نَوحہ 4
4
یروشلیِم کے کھنڈر
1سونا کَیسا بے آب ہو گیا! کُندن کَیسا بدل گیا!
مَقدِس کے پتّھر تمام گلی کُوچوں میں پڑے ہیں۔
2صِیُّون کے عزِیز فرزند جو خالِص سونے کی مانِند تھے
کَیسے کُمہار کے بنائے ہُوئے برتنوں کے برابر
ٹھہرے!
3گِیدڑ بھی اپنی چھاتِیوں سے اپنے بچّوں کو دُودھ
پِلاتے ہیں
لیکن میری دُخترِ قَوم بیابانی شُتر مُرغ کی مانِند
بے رحم ہے۔
4شِیر خوار کی زُبان پِیاس کے مارے تالُو سے جا لگی۔
بچّے روٹی مانگتے ہیں لیکن اُن کو کوئی نہیں دیتا۔
5جو ناز پروردہ تھے گلِیوں میں تباہ حال ہیں۔
جو بچپن سے ارغوان پوش تھے مزبلوں پر
پڑے ہیں
6کیونکہ میری دُخترِ قَوم کی بدکرداری سدُوؔم کے گُناہ
سے بڑھ کر ہے
جو ایک لمحہ میں برباد ہُؤا اور کِسی کے ہاتھ اُس پر دراز نہ
ہُوئے۔
7اُس کے شُرفا برف سے زِیادہ صاف اور دُودھ
سے سفید تھے۔
اُن کے بدن مُونگے سے زِیادہ سُرخ تھے۔ اُن
کی جھلک نِیلم کی سی تھی۔
8اب اُن کے چِہرے سِیاہی سے بھی کالے ہیں۔ وہ بازار میں پہچانے نہیں جاتے۔
اُن کا چمڑا ہڈِّیوں سے سٹا ہے۔ وہ سُوکھ کر لکڑی
ساہو گیا۔
9تلوار سے قتل ہونے والے بھُوکوں مَرنے والوں
سے بِہتر ہیں
کیونکہ یہ کھیت کا حاصِل نہ مِلنے سے کُڑھ کر ہلاک
ہوتے ہیں
10رحم دِل عَورتوں کے ہاتھوں نے اپنے بچّوں کو پکایا۔
میری دُخترِ قَوم کی تباہی میں وُہی اُن کی خُوراک
ہُوئے۔
11خُداوند نے اپنے غضب کو انجام دِیا۔ اُس نے اپنے
قہرِ شدِید کو نازِل کِیا۔
اور اُس نے صِیُّون میں آگ بھڑکائی جو اُس کی
بُنیاد کو چٹ کر گئی۔
12رُویِ زمِین کے بادشاہ اور دُنیا کے باشِندے باور
نہیں کرتے تھے
کہ مُخالِف اور دُشمن یروشلیِم کے پھاٹکوں سے
گُھس آئیں گے
13یہ اُس کے نبِیوں کے گُناہوں اور کاہِنوں کی بدکرداری
کی وجہ سے ہُؤا۔
جِنہوں نے اُس میں صادِقوں کا خُون بہایا۔
14وہ اندھوں کی طرح گلِیوں میں بھٹکتے اور خُون سے
آلُودہ ہوتے ہیں
اَیسا کہ کوئی اُن کے لِباس کو بھی چُھو نہیں سکتا۔
15وہ اُن کو پُکار کر کہتے تھے دُور رہو ناپاک! دُور رہو
دُور رہو! چُھونا مَت!
جب وہ بھاگ جاتے اور آوارہ پِھرتے تو لوگ
کہتے تھے اب یہ یہاں نہ رہیں گے
16خُداوند کے قہر نے اُن کو پراگندہ کِیا۔ اب وہ اُن
پر نظر نہیں کرے گا
اُنہوں نے کاہِنوں کی عِزّت نہ کی اور بزُرگوں
کا لِحاظ نہ کِیا۔
17ہماری آنکھیں باطِل مدد کے اِنتظار میں تھک گئِیں۔
ہم اُس قَوم کا اِنتظار کرتے رہے جو بچا نہیں سکتی تھی۔
18اُنہوں نے ہمارے پاؤں اَیسے باندھ رکھّے ہیں
کہ ہم باہر نہیں نِکل سکتے۔
ہمارا انجام نزدِیک ہے۔ ہمارے دِن پُورے
ہو گئے۔
ہمارا وقت آ پُہنچا۔
19ہم کو رگیدنے والے آسمان کے عُقابوں سے بھی
تیز ہیں۔
اُنہوں نے پہاڑوں پر ہمارا پِیچھا کِیا۔ وہ بیابان
میں ہماری گھات میں بَیٹھے۔
20ہماری زِندگی کا دَم خُداوند کا ممسُوح اُن کے گڑھوں
میں گرِفتار ہو گیا۔
جِس کی بابت ہم کہتے تھے کہ اُس کے سایہ تلے
ہم قَوموں کے درمِیان زِندگی بسر
کریں گے۔
21اَے دُخترِ ادُوم جو عُوض کی سرزمِین میں بستی ہے
خُوش و خُرّم ہو!
یہ پِیالہ تُجھ تک بھی پُہنچے گا۔ تُو مَست اور برہنہ ہو
جائے گی۔
22اَے دُخترِ صِیُّون تیری بدکرداری کی سزا تمام ہُوئی!
وہ تُجھے پِھر اسِیر کر کے نہیں لے جائے گا۔
اَے دُخترِ ادُوؔم وہ تیری بدکرداری کی سزا دے گا!
وہ تیرے گُناہ فاش کر دے گا۔
Currently Selected:
نَوحہ 4: URD
Highlight
Share
Copy
Want to have your highlights saved across all your devices? Sign up or sign in
Revised Urdu Holy Bible © Pakistan Bible Society, 1970, 2010.