Саалтыр 67
67
1Хуор салайааччытыгар. Давид псалома. Ырыа.
2Туран кэлиэхтин Таҥара, үрүө-тараа бардыннар Кини өстөөхтөрө;
киэр куоттуннар Киниттэн бары Кинини абааһы көрөөччүлэр.
3Буруо симэлийэринии, Эн кинилэри симэлит;
буоска уот суоһуттан уулларыныы,
хара дьайдаахтар Таҥара суоһуттан өллүннэр.
4Оттон кырдьыксыттар үөрдүннэр;
кинилэр өрөгөйдөрө Таҥара иннигэр үрдээтин,
үөрэллэрэ-көтөллөрө үксээтин.
5Ыллааҥ Таҥараҕа, ыллааҥ Кини аатыгар;
ырыанан айхаллааҥ былытынан Айаннааччыны –
Кини аата Айыы Тойон диэн – үөрүҥ Кини иннигэр.
6Тулаайахтар аҕалара, огдооболор судьуйалара –
Таҥара Бэйэтин сибэтиэй Дьиэтигэр баар.
7Таҥара аҥаардастары ыал оҥорор,
хаайыылаахтары байылыат олоххо таһаарар#67:7 Эбэтэр: хандалыттан босхолуур. ;
оттон бас бэриммэттэр кураайы дуолга хаалаллар.
8Айыы Таҥара, Эн норуотуҥ иннигэр түһэн барбыккар,
кураайы дуолу уҥуордаабыккар, Села
9сир титирэстээбитэ, халлаан ууллан тохтубута –
Таҥара, Синай Таҥаратын, иннигэр,
Таҥара, Израиль Таҥаратын, иннигэр.
10Айыы Таҥара, Эн дэлэй ардаҕы түһэрэриҥ
уоҕа тахсыбыт сиргэр,
Эн Бэйэҥ кинини тилиннэрэриҥ.
11Онно Эн норуотуҥ олохсуйбута;
оо, Таҥара, Эн үтүө санааҕыттан
дьадаҥылар кыһалҕаларын толуйбутуҥ.
12Айыы Тойон илдьит ыыппыта,
ону, кыайыы сураҕын, элбэх дьахтар иһитиннэрбитэ:
13-14«Ыраахтааҕылар сэриилэрин кытта куоттулар, куоттулар!»
Төһө да сүөһүлэрин далыттан ырааппаталлар,
дьахталлар дьиэ-дьиэ аайы сэрии булдун –
үрүҥ көмүһүнэн бүрүллүбүт кынаттаах,
солотуулаах куорсуннаах холууптары үллэстэллэр.
15Күүстээхтэн Күүстээх онно ыраахтааҕылары үрэйбитигэр,
Селмон хайата, хаар түспүтүнүү, кылбайбыта.
16Таҥара хайата, Васан хайата,
элбэх өргөстөөх Васан хайата!
17Тоҕо эһиги ордугургуу көрөҕүт, элбэх өргөстөөх хайалар,
Таҥара олохсуйуон баҕарар хайатын,
Айыы Тойон үйэлэр тухары олорор хайатын?
18Таҥара колесницата үтүмэн үгүс,
сүүһүнэн тыһыынча; олор ортолоругар
Айыы Тойон Синайга сибэтиэй Дьиэтигэр баар.
19Эн үөһэ тахсаргар,
билиэн ылбыттаргын батыһыннаран барбытыҥ;
итиэннэ, Айыы Тойон Таҥара онно олорорун туһугар,
дьонтон, утарыласпыттартан кытта, бэлэх-туһах ылбытыҥ.
20Алгыс буоллун Айыы Тойоҥҥо!
Кини күнтэн күн биһиги сүгэһэрбитин сүгэр;
Айыы Таҥара – биһиги Быыһааччыбыт. Села
21Биһиги Таҥарабыт – быыһабыллаах Таҥара;
Таҥара # 67:21 Таҥара Эргэ Кэс Тылга суруллубут «Яхве», ол аата «Кини баар» эбэтэр «Кини олоҕу биэрэр» диэн суолталаах ытык аата бу тылбааска улахан буукубаларынан бэриллэр. Айыы Тойон, өлүү айаҕыттан өрүһүйэр былаастаах.
22Ол эрэн Таҥара тобулу охсуоҕа өстөөхтөрүн оройдорун,
аньыыга-хараҕа ылларбыттар арбаҕар бастарын.
23Айыы Тойон эппитэ:
«Мин кинилэри Васантан төттөрү аҕалыам,
муора түгэҕиттэн таһаарыам,
24оччоҕо эн кинилэр хааннарын кэһиэҕиҥ,
ыттарыҥ эмиэ бэйэлэрин өлүүлэригэр тиксиэхтэрэ».
25Айыы Таҥара, ким барыта көрөр Эйигин –
Эн, мин Таҥарам, Ыраахтааҕым,
сибэтиэй Дьиэҕэр киирэр өрөгөйдөөх хаамыыгын.
26Инники ырыаһыттар иһэллэр,
кинилэр кэннилэриттэн – музыканнар,
ортолоругар тимпаннаах кыргыттар бааллар.
27«Улуу түмсүүгэ алҕааҥ Таҥараны, Айыы Тойону,
Израиль тымыр-сыдьааннара!»
28Бастакынан Вениамин, саамай балыстара, иһэр,
онтон Иуда кинээстэрэ бөлөхтөһөн иһэллэр;
Завулон кинээстэрэ, Неффалим кинээстэрэ эмиэ бааллар.
29Таҥараҥ эйигин күүстээх буолар аналлаабыта.
Биһиэхэ урут көрдөрөрүҥ курдук, Айыы Таҥара,
билигин эмиэ күүскүн көрдөр.
30Иерусалимҥа баар Храмыҥ туһугар,
ыраахтааҕылар Эйиэхэ бэлэхтэрин аҕалыахтара.
31Сыһыт тростникка бүгэн сытар дьиикэй кыыллары,
ньирэй норуоттар ортолоругар баар оҕус үөрүн;
илдьи тэбис түһээн хомуйуохтарын баҕарааччылары,
уҥа-хаҥас ыһаттаа сэриинэн суудайар норуоттары.
32Оччоҕо Египеттэн илдьиттэр кэлиэхтэрэ,
Эфиопия Таҥараҕа икки илиитин уунуоҕа.
33Сир саарыстыбалара, ыллааҥ Таҥараҕа,
ырыанан айхаллааҥ Айыы Тойону, Села
34халлааннар устун, былыргы халлааннар устун айаннааччыны.
Истиҥ, Кини куолаһа, Кини күүстээх куолаһа ньиргийэр!
35Айхаллааҥ Таҥара албан аатын.
Кини Израиль үрдүнэн улуу былаастаах,
Кини халлааннар үрдүлэринэн модун кыахтаах.
36Дьулаан да буоллаҕа Таҥара Бэйэтин сибэтиэй Дьиэтигэр!
Кини, Израиль Таҥарата, норуотун бөҕөргөтөр,
киниэхэ күүс-уох киллэрэр.
Алгыс буоллун Таҥараҕа.
Currently Selected:
Саалтыр 67: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
