Саалтыр 117
117
1Айхаллааҥ Айыы Тойону үтүө санаалааҕын иһин;
Кини бигэ таптала – үйэлэр тухары.
2Этиэхтин Израиль:
«Кини бигэ таптала – үйэлэр тухары».
3Этиэхтин Аарон дьиэтэ:
«Кини бигэ таптала – үйэлэр тухары».
4Этиэхтиннэр Айыы Тойонтон куттанааччылар:
«Кини бигэ таптала – үйэлэр тухары».
5Кыһарҕаҥҥа түбэһэн Айыы Тойону ыҥырбыппар,
Айыы Тойон миигин истэн, киэҥ дуолга таһаарда.
6 Айыы Тойон мин диэки, онон куттаммаппын:
муҥур үйэлээх миэхэ тугу оҥоруой?
7 Айыы Тойон мин диэки, Кини миэхэ көмөлөһөр;
миигин абааһы көрөөччүлэри мин өрөгөйдүү көрүөҕүм.
8Киһиэхэ эрэниэхтээҕэр
Айыы Тойоҥҥо эрэммит быдан ордук.
9Кинээстэргэ эрэниэхтээҕэр
Айыы Тойоҥҥо эрэммит быдан ордук.
10Бары норуоттар миигин иилээбиттэрэ эрээри,
Айыы Тойон аатынан мин кинилэри самнардым!
11Тула өттүбүттэн төгүрүйэн туран ыкпыттара эрээри,
Айыы Тойон аатынан мин кинилэри самнардым!
12Ыҥырыа үөрэ буолан тулалаабыттара эрээри,
хагдаҥ оттуу күлүм эрэ гынан хааллылар;
Айыы Тойон аатынан мин кинилэри самнардым!
13Күүскэ үтүрүйэннэр, сүһүөхпүн сүтэрэн эрдэхпинэ,
Айыы Тойон миэхэ көмөлөстө.
14 Айыы Тойон – мин күүһүм-тирэҕим, мин ырыам,
Кини миигин быыһаан ылла.
15Кырдьыктаах дьон отууларыттан
кыайыы үөрүүлээх ырыата ньиргийэр:
«Айыы Тойон уҥа илиитэ улуу дьайыылары оҥорор.
16 Айыы Тойон уҥа илиитин өрө көтөхпүт;
Айыы Тойон уҥа илиитэ улуу дьайыылары оҥорор».
17Мин өлүөм суоҕа, тыыннаах хаалыаҕым,
Айыы Тойон дьайыыларын иһитиннэриэҕим.
18 Айыы Тойон миигин кытаанахтык дьарыйда эрээри,
өлөр өлүүгэ туран биэрбэтэ.
19 Айыы Тойону айхаллыы киириэхпин,
кырдьык аанын миэхэ аһан биэриҥ.
20Бу – Айыы Тойон олбуорун аана,
кырдьыктаах дьон манан киириэҕэ.
21Айхал этэбин Эйиэхэ, миигин истибитиҥ иһин,
миигин быыһаан ылбытыҥ иһин.
22Тутааччылар сирэн бырахпыт таастара
муннук тутаах тааһа буолла.
23Бу – Айыы Тойон оҥоһуута,
биһиги маны көрө сөҕөбүт.
24Бу – Айыы Тойон айбыт күнэ,
үөрүөҕүҥ, өрөгөйдүөҕүҥ бу күҥҥэ.
25Оо, Айыы Тойон, быыһаа!
Оо, Айыы Тойон, ситиһиитэ бэлэхтээ!
26 Айыы Тойон аатыгар кэлээччи – алгыстаах.
Айыы Тойон Дьиэтиттэн биһиги эһигини алгыыбыт.
27 Айыы Тойон – Таҥара,
Кини биһигини сырдыгынан сыдьаайда;
быалааҥ бырааһынньык сиэртибэтин,
сиэртибэнньик муоһугар сиэтэн илдьиҥ.
28Эн буолаҕын мин Таҥарам: Эйигин мин айхаллыам;
Эн буолаҕын мин Таҥарам: Эйигин мин уруйдуом.
29Айхаллааҥ Айыы Тойону үтүө санаалааҕын иһин;
Кини бигэ таптала – үйэлэр тухары.
Currently Selected:
Саалтыр 117: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
