Саалтыр 64
64
1Хуор салайааччытыгар. Давид псалома. Ырыа.
2Айхал ырыа Эйиэхэ ылланыахтаах,
Айыы Таҥара, Сион хайатын үрдүгэр;
Эйиэхэ бэриллибит андаҕар туолуохтаах.
3Оо, киһи үҥэрин-көрдөһөрүн Истээччи!
Ким барыта Эйиэхэ кэлиэҕэ.
4Аньыылаах-харалаах дьайыыларбыт
ыар сүгэһэрдии биһиэхэ ыйаннахтарына,
Эн буруйбутун бырастыы гынаҕын.
5Эн, тиэргэҥҥэр олордоору талан ылан,
Бэйэҕэр чугаһаппыт дьонуҥ дьоллоохтор.
Эн Дьиэҥ, сибэтиэй Храмыҥ, илгэтэ
биһигини дуоһутуоҕа.
6Айыы Таҥара Быыһааччыбыт, Эн кырдьыктаах буолаҥҥын,
сөҕүмэр дьайыыларынан биһиэхэ хардараҕын;
Эн сир бары уһуктарын,
ыраах муоралар эрэллэрэ буолаҕын.
7Эн модун кыаххынан хайалары туруорбуккун,
күүһүнэн-уоҕунан таһымныы туолбуккун.
8Муоралар ньиргиэрдэрин, барылас баалларын,
норуоттар аймалҕаннарын Эн намыратаҕын.
9Эн дьикти бэлиэлэри көрдөрөҥҥүн,
сир уһугар тиийэ дьулайаллар;
илинтэн арҕааҥҥа диэри сөхтөрөҥҥүн,
бэркиһээн саҥа аллайаллар.
10Сири көрөн-истэн, Эн кини утаҕын ханнараҕын,
өҥсүтэн биэрэҕин, балысханнык байытаҕын.
Таҥара өрүһэ толору уулаах.
Эн дьоҥҥо бурдугу биэрээри,
сирдэрин бэлэмниигин:
11сухатын суолун уунан угуттуугун,
оллурун-боллурун дэхсилиигин,
самыыры түһэрэн сымнатаҕын,
бурдугун үүнүүтүн алгыыгын.
12Уйгу-быйаҥынан дьылы маанылыыгын;
Эн айаннаабыт суолгуттан арыы-сыа аллар.
13Кураайы мэччирэҥнэр чээл күөх кырыстаналлар,
кэрискэ томтордор үөрүүнэн туолаллар.
14Хонууга барааннар мэччийэллэр,
хочолор бурдугунан симэнэллэр.
Туох барыта үөрэн, саҥа аллайар,
туох барыта бииргэ ыллыыр-туойар.
Currently Selected:
Саалтыр 64: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
