ꞌRooma 8

Rũgẽt Loriiaa cĩ Nyekuci

1Nẽẽthĩ ꞌyioko, iittiõõ thõõth ꞌcĩ etteedothoothĩk eet ꞌcĩg ũrũmtĩ hĩ Yeesu Krĩstõ tõõ, 2hĩnĩngĩtĩ aaꞌnyuung hatĩ Lorii ꞌcĩ Ẽllẽẽmĩth ngagiit rũgẽt ꞌcĩ aku hĩ Yeesu Krĩstõ nẽ õõgauung ꞌthẽccaana hĩ daahĩtha. 3Hõllõngaa occa adĩman nyattalĩ cĩ Mũũꞌtha thõõth icci, hĩnĩngĩtĩ aaꞌnyĩk thõõth ꞌcĩ habũranẽẽkĩ naag nyattal, hiittiõõ hõllõngaa attiranĩ. Nẽẽthĩ, baa õõgauung ngagiit Nyekuci, ngaatĩ ĩꞌthõõanĩ Ngeerĩnĩ hikia haau hĩ naag ꞌthẽccanniooha nẽ ĩĩ ꞌgaarrieenit cĩ ꞌthẽccanẽẽt cĩggaac. Adticaniini Nyekuci ẽlẽ cĩ Yeesu habathanĩ ꞌthẽccan. 4Baa adĩman Nyekuci hoti, hátĩ hĩdĩmanit thõõth ꞌcĩ adiimmeet nyattalĩ hidticanit ꞌgõõlaa ꞌcĩ hathĩknĩ Lori ꞌcĩ Ẽllẽẽmĩthĩ, hĩllõõan ngaatĩ hathĩknĩ thooꞌthiok ꞌcĩg habũraneek naaga.

5Eeta ꞌcĩg aggam muhẽẽnĩtĩ cĩ ꞌthẽccaanõ, ammuk thõõth cĩ eleeti cĩggĩĩng diooni. Nẽ eeta ꞌcĩg aggam Lorii ꞌcĩ Ẽllẽẽmĩthĩ, ammuk thooꞌthiok cĩg Lori ꞌcĩ Ẽllẽẽmĩthĩ. 6Aꞌnyaha muhẽẽnĩtĩ cĩ eet ꞌcĩ ĩĩn ꞌthẽccannioohit daahĩth, nẽẽthĩ, muhẽẽnĩtĩ cĩ eet ꞌcĩ aggam Lorii, ĩĩn rũgẽt hĩ ganõn. 7Aaburreek muhẽẽnĩtĩ cĩ ꞌthẽccaanõ hõdõõkõthĩ Nyekuc. Hõllõngaa ẽlẽmĩ nyattal cĩ Nyekuci nẽ hõllõngaa occa adĩman noho ũdũt. 8Eeta ꞌcĩg aggam ꞌthẽccanẽẽta cĩggĩĩng, hõllõngaa aaꞌnyĩk Nyekuc haccamanoothĩk.

9Nẽẽthĩ, ꞌgõõlaa umwaanĩ, iittiõõ niig hõllõngaa aggammuung ꞌthẽccanẽẽta cugguung, nẽẽthĩ hinnia, aggammuung ngagiit Lorii, hatĩ aaĩ Lorii cĩ Nyekuci hĩ ngagiita. Nẽ má hõllõngaa aꞌnyak ẽẽtĩ umwaa Lori cĩ Krĩstõ, aitiõõ nẽẽ hõllõngaa ĩĩn eet cĩ Krĩstõ. 10Nẽẽthĩ, má aaĩ Krĩstõ hĩ nganiita, arũgĩ hatĩ lorii cunni, hĩnĩngĩtĩ bũnnai cĩ Nyekuci, tananga adaahĩ ẽlẽ cunni, hĩnĩngĩtĩ ꞌthẽccan. 11Nẽ má aaĩ Lorii cĩ Nyekuc baa arũgtha Yeesu daahĩtha hĩ ngagiita, aaꞌnyĩk hatĩ Nyekuci baa arũgtha Krĩstõ daahĩtha eleeti cugguung ꞌcĩg occa adaahĩ ho, rũgẽt Loriiaa cĩnnĩ ĩcĩ aaĩ hĩ ngagiita.

12ꞌGotoonoga hĩ ngoonoga, occa hõllõngaa harũgĩ naag, hátĩ hidticanit thooꞌthiok ꞌcĩg abũraneek eleeti cĩggaac. 13Má arũgnu niig hĩnĩngĩtĩ ꞌthẽccanẽẽt cugguung, adaaknu hatĩnĩ, nẽẽthĩ, má ũtũngteehu niig ꞌthẽccanẽẽt cĩg ẽllaak ꞌtirriaanaa cĩ Loriio, arũgnu hatĩnĩ, 14hĩnĩngĩtĩ eeta ꞌcĩg ũũha Lorii ꞌcĩ Nyekuci, ĩĩn nẽẽg lõhõlĩ cĩg Nyekuci. 15Aitiõõ Lorii cĩ Nyekuci hõllõngaa aaꞌnyeet ngagĩĩt hĩĩtõ appahacaaꞌnya ꞌcĩg hiꞌngolli Nyekuc. Nẽẽthĩ hinnia, hiita hĩĩtõ naag lõhõlĩ cĩgĩnnĩg nẽ hũtũvvẽẽcõ ĩnõõnnõ hĩĩttĩk Baangeet cĩnaac. 16Aaꞌnyeet Lorii cĩ Nyekuci hagaac dĩdĩ hĩĩtõ, hĩĩgĩn naag lõhõlĩ cĩg Nyekuci. 17Nẽ ꞌyioko má hĩĩtõ naag lõhõlĩ cĩg Nyekuci hõdẽĩ hĩ Krĩstõ, hau harigith naag ꞌgattan ꞌcĩ aaꞌnyeet Nyekuci, hĩ baa arigith Krĩstõ buúk ꞌgattan nẽ má hõthõl naag hĩ Yeesu pĩĩrnanĩt cĩnnĩ dĩdĩ, hõthõl hatĩ naag hĩ ĩnõõnnõ bulẽẽnĩt cĩnnĩ buúk.

Bulẽẽnĩt cĩ horumwa

18Maka bulẽẽnĩtĩ ꞌcĩ hatĩ eterꞌtheekeet Nyekuci ngagĩĩt ĩllõõan pĩĩrnanĩt ꞌcĩ ꞌyioko haꞌnyak naag ko. 19Abũraneek hẽlẽggĩ vẽlẽk baag ẽhẽnyta Nyekuci kõr ꞌcĩ hatĩ ẽbẽraanĩ Nyekuci eet cĩgĩnnĩg. 20Nẽẽthĩ hinnia, nga hatalmaanyattĩ hẽlẽggĩ vẽlẽk baag ẽhẽnyta Nyekuci, hõllõngaa hĩnĩngĩtĩ adiim nẽẽg haauto noho. Baa ẽhẽnyta Nyekuci ĩhõõggõ hoti, muhẽẽttaa 21ꞌcĩ hatĩ ooggianĩ hẽlẽggĩ vẽlẽk ꞌcannaana baag ẽhẽnyta nẽẽnĩ, hiittiõõ hõllõngaa acuddiaa hẽlẽggĩ cieegi nẽ iita otholit bulẽẽnĩt ꞌcĩ ooggianĩ lohollia cĩg Nyekuci.

22Haga naag haĩ, baa aguran hẽlẽggĩ vẽlẽk baag ẽhẽnyta Nyekuci huciitha, haauto hĩ ngaa ꞌcĩ attur ꞌgoonnia, hĩĩ kõr kĩ niccieeni. 23Aaꞌnyeet Lorii ngagĩĩt hagaac dĩdĩ authet ꞌcĩ hatĩ hõõ haattiyyi naag horumwa. Nẽẽthĩ ꞌyioko, haguran naag ꞌthinneetinitõõ muguruur, nga hẽrẽ Nyekuc heteretheeheet aĩ, hiita hĩĩtõ naag lõhõlĩ cĩgĩnnĩg. Aĩ thõõth ciee nẽẽ, ooggiaa hatĩ eleeti cĩggaac buúk haauto lõꞌngõõc. 24Hĩnĩngĩtĩ muhẽẽttaa ꞌcĩ abũnnaa ho, hiita heellia naaga. Nẽẽthĩ, ma edeeꞌnyia muhẽẽnĩtĩ ꞌcĩ abũnnaa ho, iittiõõ hõllõngaa ĩĩn muhẽẽnĩt ꞌcĩ abũnnaa dĩdĩ. Nganĩ ꞌcĩ aꞌnyak muhẽẽnĩt ꞌcĩ abũnnaa ꞌgiiaa ꞌcĩ aꞌnyak nẽẽ ẽlẽk? 25Nẽẽthĩ, má haarĩk naag muhẽẽnĩt ꞌcĩ abũnnaa ꞌgiiaa ꞌcĩ nga haꞌnyahit, hẽrẽẽc ĩnõõnnõ temeethitta.

26Nẽ ꞌgõõlaa ĩcĩ dioo, eelleet Lorii ngagĩĩt hittiranit. Hõllõngaa haga naag ꞌgii ꞌcĩ hala ho, nẽẽthĩ hinnianĩ, alaiinneet Lorii nẽẽ dẽẽdẽ, guraanaa ꞌcĩ occa hõllõngaa haduha utugeetini. 27Nẽ Nyekuci ꞌcĩ aga ꞌthinneeti cĩggaac, aga muhẽẽnĩt cĩ Loriio buúk. Hĩnĩngĩtĩ alaiini Lorii eet ꞌcĩg aꞌnyak lemiinit tabiittaa cĩ Nyekuci.

Hiꞌthihi ꞌgii ꞌcĩ occa eꞌngerreet ngagĩĩt mĩnnaanaa cĩ Nyekuci

28Nẽ haga naag buúk haĩ hẽlẽggẽẽnnĩ vẽlẽk, adtican Nyekuci ꞌgii ꞌcĩ abũnnaa, hĩnĩngĩtĩ eet ꞌcĩg ammĩnan ĩnõõnnõ, baag avvaa tabiittaa cĩnnĩ. 29Hĩnĩngĩtĩ eeta baag aga Nyekuci ngaanĩngĩtĩ baarkit, ikia ẽbẽra nẽẽ ĩhõõggõ hiita haauto hĩ Ngeerĩnẽẽnĩ, hátĩ hikia haau nẽẽ hĩ loholeec ꞌcĩ oou ꞌgotoonoginnii hĩ ngoonogiinni ĩĩcĩg mẽẽlĩg. 30Nĩngĩtĩ ẽlẽmmĩ Nyekuci eet baag ẽbẽra nẽẽ baa ĩĩcĩ oou ẽlẽk nẽ otholit bulẽẽnĩt cĩnnĩ hĩ ĩhõõggõ.

31Hẽdẽcĩ occa ꞌyioko thõõth icci haĩ ne? Má ĩĩn Nyekuci Nyekuc cĩnaac, nganĩ ꞌcĩ occa adĩmanneet ngagĩĩt ꞌbuth? 32Baa hõllõngaa ẽdẽnĩ Nyekuci Ngeerĩnĩ, nẽẽthĩ, baa aaꞌnyeet nẽẽ ĩnõõnnõ ngagĩĩta. Má baa adĩman Nyekuci hoti, ĩcca occa hatĩ hõllõngaa aaꞌnyeet nẽẽ hẽlẽggĩ vẽlẽk haaga? 33Nganĩ hatĩ ꞌcĩ etteedĩk eet baag ẽbẽra Nyekuci ẽlẽk thõõth? Aitiõõ ũdũt, hĩnĩngĩtĩ ẽlẽm Nyekuci ĩhõõggõ. 34Aitiõõ eet ꞌcĩ occa etteedĩkeet ngagĩĩt thõõth tõõ, hĩnĩngĩtĩ baa adaak Yeesu Krĩstõ nẽ ũrũga daahĩtha, hĩnĩngĩtĩ ngagĩĩta nẽ iccioloongan bulẽẽtta, attiaa cobbi ĩĩcĩ Nyekuci nẽ alaiinneet ngagĩĩta. 35Nganĩ ꞌcĩ occa eꞌngerreet ngagĩĩt mĩnnaanaa cĩ Krĩstõ? Eꞌngerreet occa pĩĩrnanĩtĩ hode ukẽẽnĩtĩ hode nyarõnĩ hode arriẽẽꞌthĩta hode bathi hode jõrẽẽĩ? 36Hĩcĩ eheeddi ꞌBuuhaa cĩ Nyekuci aĩ,

“Hĩnĩngĩtĩ nganiit Nyekuc, hiita hummuddiawa naag daahĩth waathinniook vẽlẽk.

Haautta naag hĩ aꞌtha ꞌcĩg õõt etteeddi thõng.”#Tigiil ꞌBuuk cĩ Tegellwaanu 44:22

37Hẽlẽggẽẽnnĩĩ cĩg vẽlẽk, hĩllõõanito naag, hĩnĩngĩtĩ Krĩstõ ꞌcĩ ammĩnanneet ngagĩĩta. 38Aitiõõ ꞌgii ꞌcĩ occa eꞌngerreet ngagĩĩt mĩnnaanaa cĩ Nyekuci tõõ, hĩnĩngĩtĩ haga naag dĩdĩ haĩ, hõllõngaa daahĩth hode rũgẽt, hõllõngaa aajĩlẽẽt hode loriẽẽt ꞌcĩg abathĩ,#8:38 Loriẽẽt ꞌcĩg abathĩ: Baa ĩĩn cieeg aajĩlẽẽt ꞌcĩg baag arũmĩ hĩ Nyekuc hẽẽtahujjieen nẽ iita ũtũbũrĩt Nyekuc, nĩngĩtĩ iiggiaĩ Nyekuci ĩhõõggõ hẽẽtahujjieen. Nẽ ꞌyioko iita accananit eet loota nĩnga. Tigiil ꞌBuuk cĩ Terethiitto 12:7-9. hõllõngaa kõr nicci hode horumwa, hode ꞌtirrian umwa, 39ꞌcĩ aku hẽẽtahujjieen hode ꞌtirrian ꞌcĩ aku loota, ꞌcĩ eꞌngerreet ngagĩĩt mĩnnaanaa cĩ Nyekuci. Hiꞌthihi ꞌgii ꞌcĩ occa eꞌngerreet ngagĩĩt hẽlẽggẽẽnnĩĩ vẽlẽk ĩĩcĩg ẽhẽnytaa mĩnnaanaa cĩ Nyekuci, hĩnĩngĩtĩ Yeesu Krĩstõ Makayyioohit cĩnaac.

Currently Selected:

ꞌRooma 8: did

Highlight

Copy

Compare