ꞌJeemith 5

Tilooinit hĩ balliook ꞌcĩg arratan eet

1Nẽẽthĩ ꞌyioko, ĩthĩktõ niig balliooha, utullẽẽc, hĩnĩngĩtĩ thõõth ꞌcĩ abathĩ ꞌcĩ hatĩ adhukiaakuung ngagiita. 2Õtõngõl ngagiit baliiniti cunuung ẽlẽk nẽ adahit ꞌthõrõhõnyĩta ceremwa cugguung hathathaarri haaga. 3Ohonooꞌthi ngagiit maccĩrẽẽna cugguung hĩ ꞌdaab. Adticaniini hatĩ Nyekuci honoothi cĩ ꞌdaabõ hĩ cĩ maccĩrẽẽnu ho, hĩĩ terethiinit ꞌcĩ hatĩ ukẽẽnĩt cunuung, ꞌcĩ atũũthẽnĩ eleeti cugguung ꞌgwoyyia. Baliiniti ciee athaddu niig ko, ĩĩn hatĩ ukẽẽnĩt cunuung kõr ꞌcĩ ẽttẽẽdĩkĩ Nyekuci eet thooꞌthiok. 4Ĩthĩktõ! Ĩthĩhĩt ulwa cĩ dticcianniook cĩg manẽẽn cugguung, baag iggoollu hõllõngaa adũmannu ꞌrabbẽẽt cĩggĩĩng. Allweekuung ngagiit ꞌrabbẽẽta tĩko, baag edennu niiga. Õdõlan ulwaanĩ cĩ dticcianniook cĩg manẽẽn cugguung, Makayyioohit cĩ ũũrũta cĩ hẽẽtkujjieen. 5Baa nga aattiyyu niig loota nĩnga, baa ammuku heengti cugguung diooni nẽ accamattoothihu. Nẽẽthĩ ꞌyioko, ĩdĩktu aauttu hĩ merukwaaꞌnya ꞌcĩg õõt etteeddi thõng. 6Etteediku niig eet thooꞌthiok nẽ uruktu eet ꞌcĩg ammĩrĩ, tananga ẽlẽmĩ thooꞌthiok cugguung.

Etemeethit thooꞌthiok ꞌcannaana

7ꞌGotoonoga hĩ ngoonoga, ereeyyio ĩꞌthõng hõbõda Makayyioohiti. Aaut hĩ kattiooha cĩg maneenu aag gõõng ereeyyi ĩꞌthõng hĩtĩĩl tammu nẽ tarĩ, ereeyyio ĩꞌthõng hibbiir mana. 8Adiim ereeinnu niig buúk. Aanytĩk ꞌthinneeti hokomit, hĩnĩngĩtĩ õbõhĩ ikia Makayyioohiti. 9ꞌGotoonoga hĩ ngoonoga, ma hongoongoeeku ꞌgoonogu, hode etteedoothĩkuung hinnia hatĩ ngagiit thõõtha. Hĩnĩngĩtĩ ĩbĩl ꞌgaadĩ ꞌcĩ ẽttẽẽd thõõth hattũũga.

10Hõlõ, ũnnẽẽc terethiinit baa põrõvẽtaaꞌnya baag õthõõth thõõth cĩ Makayyiookto. Baa adĩhan nẽẽg ꞌcannan korrioohĩĩ baag accananiini nẽẽgĩ. 11Hadĩhĩth naag eet baag adĩhan ꞌcannan. Ĩthĩktu niig ꞌcannan cĩ ꞌJõõbĩ nẽ icittu ꞌgii ꞌcĩ aku adĩmaneek Makayyioohiti ĩnõõnnõ uruta. Aꞌnyak Makayyioohiti tamaati cobbi.

12ꞌGotoonoga hĩ ngoonoga, thooꞌthiohĩ vẽlẽk, ma habũtannu ꞌthaarĩĩ cĩg hẽẽtkujjieen hode ĩcĩg looc nicci hode ĩcĩg ꞌgiimwa. Udukta thõõth ꞌcĩ aĩ eei hode aitiõõ, hátĩ hiittiõõ hõllõngaa ẽꞌthẽcannu hode etteedoothĩkuung hinnia hatĩ thõõtha.

Laiinit cĩ lemiitto

13Ma aꞌnyaku niig ꞌcannan umwa, occa alaiinnu. Nẽ má aattiyyu lõꞌngõõc, ebenit tegellwa cĩg dĩhĩthẽẽttak. 14Ma õmmõõrĩ eet umwaa hõrggẽẽnaa cunuung, aꞌnyĩĩk hũtũvva makayyiook cĩg lothippit cĩ lemmioohu, hiita halayyiõõĩ ĩnõõnnõ nẽ ĩnĩĩbĩtõ ngõõrra ꞌthaarĩĩ cĩg Makayyiooktak. 15Aaꞌnyĩk hatĩ laiiniti cĩ lemiinit cunuung eet ꞌcĩ õmmõõrĩ ho hũbũna. Aaꞌnyĩk hatĩ Makayyioohiti ĩnõõnnõ hĩtĩnga haau ꞌjieena. Ma baa ĩĩn eet ꞌcĩ ẽꞌthẽcanõõ, ũũnnĩk hatĩ Makayyioohiti ꞌthẽccanẽẽt cĩgĩnnĩg. 16Má baa ẽꞌthẽcattoou niiga, occa aduhaaku ꞌgoonogu ꞌthẽccanẽẽt ꞌcĩg baa adĩmannu ho. Nẽẽthĩ, alayyiooyyu eleeti hõdẽĩ, hátĩ hũtũngeek Makayyioohiti ꞌthẽccanẽẽt cugguung. Attiran laiiniti cĩ eet ꞌcĩ abũnnaa nẽ aga ngaatĩ eelluung ngagiit gẽrrẽẽt.

17Baa ĩĩn Eliijja#5:17 Eliijja: Baa ĩĩn Eliijja põrõvẽtaac cĩ Nyekuci ꞌcĩ baa õkõõĩ Nyekuci hẽẽtahujjieen rũgẽtẽẽt. Baa arittiaa nẽẽ baa ĩĩn irkiꞌnyia ꞌmiiaꞌnya tũrkũwwec baa nga hittirria Yeesu. Tigiil thõõth cĩnnĩ ꞌBuuhaa ꞌcĩ ĩĩn 1 ĩcĩ Habueetu 17-21; 2 Habuẽẽt 1-3. eet ꞌcĩ aaĩ hĩ naaga. Baa alayyi nẽẽ gẽrrẽẽt aĩ hiittiõõ hõllõngaa atĩĩlĩ tammu, nẽẽꞌthẽk iittiõõ tammu hõllõngaa atĩĩlĩ looccaa tĩho irkiꞌnyia iyyio hĩ nyĩlõhĩ tõrkõnõn. 18Ma baa alaõ nẽẽ tarĩ, ikia ĩtĩĩl tammu dĩdĩ haaꞌnyĩk haal hubuꞌthia. 19ꞌGotoonoga hĩ ngoonoga, má baa arahan eet umwaa hõrggẽẽnaa cunuung thõõthaa ꞌcĩ ĩĩn dĩdĩ, immiirria ĩnõõnnõ. 20Nẽẽthĩ, ummuhuttooth thõõth icci. Ẽẽtĩ ꞌcĩ ammiira ꞌthẽccannioohit ꞌgõõlaa ꞌcĩ abathĩ, ẽẽla ẽẽtĩ tĩho ĩnõõnnõ daahĩtha nẽ ũmmũt ꞌthẽccanẽẽt ꞌcĩg mẽẽlĩg gẽrrẽẽt.

Currently Selected:

ꞌJeemith 5: did

Highlight

Compare

Copy