ꠁꠘ꠆ꠎꠤꠟ ৭: ১-ꠇꠞꠤꠘ꠆ꠔꠤꠀ 14
14
ꠙꠤꠞꠣꠇꠤ ꠝꠣꠔ ꠀꠞ ꠉꠣꠁꠛꠤ ꠜꠣꠡꠣꠄ ꠝꠣꠔꠞ ꠔꠚꠣꠔ
1ꠄꠞꠟꠣꠉꠤ ꠅ ꠜꠣꠁ ꠅꠇꠟ, ꠔꠥꠝꠞꠣꠅ ꠝꠢꠛ꠆ꠛꠔꠞ ꠟꠣꠉꠤ ꠀꠡꠤꠇ ꠅꠅ, ꠙꠣꠇ ꠞꠥꠢꠥꠞ ꠖꠦꠅꠀ ꠖꠣꠘ-ꠘꠤꠀꠝꠔꠞ ꠟꠣꠉꠤ ꠈꠤꠀꠟꠤ ꠅꠅ, ꠈꠣꠍ ꠇꠞꠤ ꠙꠤꠞꠣꠇꠤ ꠝꠣꠔꠤꠛꠣꠞ ꠈꠦꠝꠔꠣ ꠙꠣꠁꠔꠦ ꠈꠤꠀꠟꠤ ꠅꠅ। 2ꠇꠣꠞꠘ ꠎꠦ ꠝꠣꠘꠡꠦ ꠉꠣꠁꠛꠤ ꠇꠥꠘꠥ ꠜꠣꠡꠣꠄ ꠝꠣꠔꠦ, ꠢꠦ ꠁꠔꠣ ꠝꠣꠘꠡꠞ ꠟꠉꠦ ꠝꠣꠔꠦꠞ ꠘꠣ, ꠀꠟ꠆ꠟꠣꠞ ꠟꠉꠦꠃ ꠝꠣꠔꠦꠞ। ꠔꠣꠞ ꠝꠣꠔꠞ ꠜꠣꠡꠣ ꠇꠥꠘꠥ ꠝꠣꠘꠡꠦ ꠛꠥꠎꠦ ꠘꠣ, ꠢꠦ ꠈꠣꠟꠤ ꠙꠣꠇ ꠞꠥꠢꠥꠞ ꠛꠟꠦ ꠛꠣꠔꠥꠘꠤ ꠛꠥꠟꠤ ꠇꠄ। 3ꠅꠁꠟꠦ ꠎꠦꠁꠘ ꠙꠤꠞꠣꠇꠤ ꠝꠣꠔꠂꠘ, ꠄꠁꠘ ꠝꠣꠘꠡꠞ ꠉꠦꠍꠦꠃ ꠝꠣꠔꠂꠘ, ꠄꠘ ꠝꠣꠔꠦ ꠝꠣꠘꠡꠞ ꠎꠤꠘ꠆ꠖꠦꠉꠤꠞꠦ ꠉꠠꠤꠀ ꠔꠥꠟꠦ, ꠝꠣꠘꠡꠞ ꠖꠤꠟꠅ ꠀꠡꠣ ꠀꠞ ꠡꠣꠘ꠆ꠔꠘꠣ ꠎꠥꠉꠣꠄ। 4ꠔꠦ ꠎꠦ ꠎꠘꠦ ꠉꠣꠁꠛꠤ ꠜꠣꠡꠣꠄ ꠝꠣꠔꠦ, ꠢꠦ ꠈꠣꠟꠤ ꠘꠤꠎꠞꠦ ꠉꠠꠤꠀ ꠔꠥꠟꠦ, ꠅꠁꠟꠦ ꠎꠦꠁꠘ ꠙꠤꠞꠣꠇꠤ ꠝꠣꠔꠂꠘ, ꠄꠁꠘ ꠔ ꠀꠟ꠆ꠟꠣꠞ ꠎꠝꠣꠔꠞꠦ ꠉꠠꠤꠀ ꠔꠥꠟꠂꠘ। 5ꠄꠞꠟꠣꠉꠤ ꠀꠝꠤ ꠌꠣꠁꠞꠣꠝ, ꠔꠥꠝꠞꠣ ꠢꠇꠟꠦꠃ ꠉꠣꠁꠛꠤ ꠜꠣꠡꠣꠄ ꠝꠣꠔꠅ, ꠅꠁꠟꠦ ꠀꠞꠅ ꠛꠦꠡꠤ ꠌꠣꠁꠞꠣꠝ, ꠔꠥꠝꠞꠣ ꠢꠇꠟꠦ ꠙꠤꠞꠣꠇꠤ ꠝꠣꠔ ꠝꠣꠔꠅ। ꠝꠘꠅ ꠞꠣꠈꠤꠅ, ꠇꠥꠘꠥ ꠝꠣꠘꠡꠦ ꠎꠥꠖꠤ ꠉꠣꠁꠛꠤ ꠜꠣꠡꠣꠄ ꠝꠣꠔꠦ, ꠀꠞ ꠝꠣꠔꠞ ꠛꠣꠖꠦ ꠎꠝꠣꠔꠞ ꠝꠣꠘꠡꠞꠦ ꠉꠠꠤꠀ ꠔꠥꠟꠣꠞ ꠟꠣꠉꠤ ꠖꠥꠍꠞꠣ ꠇꠦꠃ ꠁꠔꠣꠞ ꠝꠣꠘꠤ ꠛꠥꠎꠣꠁꠀ ꠘꠣ ꠖꠦꠄ, ꠔꠦ ꠢꠃ ꠎꠦꠁꠘ ꠙꠤꠞꠣꠇꠤ ꠝꠣꠔꠂꠘ ꠄꠁꠘꠃ ꠛꠠ।
6ꠜꠣꠁꠀꠁꠘꠞꠦ, ꠀꠝꠤ ꠎꠥꠖꠤ ꠔꠥꠝꠞꠣꠞ ꠉꠦꠍꠦ ꠀꠁꠀ ꠈꠣꠟꠤ ꠉꠣꠁꠛꠤ ꠇꠥꠘꠥ ꠜꠣꠡꠣꠄ ꠝꠣꠔꠤ, ꠅꠁꠟꠦ ꠄꠞ ꠝꠣꠎꠖꠤ ꠀꠟ꠆ꠟꠣꠞ ꠛꠣꠔꠥꠘꠤ ꠝꠥꠘꠡꠣꠞ ꠇꠕꠣ, ꠀꠈꠟ-ꠢꠦꠇꠝꠔꠞ ꠇꠕꠣ, ꠙꠤꠞꠣꠇꠤ ꠇꠥꠘꠥ ꠝꠣꠔ ꠛꠣ ꠇꠤꠔꠣꠛꠤ ꠘꠍꠤꠅꠔ ꠘꠣ ꠎꠣꠘꠣꠁ, ꠔꠦ ꠀꠝꠣꠞꠦꠖꠤ ꠔꠥꠝꠞꠣꠞ ꠇꠥꠘꠥ ꠚꠣꠄꠖꠣ ꠅꠁꠛ ꠘꠤ? 7ꠝꠘꠦ ꠇꠞꠅ, ꠛꠣꠡꠤ, ꠡꠣꠞꠤꠘ꠆ꠖꠣ, ꠀꠞ ꠎꠦꠔꠣ ꠛꠣꠁꠖ꠆ꠖ-ꠛꠣꠎꠘꠣꠞ ꠜꠤꠔꠞꠦ ꠇꠥꠘꠥ ꠎꠣꠘ ꠘꠣꠁ, ꠁꠔꠣ ꠎꠥꠖꠤ ꠉꠣꠘꠞ ꠡꠑꠤꠇ ꠡꠥꠞ-ꠔꠣꠟ ꠘꠣ ꠝꠣꠘꠤꠀ ꠛꠣꠎꠦ, ꠔꠦ ꠅꠃ ꠛꠣꠎꠘꠣꠔ ꠇꠤꠔꠣ ꠛꠣꠎꠦꠞ, ꠝꠣꠘꠡꠦ ꠁꠔꠣ ꠇꠦꠝꠘꠦ ꠛꠥꠎꠛ? 8ꠎꠥꠖ꠆ꠖꠔ ꠎꠣꠅꠀꠞ ꠟꠣꠉꠤ ꠚꠃꠎꠤ ꠡꠤꠋꠉꠣꠄ ꠎꠥꠖꠤ ꠙꠞꠤꠡ꠆ꠇꠣꠞ ꠀꠅꠀꠎ ꠘꠣ ꠖꠦꠄ, ꠔꠦ ꠇꠥꠘꠥ ꠍꠤꠙꠣꠁ ꠞꠦꠒꠤ ꠅꠁꠛ ꠘꠤ? 9ꠅꠟꠣꠈꠣꠘ ꠔꠥꠝꠤ ꠎꠦꠛꠟꠣ ꠅꠎꠣꠘꠣ ꠜꠣꠡꠣꠄ ꠝꠣꠔꠅ, ꠔꠦ ꠔꠥꠝꠤ ꠇꠤꠔꠣ ꠇꠁꠞꠣꠄ, ꠔꠣꠞꠣ ꠇꠦꠝꠘꠦ ꠛꠥꠎꠛ? ꠔꠥꠝꠣꠞ ꠁ ꠝꠣꠔ ꠈꠣꠟꠤ ꠛꠣꠔꠣꠡꠞ ꠟꠉꠦ ꠝꠣꠔꠞꠣꠄ ꠘꠤ? 10ꠁ ꠖꠥꠘꠤꠀꠔ ꠘꠣꠘꠣꠘ ꠎꠣꠔꠞ ꠛꠥꠟꠤ ꠀꠍꠦ, ꠁꠔꠣ ꠇꠥꠘꠥꠐꠣꠃ ꠝꠣꠘꠤ ꠍꠣꠠꠣ ꠘꠣꠄ। 11ꠀꠞ ꠀꠝꠤ ꠎꠥꠖꠤ ꠅꠃ ꠛꠥꠟꠤ ꠘꠣ ꠛꠥꠎꠤ, ꠔꠦ ꠎꠦ ꠎꠘꠦ ꠝꠣꠔꠤꠞꠣ, ꠔꠣꠘ ꠉꠦꠍꠦ ꠔ ꠀꠝꠤ ꠛꠤꠖꠦꠡꠤ ꠝꠣꠘꠡꠞ ꠟꠣꠈꠣꠘ, ꠀꠞ ꠔꠣꠁꠘꠅ ꠀꠝꠣꠞ ꠉꠦꠍꠦ ꠛꠤꠖꠦꠡꠤ। 12ꠁꠈꠣꠘ ꠔ ꠔꠥꠝꠞꠣꠞ ꠛꠦꠟꠣꠄꠅ ꠑꠤꠇ। ꠔꠥꠝꠞꠣ ꠎꠦꠛꠟꠣ ꠙꠣꠇ ꠞꠥꠢꠥꠞ ꠖꠦꠅꠀ ꠖꠣꠘ-ꠘꠤꠀꠝꠔꠞ ꠟꠣꠉꠤ ꠈꠤꠀꠟꠤ ꠅꠁꠞꠣꠄ, ꠔꠦ ꠎꠦ ꠘꠤꠀꠝꠔ ꠖꠤꠀ ꠎꠝꠣꠔꠞꠦ ꠉꠠꠤꠀ ꠔꠥꠟꠣ ꠎꠣꠄ, ꠅꠃ ꠘꠤꠀꠝꠔ ꠙꠣꠅꠀꠞ ꠟꠣꠉꠤꠃ ꠛꠦꠡꠤ ꠌꠦꠡ꠆ꠐꠣ ꠇꠞꠤꠅ।
13ꠄꠞꠟꠣꠉꠤ ꠎꠦ ꠝꠣꠘꠡꠦ ꠉꠣꠁꠛꠤ ꠜꠣꠡꠣꠄ ꠝꠣꠔꠦ, ꠢꠦ ꠀꠟ꠆ꠟꠣꠞ ꠉꠦꠍꠦ ꠝꠣꠋꠉꠃꠇ, ꠎꠣꠔꠦ ꠁꠔꠣꠞ ꠝꠣꠘꠤ ꠛꠥꠎꠣꠁꠀ ꠖꠤꠔ ꠙꠣꠞꠦ। 14ꠀꠝꠤ ꠎꠥꠖꠤ ꠉꠣꠁꠛꠤ ꠜꠣꠡꠣꠄ ꠖꠥꠀ ꠇꠞꠤ, ꠔꠦ ꠀꠍꠟꠦ ꠀꠝꠣꠞ ꠞꠥꠢꠦ ꠖꠥꠀ ꠇꠞꠦꠞ, ꠀꠝꠣꠞ ꠘꠤꠎꠞ ꠝꠘꠦ ꠇꠥꠘ꠆ꠔꠣ ꠇꠞꠦꠞ ꠘꠣ। 15ꠅꠈꠘ ꠀꠝꠤ ꠇꠤꠔꠣ ꠇꠞꠔꠣꠝ? ꠀꠝꠤ ꠞꠥꠢꠥ ꠖꠤꠀ ꠖꠥꠀ ꠇꠞꠔꠣꠝ, ꠀꠞ ꠛꠥꠖ꠆ꠖꠤ ꠖꠤꠀꠅ ꠇꠞꠔꠣꠝ। ꠀꠝꠤ ꠞꠥꠢꠥ ꠖꠤꠀ ꠉꠤꠔ-ꠉꠎꠟ ꠉꠣꠁꠝꠥ, ꠛꠥꠖ꠆ꠖꠤ ꠖꠤꠀꠅ ꠉꠤꠔ-ꠉꠎꠟ ꠉꠣꠁꠝꠥ। 16ꠀꠞ ꠔꠥꠝꠤ ꠎꠥꠖꠤ ꠈꠣꠟꠤ ꠞꠥꠢꠥ ꠖꠤꠀ ꠡꠥꠇꠞꠤꠀ ꠀꠖꠣꠄ ꠇꠞ, ꠔꠦ ꠝꠎꠟꠤꠍꠞ ꠝꠣꠘꠡꠦ ꠇꠤꠟꠣ ꠀꠝꠤꠘ ꠇꠁꠔ? ꠔꠣꠞꠣ ꠔ ꠛꠥꠎꠦꠞꠃ ꠘꠣ ꠔꠥꠝꠤ ꠇꠤꠔꠣ ꠇꠁꠞꠣꠄ, ꠔꠣꠞꠣ ꠔ ꠅꠌꠤꠘꠣ ꠎꠘꠞ ꠟꠣꠈꠣꠘ ꠞꠁꠟꠣ। 17ꠔꠥꠝꠤ ꠢꠄꠔ ꠑꠤꠇ ꠜꠣꠛꠦꠃ ꠡꠥꠇꠞꠤꠀ ꠀꠖꠣꠄ ꠇꠞꠞꠣꠄ, ꠅꠁꠟꠦ ꠅꠃ ꠝꠣꠘꠡꠞꠦ ꠔ ꠉꠠꠤꠀ ꠔꠥꠟꠣ ꠅꠞ ꠘꠣ।
18ꠀꠝꠤ ꠀꠟ꠆ꠟꠣ ꠙꠣꠇꠞ ꠡꠥꠇꠞꠤꠀ ꠀꠖꠣꠄ ꠇꠞꠤ, ꠇꠣꠞꠘ ꠀꠝꠤ ꠉꠣꠁꠛꠤ ꠜꠣꠡꠣꠄ ꠔꠥꠝꠞꠣꠞ ꠌꠣꠁꠔꠦ ꠛꠃꠔ ꠛꠦꠡꠤ ꠝꠣꠔꠤ। 19ꠔꠣ-ꠅ ꠎꠝꠣꠔꠞ ꠝꠣꠢꠚꠤꠟꠞ ꠝꠣꠎꠦ ꠉꠣꠁꠛꠤ ꠜꠣꠡꠣꠄ ꠀꠎꠣꠞ ꠀꠎꠣꠞ ꠇꠕꠣꠞ ꠛꠖꠟꠣ, ꠝꠣꠘꠡꠞ ꠔꠣꠟꠤꠝꠞ ꠟꠣꠉꠤ ꠀꠝꠤ ꠀꠈꠟ ꠈꠣꠐꠣꠁꠀ ꠈꠣꠟꠤ ꠙꠣꠌꠈꠣꠘ ꠇꠕꠣ ꠇꠁꠝꠥ।
20ꠜꠣꠁꠀꠁꠘꠞꠦ, ꠔꠥꠝꠞꠣꠞ ꠀꠈꠟ-ꠛꠥꠖ꠆ꠖꠤ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠘꠣ ꠅꠁꠀ ꠛꠄꠅꠡ꠆ꠇ ꠝꠣꠘꠡꠞ ꠟꠣꠈꠣꠘ ꠅꠃꠇ। ꠅꠁꠟꠦ ꠁꠋꠡꠣ-ꠘꠤꠘ꠆ꠖꠣꠞ ꠛꠦꠙꠣꠞꠦ ꠔꠥꠝꠞꠣꠞ ꠝꠘ ꠝꠣꠍꠥꠝ ꠛꠣꠁꠌ꠆ꠌꠣꠞ ꠟꠣꠈꠣꠘ ꠅꠃꠇ। 21ꠀꠍꠝꠣꠘꠤ ꠇꠤꠔꠣꠛꠅ ꠀꠍꠦ,
ꠅꠌꠤꠘꠣ ꠜꠣꠡꠣꠄ ꠝꠣꠔꠞꠣ ꠝꠣꠘꠥꠡꠖꠤ,
ꠛꠤꠖꠦꠡꠤ ꠝꠣꠘꠡꠞ ꠝꠥꠈꠖꠤ,
ꠀꠝꠤ ꠅꠃ ꠎꠣꠔꠤꠞ ꠟꠉꠦ ꠝꠣꠔꠤꠝꠥ।
ꠔꠣ-ꠅ ꠀꠝꠣꠞ ꠝꠣꠔ ꠔꠣꠞꠣ ꠢꠥꠘꠔ ꠘꠣꠄ,
ꠁꠈꠣꠘ ꠀꠝꠤ ꠝꠣꠛꠥꠖꠦ ꠇꠁꠞꠣꠝ।
22ꠔꠦ ꠛꠥꠎꠣ ꠎꠣꠄ, ꠉꠣꠁꠛꠤ ꠜꠣꠡꠣꠄ ꠝꠣꠔꠣ ꠁꠝꠣꠘꠖꠣꠞ ꠅꠇꠟꠞ ꠟꠣꠉꠤ ꠇꠥꠘꠥ ꠘꠤꠡꠣꠘꠣ ꠘꠣꠄ, ꠛꠞꠋ ꠅ-ꠁꠝꠣꠘꠖꠣꠞ ꠅꠇꠟꠞ ꠟꠣꠉꠤ ꠁꠔꠣ ꠄꠇꠐꠣ ꠘꠤꠡꠣꠘꠣ। ꠀꠞ ꠙꠤꠞꠣꠇꠤ ꠝꠣꠔ ꠝꠣꠔꠣ ꠅ-ꠁꠝꠣꠘꠖꠣꠞꠞ ꠟꠣꠉꠤ ꠇꠥꠘꠥ ꠘꠤꠡꠣꠘꠣ ꠘꠣꠄ, ꠅꠁꠟꠦ ꠁꠝꠣꠘꠖꠣꠞꠞ ꠟꠣꠉꠤ ꠔ ꠁꠔꠣ ꠄꠇꠐꠣ ꠘꠤꠡꠣꠘꠣ।
23ꠎꠝꠣꠔꠞ ꠢꠇꠟ ꠝꠣꠘꠥꠡ ꠄꠇ ꠎꠣꠉꠣꠔ ꠝꠤꠟꠣꠞ ꠛꠣꠖꠦ, ꠢꠇꠟꠦ ꠎꠥꠖꠤ ꠄꠇꠟꠉꠦ ꠉꠣꠁꠛꠤ ꠜꠣꠡꠣꠄ ꠝꠣꠔꠦ, ꠀꠞ ꠅꠃ ꠡꠝꠄ ꠎꠝꠣꠔꠞ ꠛꠣꠁꠞꠞ ꠛꠣ ꠅ-ꠁꠝꠣꠘꠖꠣꠞ ꠇꠥꠘꠥ ꠝꠣꠘꠥꠡ ꠁꠘꠅ ꠀꠄ, ꠔꠦ ꠔꠣꠞꠣ ꠔꠥꠝꠞꠣꠞꠦ ꠙꠣꠉꠟ ꠇꠁꠛꠣ ꠘꠣ ꠘꠤ? 24ꠀꠞ ꠢꠇꠟꠦ ꠎꠥꠖꠤ ꠙꠤꠞꠣꠇꠤ ꠝꠣꠔꠂꠘ, ꠅꠝꠘ ꠡꠝꠄ ꠇꠥꠘꠥ ꠅ-ꠁꠝꠣꠘꠖꠣꠞ ꠀꠁꠀ ꠁꠘꠅ ꠢꠣꠝꠣꠄ, ꠔꠦ ꠅꠃ ꠢꠇꠟꠞ ꠝꠣꠔꠞ ꠝꠣꠎꠖꠤ ꠢꠦ ꠘꠤꠎꠞ ꠉꠥꠘꠣꠞ ꠢꠣꠟꠔ ꠛꠥꠎꠤꠟꠤꠛ, ꠅꠃ ꠝꠣꠔ ꠢꠥꠘꠣꠄ ꠔꠣꠞ ꠘꠤꠎꠞ ꠛꠤꠌꠣꠞ ꠘꠤꠎꠦ ꠇꠞꠛ। 25ꠔꠣꠞ ꠝꠘꠞ ꠟꠥꠇꠣꠁꠟ ꠛꠤꠡꠄ ꠈꠥꠟꠣ-ꠝꠦꠟꠣ ꠅꠁꠛ, ꠔꠦꠃ ꠢꠦ ꠍꠁꠎꠖꠣꠔ ꠙꠠꠤꠀ ꠀꠟ꠆ꠟꠣꠞ ꠉꠃꠞꠛ-ꠔꠣꠞꠤꠚ ꠇꠞꠤꠀ ꠇꠁꠛ, “ꠀꠙꠘꠣꠞꠣꠞ ꠝꠣꠎꠦ ꠘꠤꠌ꠆ꠌꠄ ꠀꠟ꠆ꠟꠣ ꠙꠣꠇ ꠀꠎꠤꠞ ꠀꠍꠂꠘ।”
ꠁꠍꠣꠄꠁ ꠎꠝꠣꠔꠞ ꠘꠤꠅꠝ-ꠇꠣꠘꠥꠘ ꠝꠣꠘꠣ
26ꠜꠣꠁꠀꠁꠘꠞꠦ, ꠇꠤꠔꠣ ꠅꠁꠔ? ꠔꠥꠝꠞꠣ ꠎꠦꠛꠟꠣ ꠄꠇ ꠎꠣꠉꠣꠔ ꠎꠝꠣꠔꠅ ꠖꠟꠣ ꠅꠅ, ꠅꠃ ꠡꠝꠄ ꠇꠦꠃ ꠉꠤꠔ-ꠉꠎꠟ ꠉꠣꠁꠘ, ꠇꠦꠃ ꠘꠍꠤꠅꠔ ꠇꠞꠂꠘ, ꠇꠦꠃ ꠛꠣꠔꠥꠘꠤ ꠛꠦꠙꠣꠞꠦ ꠇꠂꠘ, ꠇꠦꠃ ꠉꠣꠁꠛꠤ ꠜꠣꠡꠣꠄ ꠝꠣꠔꠂꠘ, ꠀꠞ ꠇꠦꠃ ꠁꠔꠣꠞ ꠝꠣꠘꠤ ꠛꠥꠎꠣꠁꠀ ꠖꠦꠁꠘ। ꠔꠦ ꠎꠦꠁꠘ ꠎꠦꠔꠣꠃ ꠇꠞꠂꠘ ꠘꠣ ꠇꠦꠘꠦ, ꠁꠔꠣ ꠎꠣꠘꠥ ꠎꠝꠣꠔꠞꠦ ꠉꠠꠤꠀ ꠔꠥꠟꠣꠞ ꠘꠤꠅꠔꠦ ꠅꠄ। 27ꠇꠦꠃ ꠎꠥꠖꠤ ꠉꠣꠁꠛꠤ ꠜꠣꠡꠣꠄ ꠇꠥꠘ꠆ꠔꠣ ꠝꠣꠔꠦ, ꠔꠦ ꠄꠇꠅꠎꠘ ꠇꠞꠤ ꠖꠥꠁ-ꠔꠤꠘꠎꠘꠦ ꠝꠣꠔꠃꠇ ꠀꠞ ꠄꠇꠎꠘꠦ ꠁꠔꠣꠞ ꠝꠣꠘꠤ ꠛꠥꠎꠣꠁꠀ ꠖꠦꠃꠇ। 28ꠝꠣꠘꠤ ꠛꠥꠎꠣꠁ ꠖꠤꠛꠣꠞ ꠇꠦꠃ ꠘꠣ ꠕꠣꠇꠟꠦ, ꠔꠣꠞꠣ ꠎꠝꠣꠔꠅ ꠌꠥꠙꠌꠣꠙ ꠕꠣꠇꠃꠇ, ꠈꠣꠟꠤ ꠘꠤꠎꠦ ꠘꠤꠎꠦ ꠀꠟ꠆ꠟꠣꠞ ꠟꠉꠦ ꠝꠣꠔꠃꠇ। 29ꠀꠞ ꠙꠤꠞꠣꠇꠤ ꠝꠣꠔꠞꠣ ꠅꠇꠟꠦ ꠅꠟꠣ ꠖꠥꠁ-ꠔꠤꠘꠎꠘꠦ ꠝꠣꠔꠃꠇ ꠀꠞ ꠛꠣꠇꠤ ꠢꠇꠟꠦ ꠎꠣꠌꠣꠁ-ꠛꠣꠌꠣꠁ ꠇꠞꠃꠇ। 30ꠅꠁꠟꠦ ꠎꠝꠣꠔꠅ ꠎꠦꠞꠣ ꠛꠅꠀꠔ ꠀꠍꠂꠘ, ꠔꠣꠞꠣ ꠇꠦꠃꠞꠞ ꠉꠦꠍꠦ ꠎꠥꠖꠤ ꠇꠥꠘꠥ ꠅꠢꠤ ꠛꠣ ꠛꠣꠔꠥꠘꠤ ꠈꠛꠞ ꠘꠣꠎꠤꠟ ꠅꠄ, ꠔꠦ ꠎꠦꠁꠘ ꠛꠄꠀꠘ ꠇꠞꠞꠣ, ꠔꠣꠁꠘ ꠘꠤꠞꠣꠁ ꠅꠁꠎꠣꠃꠇ꠆ꠇꠣ। 31ꠅꠟꠣꠈꠣꠘ ꠔꠥꠝꠞꠣ ꠢꠇꠟꠦꠃ ꠄꠇ ꠄꠇ ꠇꠞꠤ ꠙꠤꠞꠣꠇꠤ ꠝꠣꠔꠤꠅ, ꠎꠣꠔꠦ ꠢꠥꠘꠞꠣ ꠅꠇꠟꠦ ꠔꠣꠟꠤꠝ ꠀꠞ ꠃꠔꠡꠣꠢ ꠙꠣꠄ। 32ꠙꠤꠞꠣꠇꠤ ꠝꠣꠔꠞꠣꠞ ꠞꠥꠢꠥ ꠔ ꠔꠣꠞꠣꠞ ꠘꠤꠎꠞ ꠛꠡꠦ ꠕꠣꠇꠦ, 33ꠀꠟ꠆ꠟꠣ ꠙꠣꠇꠦ ꠘꠤꠌ꠆ꠌꠄ ꠉꠥꠟꠝꠣꠟ ꠙꠍꠘ꠆ꠖ ꠇꠞꠂꠘ ꠘꠣ, ꠛꠞꠋ ꠡꠣꠘ꠆ꠔꠤ ꠙꠍꠘ꠆ꠖ ꠇꠞꠂꠘ।
34ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠢꠇꠟ ꠎꠝꠣꠔꠞ ꠘꠤꠅꠝ-ꠇꠣꠘꠥꠘ ꠅꠁꠟ, ꠎꠝꠣꠔꠞ ꠝꠣꠎꠦ ꠛꠦꠐꠤ ꠝꠣꠘꠥꠡ ꠘꠤꠞꠣꠁ ꠞꠅꠀ ꠃꠌꠤꠔ, ꠉꠚ-ꠡꠚ ꠇꠞꠣ ꠔꠣꠞꠣꠞ ꠟꠣꠉꠤ ꠑꠤꠇ ꠘꠣꠄ। ꠡꠞꠤꠅꠔꠞ ꠘꠤꠅꠝ ꠝꠣꠚꠤꠇ ꠔꠣꠞꠣ ꠅꠗꠤꠘꠔꠣ ꠝꠣꠘꠃꠇ। 35ꠔꠣꠞꠣ ꠇꠥꠘꠥ ꠔꠣꠟꠤꠝ ꠎꠣꠘꠣꠞ ꠈꠤꠀꠟꠤ ꠅꠁꠟꠦ ꠛꠣꠠꠤꠔ ꠉꠤꠀ ꠘꠤꠎꠞ ꠎꠣꠝꠣꠁꠞ ꠉꠦꠍ ꠕꠣꠇꠤ ꠎꠣꠘꠃꠇ। ꠇꠣꠞꠘ ꠎꠝꠣꠔꠞ ꠝꠣꠎꠦ ꠛꠦꠐꠤꠘ꠆ꠔꠦ ꠉꠚ-ꠡꠚ ꠇꠞꠣ ꠡꠞꠝ।
36ꠀꠁꠌ꠆ꠍꠣ ꠇꠅ ꠌꠣꠁꠘ, ꠀꠟ꠆ꠟꠣꠞ ꠇꠣꠟꠣꠝ ꠇꠥꠘꠥ ꠔꠥꠝꠞꠣꠞ ꠉꠦꠍ ꠕꠣꠇꠤ ꠛꠣꠞ ꠅꠁꠍꠦ ꠘꠤ? ꠈꠣꠟꠤ ꠔꠥꠝꠞꠣꠞ ꠉꠦꠍꠦꠃ ꠀꠁꠍꠦ ꠘꠤ? 37ꠝꠘꠅ ꠞꠣꠈꠤꠅ, ꠇꠥꠘꠥ ꠝꠣꠘꠡꠦ ꠎꠥꠖꠤ ꠘꠤꠎꠞꠦ ꠙꠤꠞ-ꠖꠞꠛꠦꠡ ꠛꠣ ꠛꠣꠔꠥꠘꠤ ꠈꠦꠝꠔꠣꠀꠟꠣ ꠝꠘꠅ ꠇꠞꠦ, ꠔꠦ ꠢꠦ ꠁꠈꠣꠘ ꠛꠥꠎꠤꠟꠣꠃꠇ, ꠀꠝꠤ ꠔꠥꠝꠞꠣꠞ ꠉꠦꠍꠦ ꠎꠦꠔꠣ ꠟꠦꠈꠟꠣꠝ, ꠁꠔꠣ ꠢꠇ꠆ꠇꠟꠔꠣꠃ ꠝꠣꠟꠤꠇ ꠁꠍꠣꠞ ꠢꠥꠇꠥꠝ। 38ꠀꠞ ꠇꠦꠃ ꠁꠔꠣ ꠘꠣ ꠝꠣꠘꠟꠦ, ꠔꠣꠞꠦꠅ ꠝꠣꠁꠘ꠆ꠘ ꠇꠞꠣ ꠅꠁꠔ ꠘꠣꠄ।
39ꠄꠞꠟꠣꠉꠤ ꠅ ꠜꠣꠁ ꠅꠇꠟ, ꠔꠥꠝꠞꠣ ꠙꠤꠞꠣꠇꠤ ꠝꠣꠔ ꠝꠣꠔꠤꠛꠣꠞ ꠟꠣꠉꠤ ꠈꠤꠀꠟꠤ ꠅꠅ, ꠀꠞ ꠉꠣꠁꠛꠤ ꠜꠣꠡꠣꠄ ꠝꠣꠔꠤꠔꠦꠅ ꠛꠣꠗꠣ ꠖꠤꠅ ꠘꠣ। 40ꠔꠣ-ꠅ ꠎꠝꠣꠔꠞ ꠢꠇꠟ ꠇꠣꠝꠃ ꠙꠥꠞꠣꠙꠥꠞ ꠀꠖꠛ-ꠇꠣꠄꠖꠣ ꠀꠞ ꠘꠤꠅꠝ-ꠇꠣꠘꠥꠘ ꠝꠣꠘꠤꠀ ꠇꠞꠣ ꠎꠞꠥꠞ।
Currently Selected:
ꠁꠘ꠆ꠎꠤꠟ ৭: ১-ꠇꠞꠤꠘ꠆ꠔꠤꠀ 14: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
