ꞌRooma 6

Aꞌnyaha ꞌthẽccanĩ daahĩth nẽ aꞌnyaha Krĩstõ rũgẽt

1Hõthõõth occa ꞌyioko haĩ ne? Haraac ꞌyioko hẽꞌthẽcattõ noho, hátĩ hĩttõõrĩ bũnnai? 2Aitiõõ ũdũt! Hĩnĩngĩtĩ ꞌthẽccan, haauto naag hĩ eeta ꞌcĩg hadaahito ẽlẽk nẽ occa nga haalla harũgĩ naag ꞌthẽccaana hutuno? 3Hõllõngaa agayyu niig aĩ, eeta vẽlẽk ꞌcĩg õthõl baattithimo cĩ Yeesu Krĩstõ, õthõl daahĩth cĩnnĩ buúk? 4Baa haggam naag baattithimo, baa haauto naag hĩ eeta ꞌcĩg hadaahito nẽ hadayyi hĩ Krĩstõ. Nẽ hĩ baa arũgthaa Krĩstõ daahĩtha bulẽẽttaa cĩ Nyekuc Maaꞌnyĩ, hau hatĩ haꞌnyak naag buúk rũgẽt ꞌcĩ ĩĩn ngeju.

5Má baa hũrũmtĩ naag hĩ Yeesu daahĩthaa cĩnnĩ, occa hatĩ harũmĩ naag hĩ ĩnõõnnõ buúk kõr ꞌcĩ arũgnaanĩ nẽẽnĩ. 6Haga naag haĩ, otoddoyyioothĩk eleeti baaggaac ꞌrẽẽttĩg hurucceea hĩ Yeesu. Baa adĩmanni thõõth ciee, hátĩ hiittiõõ eleeti cĩggaac hõllõngaa ĩĩn appahacaaꞌnya cĩg ꞌthẽccaanak tarĩ. 7Hĩnĩngĩtĩ ma hadaahĩ naag hõdẽĩ hĩ Krĩstõ, hiita hõõgta naag ꞌtirriaanaa cĩ ꞌthẽccaanõ.

8Nẽẽthĩ ꞌyioko, má baa hadaahĩ naag hõdẽĩ hĩ Krĩstõ, hẽlẽmĩ naag haĩ harũgĩ hatĩ naag buúk hĩ ĩnõõnnõ. 9Hĩnĩngĩtĩ hagaacõ naag ngaanĩngĩtĩ arũgnaanĩ Krĩstõ daahĩtha, iittiõõ nẽẽ hõllõngaa occa adaahĩ tarĩ, iittiõõ daahĩthĩ hõllõngaa occa anyamũũtana ĩnõõnnõ. 10Baa adaahĩ nẽẽnĩ, baa adaahĩ, hátĩ hĩꞌthaan ꞌtirrian cĩ ꞌthẽccaanõ. Nẽẽthĩ, rũgẽtĩ ꞌcĩ arũgnĩ nẽẽ ho, arũgĩ hĩnĩngĩtĩ bulẽẽnĩt cĩ Nyekuci.

11ꞌGõõla hõdẽẽthõng, ma nga haaꞌnyiku eleeti cugguung haggamuung ꞌthẽccanĩ. Nẽẽthĩ hinnia, aaꞌnyuung Yeesu Krĩstõ ngagiit rũgẽt nẽ aauttu ꞌgõõlaa ꞌcĩ accamana Nyekuci. 12Nẽẽthĩ hoti ho, ma haaꞌnyiku ꞌthẽccan haggam eleeti cugguung ꞌcĩg adaahĩ ho, hátĩ hiittiõõ hõllõngaa abũraneeku thooꞌthiok cĩgĩnnĩg ꞌcĩg abathĩ. 13Ma haaꞌnyiku ꞌgoolliok ũgĩ cĩg eleeti cugguung ꞌthẽccan, aanytĩk eleeti cugguung Nyekuc, hĩ eeta ꞌcĩg ũrũgta daahĩtha nẽ aanytĩhu eleeti cugguung hĩ ĩnõõnnõ, hátĩ ĩdĩmanit thooꞌthiok ꞌcĩg abũnnaa. 14Iitiõõ ꞌthẽccanĩ hõllõngaa aggammuung ngagiit tarĩ, hĩnĩngĩtĩ hõllõngaa aggammuung ngagiit nyattalĩ, nẽẽthĩ, aauttu niig lõꞌngõõc bũnnaiittaa cĩ Nyekuci.

Appahacaaꞌnya ꞌcĩg adtican thõõth ꞌcĩ accamana Nyekuci

15Aĩ occa ꞌthẽk thooꞌthioha cieeg vẽlẽk ne? Ĩcca occa ꞌthẽk hara ꞌthẽccan, hĩnĩngĩtĩ hõllõngaa aggammeet nyattalĩ, nẽẽthĩ hinnia, aggammeet bũnnai? Aitiõõ ũdũt! 16Hõllõngaa agayyu niig ngaatĩ iiginnu appahacaaꞌnya cĩg hẽlẽggĩ ꞌcĩg athiknu niiga? Occa iiginnu niig appahacaaꞌnya cĩg ꞌthẽccaanak nẽ adaaktu, hode occa iiginnu appahacaaꞌnya ꞌcĩg athiknu Nyekuc, ꞌcĩ hatĩ aaꞌnyuung ngagiit ũbũttaath rũgẽtaa cunuung. 17Nẽẽthĩ ꞌyioko, ĩlaallẽ hĩ Nyekuc, tananga baa gõõng ĩĩgĩnnu niig appahacaaꞌnya cĩg ꞌthẽccaanak, iita ithiktu niig ꞌlimman baa allimanoothikuung ngagiita. 18Baa õõgtau niig ꞌthẽccaana nẽ ꞌyioko iita iittu appahacaaꞌnya ꞌcĩg adĩmannu thooꞌthiok ꞌcĩg abũnnaa.

19Hothoothi naa hoti, hĩnĩngĩtĩ hõllõngaa attirannu niiga. Hĩ baa gõõng aalla aaꞌnyiku eleeti cugguung hĩĩtõ appahacaaꞌnya cĩg thooꞌthiok ꞌcĩg ĩĩn ꞌriiring hĩ ꞌcĩg abathĩ, nẽẽthĩ ꞌyioko, aanytĩk ĩhõõggõ hĩĩtõ appahacaaꞌnya cĩg thõõth ꞌcĩ abũnnaa ꞌcĩ okooyyuung thõõthaa ꞌcĩ ẽllẽẽmĩthĩ. 20Baa nga iiginnu niig appahacaaꞌnya cĩg ꞌthẽccaanak, baa hõllõngaa adiim accamanaannu Nyekuc. 21ꞌYioko baa bũnnai iina ꞌcĩ baa ꞌthẽk ammũdaannu niig korrioohĩĩ nĩĩcag, hẽlẽggẽẽnnĩĩ ꞌcĩg ꞌyioko aaꞌnyuung ngagiit ngaaoni ho? Aĩnanaakuung ngagiit hẽlẽggĩ tĩko daahĩth. 22Nẽẽthĩ ꞌyioko, hĩcĩ õõgtau niig ꞌthẽccaana nẽ iittu appahacaaꞌnya cĩg Nyekuci ho, ikia ꞌbaaniniti baa ammũdaannu niig ko, uukuung ngagiit thõõthaa ꞌcĩ ẽllẽẽmĩth hĩ rũgẽtaa ꞌcĩ aalla ooo. 23Hĩnĩngĩtĩ, dũman cĩ ꞌthẽccaanõ daahĩthĩ, nẽẽthĩ, ꞌbaaninit cĩ Nyekuci, rũgẽtĩ ꞌcĩ aalla ooo, hĩ Yeesu Krĩstõ Makayyioohit cĩnaac.

Currently Selected:

ꞌRooma 6: did

Highlight

Copy

Compare