Maarko 7

Thooꞌthiok ꞌcĩg tẽllĩg hĩ ꞌcĩg ĩĩn ꞌriiring

(Tigiil Maatteeo 15:1-9)

1Baa au aluttiaak Variꞌtheei ũgẽẽgĩ hĩ ꞌlimmanniook cĩg nyattal cĩ Mũũꞌtha ꞌcĩg baag au ꞌJeruꞌthalẽma Yeesu. 2Ma ho, au hinnia õrõõta ngaatĩ adahĩ nuyyiooha cĩgĩnnĩg ũgẽẽgĩ ꞌgẽẽn nga hũtũũnyĩtõ athĩn cĩggĩĩng, 3hĩnĩngĩtĩ Variꞌtheei hĩ eet cĩg ꞌJudeei vẽlẽk, hõllõngaa adak ꞌgẽẽn, nga hũtũũnyĩtõ athĩn ꞌgõõlaa ꞌcĩ anũĩ nyepitee#7:3 Nyepitee: Thõõthaa cĩ Nyekuci Dĩdĩngaayyi, ĩĩn nyepitee thooꞌthiok ꞌcĩg adĩman eeta cĩg ꞌJudeei ꞌcĩg hõllõngaa õõkõrõõ hĩ nyattal cĩ Nyekuci. cĩ makayyiook cĩggĩĩng baarkit. 4Nẽ ma au nẽẽg ꞌcuuha hatĩ õõ ũũta ꞌgiimwa, hõllõngaa adak ꞌgii tĩho nga hũtũũnytĩ. Mẽẽlĩg nyepiteeꞌnya ꞌcĩg anũ nẽẽg ꞌcĩg aattĩg hĩ cĩg ũũnyĩ hẽddẽmẽẽta hĩ hooppoꞌnya hĩ ijjioꞌnya hĩ lohilihilita.

5Ma ho, ijinit Variꞌtheei cieeg hĩ ꞌlimmanniook cĩg nyattaalak Yeesu ĩĩttĩk, “Inni hiittiõõ nuyyiooha cugunnig hõllõngaa anũ nyepitee cĩ makayyioohu nẽ udukto athĩnĩĩ ꞌcĩg ĩĩn ꞌriiring ko?”

6Ẽdẽcĩ Yeesu ĩhõõggõ anneek, “Baa ẽbẽaneek põrõvẽtaacĩ Iꞌthaia ngaatĩ ẽhẽẽdĩ ꞌBuuhaa cĩ Nyekuci aĩnnĩ, hĩnĩngĩtĩ ngagiit oloꞌngiaak,

“ ‘Adĩhĩꞌthaa nganĩĩt eeta cieeg utugeetini haaga,

nẽ ꞌrẽẽttĩg ꞌthinneeti cĩggĩĩng hĩ nganĩĩta.

7Alayya nẽẽg nganĩĩt utugeetini haaga.

ꞌLimmanĩ ꞌcĩ alliman nẽẽg ko, ĩĩn nyepitee cĩ eetu haaga.’#Tigiil ꞌBuuk cĩ Iꞌthaia 29:13

8Uunniku niig tilooinit cĩ Nyekuci nẽ unuyyu nyepiteeꞌnya cĩg eetuk.”

9Nẽ tarĩ, uduhaak Yeesu ĩhõõggõ ĩĩnnĩk, “Aꞌnyaku niig ꞌgẽẽnyĩth ꞌcĩ aaꞌnyuung ngagiit ũtũbũrĩt tilooinit cĩ Nyekuci nẽ uꞌthuuttu nyepiteeꞌnya cugguung. 10Hĩnĩngĩtĩ baa aduha Mũũꞌtha aĩ, ‘Tingõlĩ maaꞌnyu hĩ ngaanu,’#Tigiil ꞌBuuk cĩ Luugithõõ 20:12; Ditoronomi 5:16 nẽ ‘Ẽẽtĩ ꞌcĩ õdõõm maaꞌnyĩ hode aattĩnnĩ, occa aruhi nẽẽ hadaak.’#Tigiil ꞌBuuk cĩ Luugithõõ 21:17; Levitiko 20:9 11Nẽẽthĩ hinnia iittu, má aꞌnyak ẽẽtĩ umwaa ꞌgiimwa ꞌcĩ occa ẽẽlĩ maaꞌnyĩ hode aattĩnnĩ, ainnu hinnia ĩĩ ꞌgii tĩho ꞌbaaninit hĩ Nyekuc. 12Ma nga haaꞌnyiku eet ꞌcĩ aau noho hẽẽl maaꞌnyĩ hode aattĩnnĩ. 13Uunniku niig tilooinit cĩ Nyekuci ainnu, hátĩ uꞌthuutti nyepiteeꞌnya cugguung haaga nẽ mẽẽlĩg hẽlẽggĩ ꞌcĩg abathĩ ꞌcĩg adĩmannu niig gẽrrẽẽt.”

Hẽlẽggĩ ꞌcĩg aaꞌnyĩk eet hĩĩtõ ꞌriiring dĩdĩ

(Tigiil Maatteeo 15:10-20)

14Ma baa ũtũvva Yeesu lothippit hikia hĩ ĩnõõnnõ tarĩ, ikia ĩĩnnĩk nẽẽ ĩhõõggõ, “Ĩthĩktaangu niig vẽlẽk nganĩĩt nẽ agaac jurrung, 15aitiõõ ꞌgẽẽn ꞌcĩ adak ẽẽtĩ hõllõngaa aaꞌnyĩk eet hĩĩ ꞌriiring hiittiõõ hõllõngaa ala Nyekuc. Thooꞌthiok ꞌcĩg aduha ẽẽtĩ ꞌcĩg abathĩ, ꞌcĩg aaꞌnyĩk eet hĩĩ ꞌriiring ko. 16Nẽ má aꞌnyak ẽẽtĩ umwaa ĩĩn ꞌcĩg athĩknẽẽnĩ, aꞌnyĩĩk hĩthĩhõ.”

17Ma baa ũtũngeek Yeesu lothippit nẽ ũũk uduhun ꞌcieetõõ, iita ijinit nuyyiooha cĩgĩnnĩg ĩnõõnnõ huduha thõõth ꞌcĩ awantoothĩk ko. 18Ẽdẽcĩ Yeesu ĩhõõggõ anneek, “Aggiithennu niig buúk thõng? Hõllõngaa agayyu niig aĩ, aitiõõ ꞌgẽẽn ꞌcĩ adak ẽẽtĩ hõllõngaa occa aaꞌnyĩk eet hĩĩ ꞌriiring? 19Hĩnĩngĩtĩ hõllõngaa aduhun ꞌgẽẽn ꞌcĩ adak ẽẽtĩ, õkõ ꞌthĩnĩtatõõ cĩnnĩ, aduhun õkõ hẽẽngatõõ nẽ uduhuna battaala.” Õthõõth Yeesu hoti, hĩnĩngĩtĩ uppulana nẽẽ ĩĩ, ĩĩn ꞌgẽẽn vẽlẽk ꞌcĩ abũnnaa ngaatĩ hadahĩ.#7:19 Idiꞌngwa ꞌcĩg aꞌngirannii: Baa aꞌngirannii nyattaalaa cĩ Mũũꞌtha ngaatĩ adahĩ eeta cĩg ꞌJudeei idiꞌngwa ũgĩ cĩg moru ꞌcĩg aduha nyattalĩ aĩ aꞌngirannii. Tigiil ꞌBuuk cĩ Levitiko 11:1-32.

20Nẽ aalla õthõõth Yeesu noho aĩ, “Thõõth ꞌcĩ aduha ẽẽtĩ, ꞌcĩ aaꞌnyĩk ĩnõõnnõ hĩĩ ‘ꞌriiring’ ko. 21Hĩnĩngĩtĩ, muhẽẽnĩt ꞌcĩ aku ꞌthĩnĩtatõõ cĩ eeto, ꞌcĩ aaꞌnyĩk ĩnõõnnõ hĩdĩman thooꞌthiok ꞌcĩg abathĩ ꞌcĩg attihi ngaaĩ cĩg eetuk, ꞌcĩg igorꞌthiini, ꞌcĩg aruhi eet, 22lõbõlõbẽẽꞌthĩt cĩ baliitto, bathi, õlõng, ꞌwaangĩꞌthẽẽt, thõõth ꞌcĩ abũranẽẽkĩ hẽlẽggĩ cĩg eetuk, tongomi ꞌcĩ olongo, thĩngõõnyani, hĩ thooꞌthiok ꞌcĩg õthõõth eeta ꞌgiithẽtta, 23hĩ hẽlẽggĩ vẽlẽk ꞌcĩg abathĩ ꞌcĩg adukna ẽllaa cĩ eeto, ꞌcĩg aaꞌnyĩk ĩnõõnnõ hĩĩ ‘ꞌriiring’ ko.”

Lemiinit cĩ ngaa umwa ꞌcĩ hõllõngaa ĩĩn ꞌJudeeinit

(Tigiil Maatteeo 15:21-28)

24Ma nĩngaata, ĩtĩnga Yeesu ũũk ĩĩcĩ looc umwa ꞌcĩ õbõhõõ hĩ ꞌtaaũn ꞌcĩ haĩ ꞌTire. Baa õkõ aduhun nẽẽ ꞌcieeth umwa nẽ hõllõngaa adiim hagaacõ eeta ngaatĩ aayyi nẽẽ nĩngaata nẽ tarĩ, baa hõllõngaa ammiꞌthi thõõth ꞌcĩ aayyi nẽẽ nĩngaata ho. 25Baa aaĩ ngaa umwaa ꞌcĩ aꞌnyak bũhaanyĩnĩ lori ꞌcĩ abathĩ nẽ baa ĩthĩk nẽẽ aĩ, aaĩ Yeesu nĩngaata. Ma ho, ũũk ẽttẽẽd ngaa nicciee looc ꞌthõõnĩĩ cĩg Yeesu. 26Baa ĩĩn ngaa tĩho ꞌGiriheenit ꞌcĩ arrittiaa looccaa ꞌcĩ haĩ Venicia, dhoortaa cĩ looc ꞌcĩ haĩ Thiiria. Ma nĩngaata, ikia ala nẽẽ Yeesu hũũk hitiggia lori ꞌcĩ abathĩ ꞌcĩ aaĩ ẽllaa cĩ bũhaanyĩnĩ ho.

27Nĩngĩtĩ annẽẽkĩ Yeesu ĩnõõnnõ, “Aꞌnyĩĩk nõõ lõhõlĩ hudukto hũũppattĩ, hĩnĩngĩtĩ hõllõngaa abũnnaa ngaatĩ hattihaanĩ ꞌgẽẽn cĩ loholeenu nẽ haanytĩk ũthũrẽẽta.”#7:27 ꞌGẽẽn ꞌcĩ aaꞌnyĩhoothĩk ũthũrẽẽta: Baa athim eeta cĩg ꞌJudeei eet ꞌcĩg hõllõngaa ĩĩn ꞌJudeei haauto hĩ ũthũrẽẽta.

28Ẽdẽcĩ hinnia ngaa nicciee Yeesu anneek, “Makayyioohit, tananga ũthũrẽẽta buúk, gõõng aduk thuruthur cĩg loholeenu, ꞌcĩg adhukiaa tẽrẽmẽẽjawa loota.”

29Nĩngĩtĩ aduhaakĩ Yeesu ĩnõõnnõ annẽẽkĩ, “Hĩnĩngĩtĩ deciinit cunni ho, bodooth õlõ, ummudoothihu hatĩ bũhaanyuni aau lõꞌngõõc, hĩnĩngĩtĩ uduhuna lorii ꞌcĩ abathĩ ho ẽllaa cĩnnĩ.”

30Ma ho, õbõdõõꞌthĩ ngaa nicciee ĩĩcĩ olu, ũmmũdoothĩk loholeec cĩnnĩ atangu nangẽrẽba, uduhuna lorii ꞌcĩ abathĩ ho ẽllaa cĩnnĩ.

Aaꞌnyĩk Yeesu eet ꞌcĩ adĩĩtĩ ĩĩna hũbũna

31Ma baa ũtũngeek Yeesu ꞌtaaũn cĩ ꞌTire, ikia õbõdõõthĩ ꞌgõõlaa cĩ ꞌtaaũn cĩ ꞌThidõõnẽ, ũũk ĩĩcĩ Bũlũc cĩ ꞌGalileea ĩꞌthõng ꞌtaaũnniook ꞌcĩg ĩĩn õmmõtõ ꞌcĩg haĩ Dekapoli. 32Ma nĩngaata, iita aꞌnyaktaak eeta ũgẽẽgĩ ĩnõõnnõ eet umwa ꞌcĩ adĩĩtĩ ĩĩna nẽ aꞌnyaman ngaatĩ õthõõthĩ. Nẽ alaacõ nẽẽg Yeesu huhum ĩnõõnnõ athĩnĩĩ cĩgĩnnĩg.

33Ma ho, ẽꞌnyẽẽhõĩ Yeesu eet ꞌcĩ adĩĩtĩ ĩĩna ho, lothippitatõõ ngadiiha nẽ uꞌthuuhik athĩn cĩgĩnnĩg ĩĩnĩtõõ cĩg eetak nẽ ũttũũrĩk ammũt, nĩngĩtĩ ahumẽẽkĩ ahaataa cĩ eet nicci. 34Ma ho, ĩcĩnõõthĩ Yeesu hẽẽtkujjieen nẽ õbõdẽẽhĩ ꞌthĩnĩt, nĩngĩtĩ annẽẽkĩ eet nicci, “Ẽvvatha,” nĩngĩtĩ aĩ, “ꞌBuuhi!” 35Ma hĩdĩĩkoothong, iita ubbuukti ĩĩna ꞌcĩg eet nicci nẽ ũbũna ahaatĩ buúk nĩngĩtĩ õthõõthĩ jurrung.

36Ma nĩngaata, uduhaak Yeesu eet niccig ĩĩnnĩk, “Ma hooyyu haduhaaku eet umwa thõõth icci ũdũt. Ma baa uduhaak nẽẽ ĩhõõggõ thõõth icci ẽlẽk, aalla hinnia õõ athithan nẽẽg thõõth icci gẽrrẽẽt hĩllõõan.” 37Baa ĩnaat eeta vẽlẽk baag athĩhĩ ĩnõõnnõ gẽrrẽẽt nẽ othoothito ĩĩtõ, “Adĩman Yeesu hẽlẽggĩ vẽlẽk jurrung! Aaꞌnyĩk aattĩ eet ꞌcĩg adĩĩtĩ ĩĩna hĩthĩktõ nẽ aaꞌnyĩk eet ꞌcĩg idiaddiabanni hothoothito jurrung.”

Currently Selected:

Maarko 7: did

Highlight

Compare

Copy