Dtiicanĩ cĩg ꞌThooyyiahu 8

Uruk ꞌThaaulo lemmiook

1Baa abĩlĩ ꞌThaaulo nĩngaata hĩcĩn hoddiaanĩt ꞌcĩ adaaknĩ Tẽẽvẽnõ ho. Ma kõr niccia, itigirriaak pĩĩrnanĩtĩ ꞌcĩ maka gẽrrẽẽt lothippit cĩ lemmioohu ꞌJeruꞌthalẽma. Nĩngĩtĩ ĩꞌthanõthõõthĩkĩ nuyyiooha vẽlẽk looccaa cĩ ꞌJudeea hĩ looccaa cĩ Thamaria, hidionganit ꞌthooyyiaha diooni. 2Ma ho, iita adaacõ nuyyiooha cĩg Makayyiooktak Tẽẽvẽnõ nẽ utullẽẽcõ ĩnõõnnõ gẽrrẽẽt. 3Nĩngĩtĩ iꞌthianaanĩ ꞌThaaulo ĩꞌthaanĩ lothippit cĩ lemmioohu. Õyõyyõr ꞌcieethini vẽlẽk, agurra eet ꞌcĩg maacĩg hĩ ngaaĩ nẽ aarĩk ĩhõõggõ baabuuthatõõ.

Pilippo looccaa cĩ Thamaria

4Õõt illimanit nuyyiooha cĩg Makayyioohit Yeesu, ꞌcĩg baag ĩꞌthaattĩ tahatak, nyeemuut ꞌcĩ abũnnaa ꞌgoolliohĩĩ ꞌcĩg baag õõĩ nẽẽgĩ. 5Baa õkõ Pilippo ꞌtaaũnaa cobbi ĩĩcĩ Thamaria nẽ illimaneek eet thõõth cĩ Krĩstõ ĩĩca. 6Ma baa athĩhĩ lothippiti thõõth cĩ Pilippo nẽ ĩcĩnĩt thooꞌthiok ꞌcĩg ĩnaat eeta ꞌcĩg adtican nẽẽ ho, iita ĩthĩhĩt ꞌlimman cĩnnĩ ho. 7Nĩngĩtĩ au abũnnayyĩ eeta ꞌcĩg mẽẽlĩg ꞌcĩg aꞌnyak loriẽẽt ꞌcĩg abathĩ, hĩ eet ꞌcĩg ahuuli vẽlẽk. Baa adukna loriẽẽta ꞌcĩg abathĩ ho eleetinii cĩg eetuk, ẽggẽrꞌnya ꞌjieena. 8Ma nĩngaata, iita atalit eeta ꞌtaaũnaa tĩho gẽrrẽẽt ũdũt, hĩnĩngĩtĩ thooꞌthiok iccig.

Ngarĩ ꞌcĩ haĩ ꞌThimõõnẽ

9Ma waathinnioohĩĩ ũgẽẽgĩ, baa aaĩ eet umwaa ꞌcĩ ĩĩn ngarĩ ꞌcĩ haĩ ꞌThimõõnẽ, ꞌcĩ baa abulan eet vẽlẽk ngarĩꞌthẽẽtaa cĩnnĩ ꞌtaaũnaa cobbi ĩĩcĩ Thamaria. Baa irrian ꞌThimõõnẽ aĩ hĩĩnĩ eet umwa cobbi gẽrrẽẽt. 10Nĩngĩtĩ au athĩknĩ balliooha hĩ hullaha vẽlẽk thõõth cĩnnĩ nẽ ĩĩtõ, “Ĩĩn ẽẽtĩ ciee ꞌtirrian cĩ Nyekuci ꞌcĩ haĩ ꞌTirrian ꞌcĩ Maka.” 11Baa athĩhĩ eeta ꞌThimõõnẽ, hĩnĩngĩtĩ ũnũũhĩk nẽẽ ngarĩꞌthẽẽt cĩnnĩ ho, ngaatĩ adticanĩ thooꞌthiok ꞌcĩg ĩnaat eeta. 12Ma nĩngaata, iita elemit eeta Pilippo, hĩnĩngĩtĩ alliman nẽẽ nyeemuut ꞌcĩ abũnnaa cĩ habuccieet cĩ Nyekuci, hĩ ꞌthaar cĩg Yeesu Krĩstõ. Ma ho, iita aggamit nẽẽg vẽlẽk baattithimo eetinii ꞌcĩg maacĩg ngaaĩnĩ noho. 13Nẽ baa ikia ẽlẽmõ ꞌThimõõnẽ buúk, nĩngĩtĩ aggamĩ baattithimo. Ma nĩngaata, ũnũ nẽẽ Pilippo ꞌgõõlaa ꞌcĩ õkõõĩ, hĩnĩngĩtĩ thooꞌthiok ꞌcĩg ĩnaat eeta ꞌcĩg acĩn nẽẽnĩ.

14Ma baa ĩthĩhĩt ꞌthooyyiaha ꞌJeruꞌthalẽma ngaatĩ ẽlẽmmĩ eeta cĩg Thamaria thõõth cĩ Nyekuci ho, iita iꞌthooyyik nẽẽg ĩhõõggõ Pẽẽtũrũ hĩ Yõaannẽ. 15Ma baa õdõlan ꞌthooyyiaha ꞌcĩg ĩĩn ꞌramma ho, iita alayyiõõĩ nẽẽg lemmiook, hátĩ haaꞌnyĩhoothĩk Lorii ꞌcĩ Ẽllẽẽmĩth ĩhõõggõ. 16Hĩnĩngĩtĩ baa nga hikia Lorii ꞌcĩ Ẽllẽẽmĩth ĩĩcĩ oou hĩ eet cĩg Thamaria, tananga baa aggamit ũgẽẽgĩ baattithimo ꞌthaarĩĩ cĩg Makayyioohit Yeesu. 17Ma ho, ataaddik Pẽẽtũrũ hĩ Yõaannẽ athĩn ootinii cĩg lemmioohu, nĩngĩtĩ alluucciakĩ Lorii ꞌcĩ Ẽllẽẽmĩth ĩhõõggõ.

18Ma baa acĩn ꞌThimõõnẽ ngaatĩ akuuni Lorii ꞌcĩ Ẽllẽẽmĩth ꞌgõõlẽẽ ꞌcĩ ataadĩkĩ ꞌthooyyiaha athĩn ootinii cĩg lemmioohu ho, ikia aaꞌnyĩk nẽẽ ĩhõõggõ ꞌrabbẽẽt, 19nẽ ĩĩ, “Aanytaangu da nganĩĩt buúk ꞌtirrian icci, hátĩ haaꞌnyĩhoothĩk Lorii ꞌcĩ Ẽllẽẽmĩth eet ꞌcĩ hataadihi naa athĩn cĩgannĩg.”

20Ẽdẽcĩ Pẽẽtũrũ anneek, “Uduktoothĩk hĩ ꞌrabbẽẽt cugunnig ko vẽlẽk, hĩnĩngĩtĩ ammuhi aini, occa ũũta ꞌbaaninit cĩ Nyekuci ꞌrabbẽẽtĩ. 21Occa hõllõngaa hõthõl naag hĩ nganiit dtiic icci, hĩnĩngĩtĩ hõllõngaa aũlan ꞌthĩnĩt cunni muumaa cĩ Nyekuci. 22Dẽẽthĩ muhẽẽttaa cunni ĩĩcĩ abathĩ ho nẽ alau Makayyioohit, horoong hatĩ ammaannikii nẽẽ, hĩnĩngĩtĩ muhẽẽnĩt ꞌcĩ abathĩ ꞌthĩnĩtaa cunni ho. 23Hĩnĩngĩtĩ hacini iinani dtiic icci nẽ ecebbi ꞌthẽccanĩ nganiita.”

24Nĩngĩtĩ aĩnnĩ ꞌThimõõnẽ, “Ẽlẽ, laooyya baaĩ nuun hĩ Makayyioohit, hátĩ hiittiõõ thõõth ꞌcĩ aduha nii ho hõllõngaa adaka nganĩĩt ꞌgiimwa.”

25Ma urutaa ꞌcĩ illimattẽẽhĩ Pẽẽtũrũ hĩ Yõaannẽ eet nyeemuut ꞌcĩ abũnnaa cĩ Makayyioohit Yeesu ꞌtaaũna ĩĩca ẽlẽk, baa nẽẽ illimanit eet olooyyiohĩĩ ꞌcĩg mẽẽlĩg ĩĩcĩg Thamaria vẽlẽk nẽ oboddioothĩ ꞌJeruꞌthalẽma.

Pilippo hĩ Iꞌthioppianeenit

26Baa anneek aajĩlõ cĩ Makayyiookto Pilippo, “Dẽẽc ꞌgõõl ꞌcĩ õkõ ĩĩcĩ hujjieen, ꞌgõõl cĩ horu ꞌcĩ õdõhõhĩĩ ho ꞌcĩ õtõd õkõ ꞌJeruꞌthalẽma ĩꞌthõng ꞌGaaꞌtha.” 27Nĩngĩtĩ ĩꞌngaannĩ Pilippo õkõõĩ, ma ꞌgõõla, ommottio hĩ ꞌgaalac cĩ Iꞌthiooppia ꞌcĩ baa aarriaa.#8:27 Aarriaa: Baarkit, baa gõõng aara habuẽẽta eet ꞌcĩg adticanoothĩk ngaaĩ cĩggĩĩng. Baa ꞌgaalac cobbi tĩho gẽrrẽẽt ꞌcĩ aggam ꞌrabbẽẽt cĩg Kandaace ngaa ꞌcĩ ĩĩn habu cĩ Iꞌthiooppia. Baa õkõ alayyi ẽẽtĩ ciee ꞌJeruꞌthalẽma, 28nẽ ꞌyioko õbõda ũũk ĩĩcĩ õlõ cĩnnĩ. Baa iccioloongan nẽẽ ꞌgadiggadiaa cĩnnĩ ĩcĩ agurut nyangõõllẽẽꞌnya nẽ itigiil ꞌbuuk cĩ põrõvẽtaac Iꞌthaia. 29Ma ho, uduhaak Lorii ꞌcĩ Ẽllẽẽmĩth Pilippo ĩĩnnĩk, “Bĩĩt õõt õbõktõ hĩ ꞌgadiggadi iccia.”

30Ma nĩngaata, ukuloothĩk Pilippo ꞌgadiggadi nẽ ĩthĩk eet nicci ngaatĩ agiili ꞌbuuk cĩ põrõvẽtaac Iꞌthaia. Nĩngĩtĩ ajini ĩnõõnnõ annẽẽkĩ, “Athihi ꞌthẽk nii thõõth ꞌcĩ agiili ho?”

31Ẽdẽcĩ nẽẽ aĩ, “Hathihi ꞌthẽk tarĩ hutuno ẽlẽ? Ma haau eet umwaa ꞌcĩ aduhaakaanĩ, occa nuun hathihi.” Nĩngĩtĩ aduhaakĩ nẽẽ Pilippo hikia hũrũmtĩ hĩ ĩnõõnnõ.

32Baa agiil ꞌgaalacĩ ciee nĩngĩtĩ eheeddi ꞌBuuhaa cĩ Nyekuci aĩ,

“Baa anũĩ nẽẽ hĩ aꞌthẽẽtĩ ꞌcĩ õkõ etteeddi thõng.

Baa emmeethĩk nẽẽ hĩ mĩꞌnyõõn cĩ aꞌtheeto ꞌcĩ aꞌthudan tũhayyioohiti ĩma.

33Baa arannĩ eeta ĩnõõnnõ lokihooa hiittiõõ hõllõngaa ammũda thõõth ꞌcĩ abũnnaa.

Occa hatĩ aꞌnyak nẽẽ lõhõlĩ hutuno,

hatĩ aggammia rũgẽtĩ cĩnnẽẽnĩ?”#Tigiil ꞌBuuk cĩ Iꞌthaia 53:7-8

34Ma ho, ijin ꞌgaalacĩ Pilippo ĩĩnnĩk, “Duhaahaa dako ẽlẽ, nganĩ ꞌcĩ õthõõth põrõvẽtaacĩ ho, õthõõth ẽlẽ cĩnnĩ ẽmmẽn, hode eet umwa ꞌcĩ ꞌrĩĩng?” 35Nĩngĩtĩ iꞌthianaanĩ Pilippo aduhaakĩ ĩnõõnnõ thõõth cĩ ꞌbuuk cĩ Nyekuci nẽ ĩhĩkĩĩmanaak ĩnõõnnõ nyeemuut ꞌcĩ abũnnaa cĩ Yeesu.

36Ma baa nga ẽdẽcĩ nẽẽg ꞌgõõla, iita ummuddiaak nĩngĩtĩ õllõõdĩkĩ maama nẽ ĩĩ ꞌgaalacĩ, “Cĩĩn nõõ, maam ũgĩ cieegi. Ĩcca occa hõllõngaa haggami baattithimo?” 37Nĩngĩtĩ aĩnnĩ Pilippo, “Má elemmi ꞌthĩnĩtaa cunni vẽlẽk, occa ꞌthẽk aggami.” Ma ho, ẽdẽc ꞌgaalacĩ ĩĩ, “Helemi naa ngaatĩ ĩĩnnĩ Yeesu Krĩstõ Ngeertĩ Nyekuci.” 38Ma ho, uduhaak ꞌgaalacĩ eet ꞌcĩ aꞌthuhan ꞌgadiggadi hĩbĩl. Nĩngĩtĩ alluuccianĩ Pilippo hĩ ꞌgaalac nicci nẽ ikia aggameek nẽẽ ꞌgaalac baattithimo.

39Ma baa iꞌngothia nẽẽg maamĩ battaala, ikia ammanyanõõĩ Lorii cĩ Makayyiookto Pilippo noho matadaꞌnyak, hiittiõõ hõllõngaa adtuuha ꞌgaalacĩ tarĩ, nẽẽthĩ, baa accamanoothĩk ꞌgaalacĩ gẽrrẽẽt, nĩngĩtĩ õkõõĩ ꞌgõõla cĩnnĩ. 40Baa nẽẽ ikia edeeꞌnyia Pilippo uruta looccaa ꞌcĩ haĩ Athotu. Baa õyõyyõr nẽẽ ꞌtaaũnnioohĩ ꞌgõõlaa cĩ ꞌtaaũn cĩ Caetharea, allimaneek eet nyeemuut ꞌcĩ abũnnaa.

Currently Selected:

Dtiicanĩ cĩg ꞌThooyyiahu 8: did

Highlight

Copy

Compare