Саалтыр 82
82
1Ырыа. Асаф псалома.
2Айыы Таҥара, саҥата суох буолума;
хардарбакка хаалыма, Айыы Таҥара, уоскуйан уостума!
3Көр, ол өстөөхтөрүҥ хайдах өргөйбүттэрин,
Эйигин абааһы көрөөччүлэр төбөлөрүн өндөппүттэрин.
4Эн норуоккун утары уодаһыннаахтык куомуннаһаллар;
Эн араҥаччылыыр дьоҥҥун утары куомсуктаһаллар.
5«Бараммыт, норуот аатыттан аһарыаҕыҥ, – дэһэллэр. –
Израиль аата аны хаһан да ахтыллыбатын!»
6Биир санаанан киксэннэр,
Эйигин утары сөбүлэһии түһэрсибиттэр:
7Едом норуота, Измаиль дьоно,
Моав уонна агаряннар,
8Гевал, Аммон уонна Амалик,
Филистина уонна Тир олохтоохторо;
9Ассирия эмиэ, кинилэргэ холбоһон,
Лот уолаттарын тутаах күүстэринэн буолбут. Села
10Айыы Таҥара, Эн Мадиам дьонугар
уонна Сисаралаах Иавиҥҥа
Киссон үрүйэтин үрдүгэр хайдах сыһыаннаспыккыный да,
баларга эмиэ соннук сыһыаннас;
11олор, Аендорга сууһарыллан,
сир уоҕурдуута буолбуттара.
12Эн балар кинээстэригэр, Оривка уонна Зивка курдук,
баһылыктарыгар, Зевейдээх Салмаҥҥа курдук сыһыаннас;
13олор эмиэ тыыннаахтарыгар:
«Баран, Таҥара сирин-уотун былдьааммыт,
бэйэбит бас билиэҕиҥ», – дииллэрэ.
14Айыы Таҥарам, Эн кинилэри буор холорук оҥортоо,
соломо гынан, тыалга ыһаттаа.
15Уот ойууру сииринии,
төлөн хайаны хаарыйарыныы,
16буркуҥҥунан кинилэри сойуолаа,
холоруккунан уолуталаа.
17Эн ааккын билинэллэрин туһугар, Айыы Тойон,
кинилэри сир-буор сирэйдээ.
18Саакка баран, үйэлэр тухары кутталтан көммөтүннэр,
ааттара-суоллара баранан өллүннэр.
19Биллиннэр кинилэр: Эн эрэ бааргын
Айыы Тойон диэн ааттаах,
бүтүн сир үрдүнэн турар Үрдүктэн Үрдүк.
Currently Selected:
Саалтыр 82: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
