Yõõna 1
1
Ĩꞌthõ Nyekuci Yõõna
1Kõr umwa, baa aduhaak Makayyioohiti#1:1 Makayyioohit: Aĩ ꞌthaara cieeg Ebereeiyyi, Yiaawe. Aĩ Yiaawe Ebereeiyyi, Eet ꞌcĩ aalla arũgĩ ũdũt. Baa ꞌthaar ꞌcĩg tiirik cieeg gẽrrẽẽt ꞌcĩg avvĩyyĩ eeta cĩg Ĩꞌthĩraẽlĩ Nyekuc. Havvĩ naag ꞌthaar ꞌcĩg haĩ Makayyioohit ko Dĩdĩngaayyi hĩĩ nĩngĩtĩ ꞌthaar ꞌcĩg haĩ Yiaawe ho. Yõõna ngeertĩ eet ꞌcĩ haĩ Amittai, 2hũũk ꞌtaaũnaa cobbi ĩĩcĩ haĩ Nineve, hũũk huduhaak eet hĩĩnnĩk, “Udtuuha Makayyioohiti ꞌthẽccanẽẽt cugguung ꞌcĩg abathĩ dtẽc ko. Uduktoothihu niiga!”
3Ĩꞌngaathĩ hinnia Yõõna nẽ ẽdẽc ꞌgõõl ꞌcĩ ꞌrĩĩng, aireek Makayyioohit. Baa allũũcĩ hinnia nẽẽ õkõ ĩĩcĩ ꞌtaaũn ꞌcĩ haĩ ꞌJõppa, nĩngĩtĩ abĩllĩ haahũlĩta nẽ ũmmũda haahũl ꞌcĩ õkõ ĩcĩ ꞌtaaũn cĩ Tarthithi. Ma ho, ũũk ũtũũwa waraga ꞌcĩ weeto nẽ õtõd haahũl cobbi, aĩ hivvireek Makayyioohit ngaatĩ õkõõĩ ꞌtaaũnaa cĩ Tarthithi.
4Ma nĩngaata, ĩꞌthõõa Makayyioohiti ngõõt ꞌcĩ attiran gẽrrẽẽt, huuhan bũlũc hiꞌngoꞌthia maama hĩcĩ aĩ halibba haahũl cobbi hĩꞌthaanĩ. 5Ma ho, iita abarritit dticcianniooha cĩg haahũl cobbi ho gẽrrẽẽt, nĩngĩtĩ alaĩ nyekuꞌnya cĩggĩĩng. Nẽ tarĩ udhukteek ijjio cĩggĩĩng ũgĩ bũlũcatõõ, aĩ hátĩ hõõlõl haahũlĩ.
Kõr tĩho, ĩko nẽẽ hinnia atangu Yõõna ngaamwaanĩ haahũlatõõ loota. 6Ma nĩngaata, ĩtĩnga makayyioohiti ꞌcĩ aꞌthuhan haahũl nẽ ũũk ijin ĩnõõnnõ ĩĩnnĩk, “Oongiyyi gõõng nii ne pĩĩrnattaa ꞌcĩ aaĩ hoti ho? Tĩnga nẽ alau nyekuꞌnya cugunnig. Horoong hatĩ ammaannĩkeet nẽ eelliaeet hiittiõõ hõllõngaa hadũddĩ.”
7Ma baa ho, ulutti dticcianniooha cĩg haahũlaak nẽ ĩĩtõ “Huruhit da tooto, hátĩ hummuddia eet ꞌcĩ ahĩĩnakeet pĩĩrnanĩt ꞌcĩ aaĩ hoti ho.” Ma baa aruk tooto ho, appulana hinnia tooto Yõõna.
8Nĩngĩtĩ ajini nẽẽg Yõõna annẽẽkĩ, “Nganiit ꞌcĩ aĩnanaakeet ngagĩĩt bathi icci ho? Dtiic cunni nii? Akuu ꞌyioko nii looccaa ĩĩna? Ĩĩnĩ nii eet cĩ looc iina? Haĩ eet cugunnig nganĩ?”
9Nĩngĩtĩ ẽdẽcĩ Yõõna ĩhõõggõ annẽẽkĩ, “Hĩĩnĩ naa Ebereeinit nẽ hala Makayyioohit Nyekuc cĩ hẽẽtkujjieen baa ẽhẽnyta bũlũc hĩ looc.”
10Ma baa athĩhĩ nẽẽg thõõth icci ho, iita abarritit hĩnĩngĩtĩ baa uduhaak Yõõna ĩhõõggõ ẽlẽk ĩĩnnĩk, baa aireek nẽẽ Makayyioohit. Nẽ ijinit ĩnõõnnõ ĩĩttĩk, “Inni dĩman noho ho?”
11Nẽ baa aalla uuhan ngõõtĩ cobbi gẽrrẽẽt bũlũc noho. Nĩngĩtĩ ajini nẽẽg Yõõna annẽẽkĩ, “Hogoonni ꞌyioko naag nganiit hutuno, hátĩ hemmeethĩk bũlũca?”
12Ẽdẽcĩ Yõõna ĩhõõggõ anneek, “Udhukteehaangu bũlũcatõõ, nẽẽthĩ hatĩ ĩbĩl ngõõtĩ. Haga naa nganĩĩt ꞌthẽk ꞌcĩ haĩnanaakuung ngagiit ngõõt icci abathĩ dtẽc ko.”
13Baa arrĩcana ꞌthukanniooha cĩg haahũlaak aĩ huꞌthuhattootha haahũl ĩꞌthõng hõdõlan dẽmẽt. Nẽẽthĩ hinnia baa hõllõngaa ũũlũ, nĩngĩtĩ ittoorini bũlũc habathõõthĩ gẽrrẽẽt. 14Ma hoti ho, iita alaacõ nẽẽg Makayyioohit ĩĩttĩk, “Makayyioohit, ma haaꞌnyeet ngagĩĩt hadaakta, ngaatĩ haruka eet icci. Ma nuun haaꞌnyeet ngagĩĩt heteheellia daahĩth cĩ eet icci ammĩrĩ ho, hĩnĩngĩtĩ aku thõõth ciee hĩcĩ ꞌthẽk atabi niina.” 15Nĩngĩtĩ õdõngaanĩ nẽẽg Yõõna nẽ udhukteek bũlũcatõõ noho paappuu, nĩngĩtĩ abĩllĩ ngõõtĩ buúk hĩdĩĩkoothong. 16Ma ho, iita itingolli eeta cĩg haahũlaak thõõth icci gẽrrẽẽt, nĩngĩtĩ ĩbbõõrĩkĩ nẽẽg Makayyioohit ꞌgaarrieenit nẽ ũbũtanit ngaatĩ adticanõõthĩkĩ ĩnõõnnõ.
17Ma ngaati, ĩꞌthõõa Makayyioohiti ulugooc cobbi hikia huku Yõõna. Nĩngĩtĩ aayyi Yõõna hẽẽngatõõ cĩ ulugooc tĩho, waathinniook iyyio hĩ baalinniook iyyio.
Currently Selected:
Yõõna 1: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
