2 Korinthia 4

Baliinit ꞌcĩ aaĩ lohilihiliꞌnyanĩtõõ

1Nẽẽthĩ, hĩnĩngĩtĩ tamaati cĩ Nyekuci, hiita hidticatta naag dtiic cĩnnĩ, ĩnõõ ꞌcĩ hõllõngaa hũũnnĩka dtiic cĩnaang ko. 2Nẽẽthĩ hinnianĩ, haharreeka naag thooꞌthiok ꞌcĩg adĩman eeta burkiitina ꞌcĩg ĩĩn ngaaoni. Nẽ hõllõngaa hĩggõõlla eet umwa, hode hõllõngaa hũũhũyya thõõth cĩ Nyekuci. Ĩĩn Nyekuci hebereec cĩnaang ꞌcĩ aga ngaatĩ hõthõõꞌtha naag thõõth ꞌcĩ ĩĩn dĩdĩ. Haduhaanna naag thõõth ꞌcĩ ĩĩn dĩdĩ muumaa cĩ Nyekuci nẽ aga eeta vẽlẽk ꞌcĩg aduha thõõth ꞌcĩ ĩĩn dĩdĩ, thõõth icci. 3Nẽ má aguꞌthi nyeemuut cĩnaang ꞌcĩ abũnnaa ho, aguꞌthi hĩ eet ꞌcĩg arahanit diooni.

4ꞌThĩttaan ꞌcĩ aggam looc nicci. Nẽ ĩnõõnnõ ꞌcĩ adĩĩt ooti cĩg eet ꞌcĩg hõllõngaa aga lanyit ꞌcĩ ĩĩn bulẽẽnĩt cĩ nyeemuut ꞌcĩ abũnnaa cĩ Krĩstõ, ꞌcĩ ĩĩn ꞌthooura cĩ Nyekuci ho. 5Hõllõngaa hirrioonna naag thõõth cĩ eleeti cĩggaang, aĩ nyeemuut cĩnaang nẽẽ, ĩĩn Yeesu Krĩstõ Makayyioohit. Ĩꞌthõõanneet nẽẽ ngagĩĩt hiita hĩĩtta appahacaaꞌnya cugguung, hĩnĩngĩtĩ ĩnõõnnõ. 6Baa aduha Nyekuci aĩ, “Aꞌnyĩĩk lanyit haara muguratõõ.”#Tigiil ꞌBuuk cĩ ꞌThianaattõ 1:3 Nẽ ꞌyioko, aara lanyit cĩnnĩ ꞌthinneetinii cĩggaac, lanyit tĩho ꞌcĩ aaꞌnyeet hagaac hĩĩtõ, edeeꞌnyia bulẽẽnĩtĩ cĩnnĩ hĩ Yeesu Krĩstõ.

7Haattĩg naag hĩ lohilihilita ꞌcĩg itiangthiini baliiniti ciee ho. Aku ꞌtirriani ꞌcĩ ĩĩn dĩdĩ hĩ Nyekuc, hõllõngaa aku hĩ ngagĩĩta. 8Baa hummuddiaawa naag pĩĩrnanĩt ꞌgoolliohĩ vẽlẽk nẽ nga huduktoothĩha, tananga baa hõllõngaa hagayya naag ꞌgii ꞌcĩ hadticanna, nga hũtũngteeha naag dtiic cĩ Nyekuci. 9Ma haattĩg naag pĩĩrnatta, aaĩ Nyekuci hĩ ngagĩĩta, nẽ ma hẽttẽẽd looc, aalla hĩꞌngaathĩ ꞌjieena noho. 10Haꞌnyak naag hõdõõkõthĩ daahĩth cĩ Yeesu eleetinii cĩggaac, hátĩ hedeeꞌnyia rũgẽtĩ cĩnnĩ eleetinii cĩggaac. 11Hĩnĩngĩtĩ ngagĩĩt ꞌcĩg nga harũgĩ ho, haaꞌnyĩhoothĩk naag daahĩth, hĩnĩngĩtĩ ĩnõõnnõ, hátĩ hedeeꞌnyia rũgẽtĩ cĩnnĩ hĩ ngagĩĩta. 12Aĩ thõõth ciee nẽẽ, adticanni daahĩthĩ eleetinii cĩggaang nẽ idticanõõ rũgẽtĩ hĩ ngagiita.

13Aĩ ꞌBuuhi cĩ Nyekuci nẽẽ, “Baa helemi naa Nyekuc, ĩnõõ ꞌcĩ hõthõõthĩ naa ho.”#Tigiil ꞌBuuk cĩ Tegellwaanu 116:10 Nẽ haꞌnyak naag buúk lemiinit icci, hátĩ hothoothit, 14hĩnĩngĩtĩ haga naag haĩ, baa arũgtha Nyekuci Makayyioohit Yeesu daahĩtha. Arũgthanneet hatĩ Nyekuci ngagĩĩt buúk hĩ ngagiit daahĩtha, hĩ baa arũgtha nẽẽ Yeesu. Nẽ aꞌnyahaanneet hatĩ nẽẽ ngagĩĩt ngaatĩ aayyi nẽẽnĩ, hũrũmtĩ hõdẽĩ hĩ ĩnõõnnõ. 15Ĩĩn ciee vẽlẽk ꞌbaaninit cunuung, hátĩ hagaacõ eeta ꞌcĩg mẽẽlĩg gẽrrẽẽt bũnnai cĩ Nyekuci nẽ ĩdĩhĩthĩt ĩnõõnnõ tẽẽlꞌthĩta.

Lemiinit hĩ Makayyioohit

16Hõllõngaa haaꞌnyĩka naag ꞌthinneeti cĩggaang hupuppudit, tananga adaaknothi eleeti cĩggaang, aalla nẽẽ ittoori kõmĩĩthĩ cĩ ꞌthinneeti cĩggaang waathinnioohĩ vẽlẽk. 17Nẽ pĩĩrnanĩtĩ ciee haꞌnyak naag abadtẽc ko, ĩĩn ꞌcĩ akũmaneekeet ngagĩĩt, hátĩ hummuddia bulẽẽnĩt ꞌcĩ maka ꞌcĩ aalla ooo. 18Hẽlẽggĩ ꞌcĩg hacĩn naag thõng ko, ĩĩn hẽlẽggĩ ꞌcĩg hõllõngaa aalla ooo nẽ hẽlẽggĩ ꞌcĩg hõllõngaa hacĩn naaga, ĩĩn hẽlẽggĩ ꞌcĩg aalla ooo. Nẽ ꞌyioko hubbuuhit hẽbẽrĩ cĩggaac, hátĩ hĩcĩnĩt hẽlẽggĩ ꞌcĩg hõllõngaa edeeꞌnyia ho, hĩnĩngĩtĩ aalla hatĩ nẽẽg ooo.

Currently Selected:

2 Korinthia 4: did

Highlight

Copy

Compare