠥꠞꠤꠞ ꠈꠦꠔꠤ-ꠙꠥꠞꠘ ꠀꠞ ꠇꠥꠞꠛꠣꠘꠤ
14ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ, 15“ꠇꠦꠃ ꠎꠥꠖꠤ ꠘꠣ ꠎꠣꠘꠤꠀ ꠝꠣꠛꠥꠖꠞ ꠙꠣꠇ-ꠙꠛꠤꠔ꠆ꠞ ꠇꠥꠘꠥ ꠝꠣꠟ-ꠍꠣꠝꠣꠘꠣꠞ ꠛꠦꠙꠣꠞꠦ ꠄꠝꠘꠦꠃ ꠇꠥꠘꠥ ꠖꠥꠡ-ꠇꠍꠥꠞꠤ ꠇꠞꠤꠟꠣꠄ, ꠔꠦ ꠅꠃ ꠉꠥꠘꠣꠞ ꠎꠞꠤꠝꠣꠘꠣ ꠢꠤꠡꠣꠛꠦ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠎꠔ ꠔꠟꠣ ꠞꠥꠙꠣꠖꠤ ꠝꠦꠠꠣꠞ ꠖꠣꠝ ꠑꠤꠇ ꠇꠞꠣ ꠅꠄ, ꠔꠦ ꠢꠦ ꠔꠣꠞ ꠘꠤꠎꠞ ꠙꠣꠟ ꠕꠣꠇꠤ ꠅꠃ ꠙꠞꠤꠝꠣꠘ ꠖꠣꠝꠞ ꠛꠣ ꠢꠝꠣꠘ ꠖꠣꠝꠖꠤ ꠇꠤꠘꠤꠀ ꠘꠤꠈꠥꠔ ꠄꠉꠥ ꠝꠦꠠꠣꠞ ꠙꠣꠑꠣ ꠝꠣꠛꠥꠖꠞ ꠘꠣꠝꠦ ꠇꠥꠞꠛꠣꠘꠤ ꠖꠤꠔꠦ ꠅꠁꠛ। ꠁꠔꠣ ꠔ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤ। 16ꠀꠞ ꠢꠦ ꠅꠃ ꠙꠣꠇ-ꠙꠛꠤꠔ꠆ꠞ ꠝꠣꠟ-ꠍꠣꠝꠣꠘꠣꠞ ꠛꠦꠙꠣꠞꠦ ꠎꠦ ꠖꠥꠡ-ꠇꠍꠥꠞꠤ ꠇꠞꠍꠦ, ꠁꠔꠣꠞ ꠈꠦꠔꠤ-ꠙꠥꠞꠘꠅ ꠖꠤꠔꠦ ꠅꠁꠛ। ꠢꠦ ꠅꠃ ꠝꠦꠠꠣꠞ ꠖꠣꠝꠞ ꠟꠉꠦ ꠀꠞꠅ ꠙꠣꠌ ꠛꠣꠐꠞ ꠄꠇ ꠛꠣꠐ ꠙꠞꠤꠝꠣꠘ ꠘꠉꠖ ꠐꠦꠇꠣ ꠁꠝꠣꠝ ꠍꠣꠛꠞ ꠀꠔꠅ ꠖꠤꠛ। ꠛꠣꠖꠦ ꠁꠝꠣꠝꠦ ꠔꠣꠞ ꠇꠍꠥꠞꠤ ꠝꠣꠚꠤꠞ ꠘꠤꠅꠔꠦ ꠅꠃ ꠝꠦꠠꠣꠞꠦ ꠘꠤꠀ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠀ ꠢꠣꠞꠟꠦ, ꠢꠦ ꠝꠣꠚꠤ ꠙꠣꠁꠛ।
17“ꠀꠞ ꠇꠥꠘꠥ ꠝꠣꠘꠡꠦ ꠎꠥꠖꠤ ꠜꠥꠟ ꠇꠞꠤꠀ ꠘꠣ ꠎꠣꠘꠤꠀ ꠀꠟ꠆ꠟꠣꠞ ꠘꠤꠡꠦꠗ ꠇꠞꠣ ꠇꠥꠘꠥ ꠖꠥꠡ-ꠇꠍꠥꠞꠤꠞ ꠇꠣꠝ ꠇꠞꠤꠟꠣꠄ, ꠔꠦ ꠁꠔꠣꠞ ꠟꠣꠉꠤ ꠢꠦ ꠖꠥꠡꠤ। ꠁ ꠉꠥꠘꠣꠞ ꠟꠣꠉꠤ ꠔꠣꠞꠦ ꠖꠣꠄꠁ ꠇꠞꠣ ꠅꠁꠛ। 18ꠢꠦ ꠔꠣꠞ ꠅꠃ ꠖꠥꠡ-ꠇꠍꠥꠞꠤꠞ ꠇꠚꠞꠣ ꠢꠤꠡꠣꠛꠦ, ꠄꠉꠥ ꠘꠤꠈꠥꠔ ꠝꠦꠠꠣꠞ ꠙꠣꠑꠣ ꠛꠣ ꠄꠞ ꠖꠣꠝ ꠀꠘꠤꠀ ꠁꠝꠣꠝ ꠍꠣꠛꠞ ꠉꠦꠍꠦ ꠖꠤꠛ। ꠢꠦ ꠘꠣ ꠎꠣꠘꠤꠀ ꠎꠦ ꠖꠥꠡ-ꠇꠍꠥꠞꠤ ꠇꠞꠤꠟꠤꠍꠦ, ꠁꠝꠣꠝ ꠍꠣꠛꠦ ꠅꠔꠣꠞ ꠇꠚꠞꠣ ꠀꠖꠣꠄ ꠇꠞꠛꠣ, ꠔꠦꠃ ꠔꠣꠞ ꠝꠣꠚꠤ ꠝꠤꠟꠛ। 19ꠁꠔꠣ ꠔ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤ, ꠢꠦ ꠝꠣꠛꠥꠖꠞ ꠖꠞꠛꠣꠞꠅ ꠖꠥꠡ ꠇꠞꠍꠦ।”
Currently Selected:
ꠔꠃꠞꠣꠔ ৩: ꠟꠦꠛꠤꠀꠘ 5: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
