Terethiinit 5

Mĩꞌnyõõn hĩ ꞌBuuk

1Nẽ hudtuuha ꞌbuuk attiaa cobbi ĩĩcĩ eet ꞌcĩ aaĩ dtaabawa ho, ꞌcĩ eheeddi ĩĩttõõ hĩ battaala vẽlẽk nẽ idili ꞌgoolliok tũkĩramma. 2Nẽ tarĩ hĩcĩna aajĩlõ cobbi ꞌcĩ attiran gẽrrẽẽt ꞌcĩ ẽggẽrẽny aĩ, “Nganĩ ꞌcĩ ũũlũ ngaatĩ avvahanĩ ꞌbuuk icci adili ho nẽ ubbuuha?” 3Baa aitiõõ eet umwaa loota nĩnga hode hẽẽtahujjieen, hode ꞌthẽẽmĩtõõ, ꞌcĩ occa abbuuk nẽ itigiil ꞌbuuk nicci tõõ.

4Ma ho, hutuluua gẽrrẽẽt, hĩnĩngĩtĩ baa aitiõõ ẽẽtĩ ꞌcĩ ammuddiaa ꞌcĩ occa ũũppan ngaatĩ abbuuhi nẽ itigiil ꞌbuuk nicci tõõ. 5Ma ho, õthõõthahaa makayyioohiti umwaa hõrggẽẽnaa cĩ makayyiook ꞌcĩg ĩĩn hẽẽn ꞌramma hĩ ꞌwec ko ĩĩnnĩhaa, “Ma halu! Cĩĩn nõõnĩ, aaĩ ẽẽtĩ ꞌcĩ attiran ꞌcĩ haĩ ꞌMaa, ĩnõõ Yeesu ꞌcĩ arrittiaa habuccieetaa cĩ ꞌJuuda, hattũũgaa cĩ habu Daavide ꞌcĩ ĩllõõana. Ĩnõõnnõ dioo ꞌcĩ occa aga ngaatĩ avvahanĩ ꞌbuuk ꞌcĩ adili ꞌgoolliok tũkĩramma ho nẽ ubbuuha.”

6Ma nĩngaata, hudtuuha Mĩꞌnyõõn,#5:6 Mĩꞌnyõõn: ꞌBuuhaa cĩ Terethiitto, ĩĩn mĩꞌnyõõn ciee Yeesu. Nyattaalaa cĩ Mũũꞌtha, baa aduhaak Nyekuci eet cĩg ꞌJudeei hibboorrik ꞌgaarriẽẽn cĩg mĩꞌnyõ cĩg aꞌthaannu Nyekuc, hátĩ hũtũngtoothĩk ꞌthẽccanẽẽta cĩggĩĩng. Nẽẽthĩ ꞌyioko, ikia ĩĩ Yeesu Mĩꞌnyõõn ꞌcĩ attik ꞌthẽccanẽẽt cĩg eetuk. Tigiil ꞌBuuk cĩ Maarko 14:12; ꞌLuuka 22:7; Yõaannẽ 1:29-36; 1 Korinto 5:7; 1 Pẽẽtũrũ 1:19. abĩlĩ hõrggẽẽnaa cĩ dtaabaõ, irriamaneek hẽlẽggĩ ꞌcĩg ĩĩn ꞌwec ꞌcĩg arũgĩ, hĩ makayyiook ꞌcĩg ĩĩn hẽẽn ꞌramma hĩ ꞌwec, haau hĩ ẽẽtĩ baa aruhi. Baa aꞌnyak nẽẽ otto tũkĩramma hĩ hẽbẽrĩ tũkĩramma buúk, ꞌcĩg ĩĩn loriẽẽt tũkĩramma cĩg Nyekuci, ꞌcĩg ĩꞌthõõak nẽẽ looc vẽlẽk. 7Aku Mĩꞌnyõõn noho, nẽ aggama ꞌbuuk ĩĩcĩ aꞌthiit cobbi cĩ eet ꞌcĩ iccioloongan dtaabawa. 8Ma baa aggama nẽẽ ꞌbuuk nicci ho, uruhit hẽlẽggĩ ꞌcĩg arũgĩ ĩĩn ꞌwec hĩ makayyiook ꞌcĩg ĩĩn hẽẽn ꞌramma hĩ ꞌwec ko, looc nẽ akattieek Mĩꞌnyõõn huruꞌnyia. Baa aꞌnyak nẽẽg vẽlẽk addungẽẽt hĩ lohilihilit ꞌcĩg ĩĩn ꞌdaab, ꞌcĩg abbĩꞌthĩĩ mõhõõkacĩ ꞌcĩ ĩĩn laiinit cĩ eet cĩg Nyekuci. 9Nẽ ebenit nẽẽg tẽgẽl ꞌcĩ ĩĩn ngeju ꞌcĩ aĩ,

“Nganiit dioo ꞌcĩ occa õkõõĩ ꞌbuuk

nẽ avvahanuu dilẽẽnĩt cĩnnĩ,

hĩnĩngĩtĩ baa aruhi niina,

iita eellia biyyieeta cugunnig eet hĩĩtõ eet cĩg Nyekuci

habuccieeꞌnyanĩ hĩ utugeetinii ꞌcĩg õthõõth eeta vẽlẽk cũũmõ cũũmõ

hĩ eet loonyini vẽlẽk.

10Aaꞌnyĩhuu nii ĩhõõggõ hiita hĩĩtõ habuẽẽt hĩ paadĩrꞌnya ꞌcĩg adticanoothĩk Nyekuc.

Aggam hatĩ nẽẽg looc nicci.”

11Ma tarĩ ho, hĩthĩha molook cĩ aajĩlẽẽt ꞌcĩg mẽẽlĩg ꞌrĩĩng ꞌcĩg ĩĩn aalibꞌnya hĩ millioꞌnya, ebenni nẽ irriamatteek dtaaba cobbi ho, hĩ hẽlẽggĩ ꞌcĩg ĩĩn ꞌwec ꞌcĩg arũgĩ ho, hĩ makayyiook ꞌcĩg ĩĩn hẽẽn ꞌramma hĩ ꞌwec ko. 12Baa ebenni nẽẽg moloohaa cobbi aĩ,

“Adiim Mĩꞌnyõõn baa aruhi

haggam ꞌtirrian hĩ baliinit hĩ ꞌgẽẽnyĩth

hĩ tingoli hĩ bulẽẽnĩt hĩ dĩhĩthẽẽnĩt.”

13Ma nĩngaata, hĩthĩha hẽlẽggĩ vẽlẽk ꞌcĩg aattĩg hẽẽtahujjieen hĩ loota hĩ ꞌthẽẽmĩtõõ, looccaa cĩ miningu hĩ bũlũccwaanĩtõõ vẽlẽk ebenni aĩ,

“Hadihiꞌthii nganiit gẽrrẽẽt ꞌcĩ aaĩ dtaabawa ho hĩ Mĩꞌnyõõn,

aꞌnyĩĩk haau dĩhĩthẽẽnĩtĩ hĩ tẽẽlꞌthĩt hĩ bulẽẽnĩt hĩ ꞌtirrian vẽlẽk hĩ nganiit

ooo.”

14Nĩngĩtĩ ẽdẽcĩ hẽlẽggĩ ꞌcĩg arũgĩ ĩĩn ꞌwec ko aĩnnĩ, “Aamẽn!” Ma ho, akatit makayyiooha ꞌcĩg ĩĩn hẽẽn ꞌramma hĩ ꞌwec ko huruꞌnyia nẽ alaacõ Nyekuc hĩ Mĩꞌnyõõn.

Currently Selected:

Terethiinit 5: did

Highlight

Copy

Compare