ꞌLuuka 3

Ũkũmaneek Yõaannẽ Batitta ꞌgõõla

(Tigiil Maatteeo 3:1-12; Maarko 1:1-8; Yõaannẽ 1:19-28)

1Ma baa irkit ꞌcĩ ĩĩn õmmõtõ hĩ ꞌtur, ꞌcĩ ĩĩnnĩ Tiberio habu cobbi cĩ ꞌRooma hũtũrũũr nẽ ĩĩ Ponthio Pĩlaatõ makayyioohit cĩ ꞌJudeea, nẽ ĩĩ Ẽrõõdẽ#3:1 Habu Ẽrõõdẽ: Ĩĩn ciee Ẽrõõdẽ Antipa baa ĩĩn habu, baa aggameek Yõaannẽ Yeesu baattithimo. Tigiil thõõth cĩnnĩ ꞌBuuhaa cĩ Maatteeo 14:1; Maarko 6:14; ꞌLuuka 3:1; Dtiicanĩ cĩg ꞌThooyyiahu 4:27. Ĩĩn Ẽrõõdẽ Atipa, ngeertĩ Ẽrõõdẽ Cobbi baa ĩĩn habu nẽ ĩnõõnnõ baa adiim aruk Yeesu baa nga arrittiaa thõng. Tigiil thõõth cĩnnĩ ꞌBuuhaa cĩ Maatteeo 2:1-8; ꞌLuuka 1:5. Ma baa uruta, ikia aau habuui umwaa ꞌcĩ haĩ Ẽrõõdẽ Agirippa, ngeertĩ loholeec cĩ Ẽrõõdẽ Cobbi. Tigiil thõõth cĩnnĩ ꞌBuuhaa cĩ Dtiicanĩ cĩg ꞌThooyyiahu 12:1-13:1. habu cĩ ꞌGalileea nẽ tarĩ ĩĩ ꞌgotonnia Pilippo habu cĩ Iturea hĩ Tarakoniti nẽ ĩĩ Lĩthaniathĩ habu cĩ Abileene, 2baa ĩĩn Annathĩ hĩ Kaĩava paadĩrꞌnya ꞌcĩg obbitig.#3:2 Paadĩr cobbi: Maka paadĩrĩ cobbi ĩllõõan paadĩrꞌnya vẽlẽk, hĩnĩngĩtĩ paadĩr cobbi dioo ꞌcĩ aduhun Nĩngĩtĩ ꞌcĩ Aꞌngirannii ꞌcĩ Ẽllẽẽmĩth Gẽrrẽẽt ꞌCieethaa cĩ Nyekuci tabattĩ hõdẽẽthõng irkita. Baa aayyi Nyekuci Nĩngĩtĩ icci Aꞌngirannii ho bulẽẽtta, ĩnõõ ꞌcĩ adukni paadĩrĩ cobbi Nĩngĩtĩ icci nẽ ũũk urwacan biyyiẽẽtĩ, hátĩ hatamaatĩk Nyekuci eet, hĩnĩngĩtĩ ꞌthẽccanẽẽt cĩggĩĩng ko. Tigiil ꞌBuuk cĩ Levitiko 16; Ebereei 9. Baa nohota, baa õthõõthak Nyekuci Yõaannẽ ꞌcĩ baa aaĩ horrwatõõ ꞌcĩ õdõhõhĩĩ kak. Baa haĩ maaꞌnyĩ Yõaannẽ ꞌThakaria.

3Nĩngĩtĩ õvvõõĩ Yõaannẽ looc cĩ ꞌJõrdanĩ hũtũrũũr, irrioonĩkĩ eet hoboddia hĩ Nyekuc nẽ aggamit baattithimo, hátĩ hũtũngtoothĩk ꞌthẽccanẽẽta cĩggĩĩng. 4Haau hĩ baa eheeddi ꞌbuuhaa cĩ põrõvẽtaac Iꞌthaia aĩ,

“Ẽggẽrẽny mõlõõhĩ cĩ eet umwa horrwaa ꞌcĩ õdõhõhĩĩ kak aĩ,

‘Ũkũmatteek ꞌgõõl cĩ Makayyiookto,

aanytĩk ꞌgõõl cĩnnĩ hũũlan.

5Idtibanit liilliok

nẽ ĩꞌthaattu muurriok vẽlẽk hĩĩ ꞌthĩĩ.

Aanytĩk ꞌgoolliok ꞌcĩg mõrgõlĩg hũũlanit

nẽ ũkũmattu ꞌgoolliok ꞌcĩg aĩ ngõdõngõdõ hĩĩtõ lũlũlũlũ.

6Nẽẽthĩ, hatĩ ĩcĩnĩt eeta vẽlẽk elliaanĩt cĩ Nyekuci.’ ”#Tigiil ꞌBuuk cĩ Iꞌthaia 40:3-5

7Baa mẽẽlĩg eeta ꞌcĩg adiim au aggam baattithimo#3:7 Baattithimo: Aggam ẽẽtĩ baattithimo, hátĩ hẽtẽrẽtha ngaatĩ ũtũngẽẽhĩ nẽẽ ꞌthẽccanẽẽt cĩgĩnnĩg nẽ ẽlẽm Nyekuc. hĩ Yõaannẽ. Nĩngĩtĩ annẽẽkĩ nẽẽ ĩhõõggõ, “Niig lohollia cieeg hũkaaꞌnyanu ho, nganĩ ꞌcĩ aduhaakuung aĩ, iita baattithimooa, hátĩ iliittia ukẽẽnĩt ꞌcĩ hatĩ nga aku ho? 8Ĩdĩmanit thooꞌthiok ꞌcĩg occa ẽtẽrꞌtha aĩ, ũtũngteehu niig ꞌthẽccanẽẽt cugguung dĩdĩ. Nẽẽthĩ, ma nga hammuku hainnu, ‘Haꞌnyaka baaĩ nẽẽ naag baangeet cĩnaang Abũrahaamõ.’ Nẽ haduhaakuung naa hanneekuung, ũũlũ Nyekuci ngaatĩ occa ũũkcĩ biyyiẽẽn iccig hĩĩtõ lõhõlĩ cĩg Abũrahamĩ. 9Nẽẽthĩ ꞌyioko, ũkũmanoothĩk mẽlẽẽhĩ cĩ ukẽẽnĩt cĩ Nyekuci, hẽtẽngẽd cõrrẽẽn cĩg heenu ẽlẽk. Hẽẽt ꞌcĩ hatĩ hõllõngaa õddõngta ꞌgẽẽn ꞌcĩ abũnnaa, eꞌngeddoothĩk hatĩ looc nẽ udhuhoothĩk ꞌgwoyyiatõõ.”

10Nĩngĩtĩ ajini eeta ĩnõõnnõ annẽẽkĩ, “Hĩdĩmatta ꞌyioko hutuno?”

11Ẽdẽcĩ Yõaannẽ ĩhõõggõ anneek, “Ẽẽtĩ ꞌcĩ aꞌnyak ceremwa ꞌramma, aꞌnyĩĩk hẽꞌngẽraak ꞌgõõnĩ ꞌcĩ hiꞌthihi cẽrẽm nẽ ẽẽtĩ ꞌcĩ aꞌnyak ꞌgẽẽn, aꞌnyĩĩk hotholit hĩ ꞌgõõnĩ ꞌcĩ adak magĩthĩ.”

12Baa au aggam eeta ꞌcĩg alũt occoro buúk baattithimo nẽ ijinit Yõaannẽ ĩĩttĩk, “Ma naag hĩdĩmatta hutuno ꞌlimmannioohit?”

13Ẽdẽcĩ nẽẽ ĩhõõggõ anneek, “Ma hadaku eet hatĩ aluttu occoro.” 14Nĩngĩtĩ au ajini athegereeꞌnya ũgẽẽgĩ buúk ĩnõõnnõ annẽẽkĩ, “Ma naag hĩdĩmatta hutuno?”

Ẽdẽcĩ nẽẽ ĩhõõggõ anneek, “Ma harratanaannu eet ꞌrabbẽẽta, hode ma haꞌngaaꞌnyu eet umwa haaga. Aꞌnyĩĩk hũũppattuung ꞌrabbẽẽta ꞌcĩg adaku nyĩlõhẽẽnnĩ ho dioo.”

15Baa ẽrẽ eeta vẽlẽk Krĩstõ hikia hĩdĩĩkoothong nẽ baa abũraneek nẽẽg ngaatĩ agaĩ hatĩ horoong ĩĩn Yõaannẽ Krĩstõ.

16Nĩngĩtĩ ẽdẽcĩ Yõaannẽ ĩhõõggõ vẽlẽk annẽẽkĩ, “Habattithannuung naa ngagiit maamĩ haaga, nẽẽthĩ, aaĩ hatĩ eet umwaa cobbi ꞌcĩ aku hĩdĩĩkoothong ꞌcĩ ĩllõõannaa nganĩĩta, eet ꞌcĩ hõllõngaa hũũlũ naa ngaatĩ hõõganĩ lõhamũcĩ cĩg caawa cĩgĩnnĩg. Aku hatĩ aggameekuung nẽẽ baattithimo Loriiaa ꞌcĩ Ẽllẽẽmĩthĩ hĩ ꞌgwoyyia. 17Aꞌnyak nẽẽ hẽddẽm cĩ anyiitto attiaa cĩnnĩ. Aany hatĩ nẽẽ haal#3:17 Haal hĩ ngarrimo: Ĩthakꞌthoothĩk haala eet ꞌcĩg athĩhĩ thõõth cĩ Krĩstõ nẽ ĩthahithoothĩk ngarrimo, eet ꞌcĩg abũrĩ Krĩstõ. hilongana nẽ ẽtẽgẽẽl haauto cũũmõ cũũmõ nẽ ũtũũth ngarrimo ꞌgwoyyiaa ꞌcĩ ĩĩn ꞌgelemit ꞌcĩ hõllõngaa adĩĩtĩ ũdũt.” 18Baa irrioonĩk Yõaannẽ eet ꞌgoolliohĩĩ ꞌcĩg mẽẽlĩg, ngaatĩ aduhaakĩ ĩhõõggõ nyeemuut ꞌcĩ abũnnaa.

19Ma baa eggerenyeek Yõaannẽ habu Ẽrõõdẽ, hĩnĩngĩtĩ thõõth ꞌcĩ attihi ngagõtõnõõnĩ#3:19 ꞌGõtõnĩ Ẽrõõdẽ: Baa nga arũgĩ ẽẽtĩ ciee ĩĩn ꞌgõtõnĩ Ẽrõõdẽ ho baa õkõõĩ Ẽrõõdẽ Antipa Erodia nẽ ũꞌthũwan hĩĩ ngaa cĩnnĩ. Baa ĩĩn Erodia ngaa cĩ ꞌgõtõnĩ Ẽrõõdẽ ho. ꞌcĩ haĩ Erodia hĩ thooꞌthiok ꞌcĩg abathĩ ꞌcĩg gõõng adĩman nẽẽ ho, 20ikia aarĩk Ẽrõõdẽ Yõaannẽ baabuutha. Thõõth ꞌcĩ baa abathĩ gẽrrẽẽt ꞌcĩ adĩman nẽẽ niccia.

Aggam Yeesu baattithimo

(Tigiil Maatteeo 3:13-17; Maarko 1:9-11)

21Ma baa aggameek Yõaannẽ eet vẽlẽk baattithimo, ikia aggam Yeesu buúk baattithimo. Ma baa nga alayyi nẽẽnĩ, ubbuuhi hẽẽtkujjieen 22nẽ ulluuccia Lorii ꞌcĩ Ẽllẽẽmĩth ꞌcĩ aaĩ hĩ bõllõõĩ. Nĩngĩtĩ õthõõthanĩ mõlõõhĩ umwaa hẽẽtahujjieen aĩnnĩ, “Ĩĩnĩ nii Loholeec caannĩ ꞌcĩ hamĩna. Haccamanannii maaꞌnyu gẽrrẽẽt.”

Hĩbaangĩ cĩg Yeesu

(Tigiil Maatteeo 1:1-17)

23Baa iꞌthianaanĩ Yeesu dtiic cĩnnĩ baa õbõktĩ ĩĩtõ irkiꞌnyia cĩgĩnnĩg hẽẽn iyyio.

Baa ammuk eeta aĩ, ĩĩn nẽẽ ngeertĩ Yothebo,

nẽ ĩĩn Yothebo ngeertĩ Heli, 24ĩĩn Heli ngeertĩ Maꞌthatĩ

ĩĩn Maꞌthatĩ ngeertĩ ꞌLeevi, ĩĩn ꞌLeevi ngeertĩ Melki,

ĩĩn Melki ngeertĩ Jannaĩ, ĩĩn Jannaĩ ngeertĩ Yothebo,

25nẽ baa ĩĩn Yothebo ngeertĩ Mattaꞌthiathĩ, ĩĩn Mattaꞌthiathĩ ngeertĩ Aamothĩ,

ĩĩn Aamothĩ ngeertĩ Nahumi, ĩĩn Nahumi ngeertĩ Ethilĩ,

ĩĩn Ethilĩ ngeertĩ Naggaĩ, 26ĩĩn Naggaĩ ngeertĩ Maathĩ, ĩĩn Maathĩ ngeertĩ Mattaꞌthiathĩ, ĩĩn Mattaꞌthiathĩ ngeertĩ Themeini,

ĩĩn Themeini ngeertĩ ꞌJothẽhĩ, ĩĩn ꞌJothẽhĩ ngeertĩ ꞌJõõda,

27ĩĩn ꞌJõõda ngeertĩ Yõannanĩ, ĩĩn Yõannanĩ ngeertĩ ꞌRẽẽtha,

ĩĩn ꞌRẽẽtha ngeertĩ ꞌTherubbabẽlĩ, ĩĩn ꞌTherubabẽlĩ ngeertĩ Thealtiẽẽlĩ,

ĩĩn Thealtiẽẽlĩ ngeertĩ Neeri 28ĩĩn Neerĩ ngeertĩ Melki, ĩĩn Melki ngeertĩ Aaddi, ĩĩn Aaddi ngeertĩ Kõthamĩ,

ĩĩn Kõthamĩ ngeertĩ Ẽlmadaamĩ, ĩĩn Ẽlmadaamĩ ngeertĩ Eri,

29ĩĩn Eri ngeertĩ ꞌJooꞌthua, ĩĩn ꞌJooꞌthua ngeertĩ Elieꞌthẽrĩ, ĩĩn Elieꞌthẽrĩ ngeertĩ ꞌJorimi,

ĩĩn ꞌJorimi ngeertĩ Maꞌthatĩ, ĩĩn Maꞌthatĩ ngeertĩ ꞌLeevi,

30ĩĩn ꞌLeevi ngeertĩ ꞌThimiõõnẽ, ĩĩn ꞌThimiõõnẽ ngeertĩ ꞌJuuda,

ĩĩn ꞌJuuda ngeertĩ Yothebo, ĩĩn Yothebo ngeertĩ ꞌJõnamĩ,

ĩĩn ꞌJõnamĩ ngeertĩ Eliaakimĩ, 31ĩĩn Eliaakimĩ ngeertĩ Mẽlẽa, ĩĩn Mẽlẽa ngeertĩ Mẽnna,

ĩĩn Mẽnna ngeertĩ Mattatha, ĩĩn Mattatha ngeertĩ Nathanĩ,

ĩĩn Nathanĩ ngeertĩ Daavide, 32ĩĩn Daavide ngeertĩ ꞌJeeꞌthe,

ĩĩn ꞌJeeꞌthe ngeertĩ Obeede, ĩĩn Obeede ngeertĩ ꞌBõathĩ,

ĩĩn ꞌBõathĩ ngeertĩ ꞌThalmõnĩ, ĩĩn ꞌThalmõnĩ ngeertĩ Nahathõnĩ,

33ĩĩn Nahathõnĩ ngeertĩ Ammĩnadabĩ, ĩĩn Ammĩnadabĩ ngeertĩ Adimini, ĩĩn Adimini ngeertĩ Arni, ĩĩn Arni ngeertĩ Hethoronĩ,

ĩĩn Hethoronĩ ngeertĩ Pẽrẽthĩ,

ĩĩn Pẽrẽthĩ ngeertĩ ꞌJuuda, 34ĩĩn ꞌJuuda ngeertĩ Yakobo,

ĩĩn Yakobo ngeertĩ Iꞌthaako,#3:34 Iꞌthaako: Baa ĩĩn Iꞌthaako ngeertĩ Abũrahamĩ ꞌcĩ baa aduhaak Nyekuci Abũrahaamõ. Tigiil thõõth cĩnnĩ ꞌBuuhaa cĩ ꞌThianaattõ 17-35. ĩĩn Iꞌthaako ngeertĩ Abũrahamĩ,

ĩĩn Abũrahamĩ ngeertĩ ꞌTẽra, ĩĩn ꞌTẽra ngeertĩ Naahõrĩ,

35ĩĩn Naahõrĩ ngeertĩ Theruhi, ĩĩn Theruhi ngeertĩ ꞌReu,

ĩĩn ꞌReu ngeertĩ Pẽlẽhĩ, ĩĩn Pẽlẽhĩ ngeertĩ Ẽbẽrĩ,

ĩĩn Ẽbẽrĩ ngeertĩ ꞌThẽẽla, 36ĩĩn ꞌThẽẽla ngeertĩ Kaĩnanĩ,

ĩĩn Kaĩnanĩ ngeertĩ Arpathadĩ, ĩĩn Arpathadĩ ngeertĩ ꞌThẽmĩ,

ĩĩn ꞌThẽmĩ ngeertĩ Nõõa,#3:36 Nõõa: Baa arũgĩ Nõõa korrioohĩĩ baag adĩmanĩ eeta thooꞌthiok ꞌcĩg abathĩ gẽrrẽẽt. Baa avva Nyekuci ĩnõõnnõ hẽtẽhẽny haahũl hẽẽlaĩ eet cĩg halang cĩnnĩ hĩ idiꞌngwa ũgĩ. Nĩngĩtĩ acũdaanĩ Nyekuci eet ũgĩ vẽlẽk hĩ idiꞌngwa tawaanaa cobbi. Tigiil thõõth cĩnnĩ ꞌBuuhaa cĩ ꞌThianaattõ 5-9. ĩĩn Nõõa ngeertĩ Lamẽhĩ,

37ĩĩn Lamẽhĩ ngeertĩ Methuthẽla, ĩĩn Methuthẽla ngeertĩ Ẽẽnõhĩ, ĩĩn Ẽẽnõhĩ ngeertĩ ꞌJarẽdĩ,

ĩĩn ꞌJarẽdĩ ngeertĩ Mahalalẽlĩ,

ĩĩn Mahallalẽlĩ ngeertĩ Kẽnaanĩ, 38ĩĩn Kẽnaanĩ ngeertĩ Ẽnõthĩ,

ĩĩn Ẽnõthĩ ngeertĩ Thẽthĩ, ĩĩn Thẽthĩ ngeertĩ Aadamĩ,#3:38 Aadam: Baa ĩĩn Aadamĩ eet ꞌcĩ ẽhẽnyta Nyekuci ĩĩcĩ oou, nẽ ĩĩ maaꞌnyĩ eet vẽlẽk loota nĩnga. Ĩĩn ngaa cĩnnĩ Ẽẽvva aattĩ eet vẽlẽk loota nĩnga. Tigiil thõõth cĩnnĩ ꞌBuuhaa cĩ ꞌThianaattõ 1-5.

nẽ ĩĩ Aadamĩ ngeertĩ Nyekuci.

Currently Selected:

ꞌLuuka 3: did

Highlight

Compare

Copy