Саалтыр 50
50
1Хуор салайааччытыгар. Давид псалома, 2Вирсавиялыын көссүүлэспитин кэннэ, Давидка Нафан пророк кэлэ сылдьыбытыгар.
3Абыраа миигин, Айыы Таҥара, улуу амарах санааҕыттан,
үтүмэн үтүөҕүнэн суох оҥор мин буруйбун-сэмэбин.
4Элбэх төгүл сууйан, хара дьайыыбын ыыт,
аньыыбыттан миигин ырааһырт.
5Буруйу-сэмэни оҥорбуппун мин билэбин,
аньыыбын-харабын өрүү өйдүү сылдьабын.
6Эйигин, соҕотох Эйигин утары мин аньыыны оҥордум,
Эн иннигэр уодаһыннаахтык быһыыланным,
онон Эн уурааҕыҥ сөптөөх, Эн дьүүлүҥ ыраас.
7Мин үөскүөхпүттэн мөкү быһыылаахпын,
ийэттэн төрүү аньыылаахпын.
8Эн киһи ис сүрэҕиттэн кырдьыктаах буоларыгар баҕараҕын,
ол иһин мин дууһабын Бэйэҥ муудараскынан сырдатаҕын.
9Иссоп угунан миигин ыһыахтаа, оччоҕо мин ырааһырыам;
миигин сууй, оччоҕо хаардааҕар маҥхайыам.
10Миэхэ үөрүүнү, көрү-нары иһитиннэр,
оччоҕо, төһө да Эн миигин самнарбытыҥ иһин,
мин үөрүөм-көтүөм этэ.
11Мин аньыыбын-харабын көрүмэ,
буруйбун-сэмэбин барытын суох оҥор.
12Ыраас сүрэхтэ миэхэ ай, Айыы Таҥара,
ис тыыммын саҥардан, кырдьыктаах оҥор.
13Миигин Бэйэҕиттэн киэр анньыма,
Сибэтиэй Тыыҥҥын миигиттэн былдьаама.
14Быыһабылыҥ үөрүүтүн миэхэ төнүннэр,
Баһылыыр Тыыҥҥынан миигин бөҕөргөт.
15 Сокуона суохтары Эн суолгар мин үөрэтиэм,
оччоҕо аньыылаахтар Эйиэхэ эргиллиэхтэрэ.
16Быыһаа хааны тохпут аньыыбыттан, Айыы Таҥара,
миигин быыһыыр Таҥарам,
оччоҕо Эн кырдьыккын мин айхаллыам.
17Айыы Тойон, уоспун өһүл,
мин Эйиэхэ уруй-айхал тылын этиэм;
18Эйиэхэ сиэртибэ биэриэм этэ да, ону Эн баҕарбаккын,
бүтүннүү уматыллар бэримньини ахсарбаккын.
19Таҥара ылынар сиэртибэтэ – аньыытын кэлэнэр сүрэх;
аньыытын кэлэнэр сымнаҕас сүрэҕи
Эн киэр анньыаҥ суоҕа, Айыы Таҥара.
20Үтүө санааҕыттан Сиоҥҥа амарахтык сыһыаннас,
Иерусалим эркинин чөлүгэр түһэр.
21Оччоҕо үөрүөҕүҥ Эн сиэрдээх сиэртибэттэн,
уматан бэриллэр бэлэхтэн-туһахтан,
бүтүннүү уматыллар бэримньиттэн;
оччоҕо Эн сиэртибэнньиккэр кунаннары ууруохтара.
Currently Selected:
Саалтыр 50: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
