Саалтыр 46
46
1Хуор салайааччытыгар. Корей уолаттарын псалома.
2Ытыскытын таһыныҥ, норуоттар бука бары,
ыллаан дуораһытыҥ Таҥараҕа үөрүүлээх ырыалары.
3 Айыы Тойон, Үрдүктэн Үрдүк, дьулаан даҕаны!
Кини бүтүн сир үрдүнэн сүдү Ыраахтааҕы.
4Кини биһиэхэ норуоттары бас бэриннэрбитэ,
омуктары атахпыт анныгар самнарбыта.
5Кини биһиэхэ бас билэр өлбүгэ сирбитин,
таптыыр Иаковын киэн туттуутун, талан биэрбитэ. Села
6Уруй-айхал ортотугар Таҥара үөһэ таҕыста,
турба тыаһын ортотугар Айыы Тойон үөһэ таҕыста.
7Ыллааҥ Айыы Таҥараҕа, ыллааҥ,
ыллааҥ Ыраахтааҕыбытыгар, ыллааҥ.
8Айыы Таҥара – сир бүттүүнүн Ыраахтааҕыта;
айхал ыллааҥ бары Киниэхэ псалому кытта.
9Таҥара – норуоттары салайар Ыраахтааҕы;
Таҥара сибэтиэй бүрүстүөлүгэр олорор.
10Омуктар кинээстэрэ түмсэллэр
Авраам Таҥаратын норуотугар.
Сир күүстээхтэрэ Таҥараҕа бас бэринэллэр;
Кини кимнээҕэр да үөһэ турар.
Currently Selected:
Саалтыр 46: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
