1 Korito 12

Teoso Kanamori yama yoro tokana ta te amaka e ni ya, e one me e narifabone e.

1Teoso ka yama okomina okibone, e ahi naro, te watohabonehe. 2Kirisito te watori ya mata yati hiri ni teoso me tohaha me te yobi kanehemete te amake, me ati watara mati, tera me keyeha te. Afa yama te watoke. 3Makoni te narabo nima okibone. "Sesowi hiyakara", me ati na Teoso Kanamori ati me kaminakere. "Sesowi e ka Hiti amaka", me ati na Teoso Kanamori ati me kaminake. 4-5Teoso yama yoro tokana ta te amaka e ni ya, e ka one me e narifabone e. Teoso Kanamori ta oharite amaka. E ka Hiti ohari, tehi amaka. 6Teoso yama yoro tokana ya e ati boti hiri kite amaka, e nafi. Teoso ta oharika. 7Yama yoro tokana ya Teoso Kanamori era hiri kite amaka, e one me e narifabone e. 8Owa Teoso Kanamori hikanawanebonaka, yama watohibonaha, hikaminahabonehe. 9Owa Teoso kitehimona ati nebonaka, fare Teoso Kanamori ehene. Owa era nanakitama toha nebonaka, Teoso Kanamori ehene. Teoso Kanamori ta oharika. 10Owa yama namohibonaka, Teoso Kanamori ehene. Owa Teoso ati kaminebonaka. Owa me ati mite yama siba nebonaka Teoso Kanamori ati tabiyo. Owa me one ati ya ati tohawebonaka. Teoso Kanamori ehene owa me ati kaminebonaka, me ati hihiya na me ati. 11Afa yama nafi Teoso Kanamori ehene amaka, ohariari. E nafi ati boti hiri kite amaka, fare ati ya.

Kirisito abono kote me te tohake.

12E kote tamake, kobobo naro, e abono oharia e. E abono nima e te e amake, Kirisito ka me e. 13E tamaha e iibofarisa e ohariwahamate amake, e abono nima e na e. Teoso Kanamori ehene soteo me toha, soteo me amara me toha, yama aahi me toha, yama aahi me amara me toha, na me e amake. Teoso Kanamori fare ta te amaka e nafi ni ya. 14E abono kote oharitera amake. E kote tamate amake, kobobo naro. 15E teme ati yana nibana, ati e naro ahi: "E abono kote ama okere, e yehe ama ora owa", ati naba ama? E teme ati e ni ya e abono kote tohamarahaba ama? E abono kote tohasa naboneke. 16E warabo ati yana naba ama, ati e naro ahi: "E abono kote ama okere, e noko korone ama ori karo", ati naba ama? E warabo ati e na e kote tohamarahaba ama? E abono kote tohasa naboneke. 17E abono nafi e noko korone hinama tohi ya, himata ya me ati e mitaribe? E abono nafi e warabo hinama tohi ya himata ya yama mahi e hisi ribe? 18Teoso e abono kote nafi kobobo nite amaka, fare ati ya. 19E abono kote oharia e tohi ya himata nima e abono ribe? 20E abono kote tamaha kobobo na e abono oharia amake. 21E noko korone e yehe hiyaraba ama, ati e naro ahi: "Tiwa onofama okere", ati naba ama? E tati ati e naba ama ahi, e teme hiyararo: "Tera onofama okere", ati naba ama? 22E abono kote kitara ta e nofake mata ya. 23E abono kote aamosa raba na e kakatomate e amake mata ya, e abono kote namohinara toha naro. 24E abono kote aamosa na kakatomi yokana e toharaboneke. Teoso era yoro tokaniwamerika, e abono kote kobobo ni nima. E ka one me aamosa raba na mera kakatomate amaka mata ya, 25e abe mono ribone karo. E abe nofahabone ati nareka, fara e nafi. 26E ka owa yama hiyara karime ya e nafi yawahabone eke. E ka owa me kahiyari ya e nafi yayai nabone eke.

27Kirisito abono nafi me te amake. Kirisito abono kote me te tohake, te nafi. 28Teoso tera yoro tokaniwamerika, Kirisito ka mebone me te. Teoso ka yoyose me tai toha, me nowati ya Teoso ati kakamina me yotoha, me nowati ya era kakanawana me toha, me nowati ya yama nanamo me toha, me nowati ya era nanakitama me toha, me nowati ya era nanarifa me toha, me nowati ya era yoyose me toha, me nowati ya me one ati ya me ati tohawa me toha, nineke. 29Me nafi amakere, Teoso ka yoyose mati. Me nafi amakere tasa, Teoso ati kakamina mati. Me nafi amakere tasa, era kakanawana mati. Me nafi amakere tasa, yama nanamo mati. 30Me nafi amakere tasa, era nanakitama mati. Me nafi amakere tasa, me one ati ya me ati tohawa mati. Me nafi amakere, me ati kakamina mati, me ati hihiya na me ati. 31Yama tai tohaha hiri ni te watohabone onahara oke. Hawi one okomina okibone mata, amosaro mata ya.

Currently Selected:

1 Korito 12: jaaR

Highlight

Copy

Compare