1 Tẽꞌthaloonika 5

Ũkũmattoothĩk, õbõda hatĩ Yeesu

1ꞌGotoonoga hĩ ngoonoga, ma ĩĩn kõr ꞌcĩ hatĩ õbõdaanĩ Makayyioohiti tarĩ, hõllõngaa occa adiim hẽhẽẽdakuung waraga thõng buúk, 2hĩnĩngĩtĩ agayyu niig buúk jurrung ainnu, adhukiaakeet hatĩ kõrra ꞌcĩ õbõdaanĩ Makayyioohiti hĩ gõõng anĩhaakeet igorriaahiti baal. 3Ma ammuk eeta aĩ, “Haattiyyia lõꞌngõõc ꞌlẽẽmĩtha,” adhukiaak hinnia hatĩ pĩĩrnanĩtĩ ꞌcĩ ĩꞌthaan ĩhõõggõ haau hĩ gõõng alubaak ngaa huciithi ꞌcĩ atturi ꞌgoonnia. Nẽ aitiõõ hatĩ nẽẽg hõllõngaa alĩĩta.

4Nẽ niig ꞌgotoonoga hĩ ngoonoga ꞌcĩg hõllõngaa aattiyyu muguratõõ ho, ma haaꞌnyiku kõr ꞌcĩ hatĩ õbõdaanĩ Yeesu ho, hukuleehuung ꞌjieen hĩ igorriaahiti ꞌcĩ aku baal. 5Iittu niig vẽlẽk lõhõlĩ cĩg lanyitaak nẽ iittu lõhõlĩ cĩg waathĩnaak nẽ hõllõngaa hĩĩgĩn naag cĩg baalinu hode cĩg muguurak. 6Nẽẽthĩ hoti ho, occa hõllõngaa hattumanni naag hoogin hĩ eeta ꞌcĩg oogin ko, hĩcĩttĩ nẽ haauto dĩkĩĩm huꞌthuutti eleeti. 7Nẽ eeta ꞌcĩg oogini, oogin baal nẽ eeta ꞌcĩg adũũtĩ, adũũtĩ baal. 8Nẽ naag eeta ꞌcĩg haattĩg lanyita ho, haꞌnyahit muhẽẽnĩt ꞌcĩ tẽllĩ nẽ eteiinneet hilib cĩ lemiitto hĩ cĩ mĩnnaanõ nẽ hitihimit naꞌngaala cĩ eliinit cĩnaac.

9Baa hõllõngaa ẽbẽranneet ngagĩĩt Nyekuci hatĩ huukeet lĩĩlĩẽẽttaa cĩnnĩ, baa adiim nẽẽ hiita hummuddia naag eliinit hĩ Makayyioohit cĩnaac Yeesu Krĩstõ. 10Baa adaahĩ nẽẽ, hĩnĩngĩtĩ ngagĩĩta, hátĩ hõõt hũrũmtĩ hĩ ĩnõõnnõ ũdũt, tananga nga harũgĩ hode hadaahito ẽlẽk. 11Nẽẽthĩ hoti ho, ũkũtanit ꞌgoonogu ngaatĩ eelonnu nyaagwaana, irrioottĩk, hátĩ hokomit ĩhõõggõ ꞌthinneeti, haau hĩcĩ ꞌthẽk adĩmannu ꞌyioko ho.

Ẽdẽcaak Paaulo ꞌrioon

12Hõlõ, halayyuung ꞌthinneeti cugguung, itingolli makayyiook cugguung ꞌcĩg ũũhayyuung nẽ idticattõõ gẽrrẽẽt hõrggẽẽnaa cunuung nẽ illimatteehuung ngagiit thõõth cĩ Makayyioohit Yeesu ho. 13Itingolli nẽ ĩmmĩnattu ĩhõõggõ gẽrrẽẽt, hĩnĩngĩtĩ dtiic ꞌcĩ adtican nẽẽg ko. Nẽ niig buúk hõrggẽẽnaa cunuung, aaut hĩ ꞌgoonogu lõꞌngõõc. 14Haduhaakuung thõõthaa ꞌcĩ õkõmĩ gẽrrẽẽt hõlõ, itilooc eet ꞌcĩg ĩĩn nyamuttiook hidticattõõ hĩ eeta vẽlẽk, uduktaak teelliak hokomit ꞌthinneeti, eelit pĩĩrnattiaak nẽ ĩdĩhattu thooꞌthiok hõrggẽẽnaa cunuung. 15Ĩcĩnĩt jurrung, ma haruhaannu oolo, ĩĩtõ tarbalĩg hĩ lemmiook hõdõõkõthĩ hĩ eet vẽlẽk.

16Accamattoothĩk hõdõõkõthĩ. 17Alayyio hõdõõkõthĩ. 18Ĩĩttĩk Nyekuc ĩlaallẽ hõdõõkõthĩ, hĩnĩngĩtĩ ꞌgõõl ꞌcĩ adiimmuung nẽẽ ngagiit aautti hĩ lemmiooha ho cieeni, niig eeta ꞌcĩg elemmu Yeesu Krĩstõ.

19Ma hadiittu Lori ꞌcĩ Ẽllẽẽmĩthĩ, 20ma habbeeku thooꞌthiok ꞌcĩg aduha põrõvẽtaaꞌnya cĩg Nyekuci õlõng, 21ĩttĩmanit hẽlẽggĩ vẽlẽk. Nẽ akatti hẽbẽrĩ thooꞌthiok iccig jurrung nẽ uꞌthuutti thõõth ꞌcĩ abũnnaa diooni. 22Ũtũbũrĩt thooꞌthiok vẽlẽk ꞌcĩg abathĩ.

Alaõõĩ Paaulo lemmiook

23Aꞌnyĩĩk Nyekuc cĩ ganõõnõ ꞌcĩ aaꞌnyeet ngagĩĩt vẽlẽk haaut lõꞌngõõc, haaꞌnyuung hĩĩtõ tẽllĩg loriẽẽta cugguung hĩ eleeti cugguung thooꞌthiohĩ vẽlẽk nẽ aaꞌnyuung ngagiit vẽlẽk aaut hiꞌthihi ꞌthẽccan umwa ũdũt, ĩꞌthõng hõbõda Makayyioohiti cĩnaac Yeesu Krĩstõ. 24Nẽ Nyekuci baa ẽbẽraannuung ngagiit ĩĩtõ lõhõlĩ cĩgĩnnĩg ko, aꞌnyak lemiinit dĩdĩ ꞌthĩnĩta nẽ adĩman ꞌthẽk hatĩ thõõth icci.

25Hõlõ, ꞌgotoonoga hĩ ngoonoga, alayyiooyyieetu niig buúk ngagĩĩta. 26Ĩꞌthaac ꞌgotoonogu hĩ ngoonogu nĩngaata vẽlẽk gẽrrẽẽt ũdũt ꞌthaaittaa cĩ mĩnnaanõ. 27Nẽ haduhaakuung naa ngagiit komiitta ꞌthaarĩĩ cĩg Makayyiookto, itigiillik waraga icci lemmiook vẽlẽk.

28Aꞌnyĩĩk bũnnai cĩ Makayyioohit cĩnaac Yeesu Krĩstõ haau hĩ ngagiit vẽlẽk.

Currently Selected:

1 Tẽꞌthaloonika 5: did

Highlight

Compare

Copy