Dtiicanĩ cĩg ꞌThooyyiahu 9
9
Ikia ĩĩ ꞌThaaulo nuyyioohit cĩ Makayyiookto
(Tigiil Dtiicanĩ cĩg ꞌThooyyiahu 22:6-16; 26:12-18)
1Baa ara ẽrrẽan ꞌThaaulo nuyyiook cĩg Makayyiooktak ngaatĩ aduhaanĩ thooꞌthiok ꞌcĩg adiim aruhi ĩhõõggõ. Nẽ ũũk ẽttẽẽda waragẽẽt hĩ paadĩr cobbi, 2hĩ makayyiook cĩg ꞌCieethi cĩg Laiittak Damaathĩko. Baa adĩman nẽẽ thooꞌthiok iccig, hĩnĩngĩtĩ adiim aggam eet ꞌcĩg maacĩg hĩ ngaaĩ ꞌcĩg anũ ꞌGõõl cĩ Makayyioohit Yeesu, hõõt hĩĩtõ baabuuthnya ꞌJeruꞌthalẽma. 3Ma baa õbõktõ nẽẽ hĩ Damaathĩko hẽẽrõnaa cĩnnĩ ho, udhukia lanyit umwaa hẽẽtahujjieen hĩdĩĩkoothong ꞌcĩ ammaddeek ĩnõõnnõ. 4Nĩngĩtĩ ẽttẽẽdĩ ꞌThaaulo looc nẽ ĩthĩk molook umwa ꞌcĩ anneek ĩnõõnnõ, “ꞌThaaulo, ꞌThaaulo, arukaa nii nganĩĩt inni?”
5Ẽdẽcĩ ꞌThaaulo anneek, “Nganiit nganĩ Makayyioohit?”
Ẽdẽcĩ Makayyioohiti ꞌThaaulo anneek, “Nganĩĩt Yeesu ꞌcĩ aruhi nii ho. 6Nẽẽthĩ ꞌyioko, tĩnga bĩĩt ꞌtaaũnatõõ hũũk heterethoothihii thõõth ꞌcĩ hatĩ õkõ adĩmani.”
7Nẽ eeta ꞌcĩg baag ẽhẽẽrõn hĩ ꞌThaaulo, baa abĩlĩ nĩngaata muguruur, athĩhĩ molook umwa, nẽẽthĩ hinnia, hõllõngaa adtuuha eet umwa ũdũt. 8Ma ho, ĩtĩnga ꞌThaaulo ꞌjieena nẽ ma aĩ hĩcĩnĩ ho, ruben hinnia thõng. Nĩngĩtĩ atĩꞌthĩtĩ eeta ĩnõõnnõ õõyyĩ ꞌtaaũnatõõ cĩ Damaathĩko. 9Baa ruben ꞌThaaulo waathinniook iyyio hiittiõõ nõõ hõllõngaa adak ꞌgiimwaa ũdũt.
10Baa nohota, baa aaĩ nuyyioohiti umwaa ꞌcĩ haĩ Anania ꞌtaaũnaa ĩĩcĩ Damaathĩko. Baa aaĩ nẽẽ hĩcĩ ohonooꞌthi thõng nẽ ũtũvvũ Makayyioohiti Yeesu ĩnõõnnõ ĩĩnnĩk, “Anania!”
Ẽdẽcĩ Anania anneek, “Ee Makayyioohit!”
11Nĩngĩtĩ annẽẽkĩ Makayyioohiti Yeesu ĩnõõnnõ, “Bĩĩt õlõõ ꞌcĩ eet ꞌcĩ haĩ ꞌJuuda ꞌgõõlaa ꞌcĩ anneek eeta ꞌGõõl ꞌcĩ Aũlanĩ. Ma õdõlanuu, ammudoothihi hatĩ eet ꞌcĩ haĩ ꞌThaaulo, ꞌcĩ aku ꞌtaaũnaa cĩ ꞌTaartho. Hĩnĩngĩtĩ alayyi nẽẽ gẽrrẽẽt. 12Nẽ ꞌgõõlaa ꞌcĩ aayyi nẽẽ hĩcĩ ohonoothini thõng ko, baa adtuuha ꞌThaaulo eet ꞌcĩ haĩ Anania ngaatĩ akuuni nẽ uhum hẽbẽrĩ cĩgĩnnĩg hĩcĩttĩ.”
13Ẽdẽcĩ hinnia Anania Yeesu anneek, “Makayyioohit, ẽddẽẽbtahaa eeta ꞌcĩg mẽẽlĩg gẽrrẽẽt thooꞌthiok ꞌcĩg abathĩ ꞌcĩg aruhi ẽẽtĩ ciee nuyyiook cugunnig ꞌJeruꞌthalẽma. 14Nẽ ꞌyioko, aku nẽẽ ngaati, hĩnĩngĩtĩ aanytĩk makayyiooha cĩg paadĩrꞌnyaannu makaaꞌthĩt, hikia haggam eet ꞌcĩ alayyi ꞌthaarĩĩ cugunnig.”
15Nẽẽthĩ, baa anneek Makayyioohiti Yeesu Anania, “Bĩtõ! Ĩĩn ẽẽtĩ ciee eet caannĩ ꞌcĩ tiiri ꞌcĩ eberriaa hillimman eet ꞌcĩg hõllõngaa ĩĩn ꞌJudeei hĩ habuẽẽt hĩ eet cĩg Ĩꞌthĩraẽlĩ thõõth caannĩ. 16Nganĩĩt hatĩ ꞌcĩ heterꞌtheehi ĩnõõnnõ ꞌgõõl ꞌcĩ accananiini, hĩnĩngĩtĩ ꞌthaar cĩgannĩg.”
17Nĩngĩtĩ õkõ adukni Anania õlõ tĩho. Ma nĩngaata, ataadĩk athĩn cĩgĩnnĩg hĩ ꞌThaaulo nẽ ĩĩ, “ꞌGõtõna ꞌThaaulo, Makayyioohit Yeesu baa uppwannakii nganiit ꞌgõõlaa ꞌcĩ akuuni ngaati ho, ꞌcĩ ĩꞌthõõannaa nganĩĩt, hátĩ cĩnĩ nii tarĩ nẽ ũmmũda Lori ꞌcĩ Ẽllẽẽmĩthĩ.” 18Ma hĩdĩĩkoothong, udhukta hẽlẽggĩ ũgẽẽgĩ ꞌcĩg aattĩg hĩ hõꞌthõbõ cĩg ulugoocak hẽbẽrẽẽnnĩĩ cĩg ꞌThaaulo, nĩngĩtĩ acĩnẽẽnĩ. Ma ho, ĩtĩnga nẽẽ ꞌjieena nẽ aggamoothĩk baattithimo. 19Ma baa adak ꞌgẽẽn, ikia ũbũna ẽlẽ cĩnnẽẽnĩ.
ꞌThaaulo ꞌtaaũnaa cĩ Damaathĩko
Nĩngĩtĩ arũmẽẽnĩ ꞌThaaulo hĩ nuyyiook ꞌtaaũnaa cĩ Damaathĩko waathinniook ꞌcĩg mẽẽlĩg hĩdĩĩc. 20Ma hĩdĩĩkoothong, iꞌthianaaĩ nẽẽ irrioon thõõth ꞌcĩ ĩĩnnĩ Yeesu Ngeertĩ Nyekuci ꞌCieethinii cĩg Laiittak. 21Eeta vẽlẽk ꞌcĩg baag athĩhĩ thõõth cĩ ꞌThaaulo ho, ukullieek ꞌjieen nẽ ĩĩtõ, “Hõllõngaa nooyyia eet baa atĩkĩĩan eet ꞌcĩg alayyi ꞌthaarĩĩ cĩg Yeesu ꞌJeruꞌthalẽma niccieeni? ꞌYioko baa hõllõngaa aku nẽẽ hikia haggam ĩhõõggõ nẽ aꞌnyahoothĩk makayyiook cĩg paadĩrꞌnyaannu?” 22Baa irrioon ꞌThaaulo ꞌtirriaanaa ꞌcĩ maka gẽrrẽẽt hatalmanyan eet cĩg ꞌJudeei ꞌcĩg aattĩg Damaathĩko, hĩnĩngĩtĩ arĩnyana ngaatĩ aĩnnĩ ĩĩn Yeesu, Krĩstõ.
23Ma baa allanganit waathinniooha ꞌcĩg mẽẽlẽẽgĩ, iita utuhanit eeta cĩg ꞌJudeei thõõth ꞌcĩ aruhi ꞌThaaulo, 24baa nẽẽ aga ꞌThaaulo muhẽẽnĩt cĩnĩĩng ko. Waathĩn hĩ baalin, baa ẽbẽk nẽẽg hattũũgẽt ꞌcĩg obbitig cĩg ꞌtaaũnaak ꞌgõõlaa ꞌcĩ atabĩ aruhi ꞌThaaulo. 25Tõjõhõ hiita hĩnĩktĩ nuyyiooha cĩgĩnnĩg ĩnõõnnõ haarrik ꞌguuvvaa nẽ õyõyyõõrattaak loota hutulaa cĩ araanõ.
ꞌThaaulo ꞌJeruꞌthalẽma
26Ma baa õdõlan ꞌThaaulo ꞌJeruꞌthalẽma, ikia idiim uduhunoothĩk nẽẽ nuyyiook. Baa hinnia itieelli nuyyiooha ĩnõõnnõ hõllõngaa ẽlẽmĩ ngaatĩ ikiaaĩ nẽẽ ĩĩ nuyyioohit dĩdĩ. 27Nĩngĩtĩ aku ẽẽlĩ Baarnaba ĩnõõnnõ ngaatĩ õkõõĩ hĩ ꞌthooyyiak. Ma ho, ũũk uduhaak ꞌthooyyiak ꞌgõõl ꞌcĩ baa adtuuhanĩ ꞌThaaulo Makayyioohit, hĩ ꞌgõõl ꞌcĩ õthõõthĩkĩ Makayyioohiti ĩnõõnnõ. Baa aduhaak Baarnaba eet buúk ꞌgõõl ꞌcĩ baa arĩnyanaanĩ ꞌThaaulo ꞌlimman ꞌthaarĩĩ cĩg Yeesu ꞌtaaũnaa cĩ Damaathĩko. 28Baa nẽẽ õtõõcõ ꞌThaaulo hĩ nuyyiook ꞌJeruꞌthalẽma ꞌthinneetinii ꞌcĩg õkõmĩ nẽ uduktaak eet vẽlẽk thõõth cĩ Makayyioohit Yeesu. 29Õthõõth ꞌThaaulo nẽ ẽppẽhattõõ hĩ eet cĩg ꞌJudeei ꞌcĩg õthõõth thõõthaa cĩ ꞌGirihi, nĩngĩtĩ adiimi aruhi eeta cieeg ĩnõõnnõ. 30Tõjõhõ hiita hummuddia nuyyiooha thõõth icci, nĩngĩtĩ ittiõõnĩ ꞌThaaulo, ĩꞌthõng ꞌtaaũn cĩ Caetharea. Ma ĩĩca, iꞌthooyyik ĩnõõnnõ hedeceek ꞌtaaũnaa cĩ ꞌTaartho. 31Baa ikia aau lothippiti cĩ lemmioohu ganõõna looccaa cĩ ꞌJudeea hĩ ꞌGalileea hĩ Thamaria nẽ alaacõ Makayyioohit. Iita ittiranit nẽẽg gẽrrẽẽt, hĩnĩngĩtĩ ẽẽl Lorii ꞌcĩ Ẽllẽẽmĩth ĩhõõggõ aaꞌnyĩk hittoorri hĩĩtõ mẽẽlĩg.
Enea hĩ ꞌDõõrka
32Ma baa õyõyyõr Pẽẽtũrũ loonyini vẽlẽk, ikia eheronoothĩk nẽẽ nuyyiook cĩg Makayyiooktak ꞌcĩg baag aattĩg ꞌtaaũnaa cĩ Liidda. 33Ma ĩĩca, ommottio nẽẽ hĩ eet umwa ꞌcĩ haĩ Enea. Baa ĩĩn Enea eet ꞌcĩ alalliaa ẽlẽ nẽ oongi nangẽrẽba irkiꞌnyia turkiyyio hõllõngaa occa õvvõ ũdũt. 34Ma ho, ĩĩnnĩk Pẽẽtũrũ ĩnõõnnõ, “Enea, aaꞌnyi Yeesu Krĩstõ nganiit bũna. Tĩnga kũmmaneek nangẽrẽb cunni.” Ma hĩdĩĩkoothong, ĩtĩnga Enea nĩĩcĩ noho. 35Ma baa adtuuha eeta ꞌcĩg mẽẽlĩg cĩg ꞌtaaũn cĩ Liidda, hĩ cĩg ꞌtaaũn cĩ Thaaronĩ thõõth icci ho, iita elemit Makayyioohit.
36ꞌTaaũnaa cĩ ꞌJõõppa, baa aaĩ nuyyioohiti umwaa ꞌcĩ ngayyi ꞌcĩ haĩ ꞌthaar Tabitha. Baa haĩ ꞌthaar ũgĩ cĩgĩnnĩg ꞌGiriheeyyi ꞌDõõrka, nĩngĩtĩ aĩ mẽggẽẽr. Baa adĩman nẽẽ thõõth ꞌcĩ abũnnaa ngaatĩ ẽẽlĩ hullaha. 37Baa nohota, baa õmmõõrĩ Tabitha nĩngĩtĩ aku adaaknĩ, ma ho, iita ũtũũnyĩtõ eeta ẽlẽ cĩnnĩ nẽ aarrik ꞌcieethaa lokora. 38Baa õbõhõõ Liidda hĩ ꞌtaaũn cĩ ꞌJõõppa. Ma baa athĩhĩ nuyyiooha ngaatĩ aayyi Pẽẽtũrũ ꞌtaaũnaa cĩ Liidda ho, iꞌthooyyik ĩnõõnnõ eet ꞌramma hõõt hĩĩttĩk, “Tooyyia baaĩ nuun hataman!”
39Nĩngĩtĩ õõkõrĩ Pẽẽtũrũ hĩ ĩhõõggõ, ma baa õdõlan ko, iita ootti eeta ĩnõõnnõ ꞌcieetha lokora. Baa abĩlĩ ngaatĩbõyyĩꞌnya nĩngaata alu nẽ etereꞌthieek ĩnõõnnõ koouꞌnya hĩ ceremwa ũgĩ ꞌcĩg baag alũũlla ꞌDõõrka baa nga arũgĩ.
40Ma nĩngaata, ikia uduhaak Pẽẽtũrũ ĩhõõggõ vẽlẽk hõõt nõõ battaala, nĩngĩtĩ akannĩ huruꞌnyia nẽ alaõ. Ma ho, ũtũhũoothĩk ngaa ꞌcĩ adaahĩ ho nẽ ĩĩnnĩk, “Tabitha, tĩnga ꞌjieena.” Nĩngĩtĩ acĩnẽẽnĩ Tabitha hudtuuha Pẽẽtũrũ nẽ aau ꞌjieena. 41Aggam Pẽẽtũrũ ĩnõõnnõ aꞌthiit hĩtĩnga ꞌjieena. Ma nĩngaata, ũtũvva Pẽẽtũrũ lemmiook hĩ ngaatĩbõyyĩꞌnya nẽ eteretheek ĩhõõggõ ngaatĩ ũrũgaaĩ ꞌDõõrka. 42Baa ĩꞌthanothoothĩk nyeemuut ciee ꞌJõõppa hũtũrũũr nẽ iita elemit eeta ꞌcĩg mẽẽlĩg Makayyioohit Yeesu. 43Ma nĩngaata aala Pẽẽtũrũ ꞌJõõppattĩ waathinniook ꞌcĩg mẽẽlĩg õlõõ cĩ eet umwa ꞌcĩ attũũb õlẽẽt ꞌcĩ haĩ ꞌthaar ꞌThimõõnẽ.
Currently Selected:
Dtiicanĩ cĩg ꞌThooyyiahu 9: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
Dtiicanĩ cĩg ꞌThooyyiahu 9
9
Ikia ĩĩ ꞌThaaulo nuyyioohit cĩ Makayyiookto
(Tigiil Dtiicanĩ cĩg ꞌThooyyiahu 22:6-16; 26:12-18)
1Baa ara ẽrrẽan ꞌThaaulo nuyyiook cĩg Makayyiooktak ngaatĩ aduhaanĩ thooꞌthiok ꞌcĩg adiim aruhi ĩhõõggõ. Nẽ ũũk ẽttẽẽda waragẽẽt hĩ paadĩr cobbi, 2hĩ makayyiook cĩg ꞌCieethi cĩg Laiittak Damaathĩko. Baa adĩman nẽẽ thooꞌthiok iccig, hĩnĩngĩtĩ adiim aggam eet ꞌcĩg maacĩg hĩ ngaaĩ ꞌcĩg anũ ꞌGõõl cĩ Makayyioohit Yeesu, hõõt hĩĩtõ baabuuthnya ꞌJeruꞌthalẽma. 3Ma baa õbõktõ nẽẽ hĩ Damaathĩko hẽẽrõnaa cĩnnĩ ho, udhukia lanyit umwaa hẽẽtahujjieen hĩdĩĩkoothong ꞌcĩ ammaddeek ĩnõõnnõ. 4Nĩngĩtĩ ẽttẽẽdĩ ꞌThaaulo looc nẽ ĩthĩk molook umwa ꞌcĩ anneek ĩnõõnnõ, “ꞌThaaulo, ꞌThaaulo, arukaa nii nganĩĩt inni?”
5Ẽdẽcĩ ꞌThaaulo anneek, “Nganiit nganĩ Makayyioohit?”
Ẽdẽcĩ Makayyioohiti ꞌThaaulo anneek, “Nganĩĩt Yeesu ꞌcĩ aruhi nii ho. 6Nẽẽthĩ ꞌyioko, tĩnga bĩĩt ꞌtaaũnatõõ hũũk heterethoothihii thõõth ꞌcĩ hatĩ õkõ adĩmani.”
7Nẽ eeta ꞌcĩg baag ẽhẽẽrõn hĩ ꞌThaaulo, baa abĩlĩ nĩngaata muguruur, athĩhĩ molook umwa, nẽẽthĩ hinnia, hõllõngaa adtuuha eet umwa ũdũt. 8Ma ho, ĩtĩnga ꞌThaaulo ꞌjieena nẽ ma aĩ hĩcĩnĩ ho, ruben hinnia thõng. Nĩngĩtĩ atĩꞌthĩtĩ eeta ĩnõõnnõ õõyyĩ ꞌtaaũnatõõ cĩ Damaathĩko. 9Baa ruben ꞌThaaulo waathinniook iyyio hiittiõõ nõõ hõllõngaa adak ꞌgiimwaa ũdũt.
10Baa nohota, baa aaĩ nuyyioohiti umwaa ꞌcĩ haĩ Anania ꞌtaaũnaa ĩĩcĩ Damaathĩko. Baa aaĩ nẽẽ hĩcĩ ohonooꞌthi thõng nẽ ũtũvvũ Makayyioohiti Yeesu ĩnõõnnõ ĩĩnnĩk, “Anania!”
Ẽdẽcĩ Anania anneek, “Ee Makayyioohit!”
11Nĩngĩtĩ annẽẽkĩ Makayyioohiti Yeesu ĩnõõnnõ, “Bĩĩt õlõõ ꞌcĩ eet ꞌcĩ haĩ ꞌJuuda ꞌgõõlaa ꞌcĩ anneek eeta ꞌGõõl ꞌcĩ Aũlanĩ. Ma õdõlanuu, ammudoothihi hatĩ eet ꞌcĩ haĩ ꞌThaaulo, ꞌcĩ aku ꞌtaaũnaa cĩ ꞌTaartho. Hĩnĩngĩtĩ alayyi nẽẽ gẽrrẽẽt. 12Nẽ ꞌgõõlaa ꞌcĩ aayyi nẽẽ hĩcĩ ohonoothini thõng ko, baa adtuuha ꞌThaaulo eet ꞌcĩ haĩ Anania ngaatĩ akuuni nẽ uhum hẽbẽrĩ cĩgĩnnĩg hĩcĩttĩ.”
13Ẽdẽcĩ hinnia Anania Yeesu anneek, “Makayyioohit, ẽddẽẽbtahaa eeta ꞌcĩg mẽẽlĩg gẽrrẽẽt thooꞌthiok ꞌcĩg abathĩ ꞌcĩg aruhi ẽẽtĩ ciee nuyyiook cugunnig ꞌJeruꞌthalẽma. 14Nẽ ꞌyioko, aku nẽẽ ngaati, hĩnĩngĩtĩ aanytĩk makayyiooha cĩg paadĩrꞌnyaannu makaaꞌthĩt, hikia haggam eet ꞌcĩ alayyi ꞌthaarĩĩ cugunnig.”
15Nẽẽthĩ, baa anneek Makayyioohiti Yeesu Anania, “Bĩtõ! Ĩĩn ẽẽtĩ ciee eet caannĩ ꞌcĩ tiiri ꞌcĩ eberriaa hillimman eet ꞌcĩg hõllõngaa ĩĩn ꞌJudeei hĩ habuẽẽt hĩ eet cĩg Ĩꞌthĩraẽlĩ thõõth caannĩ. 16Nganĩĩt hatĩ ꞌcĩ heterꞌtheehi ĩnõõnnõ ꞌgõõl ꞌcĩ accananiini, hĩnĩngĩtĩ ꞌthaar cĩgannĩg.”
17Nĩngĩtĩ õkõ adukni Anania õlõ tĩho. Ma nĩngaata, ataadĩk athĩn cĩgĩnnĩg hĩ ꞌThaaulo nẽ ĩĩ, “ꞌGõtõna ꞌThaaulo, Makayyioohit Yeesu baa uppwannakii nganiit ꞌgõõlaa ꞌcĩ akuuni ngaati ho, ꞌcĩ ĩꞌthõõannaa nganĩĩt, hátĩ cĩnĩ nii tarĩ nẽ ũmmũda Lori ꞌcĩ Ẽllẽẽmĩthĩ.” 18Ma hĩdĩĩkoothong, udhukta hẽlẽggĩ ũgẽẽgĩ ꞌcĩg aattĩg hĩ hõꞌthõbõ cĩg ulugoocak hẽbẽrẽẽnnĩĩ cĩg ꞌThaaulo, nĩngĩtĩ acĩnẽẽnĩ. Ma ho, ĩtĩnga nẽẽ ꞌjieena nẽ aggamoothĩk baattithimo. 19Ma baa adak ꞌgẽẽn, ikia ũbũna ẽlẽ cĩnnẽẽnĩ.
ꞌThaaulo ꞌtaaũnaa cĩ Damaathĩko
Nĩngĩtĩ arũmẽẽnĩ ꞌThaaulo hĩ nuyyiook ꞌtaaũnaa cĩ Damaathĩko waathinniook ꞌcĩg mẽẽlĩg hĩdĩĩc. 20Ma hĩdĩĩkoothong, iꞌthianaaĩ nẽẽ irrioon thõõth ꞌcĩ ĩĩnnĩ Yeesu Ngeertĩ Nyekuci ꞌCieethinii cĩg Laiittak. 21Eeta vẽlẽk ꞌcĩg baag athĩhĩ thõõth cĩ ꞌThaaulo ho, ukullieek ꞌjieen nẽ ĩĩtõ, “Hõllõngaa nooyyia eet baa atĩkĩĩan eet ꞌcĩg alayyi ꞌthaarĩĩ cĩg Yeesu ꞌJeruꞌthalẽma niccieeni? ꞌYioko baa hõllõngaa aku nẽẽ hikia haggam ĩhõõggõ nẽ aꞌnyahoothĩk makayyiook cĩg paadĩrꞌnyaannu?” 22Baa irrioon ꞌThaaulo ꞌtirriaanaa ꞌcĩ maka gẽrrẽẽt hatalmanyan eet cĩg ꞌJudeei ꞌcĩg aattĩg Damaathĩko, hĩnĩngĩtĩ arĩnyana ngaatĩ aĩnnĩ ĩĩn Yeesu, Krĩstõ.
23Ma baa allanganit waathinniooha ꞌcĩg mẽẽlẽẽgĩ, iita utuhanit eeta cĩg ꞌJudeei thõõth ꞌcĩ aruhi ꞌThaaulo, 24baa nẽẽ aga ꞌThaaulo muhẽẽnĩt cĩnĩĩng ko. Waathĩn hĩ baalin, baa ẽbẽk nẽẽg hattũũgẽt ꞌcĩg obbitig cĩg ꞌtaaũnaak ꞌgõõlaa ꞌcĩ atabĩ aruhi ꞌThaaulo. 25Tõjõhõ hiita hĩnĩktĩ nuyyiooha cĩgĩnnĩg ĩnõõnnõ haarrik ꞌguuvvaa nẽ õyõyyõõrattaak loota hutulaa cĩ araanõ.
ꞌThaaulo ꞌJeruꞌthalẽma
26Ma baa õdõlan ꞌThaaulo ꞌJeruꞌthalẽma, ikia idiim uduhunoothĩk nẽẽ nuyyiook. Baa hinnia itieelli nuyyiooha ĩnõõnnõ hõllõngaa ẽlẽmĩ ngaatĩ ikiaaĩ nẽẽ ĩĩ nuyyioohit dĩdĩ. 27Nĩngĩtĩ aku ẽẽlĩ Baarnaba ĩnõõnnõ ngaatĩ õkõõĩ hĩ ꞌthooyyiak. Ma ho, ũũk uduhaak ꞌthooyyiak ꞌgõõl ꞌcĩ baa adtuuhanĩ ꞌThaaulo Makayyioohit, hĩ ꞌgõõl ꞌcĩ õthõõthĩkĩ Makayyioohiti ĩnõõnnõ. Baa aduhaak Baarnaba eet buúk ꞌgõõl ꞌcĩ baa arĩnyanaanĩ ꞌThaaulo ꞌlimman ꞌthaarĩĩ cĩg Yeesu ꞌtaaũnaa cĩ Damaathĩko. 28Baa nẽẽ õtõõcõ ꞌThaaulo hĩ nuyyiook ꞌJeruꞌthalẽma ꞌthinneetinii ꞌcĩg õkõmĩ nẽ uduktaak eet vẽlẽk thõõth cĩ Makayyioohit Yeesu. 29Õthõõth ꞌThaaulo nẽ ẽppẽhattõõ hĩ eet cĩg ꞌJudeei ꞌcĩg õthõõth thõõthaa cĩ ꞌGirihi, nĩngĩtĩ adiimi aruhi eeta cieeg ĩnõõnnõ. 30Tõjõhõ hiita hummuddia nuyyiooha thõõth icci, nĩngĩtĩ ittiõõnĩ ꞌThaaulo, ĩꞌthõng ꞌtaaũn cĩ Caetharea. Ma ĩĩca, iꞌthooyyik ĩnõõnnõ hedeceek ꞌtaaũnaa cĩ ꞌTaartho. 31Baa ikia aau lothippiti cĩ lemmioohu ganõõna looccaa cĩ ꞌJudeea hĩ ꞌGalileea hĩ Thamaria nẽ alaacõ Makayyioohit. Iita ittiranit nẽẽg gẽrrẽẽt, hĩnĩngĩtĩ ẽẽl Lorii ꞌcĩ Ẽllẽẽmĩth ĩhõõggõ aaꞌnyĩk hittoorri hĩĩtõ mẽẽlĩg.
Enea hĩ ꞌDõõrka
32Ma baa õyõyyõr Pẽẽtũrũ loonyini vẽlẽk, ikia eheronoothĩk nẽẽ nuyyiook cĩg Makayyiooktak ꞌcĩg baag aattĩg ꞌtaaũnaa cĩ Liidda. 33Ma ĩĩca, ommottio nẽẽ hĩ eet umwa ꞌcĩ haĩ Enea. Baa ĩĩn Enea eet ꞌcĩ alalliaa ẽlẽ nẽ oongi nangẽrẽba irkiꞌnyia turkiyyio hõllõngaa occa õvvõ ũdũt. 34Ma ho, ĩĩnnĩk Pẽẽtũrũ ĩnõõnnõ, “Enea, aaꞌnyi Yeesu Krĩstõ nganiit bũna. Tĩnga kũmmaneek nangẽrẽb cunni.” Ma hĩdĩĩkoothong, ĩtĩnga Enea nĩĩcĩ noho. 35Ma baa adtuuha eeta ꞌcĩg mẽẽlĩg cĩg ꞌtaaũn cĩ Liidda, hĩ cĩg ꞌtaaũn cĩ Thaaronĩ thõõth icci ho, iita elemit Makayyioohit.
36ꞌTaaũnaa cĩ ꞌJõõppa, baa aaĩ nuyyioohiti umwaa ꞌcĩ ngayyi ꞌcĩ haĩ ꞌthaar Tabitha. Baa haĩ ꞌthaar ũgĩ cĩgĩnnĩg ꞌGiriheeyyi ꞌDõõrka, nĩngĩtĩ aĩ mẽggẽẽr. Baa adĩman nẽẽ thõõth ꞌcĩ abũnnaa ngaatĩ ẽẽlĩ hullaha. 37Baa nohota, baa õmmõõrĩ Tabitha nĩngĩtĩ aku adaaknĩ, ma ho, iita ũtũũnyĩtõ eeta ẽlẽ cĩnnĩ nẽ aarrik ꞌcieethaa lokora. 38Baa õbõhõõ Liidda hĩ ꞌtaaũn cĩ ꞌJõõppa. Ma baa athĩhĩ nuyyiooha ngaatĩ aayyi Pẽẽtũrũ ꞌtaaũnaa cĩ Liidda ho, iꞌthooyyik ĩnõõnnõ eet ꞌramma hõõt hĩĩttĩk, “Tooyyia baaĩ nuun hataman!”
39Nĩngĩtĩ õõkõrĩ Pẽẽtũrũ hĩ ĩhõõggõ, ma baa õdõlan ko, iita ootti eeta ĩnõõnnõ ꞌcieetha lokora. Baa abĩlĩ ngaatĩbõyyĩꞌnya nĩngaata alu nẽ etereꞌthieek ĩnõõnnõ koouꞌnya hĩ ceremwa ũgĩ ꞌcĩg baag alũũlla ꞌDõõrka baa nga arũgĩ.
40Ma nĩngaata, ikia uduhaak Pẽẽtũrũ ĩhõõggõ vẽlẽk hõõt nõõ battaala, nĩngĩtĩ akannĩ huruꞌnyia nẽ alaõ. Ma ho, ũtũhũoothĩk ngaa ꞌcĩ adaahĩ ho nẽ ĩĩnnĩk, “Tabitha, tĩnga ꞌjieena.” Nĩngĩtĩ acĩnẽẽnĩ Tabitha hudtuuha Pẽẽtũrũ nẽ aau ꞌjieena. 41Aggam Pẽẽtũrũ ĩnõõnnõ aꞌthiit hĩtĩnga ꞌjieena. Ma nĩngaata, ũtũvva Pẽẽtũrũ lemmiook hĩ ngaatĩbõyyĩꞌnya nẽ eteretheek ĩhõõggõ ngaatĩ ũrũgaaĩ ꞌDõõrka. 42Baa ĩꞌthanothoothĩk nyeemuut ciee ꞌJõõppa hũtũrũũr nẽ iita elemit eeta ꞌcĩg mẽẽlĩg Makayyioohit Yeesu. 43Ma nĩngaata aala Pẽẽtũrũ ꞌJõõppattĩ waathinniook ꞌcĩg mẽẽlĩg õlõõ cĩ eet umwa ꞌcĩ attũũb õlẽẽt ꞌcĩ haĩ ꞌthaar ꞌThimõõnẽ.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.