Саалтыр 93
93
1Иэстэбил Таҥарата, Айыы Тойон,
иэстэбил Таҥарата, Бэйэҕин көрдөр!
2Туран, сир Судьуйата,
улуутумсуктары дьаныйтаа!
3Төһөөҥҥө диэри нэгэйдэр, Айыы Тойон,
төһөөҥҥө диэри нэгэйдэр өрөгөйдүүллэр?
4Баламат тыллары суккуйаллар;
куһаҕаны оҥорооччулар бары улуутумсуйаллар.
5Эн норуоккун күөмчүлүүллэр, Айыы Тойон,
Эн бас билэр дьоҥҥун баттыыллар-үктүүллэр.
6Огдообону, кэлии дьону өлөртүүллэр,
тулаайахтары өһөртүүллэр.
7«Айыы Тойон көрүө суоҕа,
Иаков Таҥарата билиэ суоҕа», – дииллэр.
8Оо, өйдөөҥ эһиги, дьон толкуйа суоҕа;
ньүдьү-балайдар, хаһан эһиги өйдөнөҕүт?
9Кини, кулгааҕы олордубут, истиэ суоҕа дуо?
Кини, хараҕы оҥорбут, көрүө суоҕа дуо?
10Кини, норуоттары өйдөтөөччү,
киһи аймахха билиини биэрээччи,
ама дьарыйыа суоҕа дуо?
11 Айыы Тойон киһи санаатын билэр,
билэр кини санаата тыал курдугун.
12Дьоллоох даҕаны, Айыы Тойон, Эн көннөрөр,
Сокуоҥҥар үөрэтэр киһиҥ!
13Хара дьайдаахтар ииннэрэ хаһыллыар диэри,
Эн киниэхэ ыарахан кэмҥэ уоскулаҥы биэрэҕин.
14 Айыы Тойон норуотун киэр анньыа суоҕа,
Бэйэтин бас билиитин хаалларыа суоҕа;
15көнө дьүүл кырдьыктаах дьоҥҥо төннүөҕэ,
көнө сүрэхтээх барыта кырдьык суолунан барыаҕа.
16Ким мин туспар хара дьайдаахтары утары охсуһуоҕай?
Ким мин туспар кэрээнэ суохтары утары туруоҕай?
17 Айыы Тойон миэхэ көмөлөспөтө эбитэ буоллар,
мин дууһам чуумпу дойдуга аттаммыта ыраатыа этэ.
18 Айыы Тойон, халтарыйан эрэбин диэм эрэ кэрэх,
Эн бигэ тапталыҥ миигин өйүүргэ тиэтэйэр.
19Сүрэҕим муҥа-таҥа элбээтэҕинэ,
Эн, дууһабын уоскутан, миигин үөрдэҕин.
20Хара дьайыҥнаах судьуйалар, сирэйдэрин сокуонунан саптан,
Эйигин биир куомуннаах оҥостуохтара дуо?
21Көнө киһини утары күргүөмүнэн тураннар,
кинилэр буруйа суоҕу өлөргө уураллар.
22Ол эрэн, Айыы Тойон – мин бигэ кириэппэһим,
Айыы Таҥарам – мин хорҕойор очуоһум.
23Кэрээнэ суох дьайыыларын Кини бэйэлэригэр эргитиэҕэ,
нэгэй быһыыларын иһин, бэйэлэрин эһиэҕэ,
Айыы Тойон Таҥарабыт кинилэри имири эһиэҕэ.
Currently Selected:
Саалтыр 93: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
