Саалтыр 144
144
1Давид айхал ырыата.
Уруйдуом Эйигин, Айыы Таҥарам, Ыраахтааҕым,
Эн ааккын алгыам үйэттэн үйэлэр тухары.
2Күнтэн күн Эйигин мин алгыам,
үйэттэн үйэҕэ Эн ааккын айхаллыам.
3 Айыы Тойон улуу, онон улуу уруй Киниэхэ тосхоллоох.
Кини сүдү Бэйэтэ муҥурун булларбат.
4Көлүөнэттэн көлүөнэҕэ Эн дьайыыларгын айхаллыахтара,
Эн модун кыаххын иһитиннэрэр буолуохтара.
5Эн сүдү Бэйэлээх үрдүк килбиэҥҥин,
сөҕүмэр дьайыыларгын мин анаарыам.
6Эн дьулаан дьайыыларыҥ күүһүн кэпсиэхтэрэ,
мин эмиэ Эн сүдүгүн иһитиннэриэм.
7Эн улуу үтүө санаалааххын ахтыһар буолуохтара,
Эн кырдьыктааххын туойуохтара.
8 Айыы Тойон аһыныгас сүрэхтээх, амарах санаалаах,
Кини улуу тулуурдаах, муҥура биллибэт бигэ тапталлаах.
9 Айыы Тойон кимиэхэ баҕарар үтүө сыһыаннаах,
Кини амарах санаата айбытыгар барытыгар туһааннаах.
10Айбытыҥ барыта, Айыы Тойон, Эйигин айхаллыаҕа,
сибэтиэй дьонуҥ барыта Эйигин алгыаҕа.
11Эн Саарыстыбаҥ килбиэнин кинилэр иһитиннэриэхтэрэ,
Эн модун кыаххын кэпсиэхтэрэ,
12оччоҕо ким барыта билиэҕэ Эн күүстээх дьайыыгын,
Эн Саарыстыбаҥ килбиэннээх сырдыгын.
13Үйэттэн үйэҕэ туругурар Эн Саарыстыбаҥ,
көлүөнэттэн көлүөнэҕэ барар Эн баһылааһыныҥ#144:13 Бу кэнниттэн Септуагинтаҕа уонна славянскай тиэкистэргэ өссө маннык кэрчик кэлэр: Айыы Тойон эппит тылыгар барытыгар бэриниилээх, бары дьайыытыгар барытыгар сибэтиэй. .
14 Айыы Тойон охтон эрэри барытын өйүүр,
бүк түспүтү барытын өрө тардар.
15Харахтаах эрэ барыта Эйигин эрэнэ кэтиир,
Эн кинилэр аһылыктарын кэмигэр биэрэҕин.
16Дэлгэм ытыскын аһаҥҥын,
хас биирдии харамай баҕатын ханнараҕын.
17 Айыы Тойон бары суолугар кырдьыктаах,
бары дьайыытыгар үтүө санаалаах.
18 Айыы Тойон Кинини ыҥырааччыга барытыгар чугас –
дьиҥ кырдьыгынан ыҥырааччыга бука барытыгар.
19Киниттэн куттанааччылар баҕаларын Кини толорор,
көмө көрдүүр саҥаларын истэн, кинилэри өрүһүйэр.
20 Айыы Тойон Кинини таптыыр дьону араҥаччылыыр,
оттон нэгэйдэри барыларын имири эһиэҕэ.
21 Айыы Тойону мин айхаллыаҕым;
тыынар тыыннаах барыта үйэттэн үйэҕэ
Кини сибэтиэй аатыгар алгыс этиэҕэ.
Currently Selected:
Саалтыр 144: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
